ABC
မြန်မာနိုင်ငံအတွင်းက ငြိမ်းချမ်းရေးဖော်ဆောင်တဲ့နေရာမှာ ပြည်ပက ငွေကြေးတွေကိုစောင့်မနေပဲ နိုင်ငံရဲ့ ဘဏ္ဍငွေတွေထဲက ကျခံပြီးသုံးစွဲလုပ်ဆောင်ဖို့လိုတယ်လို့ နိုင်ငံတော် လုံခြုံရေးနဲ့ ကာကွယ်ရေးကောင်စီ အစည်းအဝေး အတွင်းမှာ ပြည်သူ့လွှတ်တော်ဥက္ကဌ သူရ ဦးရွှေမန်းက ပြောလိုက်ပါတယ်။
အစည်းအဝေးမှာ ပြည်တွင်းငြိမ်းချမ်းရေးနဲ့ပတ်သက်တဲ့ အကြောင်းအရာတွေကို အဓိကထား ဆွေးနွေးခဲ့တာဖြစ်တဲ့အကြောင်း သူရဦးရွှေမန်းက ပြည်သူ့လွှတ်တော်ကိုယ်စားလှယ်ကို ဇွန်လိုင်လ ၂ရက်နေ့မှာ ပြန်လည်ရှင်းပြခဲ့တာဖြစ်ပါတယ်။
ငြိမ်းချမ်းရေး ဖော်ဆောင်တဲ့အခါမှာ ပြည်ပက ငွေကြေးတွေကို စောင့်မနေဖို့နဲ့ နိုင်ငံရဲ့ ဘဏ္ဍငွေထဲက သုံးစွဲလုပ်ဆောင်ဖို့ဆိုတဲ့အကြောင်း၊ ငြိမ်းချမ်းရေးရအောင် တည်ဆောက်တဲ့အခါမှာ ဥပဒေနဲ့ မညီပဲ ပြည်သူလူထုတွေရဲ့ဘ၀တွေကို ထိခိုက်လာမယ်ဆိုရင် မကောင်းတဲ့ အခြေအနေတွေဆီကို ဦးတည် သွား နိုင်တယ်ဆိုတဲ့အကြောင်းတွေကို သူရဦးရွှေမန်း ကပြောပါတယ်။
“ငြိမ်းချမ်းရေးဆောင်ရွက်တဲ့ အခါမှာငွေကြေး ပစ္စည်း အကူအညီ အထောက် အပံ့တွေလိုမှာပါ။ လိုလာတဲ့ အခါမှာ ပြည်ပကပေးလိမ့်မယ်ဆိုတဲ့ မျှော်လင့် ချက်မထားပဲ နိုင်ငံရဲ့ ငွေကြေး သုံးပြီး ငြိမ်းချမ်းရေး ရအောင်လုပ်ဖို့ သဘောတူကြပါတယ်။ ဒီနေရာမှာ ဘေးထွက်ဆိုးကျိုး ဆိုတဲ့ စကားနဲ့ပတ်သက်ပြီး မိမိတို့ နားလည် လက်ခံထားတဲ့အချက်က ငြိမ်းချမ်းရေး ရအောင် တည်ထောင်တဲ့ အခါမှာ ဥပဒေနဲ့မညီရင် ပြည်သူများရဲ့ ဘ၀လုံခြုံရေးကို ထိပါးလာလျှင် (သို့မဟုတ်) ပြည်သူများရဲ့ ဘ၀ လုံခြုံရေး ကာကွယ် မပေးနိုင်တဲ့ ဖြစ်စဉ်ဖြစ်ရပ်များ ဖြစ်လို့ရှိရင် မကောင်းတဲ့ ဘေးထွက်ဆိုးကျိုးများ ဖြစ်ပေါ်လာခြင်းကို ကြိုတင် လေ့လာသုံးသပ်ပြီး ဆောင်ရွက်ဖို့လည်း စဉ်းစားသုံးသပ်ကြပါတယ်။”
