ကြားဖြတ်ရွေးကောက်ပွဲ မကျင်းပမီ ရက်သတ္တပတ်အတွင်း နေပြည်တော်၊ ရန်ကုန်တိုင်း နှင့် ဧရာဝတီတိုင်းရှိ မဲဆန္ဒနယ်မြေများတွင် ကောက်ခံရရှိခဲ့သည့် စစ်တမ်းများအရ ၆ဝ ရာခိုင်နှုန်းသော မဲဆန္ဒရှင် များမှာ အမျိုးသားဒီမိုကရေစီအဖွဲ့ချုပ် NLD အား မဲပေးမည်ဟု တွေ့ရှိရသည်။
အဆိုပါစစ်တမ်းအား မဇ္ဈိမ က ရန်ကုန်အခြေစိုက် COMREG မှ သုတေသန ပညာရှင်များ၏ ပူးပေါင်းဆောင်ရွက်မှု ဖြင့် မတ်လ နောက် ဆုံးအပတ်အတွင်း ကောက်ယူခဲ့ခြင်းဖြစ်ပြီး စစ်တမ်းမှ တွေ့ရှိရချက်အချို့အား မဇ္ဈိမ အယ်ဒီတာချုပ်က ရှင်းပြထားသည်။
“၆ဝ ရာခိုင်နှုန်းက NLD ကို မဲပေးမယ်လို့ပြောတယ်။ ၃၂ ရာခိုင်နှုန်းကတော့ ကြံ့ခိုင်ရေးကို မဲပေးမယ်ပြောတယ်။ ၅၈ ရာခိုင်နှုန်းက NLD နိုင်မယ်လို့ ယူဆကြတယ်။ ၃၁ ရာခိုင်နှုန်းက ကြံ့ခိုင်ရေး နိုင်မယ်လို့ ယူဆကြတယ်” ဟု အယ်ဒီတာချုပ် ဦးစိုးမြင့် က ပြောသည်။
စစ်တမ်းကို နေပြည်တော်ရှိ မဲဆန္ဒနယ်မြေ လေးခု၊ ဧရာဝတီတိုင်းအတွင်းမှ မဲဆန္ဒနယ်မြေ လေးခုနှင့် ရန်ကုန်တိုင်း အတွင်းမှ မဲဆန္ဒနယ် မြေ ခြောက်ခုအတွင်း လိုက်လံကောက်ခံခဲ့ခြင်း ဖြစ်သည်။ မေးမြန်းချက်များကို ပြန်လည်ဖြေကြား ပေးသူ ၃၆၂ ဦး အနက် အများစုမှာ ဘွဲ့ရ ပညာ တတ်များ ဖြစ်ကြပြီး ဖြေဆိုသူအများစုမှာ အသက် ၄ဝ မှ ၆ဝ အတွင်းနှင့် အသက် ၂၅ မှ ၃၉ နှစ်အရွယ်များ ဖြစ်ကြသည်။
ကောက်ခံရရှိသည့် ဒေသကြီးသုံးခုမှ ရရှိချက်များအရ NLD အား အများစု မဲပေးကြမည်ဟု တွေ့ရှိရသော်လည်း နေပြည်တော် တွင်မူ ကြံ့ ခိုင်ရေးပါတီမှ ကြိုတင် မက်လုံးပေး စည်းရုံးထားမှုများ ရှိနေ၍ မဲဆန္ဒရှင်များအတွက် အခက်အခဲများရှိနေကြကြောင်း ပြောသည်။
“အစိုးရဝန်ထမ်းတွေ အများစု ပြောတာကတော့ ဥပမာ နေပြည်တော်လို နေရာမျိုးမှာ သူတို့ကို ငွေကြိုတင်ချေးထား ပြီးတော့ ပစ္စည်းတွေ ပေးထားတာမျိုးတွေ ပြောပြတယ်။ သူတို့အနေနဲ့ကတော့ ကြံ့ခိုင်ရေးကိုပဲ မဲပေးရမယ့် အနေအထား ရှိတယ်။ ဒါပေမယ့် တကယ်လို့ နိုင်ငံ တကာ စောင့်ကြည့်လေ့လာရေးအဖွဲ့တွေ ရှိတယ်၊ လွတ်လပ်တဲ့ atmosphere ပေါ့၊ လွတ်လပ်တဲ့ အနေအထား ရှိတယ်ဆိုရင်တော့ သူတို့အနေနဲ့လည်း NLD ကို မဲပေးဖို့ စိတ်ဝင်စားတယ်ဆိုတဲ့အကြောင်းတော့ ပြောပြတယ်” ဟု COMREG အဖွဲ့မှ ကိုရဲ က စစ်တမ်းကောက်ယူမှု အတွေ့အကြုံအား ရှင်းပြသည်။
