ကမ္ဘာ့စီးပွားရေး အကျပ်အတည်းနှင့် လိပ်ပြာ အကျိုးသက်ရောက်မှု

ယနေ့ ကမ္ဘာကြီးဟာ ကျယ်ပြောသော ပထ၀ီဒေသကြီးတခု ဖြစ်သလို ထွေပြားသော လူမှုစီးပွားရေး နယ်ပယ်ကြီး တခုလည်း ဖြစ်ပါတယ်။ ထို့အတူ ပြုပြင်ပြောင်းလဲနေမှုများ၊ ရင်ဆိုင်နေရသော ပြဿနာများ၊ ဖွံ့ဖြိုးရေးလှေကားထစ်များကို တက်ကြရာတွင်လည်း တချိန်တည်း၊ တပြိုင်တည်း မဟုတ်သလို၊ တပုံစံတည်းလည်း မဟုတ်ကြပါဘူး။ ထို့အတူ စဉ်စားအဖြေရှာမှု ပုံစံဟာလည်း အသွင်မတူနိုင်ကြပါဘူး။

ဒါပေမဲ့လည်း စဉ်စားအဖြေရှာမှုတွေမှာတော့ ပြောင်းလဲတိုးတက်နေတဲ့ ခေတ်သစ် စီးပွားရေး အခြေအနေကို နားလည်သိရှိဖို့ဟာ အင်မတန်မှ အရေးကြီးပါတယ်။ ခေတ်သစ်စီးပွားရေး ဖြစ်ပေါ်နေမှုနှင့် လက်ရှိစီးပွားရေး အကျပ်အတည်းများကို လေ့လာသုံးသပ်ရာမှာ ကမ္ဘာ့စီးပွားရေး အင်အားကြီးနိုင်ငံများ ဖြစ်ကြတဲ့ ဂျပန်နဲ့ ဂျာမဏီ နိုင်ငံတွေရဲ့ အကြောင်းကို ယနေ့ တင်ပြသွားပါမယ်။

ဒီနိုင်ငံတွေမှာ လက်ရှိဖြစ်ပေါ်နေတဲ့ စီးပွားရေးဆိုင်ရာ အကျပ်အတည်းတွေကို ဖော်ပြရင်း အမေရိကန်နိုင်ငံ အင်ဒီယားနား တက္ကသိုလ်ဘွဲ့ရ မြန်မာစီးပွားရေး ပညာရှင်လူငယ်များ တင်သွင်းခဲ့သော (World Economic Chaos and Butterfly Effect) စာတမ်းနဲ့ တချို့ စီးပွားရေးပညာရှင်များရဲ့ ဒဿနတွေကို စာဖတ်သူတို့အား ဝေမျှပေးချင်ပါတယ်။

ဂျပန် (သို့) အာရှကျား

ဂျပန်နိုင်ငံ လူစည်ကားရာ တိုကျိုမြို့မှာ ကမ္ဘာ့စီးပွားရေးပျက်ကပ်ကြောင့် အိုးမဲ့အိမ်မဲ့ လူဦးရေအသစ် တိုးများလာနေသည်။ ကမ္ဘာမှာ စီးပွားရေးအားဖြင့် ဒုတိယ အင်အားအကြီးဆုံး နိုင်ငံဖြစ်သလို၊ နေထိုင်ဖို့ ဈေးကြီးပြီး၊ လူနေမှု အဆင့်အတန်း မြင့်မားတဲ့ တိုင်းပြည်တခုလည်း ဖြစ်ပါတယ်။ လောလောဆယ် ကြုံတွေ့နေရတဲ့ ကမ္ဘာ့စီးပွားရေးပျက်ကပ်၏ အကျိုးဆက်ကြောင့် ရာပေါင်းများစွာသော အိုးမဲ့အိမ်မဲ့ဖြစ်နေကြတဲ့ သူတွေဟာ အလုပ်အကိုင်သစ်တွေရဖို့ တန်းစီစောင့်ဆိုင်းနေတာကို တိုကျိုမှာ တွေ့လာနေရပါတယ်။

