ဖိုးရှုပ်။ ။ အခုတပတ်ကတော့ ပွားစရာ တော်တော်များတယ် ကြွက်စုတ်ရေ။
ကြွက်စုတ်။ ။ လုပ်ပြီ … ဒီမှာ ဟေ့ကောင် အပွားကြီးသက်သက်ဖြင့်အလုပ်မဖြစ်ဘူးဆိုတာ သဘောပေါက်နော်။
ဖိုးရှုပ်။ ။ သြော် မင်းကလည်းကွာ … ဘာမှ မပြောဘဲ ကြောင်တောင်တောင် လုပ်နေတာထက် စာရင် ပွားတာက တော်သေးတာပေါ့ မဟုတ်ဘူးလား။
ဖိုးရှုပ်နှင့် ကြွက်စုတ်တို့ စကားကောင်းနေစဉ် သူတို့ရှိရာ ကျုံးနဘေးသို့ ဦးရုက္ခစိုး ပျာယီးပျာယာ ရောက်ရှိလာသည်။
ဖိုးရှုပ်။ ။ ဘာလဲ ဦးရုက္ခစိုး … ရင်တုန်နေသေးလား။
ရုက္ခစိုး။ ။ အခုဟာက ရင်တုန်တာမဟုတ်ဘူး၊ ရင်ခုန်တာကွ။
ကြွက်စုတ်။ ။ ဘယ်လို … ဒီနတ်ကလည်း တမျိုးပါလား။ ဘာလဲ ရုက္ခစိုး လူပျိုကြီးမလုပ်ဘဲ မိန်းမယူတော့မလို့လား။
ရုက္ခစိုး။ ။ မဟုတ်ရပါဘူးကွာ … လာမယ့် ဗယ်လင်တိုင်းဒေး အကြောင်း ကြားလာလို့ပါ။
ဖိုးရှုပ်။ ။ အဲဒီသွားဖို့ ဆိုရင်လည်း ဦးရုက္ခစိုး ဘေးမှာ နတ်သမီးလေး တပါးပါမှဖြစ်မှာဗျား။
ကြွက်စုတ်။ ။ ဘာလဲ ပထမဆုံး ရောက်လာမယ့် စုံတွဲ ၅၀၀ ကို အခန်းမဲဖောက်ပေးမယ်၊ ဒင်နာကျွေးမယ် ဆိုတဲ့အစီအစဉ် သဘောကျ လို့လား …။ မလုပ်ပါနဲ့ ဦးရုက္ခစိုးရယ် … ဘယ်သူ တရားပျက်ပျက် ကိုယ်မပျက်နဲ့တဲ့ မှတ်ထားနော်။
ရုက္ခစိုး။ ။ အဝှာပါးစပ်က အဝှာစကားထွက်ပြန်ပြီ။ ငါက သွားမလားကွ။ သူတို့အစီအစဉ်ကြီး ကြားပြီး ဘယ့်နှာကြီးတုန်းလို့ စဉ်းစားမိလို့ပါ။
ဖိုးရှုပ်။ ။ ဒီမိုကရေစီ ခေတ်ကြီးလေ ဦးရုက္ခစိုးရယ်။ သူတို့ မဲမဖောက်ပေးလည်း စုံတွဲတွေက သူတို့ဘာသာ အခန်းရှာ သွားကြမယ် ဆို တာ သိထားလို့ အဆင်ပြေအောင် လုပ်ပေးတာ နေမှာပါ။
ရုက္ခစိုး။ ။ တော်တန်တိတ် အကြော်ပန်းကန်ဖိတ် … ဒီမိုကရေစီ ဆိုပြီး မြန်မာနိုင်ငံကို အဝှာနိုင်ငံ ဖြစ်အောင် လုပ်တာတော့ ငါလက် မခံ ဘူးကွာ။ ထားလိုက်တော့ အဲဒီကိစ္စက သူတို့ အဝှာကိစ္စတွေ၊ မပြောချင်တော့ဘူး။ ငါ ပြောချင်တာက အဲဒါမဟုတ် ဘူးကွ။ ဗယ်လင်တိုင်း ဒေးအကြောင်းက ဖေ့စ်ဘုပေါ်ပြန့်နေလို့သာ မင်းတို့သွားချင် သွားပါစေတော့လို့ သတင်းယူလာတာ။
