လူထု ပါဝင်သော လုပ်ငန်းစဉ်ဖြင့် အကောင်အထည် ပေါ်သည်အထိ လုပ်ဆောင်ရန်လည်း အမျိုးသမီးများ အပေါ် အကြမ်းဖက်မှု ပပျောက်ရေး အမျိုးသမီးဖိုရမ်မှ တဆင့် တိုက်တွန်းကြောင်း သိရသည်။
“အပြည်ပြည်ဆိုင်ရာ အမျိုးသမီးများအပေါ် အကြမ်းဖက်မှု ပပျောက် ရေးနေ့ အထိမ်းအမှတ်ပွဲ” ကို နိုဝင်ဘာလ ၂၄ ရက်နေ့က ရန်ကုန်မြို့ ပြည်သူ့ ရင်ပြင်တွင် အမျိုးသမီးများ အကြမ်းဖက်မှု ပပျောက်ရေး အဖွဲ့ဝင်ပေါင်း ၂၈ ဖွဲ့ တို့မှ ဦးစီး၍ ကျင်းပခဲ့သည်။
အမျိုးသမီးများသည် ရိုက်နှက် အကြမ်းဖက်ခံရခြင်း၊ ဓလေ့ထုံးတမ်းများအရ ကျားမရေးရာ တန်းတူညီမျှမှုမရှိခြင်း စသည်ဖြင့် အမျိုးမျိုး ဖိနှိပ်ခံရသူများ ရှိကြရာ ထိုသို့ ဖိနှိပ်ခံရမှုများ ပပျောက်စေရန် ရည်ရွယ်ချက်ဖြင့် ကျင်းပခြင်း ဖြစ်သည်ဟု ဆိုသည်။
အမျိုးသမီးများအပေါ် အကြမ်းဖက်မှု ပပျောက်ရေး ၁၆ ရက်တာ လှုပ်ရှားမှု အထိမ်းအမှတ်အဖြစ် လူထု အသိပညာပေး အခမ်း အနား အစီအစဉ်တရပ်ကိုလည်း လူမှုအဖွဲ့အစည်းပေါင်း ၂၇ ဖွဲ့က နိုဝင်ဘာ ၂၅ ရက်နေ့မှ ဒီဇင်ဘာ ၁၀ ရက်အထိ ၁၆ ရက်တာ ပူးပေါင်း ဆောင်ရွက်သွားမည် ဖြစ်ကြောင်း သိရသည်။
ယင်းအထိမ်းအမှတ်ပွဲသို့ တက်ရောက်လာသူများ စုပေါင်း၍ ဖိုရမ်ကျင်းပပြီး အမျိုးသမီးများ အခွင့်အရေးကို ဦးတည်သည့် အချက် ၆ ချက်ပါ တောင်းဆိုချက်ကို ထုတ်ပြန်ခဲ့သည်။ ယင်းတောင်းဆိုချက်များအား အကောင်အထည် ဖော်နိုင်မည့် လုပ်ငန်းစဉ်များကို ဆက်လက် လုပ်ဆောင် သွားမည်ဟုလည်း ဆိုသည်။
မြန်မာနိုင်ငံရှိ ဥပဒေနှင့် ပြဋ္ဌာန်းချက်များအနက် အမျိုးသမီးများ ဦးဆောင်ပါဝင်မှုကို အဟန့်အတား ဖြစ်စေသည့် ရည်ညွှန်း ဖော်ပြချက်များကို သုံးသပ်ပြင်ဆင်သွားရန်၊ ကျား၊မ အခြေပြု တရားသေ အစွဲများနှင့် အမျိုးသမီး အခွင့်အရေးများ အကြောင်းနှင့် ပတ် သက်သည့် လူထုပညာပေး အစီအစဉ်များကို ထိရောက် ကျယ်ပြန့်စွာ တိုးမြှင့် လုပ်ဆောင်ရန် စသည့် အချက်များ အပါအ၀င် အချက် ၆ ချက်ကို တောင်းဆိုလိုက်ခြင်းလည်း ဖြစ်သည်။
အမျိုးသမီး ဖိုရမ်အနေဖြင့် ယင်းအချက်များကို အကောင်အထည် ဖော်နိုင်ရန်အတွက် ဥပဒေပြုရေး မဏ္ဍိုင်ဖြစ်သည့် လွှတ်တော်သို့တင်ပြခြင်း၊ အမျိုးသမီးများဆိုင်ရာ မူဝါဒများ ပေါ်ပေါက်လာရန် ဆောင်ရွက်ခြင်းများ၊ အမျိုးသမီးများ ခေါင်းဆောင်မှု စွမ်းရည်မြှင့် သင်တန်းများ၊ မီဒီယာနှင့် ရုပ်ရှင်အနုပညာရှင်များ အကူအညီဖြင့် လုထုပညာပေး လုပ်ငန်းများ အကောင်အထည် ဖော်မှုများကို စောင့်ကြည့်မည့် အဖွဲ့ကို ဖွဲ့စည်းခြင်းများ ဆက်လက် လုပ်ဆောင် သွားမည်ဖြစ်သည်ဟုလည်း ဆိုသည်။
