ခင်ဦးသာ Wednesday, 22 December 2010
ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီ (ကြံ့ဖွံ့ပါတီ) နှင့် နိုင်ငံရေး ပါတီတချို့တို့ အပြန်အလှန် တရားစွဲဆိုမှုများ ပြုလုပ်နေ ကြကြောင်း သိရသည်။
“မတရား စွပ်စွဲချက်တွေနဲ့ သူတို့က စတင်စွဲတော့ ကျနော်တို့ပါတီကလည်း ခိုင်မာတဲ့အချက်အလက်တွေနဲ့ ပြန်စွဲဖို့ လုပ်နေပါတယ်” ဟု ရှမ်းတိုင်းရင်းသားများ ဒီမိုကရက်တစ်ပါတီ (SNDP)ခေါ် ကျားဖြူပါတီ၏ ဒုတိယ ဥက္ကဋ္ဌ ဦးဆောင်ဆီက ဧရာဝတီကို ပြောသည်။
ကျားဖြူပါတီ၏ ပြည်နယ်လွှတ်တော်မှ အနိုင်ရထားသော ကိုယ်စားလှယ် စိုင်းမွန်းအား ကြံ့ဖွံ့ပါတီမှ ၎င်း၏ ပြိုင်ဘက် ကိုယ်စားလှယ် ဒေါက်တာ စိုင်းခမ်းလှိုင်က ပြီးခဲ့သည့် ရက်ပိုင်းက တရားစွဲဆိုခဲ့ကြောင်း၊ ကျားဖြူ ကိုယ်စားလှယ်သည် ရှမ်းလက်နက်ကိုင် တပ်ဖွဲ့များ၏ ထောက်ခံမဲများကို ရယူ၍ အနိုင်ရသွား ခြင်းကြောင့်ဟု စွပ်စွဲ၍ တရားစွဲဆိုခြင်း ဖြစ်ကြောင်း စိုင်းမွန်းနှင့်နီးစပ်သူ တဦးက ဆိုသည်။
ကျားဖြူကိုယ်စားလှယ်အား ကြံ့ဖွံ့ကိုယ်စားလှယ်က စွပ်စွဲရာ၌ မဲရုံနှင့်ကိုက် ၅၀၀ အတွင်း စည်းရုံးသည်၊ ရှမ်းပြည်တပ်မတော် - မြောက်ပိုင်း (SSA - North) အား ဗဟိုပြုကာ ပြည်သူများအား မဲထည့်ခိုင်းသည် စသည့် စွပ်စွဲချက်များ ပါဝင်ကြောင်း စိုင်းမွန်နှင့် နီးစပ်သူက ပြောသည်။
“SSA မြောက်ပိုင်း ဆိုတာက ပြည်သူ့စစ်အဖွဲ့ဖြစ်လို့ မဲပေးမယ်ဆိုရင်လည်း လွတ်လပ်စွာ ပေးပိုင်ခွင့်ရှိတဲ့ အဖွဲ့ပါ” ဟု ၎င်းက ဆိုသည်။
ကျားဖြူပါတီ၏ ပြောခွင့်ရသူ ဒု - ဥက္ကဋ္ဌ ဦးဆောင်ဆီကလည်း ယခုကဲ့သို့ စွပ်စွဲရာတွင် ခိုင်လုံမှုသည် အရေးကြီးကြောင်း၊ ကြံ့ဖွံ့ပါတီ၏ စွပ်စွဲမှုသည် အခြေအမြစ် မရှိကြောင်း ပြောသည်။
“အစတုန်းကတော့ ရတာလေးနဲ့ပဲ အေးအေးဆေးဆေး လွှတ်တော်ထဲ သွားမလို့ပါပဲ။ အခုမှ ရုတ်တရက်ထပြီး သူတို့က စလာတော့ ကိုယ့်ဘက် ကလည်း ပြန်စွဲရတာပေါ့။ ကျနော်တို့က အဆုံးထိ ရင်ဆိုင်ဖို့အဆင်သင့်ပဲ။ တရားရုံးရဲ့ ဆုံးဖြတ်ချက်က ဘယ်လောက်အထိ မျှတမလဲ ဆိုတာ စောင့်ကြည့်ရတာပေါ့” ဟု ဦးဆောင်ဆီက ဆိုသည်။
