သံတွဲတွင် RNDP မှ ပညာရည်ချွန်ကျောင်းသူနှစ်ဦးအား ငွေသားဆုနှင့် ဂုဏ်ပြုလွှာပေးအပ်

မြတ်နိုးခင်

ရခိုင်ပြည်၊ သံတွဲမြို့နယ်တွင် ဖွင့်လှစ်ထားသော "ပညာဒါနစာသင်ဝိုင်း"မှ ၂၀၁၂ - ၂၀၁၃ ပညာသင်နှစ်ကို အောင်မြင်ခဲ့သော ကျောင်းသူနှစ်ဦးကို ရခိုင်တိုင်းရင်းသားများတိုးတက်ရေးပါတီ (RNDP)မှ ကြီးမှူးပြီး ငွေသားဆုချီးမြှင့်ခြင်းနှင် ဂုဏ်ပြုလွှာမှတ်တမ်းပေးအပ်ပွဲ အခမ်းအနားတစ်ခုကို ၄င်း၏ရုံးခန်း၌ ဇူလိုင်လ ၂၁ ရက်နေ့တွင် ပြုလုပ်ခဲ့ကြောင်း သိရသည်။

ထိုဂုဏ်ပြုလွှာပေးအပ်ပွဲ အခမ်းအနားကို နံနက် ၈ နာရီမှ ၁၀ နာရီခွဲအထိ ရခိုင်တိုင်းရင်းသားများ တိုးတက်ရေးပါတီ (RNDP)ရုံခန်းတွင် ပြုလုပ်ခဲ့ပြီး အောင်မြင်သောကျောင်းသူ (၂)ဦး၊ ကော်မတီ အဖွဲ့ဝင်များ အပါအဝင် မြို့မိမြိ့ဖများ စုစုပေါင်း လူ ၁၅၀ ခန့် တက်ရောက်ခဲ့ကြောင်း သိရသည်။

ဂုဏ်ပြုလွှာပေးအပ်ခြင်းခံရသော ကျောင်းသူ (၂)ဦးမှာ မနှင်းနှင်းဝေ အသက် (၁၇)နှစ်၊ အမှတ် (၅) ရပ်ကွက်၊ ငကျော်တောင်နှင့် မဂျူးဂျူးသော် အသက် (၂၀) နှစ်၊ အင်တော်၊ ဒွါရာဝတီမြို့သစ်၌ နေထိုင်ကြကြောင်း သိရသည်။

သံတွဲမြို့ ရခိုင်တိုင်းရင်းသားများ တိုးတက်ရေးပါတီ ဥက္ကဌဖြစ်သူ ဦးစောလှိုင်က ထိုကျောင်းသူနှစ်ဦးအား ငွေသားဆုချီးမြှင့်ရခြင်းနှင့် ဂုဏ်ပြုလွှာပေးအပ်ရခြင်း ရည်ရွယ်ချက်ကို ယခုလို အာရ်ကန်တိုင်းမ်စ်သို့ ပြောသည်။

" ရည်ရွယ်ချက်က လက်ရှိ အောင်မြင်နေတဲ့ ကျောင်းသားတွေကို ဆုချီးမြှင့်ခြင်းအားဖြင့် သူတို့က ပိုပြီးအောင်မြင်အောင်၊ ထက်မြက်အောင်၊ လူကောင်းဖြစ်လာအောင် ကြိုစားဖို့နှင့် မအောင်မြင်တဲ့ ကျောင်းသားတွေအနေနဲ့လည်း အောင်မြင်အောင် ကြိုစားလာစေချင်တဲ့အတွက်ကြောင့် လုပ်ရတာ ဖြစ်ပါတယ်။ ကျွန်တော်တို့ရဲ့ ပညာဒါနစာသင်ဝိုင်းက ၂၀၁၂ - ၂၀၁၃ ပညာသင်နှစ်မှာ ကျောင်းသူ (၂) ဦး အောင်ပါတယ်။ အောင်မြင်တဲ့ ကျောင်းသူနှစ်ဦးဖြစ်တဲ့ မဂျူးဂျူးသော်နှင့် မနှင်းနှင်းဝေတို့ကို ဂုဏ်ပြုလွှာမှတ်တမ်းအပြင် တစ်ဦးကို ငွေ ၄၀၀၀၀ ကျပ်စီ ဆုချီးမြှင့်ပေးပါတယ်။ အဲဒီနှစ်က ကျောင်းက သုံးလပဲ ပြလိုက်ရပါတယ်။ ပြပေးခဲ့တဲ့ ကျောင်းသားက ၂၅ ဦးထဲက စည်းကမ်းရှိသော စာတော်တဲ့ကျောင်းသားကို ရွေးချယ်လိုက်တဲ့အခါမှာ ၁၀ ယောက်ကျန်ပါတယ်။ အဲဒီအထဲမှာ ၂ ယောက် အောင်တာဖြစ်ပါတယ်။ " ဟု သူကပြောသည်။

