Friday, July 19, 2013

ပြုပြင်ပြောင်းလဲရေးများ ဆက်လုပ်ရန် ပြင်သစ် သမ္မတ တိုက်တွန်း

လင်းသန့်


သမ္မတ ဦးသိန်းစိန်ကို ပြင်သစ်သမ္မတ ဖရန်ဆွာ အိုလန်းဒ်က နိုင်ငံရေး၊ စီးပွားရေး ပြုပြင် ပြောင်းလဲရေးလုပ်ငန်းစဉ်များ ရှေ့တိုး ဆောင်ရွက်ရေးအတွက် နိုင်ငံရေး အကျဉ်းသားများ လွှတ်ပေးရေး အပါအ၀င် လူ့အခွင့်အရေးမှတ်တမ်းများ ကောင်းမွန် ရန် တိုက်တွန်း ပြောကြားကြောင်း သိရသည်။

ပြင်သစ်နိုင်ငံ ပါရီမြို့သို့ ရောက်ရှိနေသော ဦးသိန်းစိန်နှင့် ပြင်သစ် သမ္မတ ဖရန်ဆွာ အိုလန်းဒ်တို့သည် ယမန်နေ့က ၄၅ မိနစ်ကြာ ဆွေးနွေးပြောကြားရာတွင် လွန်ခဲ့သော ၂ နှစ်မှ စ၍ ပြုလုပ်လာသည့် စီးပွားရေး၊ နိုင်ငံရေး ပြုပြင်ပြောင်းလဲမှုများကို ဆက်လက် လုပ်ဆောင်ရန် တိုက်တွန်းခြင်းဖြစ်ကြောင်း အေအက်ဖ်ပီ သတင်းတပုဒ်က ဖော်ပြသည်။

ပြင်သစ်သမ္မတရုံး၏ ကြေညာချက်တွင်လည်း ဖရန်ဆွာ အိုလန်းဒ်က မြန်မာနိုင်ငံတွင် အတိုက်အခံသည် ယခုအခါ နိုင်ငံရေး စင်မြင့် တွင် ပါဝင် လာနေပြီ ဖြစ်သည်ဟုလည်း ချီးမွမ်းစကား ဆိုကြောင်း ဖော်ပြထားသည်။

နိုင်ငံရေး အကျဉ်းသားများ အားလုံးကို ချွင်းချက်မရှိ အမြန်ဆုံးလွှတ်ပေးရန်၊ တိုင်းရင်းသား အရေးနှင့် လတ်တလော မြန်မာနိုင်ငံတွင်း ဖြစ်ပွားခဲ့သည့် အကြမ်းဖက် တိုက်ခိုက်မှုများ အတွက် ပြင်သစ် သမ္မတ က စိုးရိမ်မှုရှိသည်ဟုလည်း ဆိုသည်။

သမ္မတ ဦးသိန်းစိန်က ယခုနှစ်ကုန်ပိုင်းတွင် နိုင်ငံရေးအကျဉ်းသားများ အားလုံးလွှတ်ပေးမည်ဖြစ်ပြီး တနိုင်ငံလုံးအတိုင်း အတာဖြင့် အပစ်အခတ်ရပ်စဲရေး သဘောတူလက်မှတ်ရေးထိုးမှုကို လာမည့် သီတင်းပတ်များအတွင်း ဆောင်ရွက်သွားမည်ဟု လန်ဒန်တွင် လူသိရှင်ကြား ကတိပေးခဲ့သည်။

ထိုကဲ့သို့ ကတိပေးထားသော်လည်း ဥရောပရှိ မြန်မာ့အရေး တက်ကြွလှုပ်ရှားသူများက မြန်မာနိုင်ငံတွင် နိုင်ငံရေးအရ မတရားဖမ်းဆီးမှုများ ဆက်လက်ရှိနေသေးပြီး ယခုရက်ပိုင်းအတွင်း မွန်ပြည်သစ်ပါတီနှင့် အစိုးရစစ်တပ် တိုက်ပွဲဖြစ်မှုများ ကို ထောက်ပြ၍ သမ္မတသည် အပြောနှင့်အလုပ် မညီကြောင်း ကန့်ကွက် ဆန္ဒပြမှုများ ပြုလုပ်သည်။

