အခုဖမ်းဆီးရမိထားတဲ့ မူးယစ်ဆေးဝါး တွေကို RCSS/SSA ရှမ်းပြည်တောင်ပိုင်းတပ်ဖွဲ့ရဲ့ စစ်ဒေသ အမှတ် ၇၀၁ ဗဟိုဌာနချူပ်နယ်မြေအတွင်း နမ့်ခမ်းမြို့နယ် နောင်မ ကျေးရွာမှာ အများပြည်သူရှေ့မှောက်မှာ မီးရှို့ဖျက်ဆီးခဲ့တာ ဖြစ်ပါတယ်လို့ SSA ရှမ်းပြည်တောင်ပိုင်းတပ်ဖွဲ့ရဲ့ ပြောရေးဆိုခွင့်ရှိသူ ဗိုလ်မှူး စိုင်းလောင်ဆိုင်း က အခုလို ပြောပါတယ်။
“အဲ့ဒီ မူဆယ် ၊ နမ့်ခမ်း ဒေသတစ်ဝိုက်မှာ ဖမ်းဆီးရမိတဲ့ ယာမ ဆိုတဲ့ အဲ့ဒီ အက်ဖက်တမင်းက အလုံးရေ ပေါ့နော် ခြောက်သောင်းနီးပါး၊ နောက်ပြီးတော့ ဘိန်းစိမ်းက ခုနှစ်ပိသာ နီးပါး၊ နဲ့ ဘိန်းဖြူ အနည်းအကျဉ်း ပါပါတယ်။ ကျနော်တို့ ဖမ်းဆီးရမိထားတဲ့ အဲ့ဒီ ဘိန်းနဲ့ ယာဘ တွေကို ဒီလ ၇ ရက်နေ့ မနက် ၁၀ နာရီခွဲ အချိန်မှာ ရပ်မိရပ်ဖ တွေနဲ့ နောက်ပြီးတော့ ဒေသ တွင်းမှာရှိနေတဲ့ မူဆယ် နမ့်ခမ်းရဲ့ အဲ့ဒီ SNLD တွေ၊ SNDP ပါတီတွေနဲ့ နောက် လူမှုအခြေပြုအဖွဲ့အစည်းတွေရဲ့ ရှေ့မှာ ကျနော်တို့ မီးရှို့ပြသခြင်းပဲ ဖြစ်ပါတယ်။”
ဒီဒေသတွင်းမှာ မူးယစ်ဆေးဝါးအန္တရယ်ကြီးမားနေပြီး မျိုးဆက်သစ်လူငယ်တွေ မူးယစ်ဆေးဝါး မသုံးစွဲကြစေဖို့အပြင် မူးယစ်ဆေးဝါးအန္တရယ်တားဆီးကာကွယ်တဲ့ အနေနဲ့ အခုလို လုပ်ဆောင်တာဖြစ်တယ်လို့လည်း ဗိုလ်မှူး စိုင်းလောင်ဆိုင်း က ဆက်ပြောပါတယ်။
“ကျနော်တို့ ရှမ်းပြည်တွင်းမှာ လူငယ်ပိုင်းမှာဆိုရင်လည်း ယာဘ ဆိုတဲ့ အက်ဖက်တမင်းကို သုံးစွဲကြတယ်၊ လူကြီးပိုင်းမှာရော မိန်းမပိုင်းမှာရော၊ လက်လုပ်လက်စားတွေ အလုပ်သမားတွေလည်း သုံးစွဲကြတယ်၊ ဒီမူယစ်ဆေးဝါးအန္တရယ်တွေ သူတို့က မသိကြဘူး၊ အဲ့ဒီတော့ ကျနော်တို့အတွက် အန္တရယ်တော့ တအားကြီးမားပါတယ်။ ကျနော်တို့ စစ်တမ်းကောက်ကြည့်သလောက်တော့ ၅၀ ရာခိုင်နှုန်းလောက်တော့ ဘိန်းနဲ့ ဘိန်းဖြူတွေ သုံးစွဲနေကြ တာကို တွေ့ရတယ်။”
ရှမ်းပြည်နယ်အစားထိုးဖွံ့ဖြိုးရေး၊ တရားမ၀င် မူးယစ်ဆေးဝါး တိုက်ဖျက်ရေးနဲ့ပတ်သက်ပြီး လွန်ခဲ့တဲ့ ၂၀၁၂ ခုနှစ် အောက်တိုဘာ ၂၇ ရက်နေ့က အစိုးရကိုယ်စားလှယ်တွေနဲ့ UNODC က တာဝန်ရှိသူတွေ ရှမ်းပြည်နယ် တာချီလိတ်မြို့မှာ တွေ့ဆုံဆွေးနွေးခဲ့ကြပြီး ပူးပေါင်းလုပ်ဆောင်ဖို့ သဘောတူညီချက်တွေ ရှိခဲ့တယ်လို့ဆိုပါတယ်။ ဒါပေမယ့် လက်ရှိမှာ အစိုးရဖက်က ပူးပေါင်းပါဝင်တာ မရှိသေးဘဲ UNODC က အနည်းအကျဉ်းသာ ပူးပေါင်းပါဝင် လာတာ ရှိသေးတဲ့အတွက် ထိရောက်မှု မရှိဖြစ်နေတယ်လို့ ဗိုလ်မှူး စိုင်းလောင်ဆိုင်း ကပြောတဲ့ကြောင်း ရေဒီယို သြစတေးလျ သတင်းထောက် သန်းကျော်စိုး က သတင်းပေးပို့ထားပါတယ်။
No comments:
Post a Comment