ကြံ့ဖွံ့ပါတီ၏ တရားစွဲဆိုမှုအား အမှုဖြစ်ပွားရာ ရှမ်းပြည်နယ်၊ ကွန်ဟိန်းဒေသရှိ မြို့နယ်၊ ခရိုင်အဆင့်က မှန်ကန်မှု မရှိဟု
ဆုံးဖြတ်ပေးလိုက်ခြင်းကြောင့် မကျေနပ်၍ နေပြည်တော်ရှိ ဗဟိုတရားရုံးသို့ ထပ်မံ တိုင်ကြားခြင်းဖြစ်ကြောင်း သိရသည်။
ကျားဖြူပါတီ၏ ပြည်နယ်လွှတ်တော် ကိုယ်စားလှယ် ဦးစိုင်းထွန်းကြည်ကလည်း ၎င်း၏ ပြိုင်ဘက် ကြံ့ဖွံ့ပါတီ၏ ကိုယ်စားလှယ် ဦးစိုင်းနုအား မဲမသမာမှုဖြင့် ပြန်လည် တရားစွဲဆိုသွားမည်ဖြစ်ကြောင်း ဦးဆောင်ဆီက ပြောသည်။
တရားစွဲသည့် ကြံ့ဖွံ့ ကိုယ်စားလှယ် ဒေါက်တာ စိုင်းခမ်းလှိုင်သည် ကျားဖြူ ကိုယ်စားလှယ် စိုင်းမွန်းအား မဲအရေအတွက် ၂ ထောင်ကျော်ဖြင့် ရှုံးနိမ့်ခဲ့ကြောင်း သိရသည်။
ကြံ့ဖွံ့၏ စွပ်စွဲမှုသည် အထောက်အထား မခိုင်လုံသော်လည်း ကျားဖြူမှ ကြံ့ဖွံ့အပေါ် တရားစွဲဆိုရန် စုဆောင်းထားသည့် အချက်အလက်မှာ ခိုင်မာမှု အပြည့်ရှိကြောင်း၊ ထို့ကြောင့် ၎င်းတို့ အနိုင်ရမည်ဟု ယုံကြည်ကြောင်းလည်း ဦးဆောင်ဆီက ပြောသည်။
ကျားဖြူပါတီသည် ရွေးကောက်ပွဲ၌ ကိုယ်စားလှယ် ၁၅၆ ဦးပြိုင်ခဲ့ရာ ၅၇ ဦးအနိုင်ရရှိခဲ့သည်။
ကျားဖြူ ပါတီကဲ့သို့ပင် ဒီမိုကရက်တစ်ပါတီ (မြန်မာ) ၏ မန္တလေးတိုင်း ချမ်းအေးသာစံမြို့နယ်ကိုယ်စားပြု တိုင်းဒေသကြီး လွှတ်တော်မှ ၀င်ရောက် ယှဉ်ပြိုင် အနိုင်ရခဲ့သူ ဒေါ်တင်တင်မာအား ၎င်း၏ ပြိုင်ဘက် ကြံ့ဖွံ့ပါတီ၏ ကိုယ်စားလှယ် ဦးမြ၀င်း က တရားစွဲဆိုထား၍ နေပြည်တော်ရှိ တရားရုံး၌ အမှုရင်ဆိုင် နေရကြောင်း ပါတီ ဥက္ကဋ္ဌ ဦးသုဝေက ဧရာဝတီကို ပြောသည်။
“ကြံ့ဖွံ့ပါတီက တရားစွဲဆိုမှုတွေ ရုတ်တရက် ပေါ်လာတာကတော့ တနိုင်ငံလုံးက သူတို့ကို မတရားဘူး ဆိုပြီး တရားစွဲတာတို့၊ တိုင်တာ၊ ပြောတာတို့ ဆက်တိုက် ထွက်နေတော့ လူတွေအာရုံပြောင်းစေချင်တဲ့ သဘောနဲ့ ပြန်စွဲတယ်လို့ ထင်ပါတယ်” ဟု ဦးသုဝေက ဆိုသည်။