တွေ့ဆုံမေးမြန်းရာမှ ရရှိသည့် တုန့်ပြန်မှု (feedback)များအရလည်း နေပြည်တော်တွင် အစိုးရဝန်ထမ်းများအား ကြံ့ခိုင်ရေးပါတီမှ ချေး ငွေဖြင့် လက်ကိုင်ဖုန်းများ ဝယ်ခွင့်ပြုထား၍ ကြံ့ခိုင်ရေးပါတီအား မဲပေးရဖွယ်ရှိနေသည်။ သို့သော် အကယ်၍ နိုင်ငံတကာ စောင့်ကြည့် လေ့လာသူများဖြင့် လွတ်လပ်စွာ မဲပေးရပါက NLD အား မဲပေးမည်ဟုလည်း ဆိုကြသည်။ ကြားဖြတ်ရွေးကောက်ပွဲအား စောင့်ကြည့် သတင်းရယူအတွက် နိုင်ငံတကာ သတင်းမီဒီယားမား ၁၅ဝ ခန့်သာ အစိုးရက ခွင့်ပြုထားသည်။
သောကြာနေ့က ပြုလုပ်သည့် NLD သတင်းစာရှင်းလင်းပွဲတွင် လက်ရှိအနေအထားအရ လွတ်လပ်၍ တရားမျှတသည့် ရွေးကောက်ပွဲ မ ဖြစ်နိုင် သေးသော်လည်း ရွေးကောက် ပွဲတွင် ဆက်လက်ယှဉ်ပြိုင်သွားမည်ဟု ပါတီဥက္ကဋ္ဌဒေါ်အောင်ဆန်းစုကြည် က ပြောဆိုထားသည်။
“လုံးဝ လွတ်လပ်ပြီး တရားမျှတတဲ့ ရွေးကောက်ပွဲဖြစ်လာမယ်လို့ မထင်ပါဘူး။ ကျမတို့ရဲ့ ပါတီဆိုင်းဘုတ်တွေ၊ ပိုစတာ တွေကို ဖျက်ဆီး တာ မျိုးကအစ အနှောင့်အယှက်တွေ အများကြီး၊ အများကြီးပဲ။ ဒါပေမယ့် ဒီကြားဖြတ်ရွေးကောက်ပွဲက အမျိုးသား ပြန်လည် ရင်ကြား စေ့ ရေးအတွက် လှေကားထစ်တခု ဖြစ်မယ်လို့ ကျမတို့ မျှော်လင့်တယ်။ ဒါကြောင့် လူထုလိုလားတဲ့ အမျိုးသား ပြန်လည် ရင်ကြား စေ့ ရေး အတွက် ရှေ့ဆက်သွားဖို့ ကျမတို့ ဆုံးဖြတ်ခဲ့တယ်” ဟု NLD ဥက္ကဋ္ဌ က ပြောသည်။
NLD အား မဲပေးမည့်သူ အများစုမှာ ပါတီခေါင်းဆောင် ဒေါ်အောင်ဆန်းစုကြည်အား နှစ်သက်၍ ပေးရခြင်းဖြစ်ကြောင်း ကောက်ခံ ရရှိ သည့် စစ်တမ်းတုန့်ပြန်မှုများတွင် တွေ့ရှိရသည်။
ဖြေဆိုသူ ၈၅ ရာခိုင်နှုန်းမှာ ကြားဖြတ်ရွေးကောက်ပွဲတွင် သွားရောက်မဲပေးကြမည်ဖြစ်ပြီး ၈၄ ရာခိုင်နှုန်းက မဲပေးပုံပေး နည်းကို သိရှိနား လည်ထားပြီးဖြစ်သည်ဟု ဆိုသည်။ ထိုသို့သိရှိရခြင်းမှာ လက်ကမ်းကြော်ငြာများနှင့် ရွေးကောက်ပွဲ ကိုယ်စားလှယ် လောင်းများမှတဆင့် အများစုက သိရှိလာကြခြင်းဖြစ်သည်။
သို့သော် မိမိမဲဆန္ဒနယ်မြေတွင် ဝင်ရောက်ယှဉ်ပြိုင်မည့် ကိုယ်စားလှယ်လောင်း၏ အမည်အား မသိရှိသေးသူ ၁၃ ရာခိုင်နှုန်း ရှိနေသေး သည်။
No comments:
Post a Comment