ဆောက်လုပ်ရေး ယာယီအလုပ်သမားဘ၀ဖြင့် လုပ်ကိုင်ခဲ့တဲ့ အသက် ၆၁ နှစ် အရွယ်ရှိ ဂျပန် အမျိုးသားကြီးကတော့ ဒါဟာ သူ့အတွက် ပထမဦးဆုံးအကြိမ် အိုးမဲ့အိမ်မဲ့ အခြေအနေကို ရောက်ရှိခဲ့တာလို့ စီအန်အန် သတင်းဌာနကို ငိုယိုပြောဆိုနေတယ်။ ခရစ်စမတ်မတိုင်မှီ သူအလုပ်လုပ်ကိုင်တဲ့ ကုမ္ပဏီက ပိတ်လာတာကြောင့် သူဟာ အလုပ်လက်မဲ့ ဖြစ်ခဲ့ရပြီး၊ မိသားစုတွေဆီမှာလည်း နေထိုင်လို့ မရတာကြောင့် အိုးမဲ့အိမ်မဲ့ ဘ၀ကို ရောက်ရှိသွားခဲ့တာလို့ ပြောဆိုတယ်။

ဂျပန်အစိုးရရဲ့ ထုတ်ပြန်တဲ့ ကိန်းဂဏန်းအရ တိုကျိုမြို့မှာ အောက်တိုဘာလမှ မတ်လအထိ ၈၅,၀၀၀ ယာယီအလုပ်သမားအဖြစ် လုပ်ကိုင်နေကြသူတွေဟာ အလုပ်လက်မဲ့ ဖြစ်ကြလိမ့်မယ်လို့ ခန့်မှန်းပြောဆိုနေကြပါတယ်။

ဂျာမဏီ (သို့) ဥရောပ ကျား

ဂျာမဏီဟာ ကမ္ဘာမှာ ပထမ အများဆုံး ပြည်ပသို့ တင်ပို့ရောင်းချနေတဲ့ နိုင်ငံတခုဖြစ်တယ်။

၂၀၀၆ ခုနှစ် ဂျာမန် အလုပ်သမားရေးရာဌာနက ထုတ်ပြန်ခဲ့တဲ့ စာရင်းအရ အလုပ်လုပ်နိုင်သူဦးရေ ၄၃ ဒဿမ ၆၆ သန်း ရှိပါတယ်။ ၂၀၀၇ ခုနှစ် ကမ္ဘာ့ကိန်းဂဏန်းအရ ဂျာမဏီနိုင်ငံရဲ့ ပြည်ပသို့ တင်ပို့ရောင်းချမှု (Export) ဟာ အမေရိကန်ဒေါ်လာ ၁၃၅၄ ဘီလီယံ (၁ ဒဿမ ၃၅၄ ထရီလီယံ) ရှိခဲ့ပြီး၊ ကမ္ဘာမှာ ပထမ အကြီးမားဆုံး ပြည်ပသို့ တင်ပို့ရောင်းချနေတဲ့ နိုင်ငံတခုဖြစ်တယ်။

ဂျာမန်အစိုးရရဲ့ ထုတ်ပြန်ကြေညာတဲ့ ကိန်းဂဏန်းတွေအရ ၂၀၀၈ ခုနှစ် နိုဝင်ဘာလမှာ ပြည်ပသို့ တင်ပို့ရောင်းချမှုဟာ ရာစုနှစ် ၂ စုအတွင်း အနိမ့်ဆုံးအဆင့်ကို ရောက်ရှိခဲ့တယ်။ ဒါဟာ ၁၉၉၀ ခုနှစ် အောက်တိုဘာလက စတင်ရင် ပထမဦးဆုံး အနိမ့်ဆုံးအဆင့်ကို ရောက်ရှိသွားတာဖြစ်ပြီး၊ ပြည်ပသို့ တင်ပို့နေမှု တနှစ်အတွင်း ၁၀ ဒဿမ ၆ ရာခိုင်နှုန်း ကျဆင်းခဲ့တာ ဖြစ်ပါတယ်။ နိုဝင်ဘာလမှာ ဂျာမဏီရဲ့ ထုတ်ကုန်ဟာ ၁၂ ရာခိုင်နှုန်းနှင့် သွင်းကုန်ကတော့ ၅ ဒဿမ ၆ ရာခိုင်နှုန်းထိ ကျဆင်းခဲ့ကြောင်း ဖော်ပြထားတယ်။

လောလောဆယ် ဂျာမဏီနိုင်ငံမှာ ကုမ္ပဏီ တော်တော်များများဟာ ကုန်ထုတ်လုပ်မှုတွေ လျှော့ချနေပြီး၊ အလုပ်အကိုင်တွေကိုလည်း လျှော့ချနေတာတွေ့ရတယ်။ ဂျာမဏီနိုင်ငံ၏ လက်ရှိစီးပွားရေး အခြေအနေဟာ ဒုတိယကမ္ဘာစစ်နောက်ပိုင်း အဆိုးရွားဆုံး အခြေအနေကို ရောက်ရှိနေတယ်လို့ ဆိုပါတယ်။

