ပန်းမြတ်ဇော်
HIV ဖြင့် အသက်ရှင်နေထိုင်သူများ နှင့် နန်းခင်ဇေယျာတို့သည် နိုဝင်ဘာ ၃၀ ရက် နံနက် ၆ နာရီတွင် ကန်တော်ကြီး၌ လမ်းလျှောက်ကြမည်ဖြစ်သည်။ ယင်းအစီအစဉ်သည် ဒီဇင်ဘာ ၁ ရက်တွင် ကျရောက်မည့် World AIDS Day ကို ကြိုဆိုသည့်အနေဖြင့် PSI က စီစဉ် လုပ်ဆောင်ခြင်းဖြစ်ပြီး နန်းခင်ဇေယျာ အနေဖြင့် ဒုတိယအကြိမ်မြောက် ပူးပေါင်း လုပ်ဆောင်ခြင်းဖြစ်သည်။
“AIDS ဝေဒနာခံစားနေရသူတွေအတွက် လုပ်ကိုင်နေတဲ့အဖွဲ့အစည်းက အကူအညီတောင်းလို့ လုပ်ကိုင်ဖြစ် တာပါ။ ကန်တော်ကြီးမှာပဲ စုရပ်ထားပြီး ကန်တစ်ပတ်လမ်းလျှောက်ကြမှာပါ။ HIV နဲ့ပတ်သက်ပြီး လုပ်ကိုင် နေကြတဲ့အဖွဲ့ အစည်းတွေ အများကြီးပါဝင်မှာ ဖြစ်ပါတယ်။ လူသားအားလုံး အတူတူပဲဆိုတဲ့ အသိကို ပေး ချင်လို့ ဒီလိုပွဲမှာ ပါဝင်တာပါ” ဟု နန်းခင်ဇေယျာက ဆိုသည်။
နန်းခင်ဇေယျာသည် နိုဝင်ဘာ ၂၇ ရက်က ကျင်းပခဲ့သော မြန်မာနိုင်ငံကလေး သူငယ်အခွင့်အရေး ဖွံ့ဖြိုး တိုးတက်ရေး ကွန်ရက်ရန်ပုံငွေဈေးရောင်းပွဲတွင်လည်း အစီအစဉ်တင်ဆက်သူအဖြစ် လုပ်ဆောင်ခဲ့သည့် အပြင် ဒီဇင်ဘာ ၄ ရက်တွင် မန္တလေးသို့သွားရောက်ကာ ကလေးငယ်များနှင့်တွေ့ဆုံပြီး သူမ သင်ကြားခဲ့ သည့် ပညာရပ်များအကြောင်း၊ လေ့လာခဲ့သည့် အကြောင်းအရာများကို ဆွေးနွေးသည့် ပုံစံဖြင့် ဟောပြော မည်ဖြစ်သည်။
No comments:
Post a Comment