အောင်သက်ဝိုင်း
မနက် ငါးနာရီကျော် အချိန်သာ ရှိသေးတာမို့ ပတ်ဝန်း ကျင်မှာ အမှောင်ထု အနည်းငယ် ကြီးစိုး နေဆဲ။ သာမန် ကျေးလက် တောရွာလေး တခု မှာဆိုရင် ဒီအချိန်က တိတ်ဆိတ်ငြိမ်သက် နေရမှာ ဖြစ်ပေ မယ့် ရန်ကုန်တိုင်း ကော့မှူးမြို့ နယ်မှာ ရှိတဲ့ ၀ါးသင်္ခ ကျေးရွာ ကလေး မှာတော့ လူရာပေါင်း များစွာ ပျားပန်းခတ် လှုပ်ရှား နေကြပြီ။
ဝေးလံ ခေါင်သီ လှတဲ့ တောရွာ ကလေးမှာ ရာနဲ့ ချီတဲ့ နိုင်ငံခြား သားတွေ၊ ခေတ်မီ မော်တော်ကား ကောင်းတွေနဲ့ ရှုပ်ယှက် ခတ်နေတယ်။ အများ စုသော လူစုလူဝေး ကတော့ ၀ါးသင်္ခ ကျေးရွာ အလယ် ခေါင်မှာ ရှိတဲ့ ပန်းရောင်သုတ်ထားတဲ့ နှစ်ထပ်အိမ် ကလေးရှေ့မှာ စုရုံး နေကြပြီး သူတို့ အားလုံးက နှစ်ထပ် အိမ်ကလေး ဆီကိုပဲ ဂရုတစိုက် ကြည့်နေ ကြတယ်။
သူတို့ လက်တွေ ထဲမှာတော့ နောက်ဆုံးပေါ် ကင်မ ရာတွေ၊ ဗီဒီယို ကင်မရာတွေ၊ မိုဘိုင်းလ်ဖုန်း တွေကိုယ်စီနဲ့ တစုံ တဦးကို မျှော်လင့် စောင့်ဆိုင်း နေကြတယ်။ သူတို့ အားလုံး မျက်နှာမှာ စောင့်ဆိုင်း ရမှုအ တွက် စိတ်မရှည် ကြတဲ့ အသွင် အပြင် မျိုးတွေ တွေ့မြင် နေရတယ်။
အဲဒီနှစ်ထပ် အိမ်ကလေး ရှေ့မှာပဲ ကရင် ရိုးရာ ၀တ်စုံ ၀တ်ဆင် ထားတဲ့ အမျိုးသား၊ အမျိုးသမီး တွေကအစ ကလေးငယ် တွေအဆုံး အရွယ် ပေါင်းစုံသော လူတွေက လူးလာ ခေါက်ပြန် သွားလာ နေကြ တယ်။ ဒါပေမယ့် သူတို့ မျက်နှာမှာ အပြုံးတွေ ကိုယ်စီ ရှိနေတယ်။
နီညိုရောင် ၀မ်းဆက် ရင်ဖုံး အင်္ကျီနဲ့ ထမီဝတ် ဆင်ထားတဲ့ အမျိုး သမီးတဦး နှစ်ထပ် အိမ်ထဲက ထွက်လာ တယ်ဆို ရင်ပဲ အားလုံး လှုပ်လှုပ် ရှားရှား ဖြစ်သွား ကြပြီး ပြေးသူက ပြေး၊ တိုးသူက တိုးနဲ့ ရုန်းရင်း ဆန်ခတ်ဖြစ် သွားတယ်။ လူတွေ အားလုံး တည်ငြိမ်မှု မရှိတော့ဘဲ ၀ရုန်း သုန်းကား ဖြစ်နေ ကြတယ်။
သူတို့ အားလုံးက အဲဒီ အမျိုး သမီးကိုပဲ အာရုံစိုက် နေကြတဲ့အတွက် ခြေလှမ်းမှား လဲကျသူက လဲကျဖြစ် နေကြတယ်။ အဲဒီ အမျိုး သမီးကတော့ “အမေစု” လို့ ပြည်သူတွေ အမြတ် တနိုး ခေါ်ကြတဲ့ မြန်မာ့ ဒီမိုကရေစီ ခေါင်းဆောင်၊ အမျိုးသား ဒီမိုကရေစီ အဖွဲ့ချုပ် (NLD) ဥက္ကဋ္ဌ ဒေါ်အောင်ဆန်း စုကြည်ပါပဲ။
