သံဃာတော်များ ပြည်ပထွက်ခွင့် ပိုမို တင်းကျပ်လာ

မင်းနိုင်သူ Wednesday, June 23, 2010

သံဃာတော်များ ပြည်ပ ထွက်ခွာခွင့်ကို နအဖ စစ်အစိုးရက ပိုမိုတင်းကျပ် နေကြောင်း ပြည်တွင်း သံဃာတော်များက ဧရာဝတီသို့ မိန့်ဆိုသည်။

“ဦးပဉ္ဇင်းတို့ ထိုင်းကိုကြွဖို့ ပတ်စ်ပို့ သွားလုပ်တော့ ပိုက်ဆံတွေဘာတွေ အားလုံးသွင်းပြီး နောက်ဆုံးအဆင့်ကျမှ သာသနာရေးရဲ့ ထောက်ခံချက်လိုပါတယ်တဲ့ ၊ ဒါနဲ့ ဦးပဉ္ဇင်းတို့လည်း ကမ္ဘာအေးက သာသနာရေးရုံးကို သွားရတယ် ၊ ဟိုရောက်တော့လည်း တဘက်နိုင်ငံရဲ့ခေါ်စာပေးပါ ၊ သံရုံးတံဆိပ်တုံးတွေ ပြပါနဲ့ ရစ်တော့တာပဲ ၊ အခုတော့ ပိုက်ဆံတွေ အကုန်ခံပြီးမှ ဘယ်လိုမှ ထွက်မရဘူးဖြစ်နေတယ်"ဟု ထိုင်းနိုင်ငံတွင် ပညာသင်ကြားလိုသည့် ရန်ကုန်မှ သံဃာတော်တပါးက မိန့်သည်။

အဆိုပါကိစ္စနှင့်စပ်လျဉ်း၍ မြန်မာနိုင်ငံကူးလက်မှတ်ထုတ်ပေးရေးအဖွဲ့ရုံးသို့ ဆက်သွယ်မေးမြန်းရာ တာဝန်ကျဝန်ထမ်းတဦးက ပတ်စ်ပို့ရုံးအနေဖြင့် သာသနာရေးဝန်ကြီးဌာန၏ ထောက်ခံချက်ပါရှိပါက ထုတ်ပေးနေကြောင်း ပြန်လည်ဖြေကြားခဲ့သည်။

ဘန်ကောက်ရှိ တက္ကသိုလ်တခုတွင် ပညာသင်ကြားနေသည့် သံဃာတော်တပါးက "ပြီးခဲ့တဲ့တပတ်ကျော်လောက်ကစပြီး သံဃာတွေ ပြည်ပထွက်ဖို့ ပိုခက်လာတယ် ၊ အခုက ပတ်စ်ပို့ရဖို့ သာသနာရေးက ထွက်မယ့်နိုင်ငံရဲ့ ပင့်ဖိတ်စာကို ပြခိုင်းတယ် ၊ ဒီဘက်သံရုံးက ထွက်လာမယ့် သံဃာရဲ့ ပတ်စ်ပို့ မိတ္တူကိုတောင်းတယ် ၊ ဆိုတော့ ပတ်စ်ပို့အသစ်လုပ်ရမယ့် သံဃာတွေအဖို့ ဘယ်အဆင့်ကို ဘယ်လိုဖြတ်သန်းရမှန်းကို မသိတော့တာမျိုးဖြစ်နေကြတယ်"ဟု ရှင်းလင်းပြောဆိုသည်။

သံဃာတော်များ ပြည်ပသို့ထွက်ခွာပါက သက်ဆိုင်ရာနိုင်ငံ၏ ပင့်ဖိတ်စာ ၊ သံဃာတော်၏ နိုင်ငံကူးလက်မှတ်၊ သာသနာမှတ်တမ်း၊ တိုင်းခရိုင်မြို့နယ်၊ သံဃာ့မဟာနာယက၏ထောက်ခံချက်၊ ပြစ်မှုကင်းရှင်းကြောင်း ရဲစခန်းထောက်ခံချက်တို့ကို ရန်ကုန်မြို့ ကမ္ဘာအေးဘုရားလမ်း သာသနာရေးဝန်ကြီးဌာန၊ သာသနာတော်ထွန်းကားပြန့်ပွားရေး ဦးစီးဌာန (သာ-ထွန်း-ပြန့်) သို့ တင်ပြနေကြရသည့်အပြင် ယမန်နှစ် အောက်တိုဘာအတွင်းမှစ၍ ထေရုပ္ပတ္တိကိုပါ တောင်းယူနေကြောင်း သိရသည်။

“တကယ်ဆိုလုပ်ငန်းစဉ်အဆင့်ဆင့်ကို အတိအလင်း ကြေညာကပ်ထားလေ ၊ အရှင်ဘုရားတို့ ပတ်စ်ပို့လုပ်မယ်ဆိုရင် သာသနာရေးကို အရင်ကြွပါ ပြောပေါ့ ၊ အခုတော့ နေရာပေါင်းများစွာ သွားလာငွေသွင်းပြီးမှ ဟိုဟာလိုတယ် ၊ ဒီဟာလိုတယ်နဲ့ ဦးပဉ္ဇင်းတုိ့လို သံဃာငယ်တွေကို ဘယ်မှ ထွက်မရအောင် လုပ်ထားတာဗျ"ဟု မကြာသေးမီက ပြည်ပထွက်ခွာခွင့် ပြုလုပ်ခဲ့သည့် သံဃာတော် တပါးက ပြောဆိုသည်။

