သိမ်တော်ကြီး စေတီတော်နားမှာ မိုင်းခွဲခဲ့တာကြောင့် စေတီတော်မှာ အက်ကြောင်းတွေ ဖြစ်ပေါ်ခဲ့တဲ့ သတင်းတွေထွက်ပေါ်ပြီးနောက် ဒေသခံတွေက စေတီတော်ကို ကြည့်ရှုစစ်ဆေးဖို့ တောင်းဆိုတာကို သက်ဆိုင်ရာက မလိုက်လျောတဲ့အတွက် အခုလို သပိတ်စခန်းဖွင့်ပြီး တောင်းဆိုနေတာဖြစ်တဲ့အကြောင်း တုံကျေးရွာ အုပ်စုက လယ်သမားခေါင်းဆောင် ကိုမင်းမင်းက ပြောပါတယ်။
“စီမံကိန်းကြီးကို စပြီးတော့ ယမ်းတွေ ဖောက်ခွဲနေတဲ့အခါမှာ သိမ်ဘုရားမှာလည်း အက်ကြောင်းတွေ ထင်သွားတယ်လို့ ကျွန်တော်တို့ သတင်းရတယ်။ အဲဒီဟာအတွက် သိမ်ဘုရားကို တက်ပြီး ကြည့်ရှုခွင့်တောင်းတယ်။ တစ်ပြားမှကို လုံးဝကို မပေးဘူး။ အဲဒါမပေးတဲ့အတွက် ဒါမရမခြင်း ကျွန်တော်တို့ မပြန်ဘူးဆိုပြီးတော့ ဆည်တဲကျေးရွာရဲ့အနောက်ဖက် အင်ကြင်းတောင်ပေါ်မှာ ကျွန်တော်တို့ သပိတ်စခန်းဖွင့်ပြီး တောင်းဆိုနေတယ်ခင်ဗျ။”
အခုလို သပိတ်စခန်း ဖွင့်လှစ်တောင်းဆိုနေပေမယ့် အစိုးရဘက်က လာရောက် ညှိနှိုင်းတာ မရှိသေးဘူးလို့လည်း ဆိုပါတယ်။
လက်ပံတောင်းတောင် ကြေးနီစီမံကိန်း စုံစမ်းစစ်ဆေးရေး ကော်မရှင်ရဲ့ အစီရင်ခံစာထဲမှာ စီမံကိန်း မစတင်ခင် သာသနိက အဆေက်အအုံတွေကို လွတ်ကင်းတဲ့နေရာကို ပြောင်းရွှေ့ပေးဖို့ အကြံပြုထားပြီး ဒီလို ပြောင်းရွှေ့တဲ့ နေရာဟာလည်း သံဃာတော်တွေနဲ့ ဒေသခံတွေ ကျေနပ်မှုရှိတဲ့ နေရာကို ပြောင်းရွှေ့ပေးဖို့ တိုက်တွန်းထားပြီး အဲဒီအစီရင်ခံစာပါအတိုင်း လုပ်ဆောင်ပေးဖို့ ဒေသခံတွေက တောင်းဆိုကြတဲ့အကြောင်း ရေဒီယိုသြစတြေးလျ သတင်းထောက် စူးရှက သတင်းပေးပို့ခဲ့ပါတယ်။
No comments:
Post a Comment