၂၀၁၀ ရွေးကောက်ပွဲနှင့် အလွန်ကာလသို့

မဇ္ဈိမသတင်းဌာန

( နေမျိုးဝေနှင့် ဆက်သွယ်မေးမြန်းချက်)

မြန်မာစစ်အစိုးရ ကျင်းပမည်ဆိုသော ၂၀၁၀ ခုနှစ် ရွေးကောက်ပွဲကို နည်းလမ်းပေါင်းစုံနှင့် ကန့်ကွက်ဆန့်ကျင် သွားမည့်သူများ ရှိနေသလို၊ ပါတီထောင်ကာ ၀င်ရောက်ယှဉ်ပြိုင် အောင်နိုင်ရေးအတွက် ပြင်ဆင်လှုပ်ရှားနေသူများလည်း ပြည်တွင်း၌ ရှိနေသည်။

သည်အထဲတွင် ၁၉၉၀ ခုနှစ် ရွေးကောက်ပွဲတွင် အနိုင်ရပါတီကြီးဖြစ်သည့် အမျိုးသား ဒီမိုကရေစီအဖွဲ့ချုပ်နှင့် ပါတီအတွင်းရေးမှူးနှင့် ဒီမိုကရေစီခေါင်းဆောင် ဒေါ်အောင်ဆန်းစုကြည်အပေါ် ဝေဖန်ထိုးနှက်ပြောဆိုလေ့ရှိသည့် ကိုနေမျိုးဝေလည်း ပါဝင်သည်။


သူနေထိုင်ရာ ဧရာဝတီတိုင်း ဘိုကလေးမြို့နယ်အတွင်း ရွေးကောက်ပွဲဆိုင်ရာ အသိပညာပေးလုပ်ငန်းများကို သူက တပိုင်တနိုင်အားဖြင့် စတင်နေသည်။

သူ့ နိုင်ငံရေး စိတ်ကူးနှင့် လက်ရှိလှုပ်ရှားမှုများကို သိရှိနိုင်ရန်အတွက် မဇ္ဈိမ သတင်းထောက် သန်းထိုက်ဦးက ဆက်သွယ်မေးမြန်းထားပါသည်။

၂၀၁၀ ရွေးကောက်ပွဲနိုင်အောင် ဘယ်လို မဲဆွယ်မှုတွေ လုပ်မလဲ။

ကျနော်တို့က ၂၀၁၀ ရွေးကောက်ပွဲကို နိုင်အောင် ရည်ရွယ်ချက် မထားဘူးခင်ဗျ။ ၂၀၁၀ ရွေးကောက်ပွဲမှာ ပြည်သူ့လွှတ်တော် ကိုယ်စားလှယ်အဆင့်ကို ၀င်မယ်။ ကျနော် ဘယ်လိုလုပ်မလဲဆိုတော့ ပြည်သူ့လွှတ်တော်ထဲမှာ ဘယ်လို ဥပဒေပြုတယ်ဆိုတာ ကျနော် ရှင်းပြမယ်။

တစ်အချက်က - ကျနော် အဆိုပြုချင်တဲ့ ဥပဒေမူကြမ်းတွေကို ကျနော် စာတွေ ရေးထားမယ်။ တစ်အချက်က ဘယ်လို ဥပဒေတွေကို ထောက်ခံမယ်၊ (Yes) ထောက်ခံမယ် ဆိုပြီးတော့ ကျနော် ရေးထားမယ်။ နှစ်အချက်က ဘယ်လို ဥပဒေတွေများ တင်လာရင် (No) လုပ်မယ်ဆိုပြီး ကျနော် ရေးထားမယ်။ သုံးအချက်က လွှတ်တော် ကိုယ်စားလှယ်တွေဟာ ဘယ်လို တာဝန်တွေရှိလဲ။ လေးအချက်က တိုင်းပြည်ကို ဥပဒေ ပြုရမယ်ဆိုတာ ပြည်သူတွေ သိအောင် ရှင်းပြတဲ့အချက် လုပ်မယ်။

