လက်ရှိ သမ္မ ဦးသိန်းစိန် အစိုးရမှ ဆင်းရဲ မွဲတည်မူ လျှော့ချရန် စီစဉ် နေချိန်တွင် အောက်ခြေ ဌာနဆိုင် ရာများမှ အခွန်များ တိုးကောက် နေသဖြင့် ရခိုင် ပြည်သူများ ဒုက္ခ ရောက်နေကြ ရကြောင်း သတင်း ရရှိသည်။
ခရိုင် ငါးလုပ်ငန်း ဦးစီးဌာနမှ ကျောက်ဖြူမြို့နယ် ဇင်ချောင်း ကျေးရွာတွင် ငါးဖမ်း စက်လှေများမှ ငွေလက်ခံ ရရှိကြောင်း ပြေစာ မပေးဘဲ လိုင်စင် ကြေးဟု ဆိုကာ အခွန်များ တိုးကောက် နေကြောင်းကို ကျောက်ဖြူ ပြည်နယ် လွှတ်တော် အမတ် ဦးကျော်လွှင်က ယခုလို ပြောသည်။
" ကောက်တာက ငါးဖမ်း စက်လှေ တစီးကို ၂၅၀၀၀ ကျပ်ကောက် ပါတယ်။ အဲသလို ကောက်တဲ့ နေရာမှာ ငွေလက်ခံ ရရှိကြောင်း ပြေစာ လည်း မပေးဘုး။ အဲသလို အစိုးရ ဌာန တစ်ခု ကနေ တရားဝင် ပြေစာတွေ မပေးဘဲ အခွန် ကောက်နေတဲ့ အပေါ်မှာ လူတွေက သံသယ ဖြစ်လာ တော့ ကျွန်တော်ကို လာတိုင် ကြပါတယ်" ဟု သူက ပြောသည်။
ယခင်နှစ်က လိုင်စင် ကြေးကို ၁၈၀၀၀ ကျပ်သာ ကောက်ခံ သော်လည်း ယခုနှစ်တွင် ၂၅၀၀၀ ကျပ်ထိ တိုးကောက် လာခြင်း ဖြစ်ပြီး ထိုသို့ ကောက်ခံ ရာတွင် ငွေလက်ခံ ရရှိကြောင်း ပြေစာ ကိုလည်း ထုတ်မပေး သဖြင့် ပြည်သူများ အကြား သံသယ ဖြစ်နေကြောင်း သိရသည်။
" ဇင်ချောင်းမှာ ငါးဖမ်းစက်လှေ အစီးပေါင်း ၂၀၀ ကျော်ရှိပါတယ်။ အတိအကျ စာရင်းတော့ မရသေးပါဘူး။ အခုလို လာကောက်တဲ့ အခါ ပေးတဲ့သူလည်းပေး၊ မပေးတဲ့သူလည်း မပေးသေးဘဲ ရှိနေတာကို တွေ့နေရတယ်။ လိုင်စင်ကြေးက တိုးသွားတော့ အများစုကတော့ မပေးချင်ကြဘူး။ တဘက်မှာလည်း ဒီကောက်နေတဲ့ ငွေတွေက တကယ် နိုင်ငံတော်က ကောက်ခိုင်တာလား စသဖြင့်လည်း လူတွေက သံသယ ဖြစ်နေကြပါတယ်" ဟု ဦးကျော်လွှင်က ပြောသည်။
ယခု ငွေကောက်နေသာ အဖွဲ့မှာ ကျောက်ဖြူ ခရိုင် ငါးလုပ်ငန်း ဦးစီးဌာနမှ ဒုဦးစီးမှူး ဦးဆောင်သော အဖွဲ့ တဖွဲ့ ဖြစ်ကြောင်း သိရသည်။
