ဗိုလ်စံပြုံးကို ဘယ်သူလုပ်ကြံသလဲ

သန်းထိုက်ဦး

တိုးတက် သော ဗုဒ္ဓ ဘာသာ ကရင် အမျိုး သား တပ်ဖွဲ့ (DKBA) တပ်မဟာ ၇ မှ တပ်ရင်းမှူး ဒု ဗိုလ်မှူးကြီး စံပြုံး လုပ်ကြံ ခံရမှု နှင့် ပတ်သက်ပြီး ထိုင်း မြန်မာ နယ်စပ် ဒေသတွင် အမျိုးမျိုး ထင်ကြေးပေး မေးခွန်း ထုတ်နေ ကြသည်။

ပြီးခဲ့သည့်လ၂၆ ရက်နေ့က ဒု ဗိုလ်မှူးကြီး စံပြုံး နှင့် DKBA တပ်ဖွဲ့ဝင်များ ကရင်ပြည်နယ်၊ မြဝတီမြို့၊ ရွှေကုက္ကို ကျေးရွာသို့ သွားနေစဉ် အမည် မသိ လက်နက်ကိုင် တချို့၏ ခြုံခိုတိုက်ခိုက်မှုကို ခံခဲ့ရသည်။

မယ်လရွာအနီး ထိုင်း မြန်မာ နှစ်နိုင်ငံကို နယ်စည်းအဖြစ် ခြားထားသည့် သောင်ရင်းမြစ် အတွင်း ဖြစ်ပွားခဲ့သော အဆိုပါ ပစ်ခတ်မှုတွင် ဒု ဗိုလ်မှူးကြီး စံပြုံး အပါဝင် DKBA တပ်ဖွဲ့ဝင် ၈ ဦးခန့် သေဆုံးခဲ့သည်။

ပစ်ခတ်မှု ဖြစ်ပွားပြီး ၂ ပတ် ကြာမြင့်လာသော်လည်း မည်သူကမျှ ၎င်းတို့၏ လက်ချက် ဖြစ်ကြောင်း ထုတ်ဖော် ကြေညာချက် ထွက်ပေါ်လာခြင်း မရှိဘဲ၊ မည်သူ၏ လက်ချက် ဖြစ်မည် ဆိုသည့် ခန့်မှန်းချက်များသာ နယ်စပ်ဒေသတွင် ပေါ်ပေါက်နေသည်။


DKBA တပ်ရင်းမှူး လုပ်ကြံခံရသည်ဟု ဆိုသဖြင့် ၎င်းတို့၏ ဆန့်ကျင်ဘက်အဖွဲ့ဖြစ်သည့် KNU ခေါ် ကရင် အမျိုးသား အစည်းအရုံး တပ်ဖွဲ့များ၏ လက်ချက်ဖြစ်သည်ဟု အစောပိုင်းတွင် ထင်ကြေးပေးခဲ့ကြသည်။

DKBA သည် ၁၉၉၅ ခုနှစ်တွင် KNU မှ ခွဲထွက်ပြီးနောက် တဖြည်းဖြည်း အင်အား ကြီးမားလာသည့် လက်နက်ကိုင်အဖွဲ့ဖြစ်သည်။ ပြီးခဲ့သည့် လက မြန်မာ့တပ်မတော် နှင့် DKBA ပူးပေါင်းပြီး KNU တပ်မဟာ ၇ မှ စခန်းများကို အပြင်းအထန် ထိုးစစ်ဆင်ခဲ့သဖြင့် KNU က အဆိုပါစခန်းများကို လက်လွှတ်ပေးလိုက်ရသည်။

ဒု ဗိုလ်မှူးကြီးစံပြုံး ခေါ် ဗိုလ်ဆန်ပြုတ်သည် အဆိုပါထိုးစစ်တွင် ထင်ရှားသည့် DKBA စစ်ခေါင်းဆောင်တဦး ဖြစ်သည်။

အောင်ပွဲခံပြီး ရွှေကုက္ကိုသို့ အပြန်တွင် ဒု ဗိုလ်မှူးကြီးစံပြုံး ခြုံခို တိုက်ခိုက် ခံရသည့် နေရာမှာ KNU စိုးမိုးသည့် ဒေသ မဟုတ်သည့် အတွက် DKBA အချင်းချင်း လုပ်ကြံမှုသာ ဖြစ်နိုင်သည်ဟု သုံးသပ်ချက်များလည်း ပေါ်ထွက်နေသည်။

လုပ်ကြံမှုမှာ DKBA ၉၉၉ တပ်မဟာမှ ဗျူဟာမှူး ဗိုလ်မှူးကြီး စောချစ်သူ၏ လက်ချက်ဖြစ်သည် ဟူသော သတင်းလည်း ထွက်ပေါ် နေ သည်ဟု DKBA နှင့် နီးစပ်သည့် အမည်မဖော်လိုသူ ကရင်အမျိုးသမီးတဦးက ပြောသည်။

“ဗိုလ်ချစ်သူက နေပြီးတော့ ဒီ ထိုးစစ်ပြီးသွားတော့ စံပြုံးကို သူအားကိုးရမယ့် အခန်းကဏ္ဍပြီးပြီ၊ ကျန်တဲ့အပိုင်း ဆက်ပြီးတော့ အသုံးချစရာ မလိုတော့ဘူး။ သူ ဆက်ရှိနေမယ် ဆိုရင် သူ့ထက် ကျော်သွားနိုင်တယ်၊ ဒါကြောင့် သူ့ကို ရှင်းလိုက်တယ်ဆိုပြီး ပြောနေကြတယ်” ဟု သူက ဧရာဝတီကို ပြောပြသည်။

