ကျော်စိုးမိုး
ပင်မ ကျောင်းသား သပိတ်ကို အကြမ်းဖက် ဖြိုခွင်းမှုကြောင့် ပြီးခဲ့သည့် မတ် ၁၀ ရက်က ကမာရွတ်မြို့နယ်၊ လှည်းတန်းဈေးမှပြည်လမ်း တစ်လျှောက် ကျောင်းသားများနှင့် အခြားအင်အားစုများ ပါဝင်သည့် လမ်းလျှောက် ဆန္ဒဖော်ထုတ်ရာတွင် ပါဝင်ခဲ့သူများဖြစ်သည့် ဗကသကျောင်းသား မပိုပိုနှင့် ကိုဝင်းကျော့မှူးတို့နှစ်ဦးကို ဧပြီ ၂၄ ရက်၊ နံနက်ပိုင်းက ကမာရွတ် မြို့နယ်တရားရုံးတွင် ရုံးထုတ်ခဲ့သည်။
အမှုအတွက် ဗကသ ကျောင်းသားများဖြစ်သည့် ကိုကျော်ကိုကို၊ ကိုဝင်းကျော့မှူး၊ ကိုနန္ဒစစ်အောင်၊ ဂျိမ်းစ်၊ ကိုရှိန်းရာဇာထွန်းနှင့် မပိုပိုတို့ခြောက်ဦးကို ကမာရွတ်မြို့နယ်တရားရုံးတွင် နိုင်ငံတော်အကြည်အညို ပျက်စေမှုပုဒ်မ ၅၀၅ (ခ) အပါအဝင် လူစုလူဝေးဆိုင်ရာ ပုဒ်မများဖြစ်သည့် ၁၄၃၊ ၁၄၅၊ ၁၄၇ စသည့် ပုဒ်မလေးခုဖြင့် တရားစွဲဆိုတင်ပို့ခဲ့ခြင်းဖြစ်သည်။
အမှုကို လိုက်ပါဆောင်ရွက်ပေးနေသည့် တရားလွှတ်တော်ရှေ့နေ ဦးရောဘတ်စန်းအောင်က "တရားစွဲဆိုခံထားရတဲ့သူတွေ မစုံသေးတဲ့အတွက် ဒီနေ့ ရုံးထုတ်ရမန်ယူတာပါ၊ အမှုစမစစ်ဖြစ်သေးပါဘူး။ " ဟုပြောသည်။
ကိုဝင်းကျော့မှူးကို အခင်းဖြစ်ပွားသည့်နေ့က ဖမ်းမိခဲ့ခြင်းဖြစ်ပြီး၊ မပိုပိုကို ဧပြီ ၈ ရက်က ဖမ်းဆီးခဲ့ကာ ကိုနန္ဒစစ်အောင်ကိုလည်း ဖမ်းဆီးခဲ့ပြီးဖြစ်သည်။ လွတ်မြောက်နေသူ သုံးဦးကိုလည်း ဆက်လက်ဖမ်းဆီးသွားမည်ဟု ကမာရွတ်မြို့နယ်ရဲတပ်ဖွဲ့မှ ရဲအရာရှိတစ်ဦးက ပြောသည်။
အမှုဖြစ်စဉ်မှာ ပြီးခဲ့သည့်မတ် ၁၀ ရက်၊ မွန်းလွဲ ၂ နာရီခန့်က လက်ပံတန်းရှိ ပင်မကျောင်းသားသပိတ်ကို အကြမ်းဖက်ဖြိုခွင်းခဲ့သည့်အတွက် ရန်ကုန်တိုင်း၊ ကမာရွတ်မြို့နယ်၊ လှည်းတန်းဈေးမှ စတင်၍ ပြည်လမ်းတစ်လျှောက် ဆန္ဒဖော်ထုတ်ရာတွင် ပါဝင်ခဲ့ကြသည့် ကိုဝင်းကျော့မှူး၊ ကျော်ကိုကို၊ နန္ဒစစ်အောင်၊ ဂျိမ်းစ်၊ ရှိန်းရာဇာထွန်းနှင့် မပိုပိုတို့ ခြောက်ဦးကို ကမာရွတ်မြို့ နယ်ရဲတပ်ဖွဲ့မှူး ရဲမှူးဇော်ဝင်းက တရားလိုပြုတိုင်တန်းခဲ့ခြင်းဖြစ်သည်။
အမှုကို ထပ်မံစစ်ဆေးရန်အတွက် ကမာရွတ်မြို့နယ်တရားရုံး၌ မေ ၅ ရက် တွင် ရုံးချိန်းချိန်းဆို ထားခြင်းဖြစ်သည်။
No comments:
Post a Comment