နအဖစစ်အစိုးရက ၂၀၀၇ စက်တင်ဘာ အရေးအခင်းပြီးချိန်မှစ၍ သံဃာတော်များအပေါ် တင်းကျပ်စွာ ကိုင်တွယ်နေရာ သံဃာတော်အများအပြားသည် ထိုင်း ၊ သီရိလင်္ကာ ၊ အိန္ဒိယနိုင်ငံများသို့ ထွက်ခွာ၍ ပညာသင်ယူနေကြသည်။

“အရင်ကတော့ တခြားနိုင်ငံတွေက သံဃာတွေက မြန်မာကိုလာပြီး ဗုဒ္ဓစာပေတွေကို သင်ကြားကြရတယ် ၊ အခု ဦးပဉ္ဇင်းတို့က အပြင်ထွက်ပြီး သင်နေကြရပြီ ၊ အထဲမှာက စစ်အစိုးရရဲ့ ဖိနှိပ်မှုတွေ ရှိတဲ့အပြင် သံဃာ့တက္ကသိုလ်တွေကလည်း တက္ကသိုလ် အဆင့်အတန်းမရှိဘူး ၊ စာချဆရာတော် အကျော်အမော်တွေရှိပေမယ့် တက္ကသိုလ်အဆင့်မီပစ္စည်း ကိရိယာတွေ မရှိဘူး ၊ ဘယ်မလဲ ကွန်ပျူတာ ၊ ဘယ်မလဲ လျှပ်စစ်မီး "ဟု ဘန်ကောက်တက္ကသိုလ်တခုတွင် တက်ရောက်နေသည့် သံဃာတော်တပါးက မိန့်သည်။

နအဖစစ်အစိုးရက သံဃာတော်များ ပြည်ပထွက်ခွာခွင့်ကို ပိုမိုတင်းကျပ်စွာ ကိုင်တွယ်နေသကဲ့သို့ ပြည်ပမှ ပြန်လာသော သံဃာ တော်များကိုလည်း စောင့်ကြည့်မှုများရှိနေသည်ဟု ရန်ကုန်မြို့ခံ သံဃာတပါးက မိန့်သည်။

အဆိုပါသံဃာတော်က “သူတို့က သံဃာတော်ရဲ့ ထေရုပ္ပတ္တိကိုပါတောင်းထားပြီး ပြည်ပထွက်ခွာခွင့်ပြုထားတော့ ပြန်လာရင်လည်း လိုက်ရတာလွယ်သွားတာပေါ့။ အဲဒါကြောင့် သံဃာတွေ မထွက်ခွာခင်ကတည်းက သာသနာရေးက အချက်အလက်တွေ အစုံ ရအောင် တောင်းထားတဲ့သဘောထင်ရဲ့”ဟု မိန့်သည်။

၂၀၀၉ ခုနှစ် ဇွန်လအတွင်းကလည်း သံဃာတော်များ ပြည်ပထွက်ခွာခွင့်ကို ယာယီပိတ်ထားခဲ့ဖူးသည်။

စစ်အစိုးရနှင့် နိုင်ငံတော် သံဃမဟာ နာယက အဖွဲ့က ပြည်တွင်း သံဃာတော်များ၏ လှုပ်ရှားမှုများကို ပိုမို ကန့်သတ် ချုပ်ချယ် နိုင်ရန်အတွက် စည်းမျဉ်းစည်းကမ်း အသစ်များထုတ်ပြန်ရန် ပြင်ဆင်နေကြောင်း ပြီးခဲ့သည့် ဖေဖော်ဝါရီလအတွင်းကလည်း အစိုးရ သတင်းစာများတွင် ဖော်ပြခဲ့သည်။

စစ်အစိုးရအား ဆန့်ကျင်သူများဟု သတ်မှတ်ခြင်းခံရသော သံဃာတော်များကို ချုပ်ကိုင်နိုင်ရန်အတွက် ၂၀၀၈ ခုနှစ်တွင် သံဃာ မှတ်ပုံတင် အသစ်များလည်း ထုတ်ပေး၍ ကိုင်ဆောင်စေခဲ့သည်။ ထိုသို့ ထုတ်ပေးခဲ့သဖြင့် လှုပ်ရှားမှုများကို ပိုမိုလွယ်ကူ စွာဖြင့် အာဏာပိုင်များက ခြေရာခံနိုင်ကြောင်း သံဃာတော်များက ဆိုသည်။

၂၀၀၇ ရွှေဝါရောင် သံဃာလှုပ်ရှားမှုတွင် ခေါင်းဆောင်တဦးအဖြစ် ပါဝင်ခဲ့သော အရှင်ဂမ္ဘီရကို စစ်အာဏာပိုင်များက ၂၀၀၇ နိုဝင်ဘာ လဆန်းတွင် ဖမ်းဆီးခဲ့ပြီး အမှုပေါင်း ၁၇ မှုနှင့် ထောင်ဒဏ် ၆၈ နှစ် ချမှတ်ခဲ့သည်။

၂၀၀၈ ဇွန်လအတွင်းက အယူခံဝင်ခဲ့ရာ စစ်အစိုးရက အရှင်ဂမ္ဘီရအား ထောင်ဒဏ် ၅ နှစ် လျှော့ပေးခဲ့ပြီး ထောင်ဒဏ် ၆၃ နှစ်ဖြင့် စစ်ကိုင်းတိုင်း ကလေးထောင်တွင် အကျဉ်းချထားသည်။

မြန်မာနိုင်ငံတွင် စစ်အစိုးရက ဖမ်းဆီးထိန်းသိမ်းထားသော သံဃာတော် အပါး ၂၅၀ ကျော်ရှိနေကြောင်း ထိုင်းနိုင်ငံအခြေစိုက် နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ၏ ၀ဘ်ဆိုဒ်တွင် ဖော်ပြထားသည်။