ဇူလိုင် ၂၅၊ ယနေ့ တနင်္လာနေ့ ကချင်ပြည်နယ် အရှေ့ပိုင်း ချီဖွေမြို့နယ်တွင် မြန်မာစစ်တပ် ခလရ ၁၂၁ နှင့် KIA တပ်ရင်း (၁၀) တို့ တိုက်ပွဲဖြစ်ပွားခဲ့သည်။မြောက်ပိုင်းတိုင်းစစ်ဌာနချုပ်(မပခ)လက်အောက်ခံ အင်မောင်ခ(ရွှေလီ) မြစ်ကမ်းပေါ်မှ ငါးဦး အခြေစိုက် ခလရ (၁၂၁)မှ မြန်မာစစ်သားများသည် ချီဖွေမြို့နယ်၊ အင်မိုင်ခူး(မေခမြစ်ဖျား)မှ အပြန် လမ်းတွင် တြိဂံဒေသ KIA တပ်မဟာ (၁)၊ တပ်ရင်း (၁၀) မှ တပ်များနှင့် တိုက်ပွဲဖြစ်သည် ဟု KIA အရာရှိများပြောသည်။
မြစ်ကြီးနား-ဗန်းမော်လမ်းပိုင်း နမ်ဆန်ယန်မှ အရှေ့ဘက် ဘန်ဒေါင်ကြားတွင် မြစ်ကြီးနားမှ ခလရ (၂၁)နှင့် ခလရ (၃၇) မှ အင်အား ၅၀ ခန့် ရှိ မြန်မာစစ်ကြောင်း နှင့် KIA တပ်မဟာ ၅ ဌာနချုပ်တပ်များနှင့် နံနက် ၁၁ နာရီတွင် စစ်ပွဲ ဖြစ်ပွားသည်။
ကချင်ပြည်နယ် အလယ်ပိုင်း ဆင်ဘိုဒေသတွင်လည်း ၎င်းဒေသရှိ ခလရ (၁၄၁)နှင့် ဒေါဖွမ်းယန်နယ်မြေခံ ခလရ (၁၄၂) မှ မြန်မာစစ်သားများနှင့် KIA တပ်မဟာ(၂)၊ တပ်ရင်း(၅)မှ KIA စစ်သားများ တိုက်ပွဲဖြစ်ပွားသည်ဟု KIA အရာရှိများပြောသည်။
ယင်း တိုက်ပွဲ ၃ နေရာတွင် သေကျေဒဏ်ရာရမှု ရှိပြီး စာရင်း တိတိကျကျ မသိရပေ။
No comments:
Post a Comment