ကော့မှူးမြို့နယ်က ၀င်ရောက် အရွေးချယ် ခံမယ့် NLD ရဲ့ ပြည်သူ့ လွှတ်တော် ကိုယ်စား လှယ်လောင်း ဒေါ်အောင်ဆန်း စုကြည် အနေနဲ့ ကြားဖြတ် ရွေးကောက်ပွဲ ကျင်းပတဲ့ ဧပြီလ ၁ ရက်နေ့ ကော့မှူးဝါး သင်္ခ ကျေးရွာမှာ လာရောက် နေထိုင်တာပါ။
ဒေါ်အောင်ဆန်း စုကြည်ရဲ့ ရွေးကောက်ပွဲ သတင်း ရယူ ကြတဲ့ နိုင်ငံ တကာ သတင်း ထောက်တွေ၊ ပြည်တွင်း ပြည်ပ သတင်းထောက် တွေကလည်း အရိပ်ပမာ ဒေါ်အောင်ဆန်း စုကြည် နောက်က ထပ် ကြပ် လိုက်လို့ သတင်း ရယူပေး ပို့နေ ကြတယ်။
“နည်းနည်းလောက် ဖယ်ပေးပါ။ အမေ့ကား သွားလို့ရအောင် ဖယ်ပေးကြပါ” ဆိုတဲ့ NLD လုံခြုံရေးအဖွဲ့ဝင်လူငယ်တွေရဲ့ အသံက လူအုပ်ကြားထဲမှာ ကျယ်ကျယ်လောင်လောင် ထွက်ပေါ်လာတယ်။ ဒေါ် အောင်ဆန်းစုကြည် လိုက်ပါတဲ့ ၉ဂ/၇၄၇၄ ပါဂျဲရိုး ကားနောက်ကို လူအုပ်ကြီးက ပြေးလိုက်နေကြတယ်။
သတင်းထောက်တွေက သတင်းရယူဖို့ လိုက်ကြတာဖြစ်ပေမယ့် ဒေသခံရွာခံလူထုကတော့ သူတို့ရဲ့ ရွာမှာ ဒုက္ခခံလာရောက်နေထိုင် ရွေးကောက်ပွဲဝင်တဲ့ ဒေါ်အောင်ဆန်းစုကြည်ကို နှုတ်ဆက်ဖို့ ကြိုးစား နေ ကြ တာ ဖြစ်ပါတယ်။
“အမေစုကို မဲပေး ခဲ့ပြီးပြီ။ မဲရုံစ ဖွင့်ဖွင့်ချင်း သွားပေး လိုက်တယ်” လို့ ဆိုလိုက် သူက အသက် ၂၇ နှစ်အရွယ် ကရင် တိုင်းရင်းသား တဦးပါ။
ဒေါ်အောင်ဆန်းစုကြည် သွားရောက်ကြည့်ရှုတဲ့ ၀ါးသင်္ခကျေးရွာရဲ့ မထည်ဝါတဲ့ စာသင်ကျောင်း မဲရုံကလေးမှာတော့ မဲပေးသူတွေနဲ့ စည်ကားနေပြီ။ မဲရုံပရ၀ုဏ် ခြံစည်းရိုးဘေးမှတော့ ဒေါ်အောင်ဆန်း စု ကြည်ကို ဓာတ်ပုံ ရိုက်ဖို့ ကြိုးစားနေတဲ့ ပြည်တွင်းပြည်ပ သတင်းထောက်နဲ့ ပြည့်နှက်နေတယ်။
မဲရုံ အတွင်းမှာ လှည့်လည်ကြည့် ရှုနေတဲ့ ဒေါ်အောင်ဆန်း စုကြည်က တည်ငြိမ်မှု အပြည့်နဲ့ မဲရုံ အတွင်းကို စေ့စေ့ စပ်စပ် လိုက်လံကြည့် ရှုနေတယ်။
မဲလာပေး သူတိုင်း ကိုလည်း ဒေါ်အောင်ဆန်း စုကြည်က အပြုံးနဲ့ နှုတ်ဆက်ပြီး “ကျေးဇူး တင်ပါတယ်” လို့ ချိုချို သာသာ ပြောဆိုတယ်။ ဘယ်သူ့ကို မဲပေးတယ် ဆိုတာ သူ မသိ ပေမယ့် မဲပေး သူတိုင်းကို သူက လေးလေး စားစား ရှိလှတယ်။
ဝါးသင်္ခကျေးရွာက ထွက်ခွာရာ လမ်းတလျှောက် ဒေါ်အောင်ဆန်းစုကြည်ကို လူတွေက အပြုံးမျက်နှာတွေနဲ့ လက်ပြနှုတ်ဆက်ကြတယ်။ တချို့လူတွေက လက်မကတွေ ထောင်ပြကြတယ်။ အားလုံးသော ဒေသခံတွေရဲ့ မျက်နှာတွေက တစုံတခုကို ကျေနပ်နေကြပုံပါပဲ။