စီးပွားရေးပညာရှင်များ၏ သုံးသပ်ချက်

အမေရိကန် စီးပွားရေးပညာရှင်နဲ့ ပြည်ထောင်စု ဗဟိုဘဏ် အကြီးအကဲဟောင်း အယ်လန် ဂရင်းစပင်းက ကမ္ဘာ့စီးပွားရေးကို နှိုင်းယှဉ်သုံးသပ်ပြောဆိုခဲ့ရာမှာ အမေရိကန်ရဲ့ စီးပွားရေးဟာ လှည်းတစီးရဲ့ ၀န်းရိုးတခုဖြစ်ပြီး၊ ကျန်တဲ့ ကမ္ဘာရှိ အခြားနိုင်ငံတွေရဲ့ စီးပွားရေးကို လှည်းရဲ့ ဒေါက်တိုင်များအဖြစ် တင်စားသုံးနှုန်းခဲ့ဖူးပါတယ်။ ဆိုလိုတာက အမေရိကန်ရဲ့ စီးပွားရေးဟာ တခြားနိုင်ငံတွေကို သက်ရောက်နိုင်စေတယ်ဆိုတဲ့ အချက်ပါ။

အမေရိကန်မှာ အစိုးရက အမေရိကန် ၀ါဂွမ်းစိုက်ပျိုးတဲ့ လယ်သမားတွေကို ငွေကြေးထောက်ပံ့မှုပေးလိုက်ရင် အာဖရိက က နိုင်ငံငယ်တွေဖြစ်တဲ့ ၀ါဂွမ်းစိုက်ပျိုးသူတွေကို ဒုက္ခရောက်စေနိုင်ပါတယ်။ အမေရိကန် လယ်သမားတွေဟာ ၀ါဂွမ်းတွေ ပိုမိုထုတ်လုပ်ပြီး၊ ကမ္ဘာ့ဈေးကွက်မှာ ဈေးနှုန်းချိုသာစွာဖြင့် တင်ပို့ရောင်းချ နိုင်ကြတယ်။ အစိုးရထောက်ပံ့မှု မရှိ၊ နည်းပညာလည်း မရှိ၊ လူကိုယ်တိုင် စိုက်ပျိုးထုတ်လုပ်နေတဲ့ အာဖရိနိုင်ငံများရှိ ၀ါထုတ်လုပ်နေကြတဲ့ အာဖရိကန် လယ်သမားတွေအတွက်တော့ အတော်ကို ဒုက္ခရောက်ကြပါလိမ့်မယ်။ ထုတ်လုပ်မှုက သိပ်မရှိ၊ ဈေးနှုန်းကလည်း ကမ္ဘာ့ဈေးကွက်မှာ ကျဆင်းလာမှာမို့ သူတို့ကို အများကြီး သက်ရောက်လာစေနိုင်တဲ့ အချက်ဆိုတာပါပဲ။

တချို့ စီးပွားရေး ပညာရှင်တွေကတော့ နိုင်ငံတနိုင်ငံရဲ့ စီးပွားရေးဟာ တခြားနိုင်ငံတွေကို သက်ရောက်စေနိုင်ကြောင်း ဒိုမီနီ သီအိုရီနဲ့ အဓိပ္ပာယ်ဖွင့်ဆိုခဲ့တယ်။ ဥပမာ- ၁၉၉၇ ခုနှစ် ဇူလိုင်လမှာ ထိုင်းနိုင်ငံက သူတို့ရဲ့ ဘတ်ငွေကို လျှော့ချခဲ့တယ်။ ဒီလျှော့ချခဲ့မှုကြောင့် ပြည်တွင်း အရင်းအနှီးအများစုဟာ အိမ်ယာမြေဈေးကွက်တွေမှာ နစ်နေခဲ့တယ်။ အဲဒီနောက် စတော့ အစုရှယ်ရာ ဈေးကွက်တွေ ကျဆင်းခဲ့တယ်။ ထိုင်းနိုင်ငံက စတင်ဖြစ်ပွားခဲ့တဲ့ ငွေကြေးဆိုင်ရာ အကျပ်အတည်းဟာ ထိုင်းနိုင်ငံမှာ ရပ်မနေဘဲ အိမ်နီးချင်း အာရှနိုင်ငံတွေ အပါအ၀င် တကမ္ဘာလုံးကို ပျံ့နှံ့သွားခဲ့တယ်။ ၁၉၉၇ ခုနှစ်မှာ ဖြစ်ပေါ်ခဲ့တဲ့ အာရှစီးပွားရေး အကျပ်အတည်း ပြဿနာဟာ ဒီနေ့ အမေရိကန်မှာ ရင်ဆိုင်နေရတဲ့ စီးပွားရေးပျက်ကပ်ကြီးနဲ့ အလားသဏ္ဍာန် တူပါတယ်။

