“ ကျွန်တော်တို့ ဘူးသီးတောင်ကနေ ရေကစားပြီး မောင်တောမြို့ကို အပြန် ကားပေါ်မှာ ပါလာတဲ့ အမျိုးသမီးတွေကို နယ်ခြားစောင့်တပ်က ရေပက်ရာကနေ စကားများကြပြီး ကျွန်တော်တို့ကို လက်သီးတွေနဲ့ ထိုးပါတယ်။ ကျွန်တော်တို့ အဲသလို အနိုင်ကျင့်ခံရပြီး မြို့ထဲကို ပြန်လာကြပါတယ်။ အဲဒါကို မကျေနပ်နိုင်သေး တဲ့ နယ်ခြားစောင့်ရဲတပ်ဖွဲ့ဝင် ၄၀ ခန့်က နောက်ထပ်ကားသုံးစီးနဲ့ မြို့ထဲကို လိုက်လာပြီး ကားတွေကို ရိုက်နှက်ဖျက်ဆီးတာတို့ လူတွေကို ထိုးကြိတ်တာတို့ ပြုလုပ်ပါတယ်” ဟု နယ်ခြားစောင့်တပ်ဖွဲ့ဝင်များ၏ ၀ိုင်းဝန်းထိုးကြိတ်ခံရသူ ဒေသခံ ရခိုင် လူငယ် တစ်ဦးက ပြောသည်။
ယခုကဲ့သို့ ၀ိုင်းဝန်းရိုက်နှက်ခံရသဖြင့် ကားအမှတ် ၇ (က) ၂၆၆၁ ကားမှာ မှန်များ ဖျက်ဆီးခံခဲ့ကြရသလို နေလင်းထွန်းဆိုသူ လူငယ် တစ်ဦးမှာလည်း ဖမ်းဆီးခံခဲ့ရပြီး အခြား လူငယ်နှစ်ဦးမှာလည်း ဒဏ်ရာ ရရှိသွားကြောင်း ဒေသခံများက ပြောဆိုသည်။
ယခုကဲ့သို့ ပြသနာ ဖြစ်ပွားပြီးနောက် မောင်တောမြို့တွင် လူစု လူဝေး ဖြစ်ပေါ်ခဲ့ကြောင်း အမည် မဖေါ်လိုသူ ဒေသခံ တစ်ဦးက ပြောဆိုသည်။
“ ခုထက်ထိ မြို့ထဲမှာ လူစု လူဝေးက ရှိနေတုန်းပါဘဲ။ ၂၀၀ ၀န်းကျင်လောက်တော့ ရှိမယ်ထင်ပါတယ်။ လူတွေကို ရိုက်နှက်သွားတာထက် လူမျိုးရေးအရ စော်ကားဆဲဆိုသွားတဲ့ အပေါ်မှာ အများကြီး မကျေမနပ် ခံပြင်း နေကြပါတယ်။ ရခိုင်တွေ ဘာဖြစ်တယ်- ညာဖြစ်တယ်ဆိုပီး လူမျိုးရေး အရ စော်ကားသွားပါတယ်။ အခု ရဟန်းတော် တချို့လည်း ရောက်ရှိနေပါတယ်” ဟု သူက ဆက်လက် ပြောဆိုသည်။
အဆိုပါ ဖြစ်ပွားခဲ့သော ကိစ္စနှင့် ပတ်သက်ပြီး အာဏာပိုင်များ၏ အတည်ပြုချက်ကို ရယူနိုင်ရေးအတွက် မောင်တောခရိုင် အုပ်ချုပ်ရေးမှူး၊ မြို့နယ် အုပ်ချုပ်ရေးမှူးနှင့် နယ်ခြားစောင့်တပ်ဖွဲ့ ဂျီဝမ်းတို့အား ဆက်သွယ်ရာ ဖုန်းကိုင် ဖြေဆိုခြင်း မရှိပါ။
မောင်တောမြို့နယ် ရဲစခန်းသို့ ဆက်သွယ်မေးမြန်းရာ မြို့နယ်ရဲစခန်းမှူးက ယခုလို ပြောဆိုသည်။
“ ကျွန်တော် ဒီကိစ္စ ဘာမှ မသိဘူး။ခင်ဗျားတို့သိရင် သိတဲ့ နေရာကိုသာ ဆက်သွယ်မေးမြန်းပါ” ဟု တုန့်ပြန် ပြောဆိုသည်။
No comments:
Post a Comment