Saturday, April 6, 2013

တိုင်းရင်းသားအရေး ကာတာ ဖောင်ဒေးရှင်းဖွင့်မည်

နန်းဆိုင်နွမ်

မြန်မာပြည်အတွင်း ဖြစ်နေသည့် ငြိမ်းချမ်းရေး ကိစ္စ၊ လူမှုရေး ပဋိပက္ခိများ၊ စီးပွားရေး ပြဿနာများကို လေ့လာလိုသည့် စိတ်ကြောင့် အမေရိကန် သမ္မတဟောင်း ဂျင်မီကာတာက ကာတာ ဖောင်ဒေးရှင်ကို မြန်မာပြည်တွင် မကြာမီ လာရောက် ဖွင့်လှစ်မည်ဟု သိရသည်။

ဂျင်မီကာတာသည် ယမန်နေ့က တိုင်းရင်းသား ပါတီ ၄ ခုနှင့် ရန်ကုန်ရှိ ချက်ထရီယံ ဟိုတယ်တွင် တွေ့ဆုံစဉ်က အထက်ပါအတိုင်း ပြောကြားခဲ့ခြင်း ဖြစ်သည်။

ရှမ်း၊ ချင်း၊ မွန်နှင့် ကရင် တိုင်းရင်းသား ပါတီ ၄ ခုသည် တိုင်းရင်းသား နယ်မြေအတွင်း ဖြစ်ပျက်နေသည့် ပြဿနာများ၊ ငြိမ်းချမ်းရေး တည်ဆောက် နေသည့်အချိန် စစ်ပွဲများ ဆက်လက်ဖြစ်ပေါ်နေသည့် အကြောင်းရင်းများကို အမေရိကန် သမ္မတ ဟောင်း ဂျင်မီကာတာအား တင်ပြထားသည်ဟု ရှမ်းအမျိုးသား ဒီမိုကရေစီအဖွဲ့ချုပ် ဥက္ကဋ္ဌ ဦးခွန်ထွန်းဦးက ဧရာဝတီသို့ ပြောသည်။

“ကျနော်ကတော့ လက်ရှိ ကိုယ့်ဒေသမှာ ဖြစ်နေတဲ့ အခြေအနေတွေ၊ ဖွဲ့စည်းပုံတွေ ပြင်ဖို့၊ ကိုယ်ပိုင်ပြဌာန်းခွင့်ရှိတဲ့ ဖက်ဒရယ်တွေက ခွဲထွက်တဲ့ ဖက်ဒရယ်မဟုတ်တဲ့ အကြောင်းတွေပေါ့။ သူကတော့ ငြိမ်းချမ်းရေး ကိစ္စအတွက် မြန်မာပြည် တပြည်လုံးကို သွားရောက် လေ့လာချင်တယ်” ဟု ဦးခွန်ထွန်းဦးက ဆိုသည်။

သမ္မတ ပြောခဲ့သည့် ၂၀၁၄ ခုနစ်တွင် ကျင်းပမည့် တိုင်းရင်းသား ညီလာခံ ဖြစ်မြောက်ရေးအတွက် ချင်းပြည်နယ် ဒေသခံများ အဆင်သင့်ဖြစ်စေရန် ကာတာ ဖောင်ဒေးရှင်းအနေဖြင့် ကူညီပေးရန်၊ ရှမ်း တပြည်လုံး ညီလာခံ ကျင်းပနိုင်ရန် အတွက် ကူညီပေးကြရန် တင်ပြထားကြောင်းလည်း ချင်းအမျိုးသား ပါတီ အတွင်းရေးမှူး ဦးငယ်ပီးက ပြောသည်။

“တိုင်းရင်းသား ပြဿနာကို အဓိက နားလည်ချင်တာပေါ့။ ကျနော်တို့ တိုင်းရင်းသား ဒေသ တခုနဲ့ တခု၊ တပြည်နယ်နဲ့ တပြည်နယ်ကလည်း မတူဘူးလေ။ ချင်းတိုင်းရင်းသားတွေဆို လူနည်းတယ်၊ ဘာလုပ်ပိုင်ခွင့်မှ မရှိတဲ့အကြောင်း ပြောပြခဲ့ပါတယ်” ဟု သူက ဆိုသည်။

အမေရိကန် သမ္မတဟောင်း ဂျင်မီကာတာသည် ယမန်နေ့တွင် ရှမ်းအမျိုးသား ဒီမိုကရေစီအဖွဲ့ချုပ်၊ ချင်းအမျိုးသား ပါတီ၊ မွန်ဒေသလုံး ဆိုင်ရာ ဒီမိုကရေစီပါတီ၊ ကရင်ပြည်သူ့ပါတီတို့နှင့် သီးသန့်တွေ့ဆုံခဲ့သည်။

တိုင်းရင်းသား ပါတီ ၄ ခုနှင့် မတွေ့ဆုံမီတွင် နေပြည်တော်သို့ သွားရောက်ကာ နိုင်ငံတော်သမ္မတ ဦးသိန်းစိန်၊ ပြည်သူ့ လွှတ်တော်ဥက္ကဋ္ဌ သူရဦးရွှေမန်း၊ ပြည်ထောင်စု ရွေးကောက်ပွဲ ကော်မရှင်ဥက္ကဋ္ဌ ဦးတင်အေး၊ အမျိုးသား ဒီမိုကရေစီအဖွဲ့ချုပ် ဥက္ကဋ္ဌ ဒေါ်အောင်ဆန်းစုကြည် တို့နှင့်လည်း တွေ့ဆုံခဲ့ကြောင်း သိရသည်။

No comments: