မြန်မာအစိုးရ စစ်တပ်တွင်း ရှိနေသော ကလေးစစ်သားများနှင့် ပတ်သက်သည့် ပြဿနာ တိုင်ကြားမှုများမှာ ယခုနှစ်တွင် ပိုမိုတိုးမြင့်လာကြောင်း ရန်ကုန် အခြေစိုက် ကမ္ဘာ့အလုပ်သမားအဖွဲ့ချုပ် (ILO) ရုံး တာဝန်ခံက ပြောသည်။ “ILO က ဆောင်ရွက်ဆဲ ကလေးစစ်သားများနှင့် ပတ်သက်သည့် အမှုအရေအတွက်မှာ ၂၀၁၁ ခုနှစ် ဇူလိုင်လ အထိ စာရင်းအရ ၄၂၄ မှုရှိပြီး အာဏာပိုင်များထံသို့ ILO မှ ဆက်လက်တင်ပြထားသည့် အမှု ၃၂၆ မှုရှိကာ ILO ရုံးမှ စစ်ဆေးဆဲ အမှု ၇၅ မှု အပါအ၀င် ဖြေရှင်း၍ မပြီးပြတ်သေးသောအမှုစုစုပေါင်း ၂၄၂ မှု၊ ဖြေရှင်းပြီး မိဘရပ်ထံ ပြန် ရောက်ပြီး လွတ်မြောက်လာသော ကလေးစစ်သား စုစုပေါင်း ၁၇၂ ယောက် ရှိသည်” ဟု ILO ၏ ယခုနှစ် ဇူလိုင် စစ်တမ်းတွင် ဖော်ပြထားသည်။
ရန်ကုန်မြို့ရှိ ILO ရုံးမှ ကလေးစစ်သားအမှု စတင်ကိုယ်တွယ်ခွင့်ရခဲ့သည့် ၂၀၀၇ ခုနှစ်တွင် တိုင်ကြားမှု ၁၃ မှု၊ ၂၀၀၈ ခုနှစ်တွင် ၃၁ မှု၊ ၂၀၀၉ ခုနှစ်တွင် ၈၁ မှုနှင့် ၂၀၁၀ ပြည့်နှစ်တွင် ၂၁၀ မှုအထိ ရှိလာကြောင်း တိုင်ကြားချက်များအရ သိရသည်။
အခုနှစ် တိုင်ကြားမှုက အရင် ၃ နှစ်တိုင်ကြားမှုနဲ့ အရေအတွက်တူလာတာ သတိထားမိစရာ ဖြစ်တယ်။ ကျနော်တို့ ဆီက ပညာပေး စာစောင်တွေ ဖြန့်ဝေတာကြောင့်လည်း လူတွေက ဥပဒေအရ တိုင်ရမှန်းသိလာတာကြောင့်လည်း ဖြစ်နိုင်တယ်” ဟု ILO ရန်ကုန်ရုံးခွဲ တာဝန်ခံ မစ္စတာ စတိဖ်မာရှယ် က ရှင်းပြသည်။
ကလေးစစ်သားကိစ္စ၊ အတင်းအဓမ္မ လုပ်အားပေးခိုင်းစေသည့် ကိစ္စများအတွက် စိုးရိမ်နေရဆဲ ဖြစ်ပြီး ကမ္ဘာ့ ကုလသမဂ္ဂနှင့် မြန်မာအစိုးရတို့ ပူးပေါင်းကာ ပူးတွဲကော်မတီ တရပ်အနေဖြင့် အဆိုပါ ကိစ္စရပ်များ ပပျောက်ရေး အစီအစဉ်များကိုလည်း ဆွေးနွေးနေဆဲဖြစ်ကြောင်း သူက ဆိုသည်။
မြန်မာနိုင်ငံတွင်း အတင်းအဓမ္မ အလုပ်ခိုင်းစေမှု ပပျောက်ရေး၊ ကလေးစစ်သား စုဆောင်းမှုကိစ္စတို့နှင့် ပတ်သက်ပြီး စစ်ဘက် တာဝန်ရှိသူများ၏ လုပ်ဆောင်နေမှုများသည် စိုးရိမ်ဖွယ် အခြေအနေရှိနေကြောင်း ILO နှင့်ချိတ်ဆက် အကူအညီပေးနေသည့် ကွန်ယက်အဖွဲ့ဝင်များကလည်း ပြောသည်။
“အခုတိုင်စာတွေက ဒီလပိုင်းလေးအတွင်းမှာပဲ တော်တော်များလာတယ်။ အခု အရွယ်မရောက်သူ ကလေး စစ်သား စုဆောင်းမှု တိုင်ကြားထားတဲ့အထဲက ကျနော်ကူညီနေတဲ့ အမှုကိုပဲ ၁၀ မှုကျော် ရှိတယ်။ ဒီကာလမှာ သိသိသာသာ တိုးလာတယ်” ဟု ရန်ကုန်တိုင်း၊ စမ်းချောင်းမြို့နေ ကလေးစစ်သား အရေး ဆောင်ရွက်ပေးသူ ဦးသက်ဝေက ဆိုသည်။
နအဖစစ်အစိုးရက အရွယ်မရောက်သေးသည့် ကလေးသူငယ် စစ်မှုထမ်းခြင်းမှ ကာကွယ်ထိန်းသိမ်းရေး ကော်မတီကို ၂၀၀၄ ခုနှစ် ဇန်န၀ါရီလ ၅ ရက်နေ့တွင် စစ်ဘက်အရာရှိများဖြင့် ဖွဲ့စည်းခဲ့သော်လည်း ကလေးစစ်သား အဓမ္မစုဆောင်း ခံရမှုကြောင့် ILO ရုံးသို့ တိုင်ကြားမှုများမှာ တနှစ်ထက်တနှစ် မြင့်တက်နေဆဲဖြစ်သည်။
မြန်မာနိုင်ငံအတွင်းရှိ အကျဉ်းထောင် သို့မဟုတ် ရဲဘက်စခန်းများတွင် စစ်ပြေးမှုဖြင့် ပြစ်ဒဏ်ကျနေသော ကလေး စစ်သားများကိစ္စ ILO သို့တိုင်တန်းလာသည့်အမှုမှာ ၂၀၁၁ ခုနှစ် ဇူလိုင်လအထိ ၁၂ မှုရှိပြီး ပြန်လည် လွတ်မြောက် လာသူ ၄ ဦး ရှိသည်။
ရဲဘက်စခန်းများနှင့် အကျဉ်းထောင်များအတွင်း ကလေးစစ်သားများ ဖမ်းဆီးထိမ်းသိမ်းထားမှု မည်မျှရှိသည်ကို တိကျစွာ သိရှိနိုင်ရန်အတွက် အပြည်ပြည်ဆိုင်ရာ ကြက်ခြေနီအဖွဲ့ (ICRC) နှင့် ILO အရာရှိများ ပူးပေါင်းကာ ၀င်ရောက် စစ်ဆေးမှသာ ခိုင်မာသည့် သတင်းအချက်အလက်များကို ခြေရာခံမိနိုင်မည် ဖြစ်ကြောင်း ကလေးစစ်သား အရေး ကူညီဆောင် ရွက်ပေးနေသည့် ကွန်ယက်အဖွဲ့ဝင်များက ထောက်ပြထားသည်။
ကလေးစစ်သား စုဆောင်းမှု မြင့်မားလာရခြင်းမှာ မြန်မာစစ်တပ်နှင့် တိုင်းရင်းသားလက်နက်ကိုင် အဖွဲ့အစည်းများကြား စစ်ရေးတင်းမာမှုများကြောင့် စစ်တပ်အောက်ခြေပိုင်းတွင် ယခုကဲ့သို့ လုပ်ဆောင်ခြင်းဖြစ်ကြောင်း ကွန်ယက်အဖွဲ့ဝင် ကိုစိုးက ပြောသည်။
“တိုင်းရင်းသားဒေသတွေမှာ ဖြစ်နေတာတွေကြောင့် အခုဆို ကလေးစစ်သားတွေက တပ်က ထွက်ပြေးတာများလာ တယ်။ ဒီတော့ စစ်ပြေးမှုနဲ့ ထောင်ကျနေတာလည်း များလာတယ်” ဟု ၎င်းက ဆိုသည်။
ယခုဖြစ်ပွားနေသည့် ကချင်နှင့် ရှမ်း ပြည်နယ်ဒေသများတွင် စစ်ပွဲများဖြစ်ပွား လာသည့်အတွက် ကလေးစစ်သား စုဆောင်မှုတိုးမြင့်လာခြင်းရှိ၊ မရှိကို ဧရာဝတီက မစ္စတာ စတိဖ်မာရှယ်အား မေးမြန်းရာတွင် ၎င်းအနေဖြင့် အဆိုပါ သတင်းကို မကြားရသေးကြောင်း တုန့်ပြန်ဖြေကြားသည်။
