အေးလဲ့ Monday, 19 October 2009
အောက်တိုဘာ ၁၈ ရက်နေ့က ကျရောက် ခဲ့သော ကိုမင်းကိုနိုင် ၏ မွေးနေ့ အထိမ်း အမှတ် အဖြစ် ပြည်တွင်း၌ အခြေခံ ပညာ ကျောင်း သားများ သမဂ္ဂ (အကသ) အဖွဲ့ကို ပြန်လည်ဖွဲ့စည်း ခြင်းနှင့် အဖြူရောင် လှုပ်ရှား မှုများ ပြုလုပ်ခဲ့ကြောင်း ဗမာ နိုင်ငံလုံး ဆိုင်ရာ ကျောင်းသား သမဂ္ဂများ အဖွဲ့ချုပ် (ဗကသ) ၏ ပြောရေး ဆိုခွင့် ရှိသူ ကိုဇာနည်က ပြောသည်။
ထောင်ဒဏ် ၆၅ နှစ် အကျဉ်းကျခံနေရသော ၈၈ မျိုးဆက်ကျောင်းသားခေါင်းဆောင် ကိုမင်းကိုနိုင်၏ ၄၇ နှစ်ပြည့်မွေးနေ့အတွက် ဂုဏ်ပြုအထိမ်းအမှတ်ပွဲကို ပြည်တွင်း၊ ပြည်ပ၌ နိုင်ငံရေးတက်ကြွ လှုပ်ရှားသူများက ပြုလုပ်ခဲ့ကြသည်။
ကိုဇာနည်က “ကိုမင်းကိုနိုင်ကို ဂုဏ်ပြုတဲ့ အထိမ်းအမှတ်အဖြစ် အရင်ကရှိခဲ့ဖူးတဲ့ အကသ ကို ပြန်ဖွဲ့စည်းလိုက်ပါတယ်၊ ဒီလို ပြန်လည်ဖွဲ့စည်းတဲ့ ကြေညာချက်တွေကိုလည်း လမ်းဆုံတွေ၊ ဈေးတွေ နေရာအနှံ့အပြားမှာ အကသ ရဲဘော်တွေက လိုက်လံ ဖြန့်ဝေခဲ့ပါတယ်” ဟု ပြောပြသည်။
ဗကသ၏ ကြီးမှူးကွပ်ကဲမှုဖြင့် အကသ အဖွဲ့ဝင်များက ထိုအဖြူရောင်လှုပ်ရှားမှုကို ပြုလုပ်ခဲ့ကြောင်းသိရ သည်။
“ဘုရားမှာ အဖြူရောင် နှင်းဆီပန်းတွေလှူပါတယ်၊ အဲဒါဟာ ကိုမင်းကိုနိုင်၊ ကိုကိုကြီး၊ ကိုဌေးကြွယ် အစရှိတဲ့ ၈၈ မျိုးဆက်တွေ စခဲ့တဲ့ အဖြူရောင်လှုပ်ရှားမှုပါပဲ၊ အဲဒါကို ကျနော်တို့က ပြန်လည် ဖော်ဆောင်တဲ့ သဘော ပဲ၊ ပြီးတော့ အဖြူရောင် တီရှပ်တွေဝေတယ်၊ အဖြူရောင်တွေ မြို့ထဲမှာ ဝတ်ကြတယ်” ဟု ရန်ကုန်မြို့မှ ကိုဇာနည်က ဆက်ပြောသည်။
ကိုမင်းကိုနိုင်သည် ၂၀၀၇ ခုနှစ် လောင်စာဆီဈေးနှုန်း ကျဆင်းရေး လမ်းလျှောက် ဆန္ဒပြခဲ့မှုတွင် ဦးဆောင် ခဲ့မှုဖြင့် ထောင်ဒဏ် ၆၅ နှစ်ချမှတ်ခံထားရသည်။ လက်ရှိတွင် ရှမ်းပြည်နယ် ကျိုင်းတုံ ထောင်သို့ ပို့ဆောင်ခံထားရသည်။
၎င်းနှင့်အတူ ကိုကိုကြီး၊ ကိုဂျင်မီ ၊ ကိုမြအေး၊ ကိုမင်းဇေယျ စသည့် ထင်ရှားသည့် ကျောင်းသား ခေါင်းဆောင်များ အပါအဝင် ၈၈ မျိုးဆက်ကျောင်းသားအဖွဲ့ဝင် ၃၇ ဦးကို စစ်အစိုးရက ဖမ်းဆီး၍ နှစ်ရှည်ထောင်ဒဏ် အနည်းဆုံး ၆၅ နှစ်စီ ချမှတ်ခဲ့ပြီး မြို့နှင့်ဝေးလံခေါင်ပါးသော နယ်ထောင်များသို့ ပို့ဆောင်ခဲ့သည်။
၁၉၈၈ ခုနှစ် အရေးတော်ပုံကာလ သြဂုတ်လ ၂၈ ရက်နေ့တွင် ရန်ကုန်တက္ကသိုလ်၌ ကျင်းပသော ကျောင်းသားညီလာခံ၏ အစည်းအဝေး ဆုံးဖြတ်ချက်အရ ကိုမင်းကိုနိုင်ကို အဖွဲ့၏ ဥက္ကဋ္ဌတာဝန် ပေးအပ်ခဲ့သည်။