ဒိုမီနို သီအိုရီ

၂၀၀၇ ခုနှစ် ကမ္ဘာ့စီးပွားရေး အင်အားကြီးနိုင်ငံဖြစ်တဲ့ အမေရိကန်နိုင်ငံက စတင်ဖြစ်ပွားခဲ့တဲ့ စီးပွားရေး ၀ရုန်းသုန်းကား ဖြစ်ပေါ်ခြင်း၊ ပရမ်းပတာဖြစ်ခြင်း (Economic Chaos) ဟာ လှည်းဝန်ရိုး ကျိုးသွားတာမို့ ၁၉၉၇ ခုနှစ်မှာ ခံစားရမှာထက် ကြီးတာကတော့ ဧကန် မလွဲပါဘူးလို့ ဆိုတယ်။

၁၉၉၇ ခုနှစ် အာရှ ငွေကြေးဆိုင်ရာနဲ့ စီးပွားရေးဆိုင်ရာ အကျပ်အတည်းဖြစ်ပြီးနောက် ဒီလိုစိမ်ခေါ်ချက်မျိုးတွေ ထပ်မံဖြစ်နိုင်၊ မဖြစ်နိုင် နိုင်ငံတကာ စီးပွားရေးပညာရှင်တွေက မှန်းဆကြည့်ကြတယ်။ နာမည်ကျော် ဘောဂဗေဒ ပညာရှင် ပေါလ်ခရူမန်က နောက် ၁၀ နှစ်အတွင်း တကြိမ် ကြုံနိုင်စရာ ရှိသေးတယ်လို့ ၂၀၀၀ ခုနှစ်မှာ ဟောကိန်းထုတ်ခဲ့တယ်။ ဂျပန်စီးပွားရေးပညာရှင် အီဆူကီး ဆာကာတီဘရာကလည်း ကမ္ဘာ့စီးပွားရေးဟာ ဗဟိုရွှေ့ပြောင်းမှုကြီး ဖြစ်နေပြီး၊ ထိုရွှေ့ပြောင်းမှုဟာ ယခင်ကလို နိုင်ငံကြီးတနိုင်ငံမှ အခြားနိုင်ငံတခုသို့ ရွှေ့ပြောင်းမှုမျိုး မဟုတ်။ မြေကမ္ဘာပေါ်မှ မိုးပေါ်ဆိုက်ဘာစပေ့သို့ ရွှေ့ပြောင်းမှုကြီးဖြစ်တယ်။

ပြောင်းလဲမှုဟာ လျင်မြန်လွန်းမှာဖြစ်လို့ နည်းပညာ (Technology) မကိုင်နိုင်လျှင် ရှော့ခ် (Shock) ဒဏ်ဟာ မခံမရပ်နိုင်လောက်အောင်ကို ဖြစ်သွားမယ်လို့ ဟောကိန်းထုတ်ခဲ့တယ်။ သူတို့အဆိုအရ အစိုးရတွေဟာ ပြင်ဆင်မှု မရှိဘူး၊ နည်းပညာကို အသုံးမချဘူးဆိုရင် နောင်ဖြစ်ပေါ်လာမယ့် စီးပွားရေး အကျပ်အတည်းဟာ ၁၉၉၇ ခုနှစ်ထက် အဆပေါင်းများစွာ ပိုမိုခံစားရလိမ့်မယ်လို့ ဆိုတယ်။ မဖွံ့ဖြိုးသေးတဲ့ နိုင်ငံတွေ၊ ဆင်းရဲတဲ့ နိုင်ငံတွေဟာ ကမ္ဘာ့စီးပွားရေး ဆူနာမီ လှိုင်းတံပိုးအောက်မှာ သားကောင်တွေ ဖြစ်ကြလိမ့်မယ် ဆိုတာပါပဲ။

