UNFC ဥက္ကဌ ဒုတိယဗိုလ်ချုပ်ကြီး အင်န်ဘန်လ၊ ဒုဥက္ကဌ(၁) အေဘွယ်တွိ၊ ဒုဥက္ကဌ(၂) စောဒေးဗစ်သာကပေါ၊ တွဲဖက်အတွင်းရေးမှူး ဗိုလ်မှူးကြီးခွန်ဥက္ကာတို့ ဦးဆောင်သော ၂၃ ဦးပါအဖွဲ့သည် ဧပြီလ ၁ ရက်နေ့တွင် ဂျပန်နိုင်ငံသို့ သွားရောက်ခဲ့ခြင်းဖြစ်သည်။
မွန်ပြည်သစ်ပါတီ ကိုယ်စားလှယ် အဖြစ်လိုက်ပါခဲ့သူ နိုင်ဟံသာဗိန်ခိုင်းက “အခုခရီးစဉ်က ပိုပြီးအားရစရာပါ၊ ဂျပန်ဝန်ကြီးချုပ်၊ လက်ထောက်ဝန်ကြီးချုပ်ဖြစ်တဲ့ ဘဏ္ဍာရေးဝန်ကြီး၊ နိုင်ငံခြားရေးဝန်ကြီးတို့နဲ့ တွေ့ဆုံဆွေးနွေးခွင့်ရခဲ့ပါတယ်” ဟု ပြောသည်။
ဧပြီလ ၂ ရက်နေ့ မွန်းလွဲပိုင်းတွင် UNFC ထိပ်ပိုင်းခေါင်းဆောင် ၄ ဦးတို့က ဂျပန်နိုင်ငံခြားရေးဝန်ကြီးနှင့်၎င်း၊ ည ၇ နာရီတွင် ဂျပန်ဝန်ကြီးချုပ်ရှင်ဆိုအာဘေနှင့် UNFC အဖွဲ့ဝင်အားလုံးတို့ ဝန်ကြီးချုပ်ရုံး၌၄င်း တွေ့ဆုံခဲ့ခြင်း ဖြစ်သည်။
ဂျပန်နိုင်ငံဝန်ကြီးချုပ်အနေဖြင့် မြန်မာနိုင်ငံ နိုင်ငံရေးပြုပြင်ပြောင်းလဲရေးကို အထူးအားပေးနေကြောင်း၊ အထူးသဖြင့် မြန်မာအစိုးရနှင့် တိုင်းရင်းသားလက်နက်ကိုင်တပ်ဖွဲ့များ ငြိမ်းချမ်းရေးတည်ဆောက်နိုင်ရေး၊ တိုင်းရင်းသားနယ်မြေများတွင် ဆင်းရဲမွဲတေမှုပပျောက်စေရေး၊ လူနေမှုအဆင့်အတန်း တိုးတက်မြင့်မားရေးအတွက် ဂျပန်နိုင်ငံက အကူအညီဆက်လက်ပေးသွားမည်ဟု သူက ဆက်ပြောသည်။
နိပွန် ဖောင်ဒေးရှင်း အနေဖြင့် တိုင်းရင်းသား ဒေသများသို့ ဒေါ်လာ ၃ သန်းခန့် အကူအညီ ပေးရန်ရှိပြီး ကနဦး ရှေ့ပြေးအနေဖြင့် မွန်နှင့်ကရင် ဒေသများတွင် ဒေါ်လာ ၃ သိန်းတန် ရိက္ခာနှင့် ဆေးဝါးများကို လွန်ခဲ့သည့် ဒီဇင်ဘာလမှ အကူအညီစတင်ပေးအပ်ခဲ့သည်။
ယခုလ ၆ ရက်နေ့တွင် နိပွန်ဖောင်ဒေးရှင်းက မွန်ဒေသအတွက် ဆန် ၃၅၀ဝ အိတ်ကိုလည်း အရှေ့တောင်တိုင်းစစ်ဌာနချုပ်မှတဆင့် ပေးအပ်ခဲ့သည်ဟု သိရသည်။UNFC ကိုယ်စားလှယ်တို့သည် ၂၀၁၂ ခုနှစ် အောက်တိုဘာလတွင် နိပွန်ဖောင်ဒေးရှင်းဖိတ်ကြားမှုဖြင့် ဂျပန်နိုင်ငံသို့ ပထမအကြိမ်သွားရောက်ခဲ့ပြီး ဖြစ်သည်။တဖန် ယနေ့ရက်စွဲဖြင့် UNFC ၏ ယခုဂျပန်ခရီးစဉ် သတင်းထုတ်ပြန်ချက် ၂/၂၀၁၃ ကို ဗဟိုရုံးကထုတ်ပြန်ခဲ့သည်။
ညီညွတ်သောတိုင်းရင်းသားလူမျိုးများ ဖက်ဒရယ်ကောင်စီသည် ဒီမိုကရေစီရေး၊ အမျိုးသားတန်းတူရေးနှင့် ကိုယ်ပိုင်ပြဌာန်းခွင့်ကိုအခြေခံသည့် ဖက်ဒရယ်ပြည်ထောင်စုတည်ဆောက်ရေးဖြစ်ပေါ်စေရန်အတွက် ဂျပန်နိုင်ငံအပါအဝင် အခြားနိုင်ငံများနှင့် အဖွဲ့အစည်းတို့၏ ဝန်းရံပံ့ပိုးမှုကို ရယူသွားမည်ဖြစ်ကြောင်း ထုတ်ပြန်ချက် နိဂုံးပိုင်းတွင် ရေးသားဖေါ်ပြထားသည်။
No comments:
Post a Comment