ဂျူရီချိုင်း
မော်လမြိုင်မဲဆန္ဒနယ်၌ ကြိုတင်မဲကောက်ခံရာတွင် ရွေးကောက်ပွဲကော်မရှင်က ပါတီကိုယ်စားလှယ်လောင်းများအား ၀င်ရောက်ကြည့်ရှု့ခွင့် မရှိဟု မွန်ဒေသလုံးဆိုင်ရာဒီမိုကရေစီပါတီက သိရသည်။ ကြိုတင် မဲများကို ဝင်ရောက် ပြိုင်မည့် ပါတီတစ်ခုစီက ကိုယ်စားလှယ် နှစ် ဦး စီ ကြည့်ရှုရန် ရွေးကောက်ပွဲ ကော်မရှင်က ပြောဆိုထားသော်လည်း ကြိုတင်မဲမကောက်ခံမီ တစ်ရက်အလိုက ပါတီ ကိုယ်စားလှယ် လောင်းများ လိုက်ခွင့်မရှိကြောင်း ရွေးကောက်ပွဲကော်မရှင်က ထပ်မံပြောသည်ဟု မွန်ပါတီက ရွေးကောက်ပွဲ အောင်နိုင်ရေး ဥက္ကဌ နိုင် အောင်ချမ်းက ဆိုသည်။
“ ကြိုတင်မဲ ကောက်ခံတဲ့နေရာမှာ ပါတီကိုယ်စားလှယ်လောင်းတွေက လိုက်လို့ မရတဲ့အတွက် တရားမျှတမှုရှိတဲ့ ကြိုတင်မဲတွေ မဖြစ်နိုင် တော့ဘူး” ဟု ၎င်းက ပြောသည်။
ကြိုတင်မဲနှင့် ပတ်သက်၍ ယနေ့မနက် ၉ နာရီတွင် ကော်မရှင်ရုံးသို့ သွားရောက်စဉ် ၎င်းမဲများအား ဖြည်ကြည့်ခွင့် မရကြောင်းနှင့် တစ်ပေ ကျော်ခန့်ရှိသည့်အိတ်နှင့် ကြိုတင်မဲများကို ထည့်သွင်းထားသည်ကိုသာ တွေ့မြင်ခဲ့သည်ဟု နိုင်အောင်ချမ်းက ဆက်ပြောသည်။
ကြိုတင်မဲကို ဧပြီလ-၁ရက်နေ့ ညနေ ၄ နာရီမှစ၍ မဲပေးမည့်မဲရုံများတွင် ကော်မရှင်က ဖောက်ပြမည်ဖြစ်ပြီး လာရောက်ကြည့်ရှုရန် ပါတီ ကိုယ်စားလှယ်လောင်းများအား ပြောဆိုခဲ့သည်ဟု သိရသည်။
မတ်လ ၃၀၊ ၃၁ ရက် နှစ်ရက်၌ ကြိုတင်မဲများကို သတ်မှတ်အချိန်အတိုင်း သက်ဆိုင်ရာ ကော်မရှင်နှင့် ကျေးရွာ၊ ရပ်ကွက်လူကြီးထံတွင် မဲပေးနိုင်သည်ဟု ရွေးကောက်ပွဲကော်မရှင်က ထုတ်ပြန်ထားသည်။
မော်လမြိုင်မြို့နယ် ပြည်သူ့လွှတ်တော်လစ်လပ်မဲဆန္ဒနယ်တွင် အမျိုးသားဒီမိုကရေစီအဖွဲ့ချုပ် (NLD) ၊ မွန်ဒေသလုံးဆိုင်ရာ ဒီမိုကရေစီ ပါတီ၊ တိုင်းရင်းသားစည်းလုံးညီညွှတ်ရေးပါတီ (တစည) နှင့် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီက ကိုယ်စားလှယ်လောင်းများ ဝင်ရောက်ယှဉ်ပြိုင်ကြမည်ဖြစ်သည်။
No comments:
Post a Comment