၎င်းတို့ ကိုယ်စားလှယ်၏ အမှုသည် နေပြည်တော်ရှိ ဗဟိုတရားရုံး၌ ယနေ့ကြားနာ စစ်ဆေးမှု ပြုလုပ်၍ ဒီဇင်ဘာလ ၂၉ ရက်နေ့တွင် ဆုံးဖြတ်ချက် ချမည်ဖြစ်ကြောင်း၊ ကြံ့ဖွံ့ကိုယ်စားလှယ်က စွပ်စွဲသကဲ့သို့ မဟုတ်မှန်၍ ၎င်းတို့ပါတီ ကိုယ်စားလှယ် ကသာ အနိုင်ရမည်ဟု ယုံကြည်ကြောင်းလည်း ဦးသုဝေက ပြောသည်။
“တရားစွဲဆိုသူက ကျပ် ၁၀ သိန်း အကုန်ခံပြီး စွဲရသလို တရားရင်ဆိုင်သူကလည်း ၁၀ သိန်း ပေးထားရတာလေ။ တကယ်လို့ အစွဲခံရသူက ၁၀ သိန်း မပေးနိုင်ဘူးဆိုရင် အရှုံးပေးရမယ်လို့ ပြောတယ်။ အဲဒါကြောင့် ၁၀ သိန်းကို မရရအောင် ရှာဖွေပြီးတော့ အမှု ရင်ဆိုင်နေရတယ်” ဟု ၎င်းက ရှင်းပြသည်။
ကြံ့ဖွံ့ပါတီက ဒီမိုကရက်တစ်ပါတီ (မြန်မာ) ၏ ကိုယ်စားလှယ်အား ရွေးကောက်ပွဲ၌ မဲဝယ်ခဲ့မှုများ ရှိခဲ့သည်ဟု ဆိုကာ စွပ်စွဲ၍ တရားစွဲဆိုခြင်းဖြစ်ကြောင်း သိရသည်။
ဒီမိုကရက်တစ် ပါတီသည် ရွေးကောက်ပွဲ၌ လွှတ်တော် သုံးရပ်စလုံး၌ ကိုယ်စားလှယ် ၄၇ ဦးဝင်ရောက်ယှဉ်ပြိုင်ခဲ့ရာ ၃ ဦးအနိုင် ရရှိခဲ့သည်။
ရွေးကောက်ပွဲအပြီး ရက်ပိုင်းကာလ၌ ကြံ့ဖွံ့ပါတီ၏ မဲမသမာမှုများကို တနိုင်ငံလုံးသာမက ကမ္ဘာ့နိုင်ငံ အများအပြားကလည်း ဝေဖန်မှုများရှိခဲ့ပြီး ရွေးကောက်ပွဲရလဒ်အား အသိအမှတ်မပြုဟု ပြောဆိုမှုများရှိခဲ့သည်။
နိုင်ငံရေးပါတီအများစုက ကြံ့ဖွံ့ပါတီအား တရားစွဲဆိုမှုများပြားလာပြီး နောက်ပိုင်း ကြံ့ဖွံ့ပါတီ၏ တရားစွဲဆိုမှုများ ထွက်ပေါ်လာခြင်းဖြစ်သည်။
ကြံ့ဖွံ့ပါတီနှင့် တခြားသော နိုင်ငံရေးပါတီများ အပြန်အလှန် တရားစွဲဆိုနေမှုသည် ပြီးခဲ့သည့်လမှစတင်ခဲ့ကာ ယခုရက်ပိုင်းအတွင်း ပိုမိုများပြားလာသည်ကို တွေ့ရသည်။
ကြံ့ဖွံ့ပါတီသည် ရွေးကောက်ပွဲ၌ လွှတ်တော် သုံးရပ်စလုံး၏ မဲဆန္ဒနယ်စုစုပေါင်း ၁၁၅၄ နေရာအနက် ၈၈၂ နေရာအနိုင်ရ ခဲ့ကြောင်း စစ်အစိုးရ မီဒီယာများက တရားဝင်ကြေညာထားသည်။
No comments:
Post a Comment