ပြင်သစ်သမ္မတ၏ အကြံပေး ပုဂ္ဂိုလ်တဦးကမူ ဦးသိန်းစိန်၏ ပထမဆုံး ပြင်သစ်နိုင်ငံ ခရီးစဉ်သည် သမိုင်းဝင် ခရီးစဉ်ဖြစ်ပြီး မြန်မာအနေဖြင့် နိုင်ငံတကာ အသိုင်းအ၀ိုင်းနှင့် ပုံမှန်ဆက်ဆံရေးကို လိုလားကြောင်း ပြသသည့်ခရီးစဉ် ဖြစ်ကြောင်း မှတ်ချက် ပြုသည်။

သမ္မတ ဦးသိန်းစိန်နှင့် မြန်မာကိုယ်စားလှယ်အဖွဲ့သည် ယမန်နေ့က ပြင်သစ် စီးပွားရေး လုပ်ငန်းရှင်များနှင့် တွေ့ဆုံပြီး မြန်မာ့ စိုက်ပျိုးရေး ကဏ္ဍတွင် ပြင်သစ်မှ လာရောက်ရင်းနှီးမြှုပ်နှံရေး အပါအ၀င် ရေကောင်းရေသန့် ရရှိရေး၊ တယ်လီဖုန်း ဆက်သွယ်ရေးနှင့် လမ်း၊ တံတား စသည့် သယ်ယူပို့ဆောင်ရေး ဆိုင်ရာ ကဏ္ဍ၊ စွမ်းအင်နှင့် ကမ္ဘာလှည့် ခရီးသွား လုပ်ငန်း စသည်တို့ကို ဆွေးနွေးခဲ့ကြကြောင်း သိရသည်။

နိုင်ငံတကာ လူ့အခွင့်အရေး ဖက်ဒရေးရှင်းအဖွဲ့ (International Federation for Human Rights -FIDH) နှင့် နယ်စည်း မခြား သတင်းထောက်များ အဖွဲ့(RSF)ကလည်း မြန်မာနှင့် ကနဦး စာချုပ်များ ချုပ်ဆိုရန် လုပ်ကိုင်နေသည့် ပြင်သစ်၏ အဓိက စီးပွားရေးလုပ်ငန်း Vinci Bouygues၊ Total နှင့် Orange ကုမ္ပဏီ လုပ်ငန်းစုကြီးများ အနေဖြင့် စီးပွားရေး အကျိုးအမြတ်တခုတည်းကို မကြည့်ရန် မြန်မာနှင့် ပြင်သစ် သမ္မတ ၂ ဦးတို့ထံ ပူးတွဲစာ ပေးပို့ခဲ့သည်။

ဦးသိန်းစိန်သည် ပြင်သစ် ၀န်ကြီးချုပ် ယန်းမာ့ခ် အီးဟို့တ်နှင့်လည်း ယမန်နေ့က တွေ့ဆုံခဲ့သေးသည်။

အမည်မဖော်လိုသူ သံတမန် တဦး၏ အဆိုအရ ပြင်သစ်နှင့် မြန်မာနိုင်ငံကြား ကုန်သွယ်ရေးသည် လူသိရှင်ကြား မဟုတ် သော် လည်း ပုံမှန်ဆက်ဆံရေး ရှိနေဆဲဖြစ်ပြီး တနှစ်လျှင် ယူရို ၁၈ သန်း( အမေရိကန် ဒေါ်လာ ၂၃ သန်း) ရှိကြောင်း သိရ သည်။