လွန်ခဲ့တဲ့ ၁၀ နှစ်က သူတို့ရဲ့ ဟောကိန်းဟာ မှန်ကန်နေကြောင်း ဒီနေ့ ပြသနေတယ်။ တချို့ စီးပွားရေး ပညာရှင်တွေကတော့ အစိုးရတွေ၊ ဥပဒေပြုအမတ်တွေ၊ နိုင်ငံရေးသမားတွေဟာ ကြိုတင်သိရက်နဲ့ ဘာမှ ပြင်ဆင်မှုတွေ၊ ကာကွယ်မှုတွေ မလုပ်တဲ့အတွက် အစိုးရတွေရဲ့ တာဝန်မဲ့ လုပ်ရပ်လို့ စွပ်စွဲပြောဆိုခဲ့ကြတယ်။

မနေ့က အင်ဒီယားနားတက္ကသိုလ် (Indiana University) မှာ ကျင်းပခဲ့တဲ့ ကမ္ဘာ့စီးပွားရေး ကပ်ဆိုးအကြောင်း ဆွေးနွေးသုံးသပ်ကြတဲ့ စီးပွားရေးဆိုင်ရာ နှီးနှောဖလှယ်ပွဲမှာ အမေရိကန်မှာ နေထိုင်နေကြတဲ့ စီးပွားရေး လေ့လာသုံးသပ်နေသူ မြန်မာပညာရှင်များလည်း တက်ရောက်ခဲ့ကြတယ်။ မြန်မာ စီးပွားရေးပညာရှင်များက (Butterfly Effect on World Economic Chaos) စီးပွားရေးဆိုင်ရာ စာတမ်းတစောင် တင်သွင်းခဲ့တယ်။

ဒီနှီးနှောဖလှယ်ပွဲမှာ ကမ္ဘာ့စီးပွားရေး ကပ်ဆိုးအကြောင်းနဲ့ ပက်သက်ပြီး၊ မြန်မာစီးပွားရေး ပညာရှင်များက အက်ဒ၀ပ်လိုရင့်ဇ် (Edward Lorenz) ရဲ့ လိပ်ပြာအကျိုးသက်ရောက်မှု (Butterfly Effect) ကို နှိုင်းယှဉ်ပြီး တင်ပြဆွေးနွေးသွားတာ ကြားခဲ့ရတယ်။

လိပ်ပြာ အကျိုးသက်ရောက်မှုဆိုတာ ဘာလဲ။

အတိုချုပ် ရှင်းပြရရင်တော့ ကမ္ဘာ့ရေစီးကြောင်း ပြောင်းလဲမှုဟာ ကမ္ဘာ့ရာသီဥတုကို ပြောင်းလဲသွားစေသလို၊ ကမ္ဘာ့ရာသီဥတု ပြောင်းလဲလာနေမှုဟာ ကမ္ဘာ့ရေစီးကြောင်းကို ပြောင်းလဲလာစေနိုင်တဲ့ အချက်ဆိုတာ ကိုနှိုင်းယှဉ် အသုံးချဖော်ပြသွားတာပါ။ ဒီ လိပ်ပြာ အကျိုးသက်ရောက်မှုဟာ ပရမ်းပတာဖြစ်ခြင်း သီအိုရီ (Chaos Theory) ကို သုံးသပ်လေ့လာရာက တွေ့ရှိခဲ့တဲ့ ရှာဖွေတွေ့ရှိချက်တခုပါ။ စီးပွားရေး၊ နိုင်ငံရေး၊ ရာသီဥတု ဆိုးရွားမှု ဖြစ်ပေါ်လာမှုအပေါ် နောက်ဆက်တွဲ ဖြစ်ပေါ်လာမယ့် သက်ရောက်မှု အခြေအနေတွေကို လေ့လာသုံးသပ်ထားခြင်း ဖြစ်ပါတယ်။

လိပ်ပြာ အကျိုးသက်ရောက်မှု ပက်သက်ပြီး၊ မြန်မာပြည် အားမာန်သစ်စာပေ စာအုပ်တိုက်က ထုတ်ဝေတဲ့ သောင်းထိုက် (အငြိမ်းစားဗိုလ်မှူးကြီး) ဘာသာပြန် ရေးသားထားသော အမှန်တရား မြတ်နိုးခြင်း စာအုပ်မှာ အကျယ်တ၀င့် ရှင်းပြထားဖူးတယ်။ ဒီ သီအိုရီကို စီးပွားရေးနယ်ပယ်မှာလည်း ပြောဆိုသုံးစွဲလာနေကြပါပြီ။ ဒိုမီနို သီအိုရီ လိုပါပဲ။ နိုင်ငံတနိုင်ငံမှာ ဖြစ်ပေါ်နေတဲ့ အခြေအနေဟာ အခြားနိုင်ငံတွေကို သက်ရောက်စေနိုင်တယ် ဆိုတဲ့ အချက်ပါပဲ။


