KIO နှင့် အစိုးရ တွေ့ဆုံဆွေးနွေးပွဲတွင် ယုံကြည်မှု ပြန်လည်တည်ဆောက်ရန်လိုဟု ဆို

နန်းလွင်နှင်းပွင့်

KIO (ကချင်လွတ်လပ်ရေးအဖွဲ့)နှင့် နိုင်ငံရေးဆွေးနွေးမှုအဆင့်များ မြင့်တက်လာစေရန် KIO နှင့် ပြည်ထောင်စု ငြိမ်းချမ်းရေးဖော်ဆောင်ရေးအဖွဲ့တို့ အောက်တိုဘာလ ၈ ရက်မှ ၁၀ ရက်အထိ ပြုလုပ်မည့် ဆွေးနွေးပွဲတွင် ယုံကြည်မှု ပြန်လည်တည်ဆောက်ရန် လိုအပ်သည်ဟု ကချင်ငြိမ်းချမ်းရေးကွန်ယက်မှ ဒေါ်ခွန်ဂျာက မဇ္ဈိမကိုပြောသည်။

“ကချင်မှာက လက်မှတ်ရေးပြီး ပြန်တိုက်တာပဲ၊ အခုအခြေအနေမှာဆိုရင် သူတို့ဘက်က စစ်တပ်တွေ လာချထား တယ်၊ တပ်အင်အားတွေအများကြီး ထပ်တိုးချထားတာ ရှိတယ်။ တကယ်နိုင်ငံရေး ဆွေးနွေးပွဲကို ယုံကြည်မှု အပြည့်နဲ့ ဆွေးနွေးချင်တယ်ဆိုရင် ဒီတပ်တွေကို ဖယ်ရှားသင့်တယ်။ ကျွန်မတို့လည်း ယုံကြည်မှုအပြည့်ရှိတဲ့ ငြိမ်းချမ်းရေးကို သေလောက်အောင် လိုချင်တယ်”ဟု ဒေါ်ခွန်ဂျာက ပြောသည်။

ဒေါ်ခွန်ဂျာက ဆက်လက်၍ “နောက်တစ်ခုက ကောလာဟာလာတွေက နှစ်ဖက်လုံးကို ကင်းကွာအောင် လုပ်နေ တာတွေလည်း အဆက်မပြတ် ရှိနေတယ်။ အဲ့တာတွေကို ကြည့်ပြီး အပစ်ရပ်ရေး ငြိမ်းချမ်းရေးသာ လုပ်နေကြတာ လုပ်နေတဲ့သူတွေကရော ရိုးသားရဲ့လား တွေးစရာတွေကြီးပဲ” ဒေါ်ခွန်ဂျာက ပြောသည်။

ကချင်လွတ်မြောက်ရေးအဖွဲ့နှင့် အစိုးရတို့ဆွေးနွေးပွဲတွင် နည်းပညာ အထောက်အကူပြု အဖွဲ့ချင်း ဆွေးနွေးထား သည့် အချက်များ၊ ဒုက္ခသည်စခန်းများနှင့်ပတ်သက်သည့် ဆွေးနွေးချက်များ၊ နိုင်ငံရေးဆိုင်ရာများ၊ တစ်နိုင်ငံလုံး အပစ်အခတ် ရပ်စဲရေးလုပ်ရန် သဘောတူညီချက်များနှင့် အခြားနိုင်ငံရေးနှင့် ဆက်နွယ်သည့် အကြောင်းအရာ များကို ထည့်သွင်း ဆွေးနွေးမည်ဖြစ်သည်။

“နိုင်ငံရေးအကြောင်းအရာ ဆွေးနွေးတဲ့အခါမှာတော့ နှစ်ပိုင်းခွဲပြီး ဆွေးနွေးမယ်။ တစ်နိုင်ငံလုံး အတိုင်းအတာ လတ်မှတ်ရေးထိုးဖို့ရယ်၊ အခြား နိုင်ငံရေးအကြောင်းအရာတွေကို ဆွေးနွေးမယ်။ အားလုံးက သဘောတူညီပြီ ဆိုရင်တော့ အားလုံးပါဝင်တဲ့ ညီလာခံကြီးတစ်ခုကို လုပ်ဆောင်သွားမှာပါ”ဟု ပြည်ထောင်စုအစိုးရ ငြိမ်းချမ်းရေးဖော်ဆောင်ရေးအဖွဲ့၏ နည်းပညာအထောက်အကူပြုအဖွဲ့မှ ဦးလှမောင်ရွှေက မဇ္ဈိမကို ပြောသည်။

