ဖနိဒါ | တနင်္လာနေ့၊ ဧပြီလ ၀၁ ရက် ၂၀၁၃ ခုနှစ်
ကယားပြည်နယ်၊ ဖရူဆိုးမြို့နယ်တွင် အမှတ် (၁၄) တန်းမြင့် စစ်လေ့ကျင့်ရေးကျောင်း တည်ဆောက်ရန်အတွက် အစိုးရစစ်တပ်မှ သိမ်းယူထားသော မြေယာများအား တောင်သူများကပြန်လည်ရလို ကြောင်း တောင်သူလယ်သမား ကော်မတီက တောင်းဆိုလိုက်ကြသည်။
၂၀၁၁ ခုနှစ်ဆန်းပိုင်းက သိမ်းယူထားသော လယ်မြေဧက ၂,၇၀၀ အား မူလပိုင်ရှင် တောင်သူ လယ်သမား ၁,၇၀၀ ကျော်က ပြန်လည် ရလိုကြောင်း ခိုလျှေဆို တောင်သူလယ်သမား ကော်မတီ တာဝန်ခံ ခူးသဲရယ် က ပြောသည်။
“ဒေသခံ တောင်သူတွေက ဒီမြေကိုဘဲ လိုချင်တယ်။ အရင်တခေါက် ယူလိုက်တဲ့ တန်ဖိုးကလည်းတောင်သူတွေ အတွက်ဘာမှ စားဝတ်နေရေး ဖိုလုံမှုပေးတဲ့ အနေအထားမရှိတဲ့အတွက် ကျနော်တို့မြေပဲ လိုချင်တယ်ဆိုပြီးတော့ အစိုးရကို အကြောင်းကြားလိုက်တယ်” ဟု မဇ္စျိမကို ပြောသည်။
၂၀၁၂ ခုနှစ်၊ ဇူလိုင်လက လယ်ဧက ၆၈၀ ကျော်အတွက် တဧကလျှင် ၅ သောင်းနှုန်းဖြင့် တောင်သူများကိုလျော်ကြေးပေးခဲ့သော်လည်း ကျန်ဧကများအတွက် လျော်ကြေး မရသေးပေ။
ထိုနှစ် ဒီဇင်ဘာလအတွင်းက ပြည်နယ်ဝန်ကြီးများနှင့် ခရိုင်မှူးများက ကျန်မြေများထဲမှ ဧက ၆၈၀ကျော်အတွက် တဧကလျှင် ၁ သိန်းခွဲဖြင့် လျော်ကြေးပေးမည်ဟု ပြောဆိုလာသော်လည်း တောင်သူများက ၎င်းတို့၏ မြေယာကိုသာ ပြန်လည်ရယူလိုကြသည်ဟု ခူးသဲရယ်က ပြောသည်။
၎င်းမြေယာများသည် မာခရောရှေ့နှင့် မြို့မကျေးရွာအုပ်စု နှစ်ခုမှ မာခရောရှေ့၊ လောဂျာ၊ လောခူးခို၊ဒေါလောခူ၊ ခိုရာခို၊ ဒေါဒထုန်း ကျေးရွာများမှ ဒေသခံတောင်သူများ ပိုင်ဆိုင်ပြီး အဓိကအားဖြင့် စပါး၊ မြေပဲ၊ ပြောင်း စသည့် သီးနှံ့များ စိုက်ပျိုးကြသည်ဟု ဆိုသည်။
ဧပြီလ ၁ ရက်နေ့တွင် လွိုင်ကော်မြို့၌ တောင်သူ ၅၀၀ က ဆန္ဒပြရန် ကယားပြည်နယ်ရုံးသို့ မတ်လ ၂၂ ရက်နေ့က စာတင်ခဲ့သော်လည်း မြို့နယ် ရဲတပ်ဖွဲ့မှူးက ခွင့်ပြုချက် မပေးခဲ့ကြောင်း ခူးသဲရယ်က ပြောသည်။
ထို့ကြောင့် ခိုလျှေဆို တောင်သူလယ်သမားကော်မတီမှ ဦးဆောင်၍ မာခရောရှေ့ ကျေးရွာ အုပ်စုတွင် ယမန်နေ့က ဒေသခံများ၏ ဆန္ဒမဲပေးပွဲ ပြုလုပ်ခဲ့သည်။ အသက် ၁၈ နှစ် ပြည့်ပြီးသူ ဒေသခံ လူဦးရေ ၅၆၄ ဦး လာရောက် မဲပေးသည့်ထဲမှ ၅၀၉ ဦးက စစ်လေ့ကျင့်ရေးကျောင်း တည်ဆောက်နေခြင်းအပေါ် ကန့်ကွက်မဲ ပေးခဲ့သည်ဟု ထိုကော်မတီက ထုတ်ပြန်ခဲ့သည်။
သိမ်းယူထားသော မြေယာများ ပြန်လည် ရရှိရန်နှင့် တည်ဆောက်ပြီးစီးပြီးသော စစ်လေ့ကျင့်ရေးကျောင်း အဆောက်အအုံများကို လူထုအကျိုးပြုသော အခြားလုပ်ငန်းများနှင့် အစားထိုး အသုံးပြုရန်တို့ ထုတ်ပြန်ချက်တွင် ထည့်သွင်းဖော်ပြထားသည်။
“ကျနော်တို့က လူထုက ကန့်ကွက်တယ်။ အလိုမရှိဘူးဆိုတဲ့ အဖြေလည်း အတိအကျ ရခဲ့ပြီဆိုတော့ ဆက်လက်ပြီး သမ္မတဆီမှာရော၊ ပြည်နယ်ဝန်ကြီးချုပ်မှာရော ကန့်ကွက်စာ၊ တောင်းဆိုချက်တွေ စာတင်မယ်။ နောက် ကျနော်တို့ စာတင်ထားတဲ့ စီတန်း လှည့်လည်ဖို့ကိုလည်း ဆက်လက် အယူခံဝင်ပြီးဆောင်ရွက်သွားဖို့ရှိပါတယ်” ဟု ခူးသဲရယ်က ပြောသည်။
ခိုလျှေဆို တောင်သူလယ်သမား ကော်မတီမှာ ဒေသခံ ပြည်သူများအပေါ် လူ့အခွင့်အရေး ချိုးဖောက်မှုနှင့် ပတ်သက်၍ အကာအကွယ်ပေးနိုင်ရန် ရည်ရွယ်၍ ၂၀၁၂ ခုနှစ် သြဂုတ်လက ဖွဲ့စည်းခဲ့သည်ဟု သိရသည်။
လူမှုရေးလုပ်ငန်းများတွင် ပါဝင်လှုပ်ရှားနေသော ပုဂ္ဂိုလ်များ၊ ကျေးရွာအတွင်း သြဇာရှိသော ပုဂ္ဂိုလ်များ အပါအဝင် ၁၇ ဦးဖြင့် စတင်ဖွဲ့စည်းခဲ့ပြီး စစ်လေ့ကျင့်ရေးကျောင်း၏ အရှေ့ဘက်ရှိ ဘိုးဘွားစဉ်ဆက်
ခေါ်ဝေါ်ခဲ့သော ခိုလျှေဆိုတောင်၏ အမည်အား အစွဲပြု၍ အမည်ပေးထားခြင်း ဖြစ်သည်ဟု သိရသည်။
No comments:
Post a Comment