ထိုပွဲကို အမျိုးသမီးများအပေါ် အကြမ်းဖက်မှု ပပျောက်ရေးနှင့် ပတ်သက်ပြီး လူထုအတွင်း အသိပညာ မြှင့်တင်ရန်၊ အမျိုးသမီးများအပေါ် အကြမ်းဖက်မှုအား ကာကွယ်တားဆီးရာတွင် အမျိုးသားများ၏ ပူးပေါင်းပါဝင်မှုကို မြှင့်တင်ရန်၊ ကျား၊ မ အခြေပြုအကြမ်း ဖက်မှုသည် လူ့အခွင့်ရေးဆိုင်ရာ ပြဿနာတခုဖြစ်ကြောင်းကို ဒေသတွင်းနှင့် နိုင်ငံတော်အဆင့်အထိ အသိပညာပေး မြှင့်တင်ပေး ရန် စသည့် ရည်ရွယ်ချက် သုံးရပ်ဖြင့် ကျင်းပခြင်း ဖြစ်ကြောင်း သိရသည်။
နိုဝင်ဘာ၂၅နေ့သည် အပြည်ပြည်ဆိုင်ရာ အမျိုးသမီးများအား အကြမ်းဖက်မှု ဆန့်ကျင်ရေးနေ့ဖြစ်ပြီး ထိုနေ့ကို ဖဲကြိုးဖြူနေ့ ဟု လည်း ခေါ်သည်။
အဖွဲ့ဝင်များက အခမ်းအနားသို့ တက်ရောက်လာသူများကို နိုဝင်ဘာ ၂၅ ရက်နေ့မှ ဒီဇင်ဘာ ၁၀ ရက်နေ့အထိ အဖြူရောင်အင်္ကျီ များ ဝတ်ဆင်ရန်လည်း တိုက်တွန်းသည်။
“အားလုံးမှာ အဖြူရောင်အင်္ကျီ တထည်တော့ ရှိကြမယ်လို့ ထင်ပါတယ်။ အခုလို ၁၆ ရက်တာမှာ အဖြူရောင်အင်္ကျီကို ဝတ်ထား တာ၊ ဒါမှမဟုတ် ဖဲကြိုးဖြူက်ို တပ်ဆင်ထားတာဟာ အမျိုးသမီးတွေ အကြမ်းဖက်မှု ပပျောက်ရေးမှာ ပါဝင်တယ် ဆိုတဲ့ အဓိပ္ပာယ်ပါပဲ။ အဖြူရောင်ဟာ ငြိမ်းချမ်းမှု သင်္ကေတပါ။ ငြိမ်းချမ်းရေးအတွက် အားလုံး ပူးပေါင်း ဆောင်ရွက်ကြပါ”ဟု ကျားမ ရေးရာ တန်းတူ ညီမျှရေှး ကွန်ရက်မှ အကြီးတန်းညှိနှိုင်းရေးမှူး မမေစံပယ်ဖြူက ပြောကြားခဲ့သည်။
၁၉၆၀ ပြည့်နှစ် ဒိုမီနီကန်နိုင်ငံက အာဏာရှင် အုပ်ချုပ်ရေး ဆန့်ကျင်ခဲ့တဲ့ မီရာဘဲလ် ညီအစ်မသုံးယောက် နိုဝင်ဘာလ ၂၅ ရက်နေ့ အကြမ်းဖက် လုပ်ကြံခံရမှုအပေါ် အခြေခံပြီးဖြစ်ပေါ်လာခြင်း ဖြစ်သည်။
နိုဝင်ဘာ ၂၅ ရက် နိုင်ငံတကာ အမျိုးသမီးများ အကြမ်းဖက်မှု ပပျောက်ရေးနေ့အတွက် ၁၆ ရက်တာ လှုပ်ရှားမှု၏ အဓိက ဆောင် ပုဒ်မှာ “အိမ်တွင်းငြိမ်းချမ်းရေးမှသည် ငြိမ်းချမ်းသော ကမ္ဘာဆီသို့” ဖြစ်ကြောင်း သိရသည်။
အဆိုပါ လှုပ်ရှားမှုကို ၁၉၉၁ တွင် ကမ္ဘာလုံးဆိုင်ရာ အမျိုးသမီးခေါင်းဆောင်မှု ဗဟိုဌာန (Centre for Women’s Global Leadership) မှ နိုင်ငံတကာ လှုပ်ရှားမှု အသွင်ဖြင့် ဆောင်ရွက်ခဲ့ကြသည်။
ထို လှုပ်ရှားမှုကို ရေဒီယို အသံလွှင့်ခြင်း၊ ဗီဒီယိုနှင့်ရုပ်ရှင်များ ရိုက်ကူးပြသခြင်း၊ အလုပ်ရုံဆွေးနွေးပွဲများ၊ နှီးနှောဖလှယ်ပွဲများ၊ စကားရည် လုပွဲများ ကျင်းပခြင်း၊ ပြဇာတ်များ၊ ဂီတပွဲများ၊ စာအုပ်ပြပွဲများ ပြုလုပ်ခြင်း၊ လက်ကမ်းစာစောင်များ ဖြန့်ဝေခြင်းကိုလည်း ပြုလုပ်ခဲ့ကြသည်။
၂၀၁၂ ခုနစ် နိုဝင်ဘာ ၂၅ ရက်နေ့တွင် အပြည်ပြည်ဆိုင်ရာ အမျိုးသမီးများအပေါ် အကြမ်းဖက်မှု ပပျောက်ရေးကို ကျား၊ မ ရေးရာ တန်းတူညီမျှရေး ကွန်ရက်နှင့်အတူ တခြားလူမှုအဖွဲ့အစည်း ၂၂ ဖွဲ့တို့မှ ရန်ကုန်မြို့တွင် လူထု လမ်းလျှောက်ပွဲနှင့် ကန်တော်ကြီး ပန်းခြံတွင် အခမ်းအနား ကျင်းပပြုလုပ်ခဲ့သည်။
No comments:
Post a Comment