လိပ်ပြာ အကျိုးသက်ရောက်မှု သီအိုရီ

ဦးသောင်းထိုက်က အခုလို ဘာသာပြန်ပေးခဲ့ပါတယ်။ အက်ဒ၀ပ်လိုရင့်ဇ် (Edward Lorenz) ဟာ မန်ဆာချူးဆတ် စက်မှုတက္ကသိုလ် (MIT) မှ ရာသီဥတုနှင့် ဇလဗေဒ ပညာရှင်တဦးပါ။ သူဟာ လေတိုက်သည့် ပုံစံ အနည်းငယ် ပြောင်းရုံနှင့် ရာသီဥတုကို မည်သို့ ထိခိုက်လွှမ်းမိုးနိုင်သည်ကို သိလိုနေခဲ့တော့ စူးစမ်းမှုတွေ လုပ်နေခဲ့ပါတယ်။ ဒါကြောင့် (၁၉၆၀ ခုနှစ်များတွင်) လိုရင့်ဇ်ဟာ လေပုံစံ အနည်းငယ် ပြောင်းရုံနှင့် ရာသီဥတု မည်သို့ဖြစ်လာနိုင်သည်ကို သူ့ကွန်ပြူတာ အဖြေထုတ်ရန် စီစဉ်ခဲ့ပြီး သူ့ဓာတ်ခွဲခန်းမှ အပြင်ထွက်၍ ကော်ဖီသောက် အပန်းဖြေခဲ့လေသည်။

အက်ဒ၀ပ်လိုရင့်ဇ် ( Edward Lorenz)

သူ့ဓာတ်ခွဲခန်းသို့ ပြန်ရောက်သည့်အခါ ကွန်ပြူတာကြီးက ထုတ်ပေးသည့် ပုံကိုကြည့်၍ လိုရင့်ဇ်သည် အထူးအံသြနေ၏။ လေတိုက်သည့်ပုံစံ အနည်းငယ်ပြောင်းသွားရုံနှင့် ကမ္ဘာ့ရာသီဥတု အကြီးအကျယ် ပြောင်းလဲသွားစေသည်ဟု ကွန်ပြူတာက အဖြေထုတ်ပေးလေသည်။ လိုရင့်ဇ် ပြောတာကတော့ ဒီလိုပါ၊ ဘရာဇီးလ် (တောင်အမေရိက) နိုင်ငံက လိပ်ပြာတကောင် အတောင်တဖျတ်ဖျတ် ခတ်ရုံနဲ့ အမေရိကန် တက်ဆတ်ပြည်နယ်မှာ လေပြင်းမုန်တိုင်းကြီး ကျရောက်နိုင်ပါသည်။ လိပ်ပြာ အတောင်ခတ်၍ ဖြစ်ပေါ်လာသည့် လေလှိုင်းများသည် မိုင်ပေါင်းထောင်ချီ ပြေးသွား၍ လမ်းတလျှောက်လုံး အခြားလေလှိုင်းများကို ထိခိုက်သွားကာ နောက်ဆုံး ရာသီဥတု တခုလုံးကို ပြောင်းလဲသွားစေမည်ဟူသော သဘောဖြစ်လေသည်။

လိုရင့်ဇ်က လိပ်ပြာအတောင်ခတ်သည်ကို ပမာနှိုင်းပြောဆိုခဲ့သည်ကို အစွဲပြု၍ ယင်း အကျိုးသက်ရောက်မှုကို လိပ်ပြာ အကျိုးသက်ရောက်မှုဟု ခေါ်တွင်လာကြသည်။

ဟုတ်ပါတယ်။ မြောက်အမေရိက က လိပ်ပြာတကောင် အတောင်တဖျတ်ဖျတ် ရိုက်ခတ်လိုက်မှုကြောင့် အင်အားကြီးမားတဲ့ ဆူနာမီလှိုင်းလုံးကြီးဟာ ဘာလင်တံတိုင်း၊ မဟာတံတိုင်းနဲ့ ဂျပန်ကျွန်း ကမ်းခြေတွေဆီ တဘုန်းဘုန်း ပြင်းပြင်းထန်ထန် ရိုက်ခတ်သွားနေပါပြီ။ ။

မြတ်စိုး