ပြင်သစ် နိုင်ငံရပ်ခြား ကုန်သွယ်ရေး ၀န်ကြီး Nicole Bricq သည် ယခု လကုန်ပိုင်းတွင် မြန်မာနိုင်ငံသို့ သွားရန် စီစဉ်ထားပြီး လွန်ခဲ့သည့် မတ်လကလည်း ပြင်သစ်ဖွံ့ဖြိုးရေး ၀န်ကြီး Pascal Canfin သည် မြန်မာနိုင်ငံသို့ သွားရောက်ခဲ့သည်။

ပြင်သစ်ကုန်သွယ်ရေး ၀န်ကြီး၏ လာမည့် မြန်မာပြည်ခရီးစဉ်အတွင်း ပြင်သစ်၏ အကြီးဆုံး ရေနံကုမ္ပဏီတခုဖြစ်သည့် တိုတယ်လ် အပါအ၀င် ရေနံနှင့် သဘာဝဓာတ်ငွေ့ ဆိုင်ရာ စွမ်းအင်ကဏ္ဍ ရင်းနှီးမြှုပ်နှံရေးနှင့် တယ်လီဖုန်းဆက်သွယ်ရေး စသည့်ကဏ္ဍများတွင် ရင်းနှီးမြှုပ်နှံရေး စာချုပ်များ ချုပ်ဆိုနိုင်မည်ဟု မျှော်လင့်ထားကြောင်း သိရသည်။

ပြင်သစ်နိုင်ငံ ခရီးစဉ် မတိုင်မီ သမ္မတ ဦးသိန်းစိန်သည် ဗြိတိန်ခရီးစဉ်အတွင်း ၀န်ကြီးချုပ် ဒေးဗစ်ကင်မရွန်း၊ နိုင်ငံခြားရေး ၀န်ကြီး၊ ပြည်ထဲရေး ၀န်ကြီး စသည့် အစိုးရထိပ်ပိုင်း ခေါင်းဆောင်များအပါအ၀င် ဗြိတိန် ၀န်ကြီးချုပ်ဟောင်း တိုနီ ဘလဲ၊ ဗြိတိန် စီးပွားရေး လုပ်ငန်းရှင်များ၊ ဗြိတိန်-အာဆီယံ စီးပွားရေးကောင်စီ(U.K – ASEAN Business Council)တို့နှင့်လည်း တွေ့ဆုံခဲ့သည်။

ထိုသို့တွေ့ဆုံမှုများအတွင်း ဦးသိန်းစိန်က ဒီမိုကရေစီလမ်းလျှောက်ရာတွင် နိုင်ငံရေးတည်ငြိမ်စေရန် စီးပွားရေးဖွံ့ဖြိုးရန်လို ကြောင်း၊ စီးပွားရေး ဖွံ့ဖြိုးတိုးတက်ရန် နိုင်ငံခြားရင်းနှီးမြှုပ်နှံမှုနှင့် နည်းပညာအကူအညီ လိုအပ်ကြောင်းများ ပြောကြားပြီး မြန်မာ နိုင်ငံတွင် လာရောက်ရင်းနှီြးှမှုပ်နှံရေး ဖိတ်ခေါ်မှုများ လုပ်ဆောင်ခဲ့သည်။

ဗြိတိန်ခရီးစဉ် နောက်ဆုံးနေ့တွင် ဗြိတိန်နှင့် မြန်မာနိုင်ငံတို့အကြား ဘဏ္ဍာ ငွေကြေးဆိုင်ရာ ၀န်ဆောင်မှု လုပ်ငန်းအဖွဲ့ (Financial Service Taskforce) တခု ဖွဲ့စည်းလိုက်ကြောင်း ကြေညာခဲ့သည်။

အဆိုပါအဖွဲ့က မြန်မာ့ဘဏ္ဍာရေး ကဏ္ဍ တိုးတက်စေရေး ကူညီပေးမည်ဖြစ်ပြီး ဗြိတိန်အပါအ၀င် နိုင်ငံတကာမှ မြန်မာ နိုင်ငံ အား ရင်းနှီးမြှုပ်နှံသူများ အားလုံးအတွက် ဘဏ္ဍာရေးဆိုင်ရာ အဟန့်အတားများကို ကူညီဖြေရှင်းပေးမည့် အဖွဲ့လည်း ဖြစ် သည်ဟု ဆိုသည်။