ထို့နောက် ကိုမင်းကိုနိုင်သည် ၁၉၈၉ ခုနှစ်တွင် ဖမ်းဆီးထိန်းသိမ်းခံရပြီး ၁၆ နှစ်ခန့် အကြာ ၂၀၀၄ ခုနှစ်တွင် ပြန်လည် လွတ်မြောက်ခဲ့သည်။
ထိုသို့ လွတ်မြောက်ခဲ့ပြီးနောက်ပိုင်း ၈၈ မျိုးဆက်ကျောင်းသားများကို ပြန်လည်စုစည်းကာ ၈၈ မျိုးဆက် ကျောင်းသားအဖွဲ့ကို ဦးဆောင်ဖွဲ့စည်းခဲ့သည်။ ထိုသို့သော နိုင်ငံရေးလှုပ်ရှားမှုကြောင့် ကိုမင်းကိုနိုင်အား စစ်အစိုးရက အကြိမ်ကြိမ် ဖမ်းဆီးထိန်းသိမ်းခဲ့သည်။
ကိုမင်းကိုနိုင်သည် နိုင်ငံရေးတက်ကြွ လှုပ်ရှားသူတဦးသာ မကဘဲ ပန်းချီ၊ ဂီတ၊ စာပေ စသည့် အနုပညာလိုက်စားသူ တဦးလည်းဖြစ်သည်။
ထိုင်း-မြန်မာ နယ်စပ်အခြေစိုက် နိုင်ငံရေး အကျဉ်းသားများ ကူညီစောင့်ရှောက်ရေး အသင်း (AAPP) က ကိုမင်းကိုနိုင်၏ မွေးနေ့ အခမ်းအနားကို ကျင်းပပြီး သူရေးသားခဲ့သည့် “နောက်ကြည့်မှန်” အမည်ရှိ ဝတ္ထုစာအုပ်ကိုလည်း မွေးနေ့ အထိမ်းအမှတ်အဖြစ် ထုတ်ဝေလိုက်ကြောင်း သိရသည်။
၎င်းစာအုပ်သည် ၁၉၈၈ အရေးတော်ပုံသမိုင်းကို နောက်ခံထားသော အချစ်ဝတ္ထုစာအုပ်ဖြစ်သည်။
ကိုမင်းကိုနိုင်၏ ဝတ္ထုထုတ်ဝေခြင်းနှင့်ပတ်သက်၍ AAPP က “ကိုမင်းကိုနိုင်သည် ယုံကြည်မှုအတွက် သူ့ဘ၀၏ အကောင်းဆုံးအချိန်များကို နံရံလေးဘက်ကြား ရင်းနှီး မြှုပ်နှံခဲ့သည်။ ယခုတဖန် ရင်းနှီးမြှုပ်နှံဆဲ ဖြစ်သော်လည်း သူသည် လူ့အခွင့်အရေးနှင့် ဒီမိုကရေစီကို ချက်ကြိုးနှင့်အတူ အဖြတ်ခံခဲ့ရသော မျိုးဆက်ကို ကိုယ်စားပြုသည်။ သံတိုင်နောက်က မွေးနေ့ကိတ်ပေါ်တွင် ကျနော်တို့ ဖယောင်းတိုင်ထွန်းခွင့်မရသော်လည်း သူ့နှလုံးသား၏ အလင်းရောင်ကို အားလုံးထံ ပျံ့နှံ့ရန် သည်စာအုပ်ငယ်ကို ထုတ်ဝေခြင်းဖြစ်သည်” ဟု ဖော်ကျူးထားသည်။
“သူက ခေါင်းဆောင်ကောင်းပီသတယ်လို့ ပြောလို့ရတယ်။ ၁၉၈၉၊ ပထမဆုံးအကြိမ် အဖမ်းခံရတုန်းက သူရယ်၊ ကျနော်ရယ်၊ ဘိုဘိုရယ်၊ အဲဒီတုန်းက သူက သူရဲ့လွတ်မြောက်ရေးအတွက် မစဉ်းစားဘူး၊ ကျနော်တို့ နှစ်ယောက်အတွက် စဉ်းစားခဲ့တယ်။ အဲဒီလို ကိုယ်ကျိုးစွန့်တယ်၊ အနစ်နာခံတယ်၊ ခေါင်းဆောင်စိတ် ရှိတယ်ဆိုတာ ကျနော့်တသက်တာမှာ မေ့လို့မရတဲ့ ဟာပေါ့လေ” ဟု AAPP ၏ တွဲဖက်အတွင်းရေးမှူး ကိုဘိုကြည်ကု ပြန်လည်ပြောပြသည်။
သောကြာနေ့က ထိုင်း - မြန်မာနယ်စပ် မဲဆောက်မြို့ရှိ စာသင်ကျောင်း ၇ ကျောင်းတွင် ကိုမင်းကိုနိုင် အကြောင်း ဟောပြောပွဲများ ကျင်းပခဲ့ကြောင်းလည်း သိရသည်။
No comments:
Post a Comment