ပန်းမြတ်ဇော်
ဟာသ,သရုပ်ဆောင်များသည် ဖက်ရှင်ရှိုးများ၊ ဗီစီဒီရိုက်ကူးမှုများ၊ ဂီတဖျော်ဖြေပွဲအပါအ၀င် ဂီတဆုပေး ပွဲများတွင် အဓိကအခန်းကဏ္ဍမှ ပါဝင်လုပ်ကိုင်ခွင့်ရရှိလာပြီဖြစ်သည်ဟု ဟာသသရုပ်ဆောင်ဂွမ်းပုံက ပြောဆိုလိုက်သည်။
ယင်းသို့ပါဝင်လာရာတွင် ဟာသသရုပ်ဆောင်နှင့် မော်ဒယ်၊ မင်းသမီးများဖြင့် တွဲဖက်သရုပ်ဆောင်ကာ တင်ပြခြင်း၊ ဟာသ,သရုပ်ဆောင်အချင်းချင်း ဟာသပုံစံမဟုတ်သော ပုံမှန်ဇာတ်ရုပ်ဖြင့် သရုပ်ဆောင် ခြင်း၊ တေးသီချင်းများ သီဆိုဖျော်ဖြေခြင်းတို့ဖြစ်ကြသည်။
ဟာသ,သရုပ်ဆောင်ဂွမ်းပုံက “ဟာသခေတ်လို့ကို ပြောလို့ရပါတယ်။ ဒါဟာ ကောင်းတဲ့အလားအလာ ပါပဲ။ အရင်က ဟာသသရုပ်ဆောင်တွေအတွက် နေရာနည်းတယ်။ အခုလိုတော့ အခမ်းအနားတော် တော်များများမှာ ပါဝင်ခွင့်ရရှိလာတာပေါ့။ အဲဒါကတော့ ၀မ်းသာစရာပါ” ဟု ဆိုသည်။
ယင်းကဲ့သို့ အဓိကအခန်းကဏ္ဍများတွင် ပါဝင်ခွင့်ရရှိလာခြင်းမှာ မင်းသား၊ မင်းသမီးများနေရာတွင် ဟာသသရုပ်ဆောင်များအား ပြောင်းလဲပါဝင်ခြင်းဖြင့် ပရိသတ်၏အမြင်အား ပြောင်းလဲစေနိုင်ခြင်း၊ ပရိသတ်များသည် ဟာသသရုပ်ဆောင်များအား အားပေးမှုများရှိခြင်းတို့ကြောင့်လည်းဖြစ်ကြောင်း အနုပညာရှင်များက သုံးသပ်ပြောဆိုလိုက်သည်။
“ရိုက်ကူးမှုပုံစံတွေကတော့ အမြဲတမ်းပြောင်းလဲနေတာပါ။ ကြော်ငြာမှာလည်း အခုဆို ဟာသသရုပ် ဆောင်တွေနဲ့ ရိုက်လာကြတယ်။ မင်းသား၊ မင်းသမီးထက် ဟာသ,သရုပ်ဆောင်ဆိုတော့ သူတို့မျက်နှာ မြင်တာနဲ့ ပရိသတ်က ပိုပြီးသဘောကျကြတာဆိုတော့ ဟာသသရုပ်ဆောင်တွေနဲ့ တွဲဖက်ပြီးရိုက်လာ ကြတယ်”ဟု ဒါရိုက်တာဇော်ကိုကိုက ပြောကြားသည်။
ဒါ့အပြင် လူငယ်ပရိသတ်အကြားထင်ရှားသော “လွမ်းလွန်းလို့” တေးသီချင်းအား ဟာသသရုပ်ဆောင် ကျင်ဝှက်ဖြင့် ရိုက်ကူးဖြစ်ခဲ့ပုံကိုလည်း အဆိုတော်ရဲရင့်အောင်က “ပရိသတ်ကို အမြင်ဆန်းအောင် ဟာသအမြင်လေးနဲ့ ရိုက်ချင်တယ်။ အဲဒီလွမ်းရမယ့်ဇာတ်ကောင်နေရာမှာ ဟာသသရုပ်ဆောင်ထည့် ကြည့်တယ်။ ဦးကျင်ဝှက်နဲ့ အရမ်းအဆင်ပြေတာနဲ့ ရိုက်ကူးဖြစ်ခဲ့တာပါ”ဟု ပြောသည်။
ယင်းသို့ ဟာသသရုပ်ဆောင်များမှ အဓိကဇာတ်ဆောင်များနေရာတွင် ပါဝင်သရုပ်ဆောင်လာသလို နာမည်ကျော် မင်းသား၊ မင်းသမီးများသည်လည်း လူရွှင်တော်များအဖြစ် ပြောင်းလဲလုပ်ဆောင်လျက်ရှိ သည်။
No comments:
Post a Comment