ဟိန်းကိုစိုး
ရခိုင်ပြည်နယ်အတွင်း ဖြစ်ပေါ်နေသည့် စစ်ပွဲများတွင် ပြည်သူများအပေါ် နှိပ်စက်ညှင်းပန်းမှုများ ရှိနေသည်ဟု ရခိုင်တပ်မတော် (AA) ထုတ်ပြန်ချက်မှာ မဟုတ်မှန်ကြောင်းနှင့် တပ်မတော်က ရခိုင်ပြည်သူများအပေါ် ညှင်းပမ်းနှိပ်စက်မှု မရှိကြောင်း တပ်မတော် ပြန်ကြားရေးအဖွဲ့က ဧပြီလ ၂၈ ရက်က ငြင်းဆိုလိုက်သည်။
"တပ်မတော်က ရွာသားတွေကို နှိပ်စက်တာ ဒီခေတ်မှာ မရှိတော့ပါဘူး၊ တာဝန် ရှိသူတွေ ကိုယ်တိုင် ရွာသားတွေနဲ့ ပေါင်းပြီး ကူညီနေတယ်။ သူတို့ထုတ်ပြန် တာတွေက အတည်ပြုလို့မရပါဘူး" ဟု သတင်းပြန်ကြားရေးကော်မတီမှ ဗိုလ်ကြီးအဆင့်ရှိသူက ဆိုသည်။
မြန်မာတပ်မတော်သည် ရခိုင်ရွာ အချို့အားအတင်း ဝင်ရောက် မွှေနှောက်ပြီး ရပ်မိ၊ ရပ်ဖ ရွာလူကြီးများ အပါအဝင် ရွာသားများကို ထိန်းသိမ်း စစ်ဆေးခြင်း၊ ဆန်၊ ဆီ၊ ဆား စားနပ်ရိက္ခာတို့ကို ဖျက်ဆီး ယူဆောင်ခြင်း၊ နှိပ်စက်ခြင်း၊ ခြိမ်းခြောက်ခြင်း၊ စစ်ရာဇဝတ်မှု ကျူးလွန်ခြင်း၊ တို့ကို ဆက်တိုက်ပြု လုပ်ခြင်းကြောင့် ရခိုင်တပ်မတော် အောက်ခြေစစ်သားများ၏ ဒေါသများကို နှိုးဆွပေးနေပြီး မလိုလားအပ်သည့် ပြဿနာ ရပ်များဖြစ်ပေါ်နိုင်ရန် တွန်းအားများ ပေးနေသည်ဟု ရခိုင်တပ်မတော်က ဧပြီ ၂၈ ရက်တွင် ထုတ်ပြန်ထားသည်။
"AA က တရားဝင်အဖွဲ့ အစည်းမဟုတ်ဘူး၊ သူတို့ ထုတ်ပြန်ချက်တွေကလည်း အတည်ပြုလို့ရဘူး၊ ဒါပေမယ့် ထုတ်ပြန်တာတွေကိုတော့စောင့်ကြည့်ဖို့ လိုတယ်" ဟု မြန်မာတပ်မတော်မှ ဗိုလ်ကြီး အဆင့်ရှိသူက ဆိုသည်။
ရခိုင်ပြည်နယ်အတွင်း ဖြစ်ပေါ်နေသည့် တိုက်ပွဲများ ကိုနိုင်ငံရေးနည်းအရဖြေရှင်းရမည့် ကိစ္စရပ်များ ကိုနိုင်ငံရေးနည်းဖြင့် မဖြေရှင်းခြင်းက လူမျိုးရေးပဋိပက္ခ များဖြစ်ပေါ်လာနိုင်အောင် တွန်းအားပေး ရာရောက်နေသည်ဟု ထုတ်ပြန်ချက်တွင် ပါရှိသည်။
ယင်းသို့ ညှင်းပမ်းနှိပ် စက်မှုများ ရှိနေသည်ကို ရခိုင်အမျိုးသားထုတို့က လက်ပိုက်ကြည့်ရှုမနေဘဲ ရခိုင် တပ်မတော်နှင့်လာရောက်ပူးပေါင်းကြရန် မေတ္တာရပ်ခံကြောင်းလည်း AA က ထည့်သွင်းရေးသားထားသည်။
"ရခိုင်ပြည်နယ်မှာဖြစ်နေတာတွေကို အစိုးရနဲ့ဖြစ်နေတဲ့ အဖွဲ့အစည်းတို့က တွေ့ဆုံဆွေးနွေး ပြီးတော့ အမြန်ဆုံး စစ်ပွဲတွေကို ရပ်သင့်တယ်၊ တိုင်းရင်းသားတွေ ကတော့ အဖွဲ့အားလုံးနဲ့ အပစ်ရပ်ချင်တယ် အစိုးရက ၁၆ ဖွဲ့နဲ့ပဲ လုပ်မယ်ဆိုထားတော့ ကွဲလွဲမှုရှိနေတယ်" ဟု ရခိုင်လွတ်မြောက်ရေးပါတီ ဗဟိုအလုပ် မှုဆောင်ဒေါ်စောမြရာဇာလင်း က ဆိုသည်။
ရခိုင်ပြည်နယ်၊ကျောက်တော်ဒေသတွင်မြန်မာစစ်တပ်နှင့်AAတို့ မတ်လ၂၉ရက်မှစတင်ကာ တိုက်ပွဲပေါင်း၁၁ပွဲထိဖြစ်ပွားနေပြီး စစ်ဘေးကြောင့်ပြောင်းရွှေ့နေ ထိုင်ရသူ ၅၀၀ကျော် အထိ ရှိနေပြီဖြစ်သည်။
ရခိုင် တပ်မတော်သည် တစ်နိုင်ငံလုံးအပစ် အခတ်ရပ်စဲရေး ညှိနှိုင်းအဖွဲ့ဝင် တိုင်းရင်းသား လက်နက်ကိုင် အဖွဲ့ တစ်ခုဖြစ်သော်လည်း ဦးသိန်းစိန် အစိုးရကမူ တစ်နိုင်ငံလုံး အပစ်အခတ်ရပ်စဲရေး လတ်မှတ်ရေးထိုးရာတွင် ရခိုင်တပ်မတော် (AA) ပါဝင်မှုကို ကန့်ကွက်ထားသည်။
No comments:
Post a Comment