ဒေါ်အောင်ဆန်းစုကြည်က ညောင်ထောက်၊ ငှက်အော်စမ်း၊ ချောင်ကော်ခြံ၊ နတ်စင်ကုန်း ကျေးရွာတွေက မဲရုံတွေကို လှည့်လည်ကြည့်ရှုပြီး နေ့လည် ၁၂ နာရီမထိုးခင် ကော့မှူးမြို့နယ်ကနေ ရန်ကုန်မြို့ကို ပြန်လည်ထွက်ခွာသွားတယ်။
ဒေါ်အောင်ဆန်းစုကြည် ထွက်ခွာသွားပြီဖြစ်ပေမယ့် ကော့မှူးမြို့ပေါ်မှာတော့ လမ်းဘေး လက်ဘက်ရည်ဆိုင်တွေ၊ အအေးဆိုင်တွေ၊ စားသောက်ဆိုင်တွေနဲ့ လမ်းဘေးခုံတန်းဘေးတွေမှာ လူတွေ ပြည့်နှက် နေတယ်။
သူတို့အားလုံးက မဲပေးခဲ့ကြတဲ့ အတွေ့အကြုံတွေကို ပြန်လည်ပြောဆိုနေကြသလို မဲစာရွက်တွေမှာ ဖယောင်းသုတ်လို့ NLD ကို မဲပေးဖို့ အမှန်ခြစ်လို့ မရတဲ့အကြောင်း ပြောဆိုနေကြတယ်။
“ပြည်တော်သာ ၁ ရပ်ကွက် မဲရုံမှာ မဲပေးတဲ့ မဲဆန္ဒရှင် ဒေါ်ကြည်အေးက NLD မဲပေးဖို့ အမှန်ခြစ်တာ ဖယောင်းသုတ်ထားလို့ ခြစ်မရဘူး။ အဲဒါ မဲရုံမှူးက မဲစာရွက်လဲမပေးလို့ ပြဿနာတက်ကြတယ်။ တခြားမဲရုံတွေမှာလည်း မဲစာရင်း မပါတာ၊ ပြဿနာမျိုးစုံ တက်နေကြတယ်။ အားလုံးက ဒီနေ့ ဘာမှ မလုပ်ကြဘူး။ ရွေးကောက်ပွဲအကြောင်းပဲ ပြောကြဆိုကြ လုပ်ကြတယ်” လို့ ပြည်တော်သာ ၁ ရပ်ကွက်ထိပ်ရှိ စား သောက်ဆိုင်တခုမှ ဒေသခံတဦးက ပြောတယ်။
တချို့သော လက်ဖက်ရည်ဆိုင်များမှာ ဒီမိုကရက်တစ်မြန်မာ့အသံ (DVB)၊ CNN နဲ့ BBC စတဲ့ ရုပ်သံ သတင်းလိုင်းများကို တိုက်ရိုက် ကြည့်ရှုနေကြတယ်။ ကော့မှူးတမြို့နယ်လုံး အိမ်တွင်းပုန်းသူ မရှိလို့ ဆိုရ လောက်အောင်ပဲ နေ့လယ် ခြစ်ခြစ်တောက် နေရောင်အောက်မှာ လူတွေ သွားလာလှုပ်ရှားနေကြတယ်။
ညနေ ၄ နာရီ မဲရုံများ စတင်ပိတ်သိမ်းလိုက်ပြီး မဲတွေ စတင်ရေတွက်ချိန်မှာတော့ ကော့မှူးမြို့ လမ်းမတွေပေါ်မှာ လူသွားလူလာ ကင်းမဲ့သွားပြီး အများစုက မဲရုံတွေရဲ့ ပတ်ဝန်းကျင်နားတွေမှာ သွားရောက် စုဝေးနေကြတယ်။
“ဟေး … နိုင်ပြီ” ဆိုတဲ့ ကျယ်လောင်မြည်ဟီးတဲ့ အသံကြီးတွေက မဲရုံတွေရဲ့ ပတ်ဝန်းကျင်နေရာတွေက ပေါ်ထွက်လာပြီ။ ကော့မှူးတမြို့နယ်လုံးရဲ့ အနိုင်အရှုံးရလဒ်တွေ မသိရှိရသေးပေမယ့် မဲရုံတရုံ ချင်း စီအလိုက် မဲရလဒ်တွေ ထွက်ပေါ်လာလို့ လူတွေရဲ့ အားရကျေနပ် အော်ဟစ်သံတွေ ဆူဆူညံညံ ထွက်ပေါ်လာတယ်။