အဲဒီ အချက် ၄ ချက်ကို ကျနော်ရေးပြီးတော့ စာရွက်နဲ့လည်း ဖြန့်မယ်။ ကျနော်က ဘိုကလေးမြို့မှာ ၀င်မယ်ဆိုတော့ ဘိုကလေးမြို့နယ်တွေပေါ်မှာ ဖြန့်ရုံတင် မကဘူး၊ ကျနော် တယောက်တည်းသာ ဒီလို အတွေးအခေါ်ရှိတဲ့ လူတယောက်တည်းသာ လွှတ်တော်ထဲမှာ ရောက်မယ်ဆိုရင် လွှတ်တော်ထဲမှာ တမဲပဲ ပေးရမှာ ဖြစ်တယ်။ အဲဒီတော့ အလုပ်ဖြစ်မှာ မဟုတ်ဘူး။ တခြား မြန်မာနိုင်ငံလုံးမှာရှိတဲ့ မြို့နယ်တွေကိုပါ ပြန့်အောင် ကျနော် ဖြန့်မယ်။

မီဒီယာတွေနဲ့လည်း ဆက်သွယ်စည်းရုံးပြီး ဒီအယူအဆကို ပြန့်ပွားအောင် လုပ်မယ်။ အဲဒီလို ကျနော်တို့ မဲဆွယ်စည်းရုံးမယ်။ ကျနော် တယောက်တည်း နိုင်ရေးက အဓိက မဟုတ်ဘူး။ ကျနော် တယောက်တည်း နိုင်ရင် လွှတ်တော်ထဲမှာ တမဲပဲ ဖြစ်မယ့်အတွက် အလုပ်ဖြစ်မှာ မဟုတ်ဘူး။

မြို့နယ် ဒေသခံတွေကြားမှာ ရွေးကောက်ပွဲဆိုတာကို အများစုက နားမလည်ကြဘူးဆိုတော့ မဲဆွယ်တဲ့ နေရာမှာ အောင်မြင်မှု ရနိုင်မလား။

ဒေသခံတွေကြားမှာ ဒီရွေးကောက်ပွဲနဲ့ ပတ်သက်လို့ မြင်နေတာလေးတွေက ရ၀တ ဥက္ကဋ္ဌ ရွေးတယ်လို့ ထင်နေတယ်။ မ၀တ ဥက္ကဋ္ဌ ကို ရွေးတယ်လို့ ထင်နေတယ်။ ဥပဒေပြုတယ်ဆိုတာ ဘာမှန်းမသိဘူး။ ဘာလဲဆိုတော့ ဒီလက်ရှိကာလတွေနဲ့ ဆက်စပ်ပြီးတော့ ကြည့်နေသေးတာကိုး။ ကျနော်တို့က အဲဒါတွေနဲ့ ပတ်သက်လို့ ရှင်းပြဖို့ ကျနော်တို့က အခု ဘယ်လိုတည်ဆောက်နေရလဲဆိုတော့ အခုလည်း ပုဂံက မိတ်ဆွေတွေ ရောက်လာတယ်။ သူတို့ကို ကျနော် ရှင်းပြတယ်ပေါ့။ လွှတ်တော် ကိုယ်စားလှယ်ဆိုတာ ဥပဒေပြုတယ်၊ ဘယ်လို ဘယ်လို ဖြစ်တယ်ဆိုတဲ့အကြောင်း။ အဲဒီလို လူတွေကနေ စပြီးတော့ နိုင်ငံရေးအဆင့်မှာလည်း ၄ ဆင့် ရှိတာကိုး။

