ABC
အီရန်နိုင်ငံအနေနဲ့ ရိုဟင်ဂျာဒုက္ခသည်တွေကို ကူညီထောက်ပံ့မှုတွေ ပေးဖို့ အဆင်သင့်ရှိနေတယ်လို့ အီရန်နိုင်ငံခြားရေးဌာနက ပြောလိုက်ကြောင်း Press TV သတင်းအရ သိရပါတယ်။
နေပြည်တော်မှာ မြန်မာနိုင်ငံ ဒုနိုင်ငံခြားရေးဝန်ကြီး ဦးဇင်ယော်နဲ့ တွေ့ဆုံစဉ်မှာ အီရန်နိုင်ငံ ဒုနိုင်ငံ ခြားရေး ဝန်ကြီးက ပြောလိုက်တာဖြစ်ပြီး အီရန်နိုင်ငံရဲ့ ပေါ်လစီအရ မွတ်စလင်တွေ နေထိုင်တဲ့နေရာမှာ ဖွံ့ဖြိုးတိုးတက်ရေးတွေ လုပ်ဖို့ပါရှိတာကြောင့် အီရန်နိုင်ငံအနေနဲ့ အကူအညီတွေ ပေးလိုတာဖြစ်ကြောင်းလည်း ရှင်းပြခဲ့တယ်လို့ ဆိုပါတယ်။
မြန်မာနိုင်ငံမှာ ဖြစ်ခဲ့တဲ့ ပဋိပက္ခနဲ့ပတ်သက်ပြီး အီရန်နိုင်ငံ အာဏာပိုင်တွေနဲ့ ပညာရှင်တွေက စိုးရိမ်မကင်းဖြစ်နေကြပြီး မြန်မာအစိုးရအနေနဲ့ ထိရောက်တဲ့ ပြဿနာဖြေရှင်းမှုတွေ လုပ်ကိုင်ဖို့လည်း တိုက်တွန်းလိုက်ပါတယ်။
တဆက်တည်းမှာပဲ ရခိုင်ပြည်နယ်မှာ ကူညီထောက်ပံ့ရေးလုပ်ငန်းတွေ လုပ်ကိုင်နေတဲ့အဖွဲ့အစည်းတွေအနေနဲ့ မျက်နှာလိုက်မှုတွေ လုပ်နေတယ်လို့ အပြောမခံရအောင် သတိနဲ့ လုပ်ဆောင်သင့်တယ်လို့ ကုလသမဂ္ဂသတင်းတွေကို ဖော်ပြလေ့ရှိတဲ့ IRIN ရဲ့ ဆောင်းပါးတစ်ခုမှာ ရေးသားထားပါတယ်။
ရခိုင်တွေနဲ့ ရိုဟင်ဂျာတွေကြား ပဋိပက္ခတွေ ဖြစ်ပြီးနောက်ပိုင်း ဒုက္ခသည်အယောက်ပေါင်း သိန်းနဲ့ချီရှိနေပြီး ရိုဟင်ဂျာဒုက္ခသည်တွေပိုများတဲ့အတွက် ရိုဟင်ဂျာတွေကို ကူညီထောက်ပံ့မှုတွေ ပိုပေးသလိုဖြစ်နေတာကို ရခိုင်လူမျိုးတစ်ချို့တွေက မကျေနပ်တဲ့အတွက် ကူညီထောက်ပံ့မှုတွေက ပြဿနာဖြစ်အောင် တနည်းတလမ်းအားဖြင့် အားပေးအားမြောက်ပြုရာ ဖြစ်နိုင်တဲ့အတွက် သတိနဲ့ လုပ်ဆောင်သင့်တယ်လို့ ပါရှိပါတယ်။
ကူညီထောက်ပံ့ရေးအဖွဲ့အစည်းအများစုက ဘက်လိုက်မှုမရှိပဲ ဒုက္ခရောက်သူတွေကို ကူညီထောက်ပံ့မှု ပေးနေတာဖြစ်ပေမယ့် ဘက်လိုက်မှုတွေ လုပ်နေတယ်ဆိုတဲ့အမြင်တွေကြောင့် ကူညီထောက်ပံ့မှု လုပ်ရာမှာ ပွင့်လင်းမြင်သာမှုရှိဖို့အတွက် သက်ဆိုင်ရာ လူမျိုးတွေ၊ အဖွဲ့အစည်းတွေနဲ့ ဆက်သွယ်မှုလုပ်ပြီး ဘယ်သူ့ကို ဘာကြောင့် ကူညီထောက်ပံ့မှုတွေ လုပ်ရတယ်ဆိုတာမျိုး ရှင်းပြမှုတွေလုပ်မှသာ အမြင်စောင်းတာတွေ လျော့ကျနိုင်တယ်လို့ ပါရှိပါတယ်။
ကူညီထောက်ပံ့မှုတွေကို ရိုဟင်ဂျာတွေကပဲ ပိုရနေတယ်လို့ ရခိုင်လူမျိုးတွေ မြင်နေသ၍ကာလပတ်လုံး နှစ်ဖက် တင်းမာမှုတွေကို လျော့ချနိုင်မှာမဟုတ်ပဲ ကူညီထောက်ပံ့ရေးကြောင့် ပြဿနာပိုဖြစ်တာမျိုးတောင် ဖြစ်လာနိုင်တယ်လို့ နိုင်ငံတကာ ပဋိပက္ခလေ့လာရေးအဖွဲ့ရဲ့ အကြီးအကဲက IRIN ကို ပြောခဲ့ပါတယ်။
No comments:
Post a Comment