ထိုသို့ အောက်တိုဘာလ ၈၊ ၉၊ ၁၀ ရက်များတွင် မတွေ့ဆုံမီ အောက်တိုဘာလ ၂ ရက်နှင့် ၃ ရက်တို့ တွင် နှစ်ဖက် နည်းပညာအထောက်အကူပြု အဖွဲ့ချင်း ကချင်ပြည်နယ် မြစ်ကြီးနားရှိ KIO နည်းပညာအထောက်အကူပြု ရုံးတွင်တွေ့ဆုံဆွေးနွေးခဲ့သည်။ ထိုဆွေးနွေးပွဲသည် နှစ်ဖက်ခေါင်းဆောင်များ တွေ့ဆုံ ဆွေးနွေးရန် အကြိုညှိနှိုင်းဆွေးနွေးခြင်းဖြစ်သည်။

တစ်နိုင်ငံလုံးအတိုင်းအတာဖြင့် အပစ်အခတ်ရပ်စဲရန် အောက်တိုဘာတွင် လက်မှတ်ရေးထိုးမည်ဟု ပြည်ထောင်စု ငြိမ်းချမ်းရေးဖော်ဆောင်ရေး လုပ်ငန်းကော်မတီ ဒု-ဥက္ကဋ္ဌဦးအောင်မင်းက စက်တင်ဘာ ၈ ရက်က ညီညွတ်သော တိုင်းရင်းသားလူမျိုးများ ဖက်ဒရယ်ကောင်စီ (UNFC)နှင့် ထိုင်းနိုင်ငံ ချင်းမိုင်မြို့တွင် တွေ့ဆုံစဉ် ပြောကြားခဲ့သော်လည်း UNFC အနေဖြင့်မူ တက်ရောက် လက်မှတ်ထိုးမည် မဟုတ်ဘဲ လေ့လာသူအဖြစ်သာ တက်မည်ဟု ဗိုလ်မှူးကြီးခွန်ဥက္ကာက ပြောသည်။

ကချင်လွတ်လပ်ရေးအဖွဲ့နှင့် အစိုးရတို့သည် မေလ၂၉ ရက်တွင် နိုင်ငံရေးဆွေးနွေးပွဲများ ပြုလုပ်ကာ သဘောတူ ညီချက် ခုနှစ်ချက်ဖြင့် သဘောတူညီခဲ့သည်။ သို့သော် ထိုအထဲမှ နည်းပညာ အထောက်အကူပြုအဖွဲ့ ရုံးဖွင့်ရန် တစ်ချက်ကိုသာ ဆောင်ရွက်နိုင်သေးသည်။

ထိုနောက်ပိုင်းတွင် အဖွဲ့နှစ်ဖွဲ့ကြား ယုံကြည်မှု ပျက်ပြားစေသည့် ကချင်ပြည်နယ်တွင် အစိုးရတပ်များ ထပ်မံချထားမှု အပြင် အခြား အကြောင်းအရာများကြောင့် ယုံကြည်မှုပျက်ပြားခဲ့ရသည်။ ထို့ကြောင့် ယခု တွေ့ဆုံမှုအား ယုံကြည်မှုပြန်လည်ရရှိစေရန် လုပ်ဆောင်မည့် အစည်းအဝေးဟူ၍သာ သတ်မှတ်ထားသည်ဟု ကချင်ငြိမ်းချမ်းရေး ကွန်ရက်မှဒေါ်ခွန်ဂျာက သူ့အမြင်ကို ပြောသည်။

KIO နှင့် ပြည်ထောင်စု ငြိမ်းချမ်းရေးဖော်ဆောင်ရေးအဖွဲ့တို့သည် အောက်တိုဘာလ ၈၊ ၉၊ ၁၀ ရက်များတွင် ကချင်ပြည်နယ် မြစ်ကြီးနားတွင် တွေ့ဆုံကြမည်ဖြစ်သည်။

ယင်းသို့တွေ့ဆုံမှုမတိုင်ခင် နှစ်ဖက်ခေါင်းဆောင်များသည် မတ်လတွင် မြစ်ကြီးနား၌ပင် တွေ့ဆုံခဲ့သေးသည်။ ထိုသို့ တွေ့ဆုံခဲ့အပြီး ကြားကာလတွင် နှစ်ဖက် နည်းပညာအဖွဲ့အချင်းချင်းသာ နှစ်ကြိမ်တွေ့ဆုံကာ ဆွေးနွေးမှုမျပြုလုပ်ခဲ့သည်။