ပထမ အဆင့်ကတော့ ဒီအဖွဲ့အစည်းမှာ ပါဝင်ပြီးတော့ နိုင်ငံရေး အခြေခံအဆင့်ပေါ့နော်။ ပထမ အဖွဲ့အစည်းတွေမှာ ပါဝင်ပြီးတော့ အဖွဲ့အစည်းရဲ့ လုပ်ငန်းတွေကို လုပ်တာ။ အဲဒီလူတွေ အဆင့်က သပိတ်တွေ ဘာတွေ မှောက်တဲ့အခါမှာ လက်သီးလက်မောင်းတန်းအော်တဲ့ အဆင့်မျိုးပေါ့ဗျာ။ ဒုတိယအဆင့်ကတော့ သန့်ရှင်းသော အစိုးရဖြစ်အောင် ၀ိုင်းပြီးတော့ ဘယ်နေရာမှာ မှားနေပါတယ်ဆိုပြီးတော့ မီဒီယာနဲ့ ဆက်သွယ်ပြောဆိုပြီးတော့ လုပ်လိုက်မယ့် လူတွေ။ တတိယ နိုင်ငံရေးအဆင့်ကတော့ အကြံပြုစာရေးတဲ့ အဆင့်။ နောက်ဆုံးအဆင့်ကတော့ ခုနက ကျနော်ပြောတဲ့ မူဝါဒတွေ ရေးဆွဲချမှတ်ပြီး ပြဋ္ဌာန်းလိုက်တဲ့ ပုဂ္ဂိုလ်တွေ ဖြစ်နေတယ်။

ကျနော်တို့ဟာ ခုန အောက်ခြေအဆင့်မှာရှိတဲ့ ဒီအဖွဲ့အစည်းတွေရဲ့ လုပ်ငန်းစဉ်တွေကို ဖြန့်ဝေပေးတဲ့ လူတွေကို ကျနော်တို့ အရင်စုရပါတယ်။ အဲဒီလူတွေကို အခုဆို ကျနော်တို့ မဲဆွယ်စည်းရုံးတဲ့ကာလ မရောက်သေးပေမယ့် ဖွဲ့စည်းပုံကို နားလည်အောင်ပြောတဲ့ အဆင့်က လူတွေဖြစ်အောင် တည်ဆောက်တာပါ။

ပြိုင်ဘက် ပါတီ ကိုယ်စားလှယ်တွေက ဘယ်သူတွေ ဖြစ်လာနိုင်မလဲ။

ပြိုင်ဘက်ပါတီဆိုတာကတော့ ကျနော်တို့က ပြိုင်ဘက်လို့ မသတ်မှတ်ပါဘူး။ မိတ်ဘက်တွေလိုပဲ သတ်မှတ်ပါတယ်။ မည်သူမဆို ပြိုင်ဘက်လို့ မသတ်မှတ်ဘူးဆိုတာက အကုန်လုံး ဒီမေးခွန်းတွေ ဖြန့်ကျက်မယ်။ ဒါ ကြိုတင်ပြီး (Question) Out သလိုပဲ။ ဒီဟာတွေကို သူတို့က ကြိုတင်ပြီးတော့ သိထားလို့ အကုန်လုံးက လေ့လာကြမယ်။ လေ့လာရင် တတ်သွားမယ်။ တတ်သွားရင် တတ်တဲ့ လူတွေ ရမယ်။

ကျနော်တို့ နိုင်ငံမှာ သူတို့ ကြိုတင်သိလို့၊ လေ့လာလို့၊ ဖြေနိုင်လို့ တတ်သွားမယ် ဆိုလို့ရှိရင် တတ်တဲ့လူတွေ ရမယ်လို့ ကျနော်တို့ မျှော်လင့်ပါတယ်။ ဖြစ်နိုင်တာကတော့ဗျာ၊ ပါတီတွေအနေနဲ့ကတော့ တနိုင်ငံလုံး လွှမ်းပတ်ခြုံနိုင်မယ့် ပါတီတွေဟာ ၂ ခု၊ ၃ ခုထက် မပိုဘူးလို့ ကျနော် သုံးသပ်ပါတယ်။

ကိုယ်စားတွေကရော ဘယ်သူတွေ ဖြစ်လာမလဲဗျ။

အဲဒါတွေ ဒီအချိန်မှာ ကျနော် မသိသေးဘူးခင်ဗျာ။ ပြိုင်ဘက်ပါတီတွေကတော့ ကျနော် မသိသေးဘူး။ ဒါ ကျနော် အပွင့်လင်းဆုံးပြောတာ။ နိုင်ငံတော်ဘက်ခြမ်းက စီစဉ်တာတွေလည်း ရှိမယ်။ တချို့လူတွေလည်း ရှိလိမ့်မယ်။ ဒီအချိန်မှာ ပုဂ္ဂလိက ကွန်ယက်တွေလည်း ပေါ်လာကောင်း ပေါ်လာနိုင်မယ်။

၂၀၁၀ အလွန် မြန်မာ့နိုင်ငံရေးအခြေအနေ ဘယ်လိုဖြစ်လာမယ်ထင်လဲ။ စီးပွားရေး၊ လူမှုရေး၊ ပညာရေး စသဖြင့်။

၂၀၁၀ အလွန်မှာ ဘယ်လို ဖြစ်လာနိုင်မလဲဆိုတော့ ကျနော်တို့ လုပ်ပိုင်ခွင့် များသောအားဖြင့် ရမယ့်နေရာတွေက ပညာရေး နယ်ပယ်၊ စီးပွားရေးနယ်ပယ်။ အဲဒီနယ်ပယ်တွေမှာ ကျနော်တို့ ပြောရေးဆိုခွင့်လေးတွေ ရလာမယ်။ ပြောရေးဆိုခွင့်လေးတွေ ရလာပြီဆိုရင် ကျနော်တို့ ဥပဒေမူကြမ်းလေးတွေ စမ်းသပ်ပြီးတော့ တင်သွင်းခွင့်လေးတွေ ရလာမယ်။ အဲဒီ လွှတ်တော်တွေထဲမှာလည်း မေးဖို့ ဆွေးနွေးပွဲလေးတွေ ဖြစ်လာနိုင်တယ်။ နောက် ပြည်သူတွေကို ကျနော်တို့ အသိပေးဖို့တွေ လုပ်လာနိုင်မယ်။

အဲဒီလို ရလာပြီဆိုရင် အဲဒီဘက်ကနေ စပြီးတော့၊ နောက် ဒီဘက်ခေတ်ကလည်း နည်းနည်းပြောင်းလာမှာပေါ့ဗျ။ ရှေးခေတ်တုန်းကဆိုရင် ကျနော် မမျှော်လင့်ရဲဘူးဗျာ။ ရှေးခေတ်တုန်းက လက်နှိပ်စက်တောင် ဘိုကလေးမြို့နယ် တမြို့လုံးမှာ တလုံးလောက် ရှိတာကိုး။ အခု ကော်ပီယာတွေ ပေါ်လာပြီ။ နောက် VCD စက်တွေနဲ့ အခွေတွေနဲ့ အလွယ်တကူ ပြန့်ပွားလို့ရပြီ။ နည်းနည်း ပေါက်ကွဲမှုပုံစံ ရှိတယ်။ မီဒီယာ ပေါက်ကွဲမှု ရှိတဲ့အပြင် ၂၀၁၀ ရွေးကောက်ပွဲ တနေရာထဲမှာတင် အသိပေးထားတာ အောင်မြင်လာမယ်လို့ မျှော်မှန်းပါတယ်။ နောက် ၂၀၁၅ လောက်မှာ နည်းနည်း စနစ်ကျဖြစ်လာမယ်လို့ ကျနော် မျှော်လင့်ပါတယ်။

နိုင်ငံတော် စီးပွားရေး ဦးမော့လာအောင် ဘာတွေ လုပ်သင့်တယ် ထင်လဲ။

နိုင်ငံ့စီးပွားရေးကို ကျနော်တို့က တွက်ချက်တဲ့အခါကျတော့ ကိုယ့်နိုင်ငံရဲ့ သဘာဝ၊ ကိုယ့်နိုင်ငံမှာရှိတဲ့ လူသား အရင်းအမြစ်၊ ကိုယ့်နိုင်ငံမှာရှိတဲ့ သဘာဝ အရင်းအမြစ်၊ ကိုယ့်နိုင်ငံမှာရှိတဲ့ အခြေအနေကို တွက်ချက်လိုက်တဲ့ အခါကျတော့ တကယ့်အဆင့်မြင့် အိုင်တီ နည်းပညာတွေပေါ့။ ဒီမှာ အရင်ဆုံး ထူထောင်နိုင်ဖို့ ဆင့်ကဲပြီး တွေ့ရတယ်။