ကြွက်စုတ်။ ။ ကျနော်တို့ သွားလို့ မဖြစ်ပါဘူး ဦးရုက္ခစိုးရယ်။ ကိုယ့်ဘာသာပဲ နိုင်ငံရေး ယောင်ယောင်၊ ဂျာနယ်လစ် ယောင်ယောင် လုပ် နေရလို့ အတွဲရှာဖို့ မအားသလိုလို လုပ်နေရတာက သိက္ခာ ရှိပါတယ်။ တော်ကြာ သွားလိုက်မှ အရှက်တွေ ကွဲနေပါ့မယ်။
ရုက္ခစိုး။ ။ မသွားရင်လည်း ပြီးတာပဲ။ ဒါနဲ့ မင်းတို့ ဟိုကိစ္စ ကြားပြီးပြီလား။
ဖိုးရှုပ်။ ။ လုပ်ပြန်ပြီ အစမရှိ အဆုံးမရှိနဲ့။ သူ့ကိုသူ ကြော်ငြာ မော်ဒယ်လ်များ မှတ်နေလား မသိဘူး။
ရုက္ခစိုး။ ။ မင်းက စကား ဆုံးအောင်မစောင့်ဘဲ အတင်း ဝင်ပြောတာကိုးကွ။ ငါပြောတာက ၅ ထောင်တန် ဆင်းကတ် ကိစ္စ။
ကြွက်စုတ်။ ။ ဒါများ။ လူတွေကြားမှာ ပွထနေတာ ကြာပေါ့။ လွယ်တာကို ခက်အောင် လုပ်တဲ့ နေရာမှာတော့ တို့မြန်မာကို ဘယ်သူမှ မီမယ် မထင်ဘူးနော်။ ဖုန်းတွေ ဈေးပေါပေါနဲ့ ရောင်းနိုင်ရဲ့သားနဲ့ တမင်ကို ဈေးမကြီးကြီးအောင် လုပ်နေတယ်။
ရုက္ခစိုး။ ။ ငါ တခု စဉ်းစားမိတာ ရှိလို့ကွ။ တို့သမ္မတကြီးသာ ငါးထောင်တန် ဆင်းကတ်တွေ ရောင်းဖို့ အမိန့်ပေးလိုက်မယ် ဆိုရင် လူ တွေက သူ့ကို ပြေးပြီး ဖက်နမ်းကြမယ် ထင်တယ်နော်။
ဖိုးရှုပ်။ ။ ဖြစ်နိုင်တယ်။ သမ္မတ ရာထူးက မဆင်းပါနဲ့တော့ လို့တောင် ပြောချင်ပြောမှာ။
ရုက္ခစိုး။ ။ စဉ်းစဉ်းစားစားလည်း လုပ်ပါကွယ်။ ငါက သဘောပြောတာပါ။ သူ့ခမျာ သမ္မတသာ ဖြစ်ရှာတာ သူပြီးတာနဲ့ ပြီးတာမှ မဟုတ် ဘဲ။ တော်ကြာ ဆက်သွယ်ရေးဝန်ကြီးက သူလက်နဲ့ရေးတာ ခြေနဲ့ဖျက်ပါတယ်ဆိုပြီး ဒေါပွရင် တို့သမ္မတကြီး ဘယ်နား သွားပုန်း ရမှန်း မသိဖြစ်နေပါ့မယ်။
ဖိုးရှုပ်။ ။ ဟုတ်တော့လည်း ဟုတ်သားဗျ။ ဆက်သွယ်ရေးက လူတွေကို ၅ သိန်းတန်ဖုန်းတို့၊ ၃ သိန်းတန်ဖုန်းတို့ ရောင်းစားဖို့ ကြံနေ ချိန်မှာ ၅ ထောင်တန် ဆင်းကတ် ထုတ်မယ်၊ ထုတ်လို့လည်းရတယ် ဆိုတော့ အကုန် ရှော့ခ်ဖြစ်ကုန်တာပေါ့။
