ဦးလွင် | အင်္ဂါနေ့၊ ဇူလိုင်လ ၂၃ ရက် ၂၀၁၃
မန္တလေးတိုင်း မဟာအောင်မြေမြို့နယ် ၃၆ လမ်း၊ ၈၄ လမ်းနှင့် ၈၅ လမ်းကြားတွင် အရှင်ဝီရသူမှ တရားဟောကြားနေစဉ် ပေါက်ကွဲမှုသည် လက်လုပ်ဗုံးပေါက်ကွဲမှုဟု မဟာအောင်မြေမြို့နယ် အမှတ် ၉ ရဲစခန်းက မန္တလေးတိုင်း ရဲတပ်ဖွဲ့မှူးရုံးသို့ အစီရင်ခံတင်ပြစာတွင် ဖော်ပြထားသည်။
အစီရင်ခံစာကို ဇူလိုင်လ ၂၂ ရက်တွင် တိုင်းရဲတပ်ဖွဲ့မှူးရုံးသို့ တင်ပြလိုက်ခြင်းဖြစ်သည်။ အစီရင်ခံစာတွင် ပေါက်ကွဲမှုဖြစ်ပေါ်ရခြင်းနှင့်ပတ်သက်၍ “သံကြွပ်စထည့်သွင်းပြုလုပ်ထားသည့် ဒေသန္တရ လက်လုပ်ဗုံးဟု ယူဆရသောပေါက်ကွဲစေတတ်သည့်ပစ္စည်းဖြင့် ပေါက်ကွဲမှုဖြစ်အောင် ဆောင်ရွက်ခဲ့ခြင်း ဖြစ်ကြောင်း” ဟု ဖော်ပြထားသည်။
အဆိုပါဖြစ်စဉ်ကြောင့် တရားခံကို စုံစမ်းဆဲဟုလည်း အစီရင်ခံစာတွင်ဖော်ပြသည်။ ပေါက်ကွဲမှုသည် အရှင်ဝီရသူ တရားဟောရာနေရာနှင့် ကိုက် ၁၀ဝ ခန့်တွင် ဖြစ်ပွားခဲ့ခြင်းဖြစ်သည်။
ပေါက်ကွဲမှုကြောင့် ကိုရင်တစ်ပါး၊ အမျိုးသမီးသုံးဦးနှင့် အမျိုးသားတစ်ဦး စုစုပေါင်း ငါးဦးတို့၏ ခြေထောက်များတွင် ပွန်းပဲ့ဒဏ်ရာများ ရရှိသွားခဲ့သည်ဟုလည်း အစီရင်ခံစာတွင် ဖော်ပြထားသည်။ ဒဏ်ရာရှိသူ ငါးဦးအနက် လေးဦးမှာ မန္တလေးဆေးရုံကြီးတွင် ဆေးကုသမှုခံယူနေသည်ဟုလည်း ဖော်ပြထားသည်။
ဗုံးထောင်ခံထားရသည့်ကားမှာ နံပါတ် ၇က/၃၀၂၀ ဖြစ်ပြီး တိုယိုတာကိုရိုလာ အဖြူရောင်ဖြစ်သည်။ တရားပွဲကို ည ၇ နာရီတွင် စတင်ခဲ့ပြီး ၉ နာရီ ၁၅ မိနစ် တွင် ပေါက်ကွဲမှု ဖြစ်ပေါ်ခဲ့ခြင်းဖြစ်သည်။ တရားပွဲကို ယခုလ ၁၇ ရက်ကတည်းက ကျင်းပခြင်းဖြစ်ကာ ၂၁ ရက်ည တရားပွဲသည် နောက်ဆုံးညလည်းဖြစ်သည်။
No comments:
Post a Comment