နိုင်ငံတော် အစိုးရမှ ဆင်းရဲ မွဲတည်မူ လျှော့ချရေး အတွက် ကြိုးပမ်းဆောင်ရွက်နေချိန်တွင် အောက်ခြေတွင် လုပ်ချင်သလို လုပ်ကြနေသဖြင့် ပြည်သူများ အနေဖြင့် နားမလည်အောင် ဖြစ်နေကြသည်ဟု သူက နိရဉ္စရာသို့ ဆက်ပြောသည်။
" စနစ်တွေ ပြောင်းလာပြီ။ အစိုးရလည်း ပြောင်းလာပြီ ဖြစ်တယ်ဆိုပြီး ပြည်သူတွေကတော့ အကောင်းဘက်ကို မျှော်လင့်နေကြတာပေါ့ဗျာ။ ဒီလို မျှော်လင့်နေတဲ့ အချိန်မှာ အရင်က အတိုင်းဘဲ အောက်ခြေမှာ လုပ်ချင်သလို လုပ်နေကြတော့ လူတွေက စိတ်ပျက်နေကြပါတယ်။ နိုင်ငံတော် အစိုးရက ဆင်းရဲ မွဲတည်မူ တိုက်ဖျက်ရေး စသဖြင့် ပြောဆိုနေချိန်မှာ အစိုးရ ဌာနဆိုင်ရာတွေက လူတွေဆီက အခွန်တိုး ကောက်တယ်ဆိုတော့ ပြောတာနဲ့ လုပ်တာက တခြားစီ ဖြစ်နေတာကြောင့် ပြည်သူတွေက နားမလည်အောင် ဖြစ်နေကြပါတယ်" ဟု ပြောသည်။
ရခိုင်ပြည်နယ် အတွင်းရှိ ငါးလုပ်ငန်းဖြင့် အသက်မွေးသူ ပြည်သူများ အနေဖြင့် နှစ်စဉ် နှစ်တိုင်း လိုင်စင်ကြေးဆိုပြီး အစိုးရကို အခွန်ငွေများ ပေးသွင်းရသလို ပင်လယ်ပြင်သို့ ထွက်၍ ငါးဖမ်းပါကလည်း ပင်လယ်ပြင် လုပ်ကွက်များကို လေလံရထားသူများကို တဖန် ငွေများ ပေးသွင်းကြရသဖြင့် အခွန်များထပ်နေ၍ အမြတ်မရှိဘဲ အရှုံးသာ ရှိနေကြသည်ဟု သိရသည်။
၎င်းပြင် ရခိုင်ပင်လယ်ပြင်တွင် စစ်အုပ်စု မိသားစုများနှင့် သူတို့နှင့် ဆက်စပ်သည့် Asia World ကဲ့သို့ ကုမ္ပဏီများမှ တရုတ်၊ စင်္ကာပူ စသော ငါးဖမ်း ကုမ္ပဏီများနှင့် ပူးပေါင်းကာ ငါးဖမ်း သင်္ဘောကြီးများဖြင့် နေ့ည မပြတ် ငါးဖမ်းနေသဖြင့် ရခိုင်ပင်လယ်ပြင်တွင် ငါးများ ရှားပါးလာပြီး စက်လှေငယ်များနှင့် လုပ်ကိုင် စားသောက်နေကြသော သာမန် ဒေသခံ ပြည်သူများမှာ လုပ်ကိုင် စားသောက်ရသည်မှာ ယခင်ကလို အဆင်မပြေ တော့ကြောင်း သိရသည်။
ယခု နောက်ဆုံး ၀င်လာသော သတင်း အရ မြောက်ဦး တွင်လည်း အရက်ဆိုင်၊ လဘက်ရည် ဆိုင်များနှင့် သာမန် လမ်းဘေး ဈေးဆိုင် များပါ မကျန် ကျပ် ၁၀၀၀၀ နုန်းဖြင့် အစိုးရမှ အခွန်များ ကောက်ခံ နေကြောင်း သိရသည်။
No comments:
Post a Comment