ကော့မှူးမြို့အ၀င် ကားလမ်းမကြီးဘေး ၀ဲယာတွေမှာ ကသူတွေက၊ ခုန်သူတွေက ခုန်၊ အော်တဲ့သူတွေက အော်၊ တမြို့လုံး အုန်းအုန်းကျွက်ကျွက် ဖြစ်နေကြတယ်။ ဒေါ်အောင်ဆန်းစုကြည် အနိုင်ရပြီဆိုတဲ့ သတင်းတွေက မဲရေတွက်ပြီးတဲ့ မဲရုံတိုင်းဆီက ထွက်ပေါ်နေတယ်။
လမ်းမတွေပေါ်မှာ ခွပ်ဒေါင်းအလံ လွှင့်ထူထားတဲ့ကားတွေ၊ ဆိုင်ကယ်တွေကလည်း လူးလာခေါက်ပြန် မောင်းနှင်နေကြပြီ။ ကလေးငယ်တွေကအစ သက်ကြီးရွယ်အို အဘိုးအဘွားတွေအထိ ခွပ်ဒေါင်း အ လံငယ်လေးတွေ ကိုင် ဝှေ့ယမ်းနေကြတယ်။
တချို့ လက်ဖက်ရည်ဆိုင်တွေက ရေပန်းစားနေတဲ့ “အမေဒေါ်စု ပြန်လာပြီ” ဆိုတဲ့ သီချင်းကို အသံကုန်မြှင့် ဖွင့်ထားကြတယ်။
ကော့မှူးမြို့နယ် ကြံ့ခိုင်ရေးပါတီရုံးရှေ့မှာတော့ လူဝင်လို့မရအောင် တားဆီးထားတဲ့ ၀ါးလုံးတွေရှိနေပြီး ရုံးတွင်းမှာလည်း လူတွေ ငြိမ်သက်နေတယ်။
“ကော့မှူးမှသည် ဒီမိုကရေစီသို့” ဆိုတဲ့ စာတန်းကိုင်ဆောင်ထားတဲ့ အမျိုးသမီးကြီးတဦးက သူရဲ့လက်မကို ထောင်လို့ ၀င့်ဝင့်ကြွားကြွားပုံစံ လူတိုင်းကို လုပ်ပြနေတယ်။ သူ့မျက်ဝန်းဆီက မျက်ရည်တွေ ကျ နေပေမယ့် သူ့နှုတ်ခမ်းတွေက ပြုံးနေတယ်။
ကလေးတွေအားလုံးကလည်း “အမေစု နိုင်ပြီ” ဆိုပြီး ကခုန်နေကြတယ်။ နိုင်ငံရေးဆိုတာ ဘာမှန်းသိနိုင်တဲ့ အရွယ်မဟုတ်ပေမယ့် လူကြီးတွေရဲ့အပျော်က သူတို့ဆီကို ကူးစက်သွားပုံရတယ်။
ညဥ့်နက်လာတဲ့အမျှ ကော့မှူးလမ်းကြီးပေါ်မှာ ခွပ်ဒေါင်းနဖူးစည်းစီးထားတဲ့ အရွယ်စုံ လူပေါင်းမြောက်များစွာ ထွက်လာကြတယ်။
“ဒို့ ကော့မှူးက ရာဇ၀င်မှာ စာတင် နိုင်ခဲ့ပြီ။ ကော့မှူးရဲ့ သမိုင်း ဘယ်တော့မှ မရိုင်းဘူး” လို့ ပြောဆို သူက အသက် ၆၀ ကျော် အရွယ် ကော့မှူး ဒေသခံ အဘိုး တဦးပါ။
ကော့မှူး ဒေသခံ တွေကြားမှာ လက်မ ထောင်ပြတာက ဖက်ရှင် တခုအလား တွင်တွင် ကျယ်ကျယ် တွေ့နေ ရတယ်။
မိုးချုပ် လာပြီဖြစ် ပေမယ့် နီနီရဲရဲ ခွပ်ဒေါင်း အလံတွေက ကော့မှူးမြို့ တခွင်လုံးမှာ လွင့်ပျံနေဆဲ။
“အမေစု နိုင်ပြီ” ဆိုတဲ့ ကြွေးကြော် သံတွေက ညသန်းခေါင် ယံအချိန် အထိ ကော့မှူးမြို့ တခွင်မှာ မြည်ဟည်း နေဆဲ။
No comments:
Post a Comment