ကြွက်စုတ်။ ။ သမ္မတ ခမျာလည်း အပြောင်းအလဲကို လိုချင်ရှာလို့ လုပ်ရှာ၊ ပြောရှာပါတယ်ဗျာ။ ကြားက ဖိုးကန့်လန့် တွေကြောင့် အရှေ့ကို မရောက်ဘဲ တန်းလန်းကြီးတွေ ဖြစ်နေတာ။
ရုက္ခစိုး။ ။ သြော် မင်းတို့ကို နောက်တခု ပြောရဦးမယ်။ ဖော်ဗျူဟာ ဆိုတဲ့မီဒီယာက ရေးထားတာကွ။ သူရေးထားတဲ့ အတိုင်းဆိုရင် မဟုတ်တာလုပ်ထားလို့ ငရဲကျနေတဲ့သူတွေ နတ်ပြည်ရောက်ဖို့ လွယ်သွားပြီ။
ဖိုးရှုပ်။ ။ ဟင် ဆန်းလှချည်လား။ ဒီပုံအတိုင်းဆို သေရင်ငရဲကျဖို့ သေချာနေတဲ့ ပေါတာကြီးတို့ အုပ်စုအတွက် အဆင်ပြေ သွားတာ ပေါ့နော်။
ရုက္ခစိုး။ ။ အေးပေါ့ကွာ … အဲဒီမီဒီယာက ရေးထားတယ်။ ကောင်းကင်နဲ့မြေအောက် ရထားလမ်းဖောက်တော့မယ်တဲ့။ သူရေးတဲ့ အ တိုင်း ဆို ငရဲကနေ ရထားလက်မှတ်ဝယ်ပြီး ကောင်းကင်ကို သွားလိုက်ရုံပဲ ဟီဟိ။
ကြွက်စုတ်။ ။ လုပ်ပြီ ဦးရုက္ခစိုးရာ။ မနောက်ပါနဲ့။ မိုးပျံရထားလမ်းနဲ့ မြေအောက်ရထားလမ်း ဖောက်မယ် ပြောတာပါ။
ဖိုးရှုပ်။ ။ ဟာ ဒါဆို တိုက်တိုက်ဆိုင်ဆိုင်ပဲ ကျနော်လည်း တွေ့လိုက်တယ်။ ဂျီဗလာ ဆိုတဲ့မီဒီယာ က ရေးထားတာလည်း တော်တော် ဆန်းတယ်။ မြေအောက်မိုးပျံရထားလမ်း ဖောက်မယ်တဲ့။ တကယ်သာ ဖောက်ရင် ကမ္ဘာမှာ မြန်မာဟေ့လို့တောင် ကြွေးကြော်လို့ရတယ်။
ရုက္ခစိုး။ ။ အဲဒါတွေ မင်းတို့ကို ပြောချင်တာ။ ကိုယ်က မီဒီယာလုပ်မယ်၊ စတုတ္ထမဏ္ဍိုင် ဘာညာဆိုပြီး သူများကို ထောက်ပြမယ် ဆိုရင် ကိုယ့်ကို ပြန်ထောက်ပြစရာ မရှိအောင် နေရမယ်၊ ကိုယ့်ဘက်ကလည်း မှန်နေရမယ်ပေါ့ကွာ။
ဦးရုက္ခစိုး၏ ဆုံးမစကားကို ဖိုးရှုပ်နှင့် ကြွက်စုတ်တို့ ငြိမ်ပြီး နားထောင်နေကြသည်။
“အိမ်းကြိုးစားကြ၊ ကြိုးစားကြ … ကြိုးစားမှ ဒိုးပြား … အဲ ယောင်ကုန်ပြီ။ ကြိုးစားမှ မီဒီယာ ကျားခေါင်းဓားစက်ကြီးနဲ့ ဝေးမှာဟေ့” ဟု ဦးရုက္ခစိုးက ပြောလိုက်သည်။
ပြောပြောဆိုဆို ထိုနေရာမှ ရုတ်ချည်း ပျောက်ကွယ်သွားသော ဦးရုက္ခစိုးကြောင့် ဖိုးရှုပ်ကော ကြွက်စုတ်ပါ မည်သည့် စကားမှ ပြန်ပြော ချိန်မရဘဲ ဆံ့တငင်ငင် ကျန်ရစ်ခဲ့ကြ လေတော့သတည်း။
No comments:
Post a Comment