ABC
မြန်မာနိုင်ငံရဲ့ မိုးရာသီအတွင်း ရခိုင်ပြည်နယ်မှာ ရှိနေတဲ့ ဒုက္ခသည်တွေ ဒုက္ခအရောက်နည်းပါးအောင် မိုးလုံတဲ့ နေရာထိုင်ခင်းတွေ အရေးပေါ် လိုအပ်နေတဲ့အတွက် ကူညီကြဖို့ ကုလသမဂ္ဂက တိုက်တွန်းလိုက်ပါတယ်။
ယာယီတဲတွေမှာ နေထိုင်နေရတဲ့ ဒုက္ခသည်တွေနဲ့ ရေကြီးနိူင်တဲ့ဒေသမှာ ရှိနေတဲ့ ဒုက္ခသည် အယောက်ပေါင်း ၆၀၀၀၀ ကို ကူညီဖို့ ငွေကြေးလျူဒါန်းမှုတွေ လုပ်ကြဖို့ ကုလသမဂ္ဂက တိုက်တွန်းထားပါတယ်။
မေလကနေ စက်တင်ဘာလအထိ ကျရောက်တဲ့ မိုးရာသီအတွင်း ရခိုင်ပြည်နယ်မှာ မိုးသည်းထန်မှုတွေနဲ့ တခါတရံ လေပြင်းမုန်တိုင်းပါ ကျရောက်လေ့ရှိတဲ့အတွက် ဒုက္ခသည်တွေအတွက် စိုးရိမ်မကင်း ဖြစ်နေကြတာ ဖြစ်ပါတယ်။
ရခိုင်ပြည်နယ်မှာဖြစ်ခဲ့တဲ့ ပဋိပက္ခကြောင့် လူပေါင်း တစ်သိန်းကျော် အိုးအိမ်ရွှေ့ပြောင်းခဲ့ရပါတယ်။ အဲဒီထဲက စစ်တွေမြို့၊ ပေါက်တောမြို့နဲ့ မြေပုံမြို့ ကမ်းရိုးတန်းတလျောက်မှာ နေထိုင်တဲ့ ဒုက္ခသည်တွေ လှိုင်းပုတ်ဒဏ်ကို ခံရနိူင်ဖွယ်ရှိတယ်လို့ ယူဆပြီး စိုးရိမ်ကြသလို တချို့ကလည်း မြေနိမ့်ရာ လယ်ကွင်းပြင်မှာ နေထိုင်ကြတဲ့အတွက် ရေကြီးမှုဒဏ်ကို ခံစားရမှာကို စိုးရိမ်နေကြတာ ဖြစ်ပါတယ်။
ရေကြီးမှုဖြစ်လာရင် ဒုက္ခသည်တွေရဲ့ နေရေးထိုင်ရေးနဲ့ သန့်စင်မှုအခြေအနေက ဒိထက် ဆိုးရွားလာပြီး ရေကနေ ပေါက်ဖွားလာတဲ့ ရောဂါဝေဒနာတွေ ခံစားရနိူင်တာကြောင့် ကုလသမဂ္ဂက ကြိုတင်ပြင်ဆင်မှုတွေ လုပ်လိုတာ ဖြစ်ပါတယ်။
ဒုက္ခသည်တချို့အတွက် နေရာထိုင်ခင်းတွေ စီစဉ်ခဲ့သလိုပဲ ကျန်တဲ့ ဒုက္ခသည်တွေကို အမြန်ဆုံး နေရာပြန်လည်ချထားနိူင်ဖို့ အိမ်တွေအရေးပေါ် ဆောက်ပေးဖို့ တိုက်တွန်းထားပါတယ်။
မြန်မာနိုင်ငံမှာ ဖြစ်ခဲ့တဲ့ ပဋိပက္ခနဲ့ ပတ်သက်ပြီး ကူညီထောက်ပံ့မှုတွေလုပ်ဖို့အတွက် ဒေါ်လာ သန်းပေါင်း ၈၀ လိုအပ်မယ်လို့ ကုလသမဂ္ဂက ခန့်မှန်းထားပေမယ့် ခုချိန်ထိ ဒေါ်လာ ၉.၉ သန်းသာ လျူဒါန်းကြတာဖြစ်ပြီး လိုအပ်တဲ့ ပမာဏရဲ့ ၁၄ % သာ ရရှိသေးကြောင်း ကုလသမဂ္ဂရဲ့ သတင်းမှာ ဖော်ပြထားပါတယ်။
No comments:
Post a Comment