လုပ်ကြံခံလိုက်ရသော ဗိုလ်စံပြုံးသည် ပညာအရေး အချင်း မြင့်မားသူတဦးဖြစ်ပြီး၊ ဘာသာစကား ကျွမ်းကျင်မှု ရှိသဖြင့် မြန်မာ့တပ်မတော်နှင့် ဆက်ဆံရေးတွင် အားကိုးရသူတဦးဖြစ်သည်ဟု သိရသည်။

DKBA စစ်ရေး ဦးဆောင်မှုတွင် ဗိုလ်စံပြုံး သာလွန်သွားမည်ကို စိုးရိမ်သောကြောင့် ဗိုလ်ချစ်သူက လုပ်ကြံခြင်း ဖြစ်နိုင်ကြောင်း သုံးသပ်သူတချို့လည်း ရှိနေသည်။

KNU ခေါင်းဆောင် ဖဒိုမန်းရှာကို ပြီးခဲ့သည့်နှစ် ဖေဖော်ဝါရီလက မဲဆောက်မြို့တွင် လုပ်ကြံခဲ့သူမှာ ဗိုလ်စံပြုံး ဖြစ်သည်ဟု အများက ခန့်မှန်းထားကြသည်။

ထို့ကြောင့် ဗိုလ်စံပြုံး သတ်ဖြတ်ခံခဲ့ရခြင်းမှာ KNU ၏ လက်စားချေမှုဖြစ်နိုင်သည်ဟူသော ယူဆချက်လည်း ထွက်ပေါ်လာသည်။ KNU တွဲဖက် အတွင်းရေးမှူး(၁) ဗိုလ်မှူး စောလှငွေက အဆိုပါ အယူအဆကို လက်မခံပေ။

“ပထမ မြှားဦးကတော့ ကျနော်တို့ ဘက်ကို လှည့်တယ်၊ သူတို့ အခင်းဖြစ်တဲ့ နေရာတွေကို သွားကြည့်တော့ KNU ရဲ့ လက်ချက် မဖြစ်နိုင်ဘူးဆိုတာ သူ့တို့တပ် အတွင်းမှာ ဝေဖန်နေကြတယ်။ အခု သူတို့တပ် အတွင်းမှာပဲ တရားခံ လိုက်ရှာနေတဲ့ သဘော ရှိတယ်။ အခုထိတော့ အဖြေကတော့ ပေါ်မလာသေးဘူး” ဟု ဗိုလ်မှူး စောလှငွေက ဧရာဝတီသို့ ပြောသည်။

ဧရာဝတီက ဘားအံမြို့ရှိ DKBA အုပ်ချုပ်ရေးရုံးသို့ ဆက်သွယ်သော်လည်း တာဝန်ယူ ဖြေကြားမည့်သူ မရှိပေ။

KNU မှ ခွဲထွက်သွားပြီး ငြိမ်းချမ်းရေး ကောင်စီ အမည်ဖြင့် ကရင်ပြည်နယ် အတွင်း လှုပ်ရှားနေသော ဗိုလ်မှူးချုပ် ထိန်မောင်၏ အဖွဲ့သည်လည်း သံသယ ဖြစ်ဖွယ် ရှိသည်ဟု ထိုင်းမြန်မာ နယ်စပ် မဲဆောက်မြို့မှ အမည် မဖော်လိုသူ နိုင်ငံရေးသမား တဦးက သုံးသပ်သည်။

“ကျနော် သိသလောက်တော့ အဲဒီနေရာမှာ KNU မရှိဘူးဗျ။ ဗိုလ်မှူးချုပ်ထိန်မောင်တို့အဖွဲ့ရဲ့ လက်ချက်လည်း ဖြစ်နိုင်တယ်။ သူတို့က နယ်မြေ လိုချင်လို့ ဗိုလ်ဆန်ပြုတ်ကို ရှင်းလိုက်တာလို့ ယူဆရတယ်။ သူတို့အဖွဲ့က မှား ပစ်တာလည်း ဖြစ်နိုင်တယ်၊ ဒါမှမဟုတ် တမင်ပစ်တာလည်း ဖြစ်နိုင်တယ်” ဟု နယ်စပ်ဒေသတွင် အနှစ် ၂ဝ ဝန်းကျင် နေထိုင်ခဲ့သော အဆိုပါ နိုင်ငံရေးသမားက ဧရာဝတီကို ပြောပြသည်။

မြန်မာစစ်အစိုးရက DKBA ကို ဖွဲ့စည်းပုံအခြေခံ ဥပဒေအသစ်အရ နယ်ခြားစောင့်တပ် အဖြစ် အသွင် ပြောင်းလဲရန် ဆွေးနွေးခဲ့ရာ DKBA က သဘောတူခဲ့သည်။

ထိုသို့ သဘောတူပြီးနောက် မြန်မာ့တပ်မတော်နှင့် DKBA ပူးပေါင်းပြီး KNU ၏ တပ်စခန်းများကို အဆက်မပြတ် ထိုးစစ်ဆင်ခဲ့ကြသည်။

KNU၏ တပ်မဟာ ၇ နယ်မြေကို စိုးမိုးပြီးပါက ဗိုလ်ချစ်သူသည် သူ့အာဏာကို အသုံးချပြီး သောင်ရင်းမြစ် တလျှောက်ရှိ ဒေသများတွင် စီးပွားရေး လုပ်ကိုင်သွားမည် ဖြစ်ကြောင်း DKBA နှင့် နီးစပ်သူ စီးပွားရေး သမားများက သုံးသပ် ပြောဆိုနေကြသည်။