Mizzima
နိုင်ငံတော် အခြေပြမိန့်ခွန်းများ၊ နိုင်ငံ၏ ဖြစ်ပေါ်တိုးတက်မှုများကို လစဉ် ၁ ရက်နေ့တွင် သမ္မတ ဦးသိန်းစိန်က ရေဒီယိုမှတစ်ဆင့် ပြောကြားနေကျ ဖြစ်သော်လည်း ယနေ့ ကျရောက်သည့် ဧပြီ တစ်ရက်နေ့တွင်မူ မိန့်ခွန်း မပြောကြားဖြစ်တော့ပေ။
သမ္မတ မိန့်ခွန်းကို ဧပြီ ၂ ရက်တွင်မှ ထုတ်လွှင့်မည်ဟု သမ္မတရုံး ညွှန်ကြားရေးမှူး ဦးဇော်ဋ္ဌေးက ဆိုသော်လည်း မည်သည့်အကြောင်းကြောင့် ဟူသည်ကို ပြောဆိုခြင်းမရှိပေ။
သမ္မတ၏ လစဉ်ရေဒီယိုမိန့်ခွန်းများတွင် "မိဘပြည်သူများ ခင်ဗျာ" ဟု အစချီလျက် မိန့်ခွန်းပြောလေ့ရှိရာ "မိဘ ပြည်သူများ ခင်ဗျာ" ဟု ပြောဆိုသည့်အပေါ် ဝေဖန်မှုများ ထွက်ပေါ်ခဲ့သည်။
မတ်လအတွင်း လက်ပံတန်းတွင် ပေါ်ပေါက်ခဲ့သည့် ကျောင်းသားများ ဆန္ဒပြမှုကို ရဲတပ်ဖွဲ့ဝင်တို့က အကြမ်းဖက် ဖြိုခွင်းပြီးနောက် ယင်းကဲ့သို့ ဝေဖန်မှုများ ပိုမိုပြင်းထန်လာခဲ့သည်။
လက်ပံတန်း သပိတ်စခန်း အကြမ်းဖက် ဖြိုခွင်းခံရပြီးနောက် နာရေးကူညီမှုအသင်း (ရန်ကုန်) တွင် မတ်လ ၁၂ ရက်က ကျင်းပသည့် ကျာင်းသားသပိတ် အကြမ်းဖက် ဖြိုခွင်းခံရမှု ရှုတ်ချပွဲသို့ အများကြည်ညိုလေးစားပြီး ဓမ္မစာပေများ ရေးသားနေသည့် အရှင်ဆန္ဒာဓိက သဝဏ်လွှာပေးပို့ရာတွင် ဝေဖန်ခဲ့သည်ကို တွေ့ရသည်။
အရှင်ဆန္ဒာဓိက လက်ပံတန်း ဖြစ်စဉ်ကို ရည်ညွှန်းလျက် သမ္မတ ဦးသိန်းစိန် အစချီပြောဆိုလေ့ရှိသည့် "မိဘပြည်သူများ ခင်ဗျာ" ဟူသည့် နှုတ်ဆက်စကားသည် ဟန်ပြသာဖြစ်ပြီး ရင်ထဲက မပါသည့် နှုတ်ဆက်စကားဟု သဝဏ်လွှာတွင် ရေးသားထားသည်။
"နှုတ်ခွန်းဆက် စကားကို ရင်ထဲက မပါတဲ့လေသံနဲ့ အပေါ်ယံဟန်ပြ မပြောဆိုသင့်သလို သားသမီးကျောင်းသား၊ ကျောင်းသူတို့ရေ ဆိုတဲ့ နှုတ်ခွန်းဆက်စကားကို မိဘကောင်း တစ်ယောက်ရဲ့ စစ်မှန်တဲ့ မေတ္တာ နှလုံးသားနဲ့ ကရုဏာသံပြည့်ဝစွာ နွေးနွေးထွေးထွေး ပြောဆိုနိုင်ဖို့ကိုလည်း လုံးဝန် ဝန်မလေးသင့်ပါဘူး" ဟု အရှင်ဆန္ဒာဓိက တိုက်တွန်းခဲ့သည်။
မတ်လ ၁၀ ရက်တွင် ပေါ်ပေါက်ခဲ့သည့် လက်ပံတန်း ပဋိပက္ခတွင် ကျောင်းသားနှင့် ပြည်သူ ၁၀၀ ကျော် ဖမ်းဆီးခံခဲ့ရပြီး အဆိုပါ လုပ်ရပ်သည် "အာဏာရှင် လူထွက်တွေရဲ့ သရုပ်သကန်ကို အမှန်အတိုင်း ထုတ်ဖေါ်ဝန်ခံလိုက်တာပါပဲ" ဟု အရှင်ဆန္ဒာဓိက ၏ သဝဏ်လွှာတွင် ပါရှိခဲ့သည်။
No comments:
Post a Comment