ကလေးစစ်သား စုဆောင်းမှုနှင့်ပတ်သက်၍ ပွဲစားအဖြစ် လုပ်ကိုင်နေသူများမှာ လက်ရှိအာဏာရ ပြည်ထောင်စု ကြံ့ခိုင်ဖွံ့ရေးနှင့် ဖွံ့ဖြိုးရေး ပါတီ (ကြံ့ဖွံ့ပါတီ) ၀င်များ၊ စစ်တပ်နှင့်နီးစပ်သူများသာဖြစ်ကြောင်း၊ ယခုကာလ ပေါက်ဈေးမှာ ကလေးစစ်သားတဦး အတွက် ကျပ် ၅ သောင်း မှ ၇ သောင်းထိ ရှိကြောင်း ကလေးစစ်သားအရေး ကူညီပေးနေသူ တဦးဖြစ်သည့် ကိုမောင်မောင်က ပြောသည်။
“အခုဟာက သူတို့လူတွေကပဲ လုပ်စားနေတာ။ အထက်က သိရက်နဲ့ မသိချင်ယောင် ဆောင်နေတယ်။ ဈေးကောင်းရ တော့ လူရောင်းပွဲလို ဖြစ်နေတယ်။ ILOနဲ့ ပူးပေါင်းဆောင်ရွက်မှုလည်း သိပ်အားမရဘူး” ဟု သူက ဆိုသည်။
နိုင်ငံတကာ ဥပဒေအရ အစိုးရစစ်တပ်များနှင့် လက်နက်ကိုင် အဖွဲ့အစည်းသည် အသက် ၁၅ နှစ်အောက် ကလေး သူငယ်များကို စစ်သားအဖြစ် မစုဆောင်းရန် ကန့်သတ်ထားသည်။ ကလေးသူငယ်များကို စစ်သားအဖြစ် စုဆောင်း ခြင်းသည် နိုင်ငံတကာ ရာဇ၀တ်ခုံရုံး တင်နိုင်သည့် စစ်ရာဇ၀တ်မှု မြောက်ကြောင်း အတိအလင်း ဖော်ပြထားသည်။
ကုလသမဂ္ဂ အထွေထွေအတွင်းရေးမှူးချုပ် မစ္စတာ ဘန်ကီမွန်း တင်ပြထားသော ကလေးစစ်သားအရေး၊ စစ်မက်ဖြစ် ပွားနေသော ဒေသများတွင် ကျောင်းများ၊ ဆေးရုံများဖျက်ဆီး တိုက်ခိုက်ခံရမှုနှင့် ကလေးများအပေါ် မတရား ညှဉ်းပန်း နှိပ်စက်မှုများ လုပ်နေသည့် သက်ဆိုင်ရာ အစိုးရ စစ်တပ်များ၊ လက်နက်ကိုင် အဖွဲ့များ၏ ကျူးလွန်မှုများကို အရေး ယူနိုင်ရေး အစီရင်ခံစာတရပ်အား ကုလသမဂ္ဂ လုံခြုံရေးကောင်းစီ အစည်းအဝေးတွင် မကြာသေးခင်က တညီတညွတ် တည်း ထောက်ခံခဲ့သည်။
“အဲဒီလို ကျူးလွန်နေတဲ့ အထဲမှာ မြန်မာအစိုးရစစ်တပ်ပါနေတယ်လို့ သတိပေးလိုက်တာဖြစ်တယ်။ ဒါကြောင့် အရေးယူနိုင်တော့မှာပါ။ ကလေးစစ်သားအရေး ကိုင်တွယ်တဲ့ ကုလသမဂ္ဂ အထူးကိုယ်စားလှယ်ကို မြန်မာပြည် ၀င်ပြီး ထောင်တွေ၊ ရဲဘက်တွေထိပါ စစ်ဆေး ခွင့်ရဖို့ မြန်မာအစိုးရအနေနဲ့ ပူးပေါင်းဆောင်ရွက်ဖို့ လိုတယ်” ဟု ကုလ သမဂ္ဂဆိုင်ရာ ညွန့်ပေါင်းအစိုးရ ကိုယ်စားလှယ် ဒေါက်တာ သောင်းထွန်းက ပြောသည်။
No comments:
Post a Comment