ဒီဘက်မှာကျတော့ ရေမြေကို ကြည့်မယ်ဆိုလို့ရှိရင် ဖြစ်နိုင်တာလေးတွေ ရှိတယ်။ စိုက်ပျိုးရေး ထွက်ကုန်၊ မွေးမြူရေး ထွက်ကုန်၊ အဲဒါနဲ့ ပတ်သက်တဲ့ တပိုင်း။ ကုန်ချောဖြစ်မယ့် ဆီသွပ်လုပ်ငန်းတွေ၊ အပြီး ကုန်ချောပေါ့နော်။ အဲဒီလို လုပ်ငန်းမျိုးလေးတွေဟာ ပြန်လည်ထူထောင်ရေး မြန်မာနိုင်ငံမှာ စလုပ်တဲ့အခါမှာ ရင်းနှီးမြှုပ်နှံမှု အများဆုံး လုပ်သင့်တဲ့ လုပ်ငန်းလို့ ကျနော် သုံးသပ်ပါတယ်။ အဲဒါတွေနဲ့ ပတ်သက်တဲ့ ဥပဒေ မူကြမ်းတွေနဲ့ ထောက်ခံမယ်။

အခုနေ တောင်းဆိုခွင့် ရှိမယ်ဆိုရင် စစ်အစိုးရကို ဘာတွေ တောင်းဆိုမှာလဲ။

အစိုးရကို တောင်းဆိုရမယ်ဆိုလို့ရှိရင်တော့ တခြားဟာတွေ ကျနော် မတောင်းဆိုချင်ပါဘူး။ ခုနလိုပေါ့ သူတို့ရဲ့ အခြေအနေ၊ အချိန်အခါတွေ တွက်ချက်ပြီးတော့ ခုနက စည်းမျဉ်းစည်းကမ်းလေးတွေပေါ့။ နောက် ရွေးကောက်ပွဲ ကော်မရှင်တို့ အဲဒါလေးတွေက တတ်နိုင်သလောက်လေး သူတို့ဘက်က တွက်ချက်ပြီးတော့ ခပ်စောစောလေး ထုတ်ပေးတာကို ကျနော် မျှော်လင့်ပါတယ်။ ခပ်စောစော ထုတ်ပေးခြင်းအားဖြင့် ဘာဖြစ်အုံးမလဲဆိုတော့ ဒီဖွဲ့စည်းပုံကို မထောက်ခံဘူးဆိုတဲ့ ပုဂ္ဂိုလ်မျိုးတွေ ဘာတွေ စပြီးတော့လည်း လုံးဝ ပြတ်ပြတ်သားသား ဆုံးဖြတ်မယ့် ကိစ္စလေးတွေ ပေါ်လာပြီးတော့ စည်းလုံးညီညွတ်ရေးဟာ ပုံစံတမျိုးနဲ့ ပေါ်လာမယ်လို့ ကျနော် ယူဆပါတယ်။ အဲဒါမျိုးလေးတော့ တောင်းဆိုချင်တယ်။ ကျန်တာကတော့ ကျနော်တို့ အနာဂတ်မှာ လုပ်သွားမှာပါ။

အကိုတို့ကို စစ်အစိုးရလိုလားသူတွေ၊ စစ်အစိုးရ မျက်နှာသာ ပေးခံရတယ်လို့ ပြောကြတာ ဟုတ်ပါသလား။

အဲဒါနဲ့ ပတ်သက်လို့ဗျာ (HRDP) က လူငယ်တွေ ကျနော် သိတယ်။ အန်အယ်ဒီက တချို့လူငယ်တွေ ဘိုကလေးမှာ ကျနော့်နဲ့ သိခဲ့တဲ့ လူငယ်တွေ ရှိတယ်။ ဒီလူတွေ ကိုယ်တိုင်ပဲ အစိုးရနဲ့ လိုင်းကွဲနေတယ်။ ဘယ်လိုလိုင်းကွဲလဲဆိုတော့ ဖွဲ့စည်းပုံနဲ့ ဖျက်မယ့်လူတွေ၊ ဖွဲ့စည်းပုံနဲ့အညီ ကိုယ့်အယူအဆတွေနဲ့ ရွေးကောက်ပွဲဝင်မယ့် လူတွေ။ အဲဒီအချိန်မှာ ဖွဲ့စည်းပုံနဲ့အညီ ၀င်လာပြီးတော့ ရွေးချယ်တင်မြှောက်ပွဲတွေ ၀င်မယ်ဆိုရင် ကျနော်တို့ဟာ ဒါ မဟာမိတ်တွေ ဖြစ်မှာပဲ။ သူတို့ ဒီလိုပြောနေတာနဲ့ ပတ်သက်လို့ကတော့ ကျနော်တို့နဲ့ ရင်းနှီးတဲ့ လူတွေမှာတော့ ရှင်းလင်းစွာ တွေ့ရပါတယ်။

၂၀၁၀ ရွေးကောက်ပွဲနဲ့ ပတ်သက်ပြီးတော့ ပြည်သူတွေကို သိသင့်သိထိုက်တာ ဘာတွေများ ပြောစရာ ရှိသေးလဲ။

ကျနော် ပြည်သူတွေကို ပြောချင်တာကတော့ ၂၀၁၀ ရွေးကောက်ပွဲမှာ ပြည်သူ့လွှတ်တော် ကိုယ်စားလှယ်တွေ ရွေးတယ်ဆိုတာ မ၀တ ဥက္ကဋ္ဌ ရွေးတာမျိုး မဟုတ်ဘူး၊ ပြည်သူတွေ ရွေးချယ်ခွင့်ရှိတဲ့ဟာက ကိုယ်စားပြု ဒီမိုကရေစီ ဖြစ်တယ်။ ပြည်သူ့လွှတ်တော် ကိုယ်စားလှယ်ကို တမြို့နယ်ကို တယောက် ရွေးနိုင်တယ်။ တိုင်းတတိုင်း သို့မဟုတ် ပြည်နယ် တခုအတွက်ကို ၁၂ ယောက် ရွေးနိုင်တယ်။ အဲဒီလူတွေကို ရွေးပြီးတာနဲ့ တပြိုင်နက်ထဲ ပြည်သူတွေဟာ အလုပ်မရှိတော့ဘူး။ ဒီလူတွေသာ အုပ်ချုပ်ရေးအဖွဲ့တွေ ဖွဲ့မယ်။ တရားစီရင်ရေး အဖွဲ့တွေ ဖွဲ့မယ်။ ၀န်ကြီးအဖွဲ့တွေ ဖွဲ့မယ်ဆိုပြီးတော့ ယန္တရားကြီးဟာ လုပ်မှာဖြစ်တယ်။ အဲဒီလူတွေကို မှန်မှန်ကန်ကန် ပြည့်ပြည့်၀၀ ကြပ်မတ်ပြီးတော့ ရွေးချယ်ဖို့ လိုတယ်။ ပြည်သူ့လွှတ်တော် ကိုယ်စားလှယ်လောင်းတွေကို မေးတိုင်းမေးတိုင်း တိုင်းပြည်ကို မွဲအောင် လုပ်ပါမယ်၊ တိုင်းပြည်ကို ပျက်စီးအောင်လုပ်ပါမယ်လို့ ဖြေမှာ မဟုတ်ဘူး။ တိုင်းပြည် တိုးတက်အောင် လုပ်မယ်၊ ပညာရေး တိုးတက်အောင် လုပ်မယ်၊ ဆိုပြီးတော့ ဖြေကြမှာချည်းပဲ။

အဲဒီတော့ ပညာရေး ဘယ်လိုနည်းနဲ့ ကောင်းအောင်လုပ်မှာလဲ၊ ဘယ်လိုနည်းနဲ့ စီးပွားရေးကို ကောင်းအောင် လုပ်မှာလဲ။ ကွဲကွဲပြားပြား စိစစ်ဖို့ လိုပါတယ်လို့၊ ပြည်သူတွေဆီမှာ တာဝန်ရှိတယ်လို့ ကျနော် ပြောချင်ပါတယ်။