အဆိုပါ စာသင်ဝိုင်းတွင် ငွေကြေးအားနည်းမှုကြောင့် ယခုအောင်မြင်ခဲ့သော ကျောင်းသူနှစ်ဦးကို ဆယ်တန်းအောင်လောက်ပဲ ထောက်ပံ့ပေးနိုင်ပြီး တက္ကသိုလ်ထိ မထောက်ပံ့ပေးနိုင်ကြောင်း၊ သို့သော်လည်း နောက်လာမည့်နှစ်များတွင် တက္ကသိုလ်တက်နိုင်အောင်ထိသာမက အသက်မွေးဝမ်းကြောင်း ပညာများပါသင်ပေးနိုင်အောင်ထိ ကြိုးစားသွားမှာဖြစ်ကြောင်း သူကဆိုသည်။

" လက်ရှိမှာတော့ ကျောင်းသူကျောင်းသားများအတွက် ပံ့ပိုးပေးဖို့အတွက် ထိုင်ခုံများနဲ့ စာအုပ်စာတမ်းများမှာ အခက်အခဲဖြစ်နေပါတယ်။ နောက်နှစ်တွေမှာလည်း အောင်မြင်တဲ့ ကျောင်းသူ ကျောင်းသားများကို တက္ကသိုလ်အထိ ပံ့ပိုးပေးနိုင်အောင်၊ အသက်မွေးဝမ်းကြောင်း ပညာ၊ လက်မှုပညာများကိုလည်း သင်ကြားပေးနိုင်အာင် ကြိုးစားသွားမည်။ " ဟုပြောသည်။

၂၀၁၃-၂၀၁၄ ပညာသင်၌တွင်လည်း သံတွဲ RNDP မှ ထောက်ပံ့မှုဖြင့် သင်ကြားပေးနေသော ကျောင်းသား ၂၅ ဦးနှင့် ကျောင်းသူ ၂၅ ဦး ပေါင်း (၅၀)ဦး ရှိကြောင်း ဦးစောလှိုင်က ဆက်ပြောသည်။

သံတွဲမြို့နယ်ရှိ ပညာဒါန စာသင်ဝိုင်းကို ၂၀၁၂ ခုနှစ်၊ နိုဝင်ဘာလတွင် သံတွဲ- ရခိုင်တိုင်းရင်းသားများ တိုးတက်ရေးပါတီ (RNDP)နှင့် ကျောင်းဆရာ/မများမှ ဦးဆောင်ဖွဲ့စည်းခဲ့ခြင်းဖြစ်ပြီး ဆယ်တန်းကို ဆက်လက်မသင်ကြားနိုင်ကြသော ကျောင်းသူ၊ ကျောင်းသားများအား အခမဲ့ပညာသင်ကြားပေးနေသည့် စာသင်ဝိုင်းတစ်ခု ဖြစ်သည်။

ပညာဒါန စာသင်ဝိုင်းမှာ သံတွဲမြို့နယ် တစ်ခု၌သာ ရှိနေသေးပြီး ၄င်းပညာဒါန စာသင်ဝိုင်းကို စနစ်တကျနှင့် အောင်မြင်မှုရရှိအောင် ကျောင်းသား၊ မိဘများ၊ ကျောင်းဆရာ/မများနှင့် ကော်မတီတစ်ခုကို ဇူလိုင်လ၂၃ ရက်နေ့ တွင် ပြည်လည်ဖွဲ့စည်းသွားမည်ဖြစ်ကြောင်း ဦးစောလှိုင်က ပြောကြားခဲ့သည်။