အရင်က နိုင်ငံတော်လုံခြုံရေးနဲ့ ကာကွယ်ရေးကောင်စီ အစည်းအဝေးကနေ ဆွေးနွေးတဲ့ အချက် အလက်တွေကို ပွင့်ပွင့်လင်းလင်း ပြန်လည်ရှင်းပြခြင်းမရှိခဲ့ပဲ ဒါဟာ ပထမဦးဆုံးအကြိမ်အဖြစ် ပြည်သူ့လွှတ်တော်ကိုယ်စားလှယ်တွေပြန်လည် ရှင်းပြတာဖြစ်တယ်လို့သိရပါတယ်။ ဒါပေမယ့် အခုလို လွှတ်တော် ကိုယ်စားလှယ်တွေကို ပြန်လည်ရှင်းပြတာဟာ ပွင့်လင်းလာတယ်လို့ ပြောဖို့ စောသေးတဲ့ အကြောင်း မြန်မာနိုင်ငံရေး လေ့လာသုံးသပ်သူ ဒေါက်တာ ဦးရန်မျိုးသိန်းက အခုလို ပြောပါတယ်။
“ဒီလို အစည်းအဝေးက အကြောင်းကို လွှတ်တော်မှာ ပြန်ချ ပြတာဟာလည်း အစည်းအဝေးမှာ အတည်ပြုချက်ရထားလို့ ပြောတယ်လို့ ထင်တယ်ဗျ။ သူရဲ့ သဘောတစ်ခုတည်းနဲ့တော့ ဒါကိုပြော လို့ မရဘူး။ ဘာလို့ လဲ ဆိုတော့ လက်ရှိ ဖွဲ့စည်းပုံ အခြေခံ ဥပဒေရဲ့ အနေအထားရ ကြည့်မယ်ဆို ရင် ဒီကာလုံဟာ အင်မတန်မှ လုပ်ကိုင်ခွင့် မြင့်မားတဲ့ အဖွဲ့အစည်းမျိုးဖြစ်တယ်။”
နိုင်ငံတော် လုံခြုံရေးနဲ့ ကာကွယ်ရေးကောင်စီ အစည်းအဝေးကိုခေါ်ယူဖို့အတွက် သူရ ဦးရွှေမန်းက သမ္မတဦးသိန်းစိန်ထံကို ဇူလ ၂၅ရက်နေ့က သ၀ဏ်လွှာပေးပို့ခဲ့တာဖြစ်ပြီးတော့ ပြီးခဲ့တဲ့ ဇွန်လိုင်လ ၁ရက်နေ့က နေပြည်တော်မှာ ကျင်းပပြုလုပ်ခဲ့တာဖြစ်ပါတယ်။
အမျိုးသားကာကွယ်ရေးနဲ့ လုံခြုံရေးကောင်စီမှာ နိုင်ငံတော်သမ္မတ၊ ဒုတိယ သမ္မတ၊ ပြည်သူ့လွှတ်တော် ဥက္ကဋ္ဌ၊ အမျိုးသား လွှတ်တော် ဥက္ကဋ္ဌ၊ တပ်မတော် ကာကွယ်ရေး ဦးစီးချုပ်၊ ဒုတိယ တပ်မတော် ကာကွယ်ရေးဦးစီးချုပ်၊ ကာကွယ်ရေးဝန်ကြီး၊ နိုင်ငံခြားရေး ၀န်ကြီး၊ နယ်စပ်ရေးရာဝန်ကြီး၊ ပြည်ထဲရေး ၀န်ကြီး စုစုပေါင်း အဖွဲ့ဝင် ၁၁ ဦးပါဝင်ပြီး ၂၀၀၈ ဖွဲ့စည်းပုံ အခြေခံ ဥပဒေ အခန်း ၁၁ အရေးပေါ် ကာလဆိုင်ရာ ပြဋ္ဌာန်းချက်တွေအရ နိုင်ငံတော်အရေးပေါ် အခြေအနေနဲ့ စစ်အုပ်ချုပ်ရေး အမိန့်တွေ ထုတ်ပြန်နိုင်တဲ့ အမြင့်ဆုံး အာဏာပိုင်အဖွဲ့အစည်းတခု ဖြစ်တယ်ဆိုတဲ့အကြောင်း ရေဒီယို သြစတြေးလျသတင်းထောက် မဝေစန္ဒာကျော်က သတင်းပေးပို့ခဲ့တာဖြစ်ပါတယ်။
No comments:
Post a Comment