ဥရောပ သမဂ္ဂ(EU)ကလည်း မြန်မာနိုင်ငံကို ကုန်သွယ်ရေး အထူးခံစားခွင့်ရ တိုင်းပြည်အနေနှင့် ပြန်လည် အသိအမှတ်ပြုမှုကို ဇူလိုင် ၁၉ ရက်တွင် စတင် အသက်ဝင်ပြီ ဖြစ်ကြောင်း ထုတ်ပြန်ကြေညာသည်။

ဗြိတိန် နိုင်ငံခြားရေး ၀န်ကြီး မစ္စတာ ၀ီလျံဟိဂ်က ဦးသိန်းစိန်၏ ဗြိတိန်ခရီးစဉ်အပြီး ကြေညာချက် ထုတ်ပြန်ရာတွင် တိုင်းရင်းသား လက်နက်ကိုင်အဖွဲ့များနှင့် ငြိမ်းချမ်းရေးလုပ်ငန်းစဉ် ဖော်ဆောင်ရေးနှင့် မြန်မာ့ တပ်မတော် ပြုပြင်ပြောင်းလဲရေး ဆိုင်ရာများကို အလေးထားဆွေးနွေးခဲ့ကြောင်း၊ မြန်မာ့တပ်တော်အနေဖြင့် လူ့အခွင့်အရေးကိုလေးစားသည့် နိုင်ငံတကာ အဆင့်မီ တပ်မတော်အဖြစ် အာရုံထားကြောင်းတို့ ပါရှိသည်။

ဗြိတိန်ကာကွယ်ရေးဝန်ကြီးကလည်း ၂၀၁၄ ခုနှစ် ဇန်န၀ါရီလတွင် ဗြိတိန်တပ်မတော်၏ Managing Defence in the Wider Security Context သင်တန်းအတွက် မြန်မာစစ်တပ်အရာရှိ ၃၀ ခန့်ကို တက်ရောက်သင်ကြားရေး အကူအညီ ပေး မည်ဟု သမ္မတ ဦးသိန်းစိန်ကို ကမ်းလှမ်းခဲ့ကြောင်း ၄င်းကြေညာချက်အရ သိရသည်။

ကုလသမဂ္ဂ လုံခြုံရေး ကောင်စီ ဆုံးဖြတ်ချက်ဖြင့် အရေးယူခံထားရသော မြောက်ကိုရီးယားနှင့် စစ်ရေးဆက်သွယ်မှု အဆုံး သတ် သွားပြီဟု သမ္မတ ဦးသိန်းစိန်ထံမှ ကတိပြုချက် ရထားကြောင်းလည်း ကြေညာချက်က ဆိုသည်။

သမ္မတ ဦးသိန်းစိန်သည် ၃ ရက်ကြာ ဗြိတိန် ခရီးစဉ်အတွင်း လာမည့် ၂၀၁၅ ခုနှစ်တွင် သမ္မတအဖြစ် ၀င်ရောက်ယှဉ်ပြိုင် ရန် အစီအစဉ်မရှိသေးကြောင်း၊ တိုင်းပြည် စီးပွားရေး၊ ငြိမ်းချမ်းရေးနှင့် လူငယ် များအတွက် အမြဲစဉ်းစားနေသည့် အတွက် သမ္မတအဖြစ် ၀င်ရွေးမည်ဟု ထုတ်ဖော်ပြောကြားခဲ့သူ သူရ ဦးရွှေမန်းနှင့် ဒေါ်အောင်ဆန်းစုကြည်တို့ကိုလည်း ပြိုင်ဘက် အဖြစ် မမြင်ကြောင်း လန်ဒန်အခြေစိုက် ဘီဘီစီ နှင့် သီးသန့်တွေ့ဆုံမေးမြန်းခန်းတွင် ဦးသိန်းစိန် က ပြောဆိုသွားသည်။

No comments: