စစ်အုပ်စု တူးနေသည့် မိုက်တွင်းများ

မျိုးဇာနည်

၁၉၈၃ ခုနှစ် အောက်တို ဘာလ (၉) ရက် နေ့က ရန်ကုန်မြို့ အာဇာနည် ဂူဗိမာန် ၌ ဗုံး ပေါက်ကွဲ မှုဖြစ် ပွားရာ (၂၁) ဦး သေဆုံး ပြီး (၄၆) ဦး ဒဏ်ရာ ရရှိခဲ့ သည်။ ဗုံးဖောက်ခွဲ သူများ သည် ထိုစဉ်က မဆလ အစိုးရ၏ ဧည့်သည် တော်အဖြစ် ရောက်ရှိ နေသော တောင်ကို ရီး ယား သမ္မတ ချွန်ဒူးဝှမ် (Chun Doo Hwan) အား အဓိက ပစ်မှတ်ထား လုပ်ကြံ ရန် ကြံစည်ကြိုး စားခဲ့ ကြခြင်း ဖြစ်သည်။


သို့သော် သမ္မတ ချွန်ဒူးဝှမ်ကား သေကံမရောက် အသက်မပျောက်ဘဲ ဗုံးခွဲလုပ်ကြံမှုမှ သီသီကလေး လွတ်မြောက်သွားခဲ့သည်။ ယာဉ်ကြောပိတ်ဆို့နေမှုကြောင့် အာဇာနည်ကုန်းသို့ သတ်မှတ်ချိန်ထက် အနည်းငယ်နောက်ကျပြီးမှ ရောက်ရှိသွားသဖြင့် ဗုံးကွဲချိန်နှင့် မကြုံကြိုက်လိုက်ဘဲ ကပ်လွတ်သွားခဲ့ခြင်းဖြစ်သည်။ သူ၏ ကိုယ်စားလှယ်အဖွဲ့တွင် ပါဝင်သည့် ထိပ်တန်းဝန်ကြီး (၄) ဦးအပါအဝင် တောင်ကိုရီးယားအရာရှိ စုစုပေါင်း (၁၇) ဦး သေဆုံးသွားခဲ့သည်။

အဆိုပါဗုံးခွဲတိုက်ခိုက်မှုမှာ မြောက်ကိုရီးယားအစိုးရမှ စေလွှတ်ခဲ့သော အထူးကွန်မန်ဒိုများဖြစ်ကြသည့် မြောက်ကိုရီးယား စစ်တပ်အရာရှိ ဗိုလ်မှူးတဦးနှင့် ဗိုလ်ကြီးအဆင့်ရှိသူ နှစ်ဦး၏ လက်ချက်ဖြစ်ကြောင်း ဖော်ထုတ်တွေ့ရှိသဖြင့် ထိုအချိန်မှစပြီး အာဏာရှင် ဦးနေ၀င်း၏ မဆလအစိုးရက မြောက်ကိုရီးယားနိုင်ငံနှင့် သံတမန်အဆက်အသွယ် လုံးဝဖြတ်တောက်ပစ်ခဲ့သည်။

ထိုသို့ သံတမန်အဆက်အသွယ် ဖြတ်တောက်ပြီး (၂၅) နှစ်အကြာ ၂၀၀၈ ခုနှစ် အောက်တိုဘာလ (၂၇) ရက်နေ့တွင် မြန်မာစစ်အစိုးရ နိုင်ငံခြားရေးဝန်ကြီး ဦးဉာဏ်ဝင်း မြောက်ကိုရီးယားနိုင်ငံ ပြုံယမ်းမြို့တော်သို့ ပထမဆုံးအကြိမ် အလည်အပတ် သွားရောက်ခဲ့သည်။ တရုတ်နိုင်ငံ ဘေဂျင်းမြို့တွင် ကျင်းပသည့် အာရှ-ဥရောပ (အာဆမ်) အစည်းအဝေးကို တက်ရောက်ပြီး နောက် ပြုံယမ်းသို့ သွားရောက်ခဲ့ခြင်းဖြစ်သည်။

နအဖနိုင်ငံခြားရေးဝန်ကြီး ဦးဉာဏ်ဝင်း မသွားရောက်မီ ၂ဝဝ၇ ဧပြီလတွင် မြောက်ကိုရီးယား ဒုတိယနိုင်ငံခြားရေးဝန်ကြီး ကင်ရန်အီးလ် မြန်မာနိုင်ငံသို့ လာရောက်၍ နှစ်နိုင်ငံ သံတမန်ဆက်သွယ်ရေး ပြန်လည်ပြုလုပ်ရန် သဘောတူစာချုပ် ချုပ်ဆိုခဲ့သည်။ ဗုံးခွဲ၍ ကျူးလွန်စော်ကားထားမှုအပေါ် မြောက်ကိုရီးယားအစိုးရက တရားဝင် တောင်းပန်မှုမပြုမီ နိုင်ငံတကာ အသိုင်းအ၀ိုင်းကြားတွင် မျက်နှာငယ် အထီးကျန်နေသည့် မြန်မာစစ်အစိုးရက သူတော်ချင်းချင်း သတင်းလွေ့လွေ့ ပေါင်းဖက်ကြရန် သံသမန်အဆက်အသွယ်များ ပြန်လည်ပြုလုပ်ခဲ့ခြင်းဖြစ်သည်။

ထိုသို့ မြန်မာစစ်အစိုးရဘက်မှ အောက်ကျို့ကာ မြောက်ကိုရီးယားနှင့် သံတမန်အဆက်အသွယ် ပြန်လည်ပြုလုပ်ခြင်းအပေါ် မြောက်ကိုရီးယားဆိုင်ရာ မြန်မာသံအမတ်အဖြစ် တာဝန်ထမ်းဆောင်ခဲ့ဖူးသည့် ၀ါရင့်နိုင်ငံရေးသမားကြီး သခင်ချန်ထွန်းက “ကိုယ့်နိုင်ငံကိုလာရောက်ပြီး ဒီလောက်စော်ကားထားတဲ့ နိုင်ငံအစိုးရကို အသိအမှတ်ပြုပြီး သံတမန်ရေး ပြန်ဆက်ဆံတာဟာ တော်ရုံကိစ္စတော့ မဟုတ်လောက်ဘူး။ လက်နက်ကိစ္စ၊ နျူကလီးယားကိစ္စအတွက် အကူအညီရနိုင်ဖို့ သွားတယ်လို့ ဒီလိုပဲယူဆတယ်” ဟု ထိုစဉ်က မှတ်ချက်ပြုပြောဆိုခဲ့သည်။

မြောက်ကိုရီးယား-မြန်မာဆက်ဆံရေး အလျင်အမြန် တိုးတက်ပြောင်းလဲလာမှုနှင့် ပတ်သက်၍ အမေရိကန်အခြေစိုက် ရူပဗေဒပညာရှင် ဒေါက်တာကျော်တင့်က သူ၏အမြင်ကို ပြောဆိုရာတွင်လည်း မြန်မာစစ်အစိုးရအနေဖြင့် နျူကလီးယားလက်နက် လက်ဝယ်ပိုင်ဆိုင်ရန်အတွက် လွန်ခဲ့သည့် (၁၀) နှစ်ကျော်ကတည်းက ကြိုးစားနေခဲ့ခြင်းဖြစ်ကြောင်း၊ မိမိဘာသာကြိုးစားလျှင် အချိန်ကြာမြင့်နိုင်သည့်အတွက် နျူကလီးယားဗုံး အမြန်ဆုံးပြုလုပ်နိုင်သည့် သန့်စင်ပြီးသား ယူရေနီယံကို မှောင်ခိုကနေ၀ယ်ယူရန် ဆုံးဖြတ်လိုက်ပုံရကြောင်း၊ ထို့အတွက် မြောက်ကိုရီးယားနှင့် သံတမန်အဆက်အသွယ် ပြန်လည်ပြုလုပ်ခဲ့သည်ဟု ထင်မြင်ကြောင်း လေလှိုင်းထဲမှ အင်တာဗျူးတခုတွင် ပြောဆိုခဲ့သည်။

“မြန်မာအစိုးရက မှောင်ခိုက၀ယ်ဖို့ စဉ်းစားလိုက်ပုံရတယ်။ မှောင်ခိုရောင်းနိုင်တဲ့နိုင်ငံ အနောက်အုပ်စုမဟုတ်တဲ့နိုင်ငံတွေ ကျနော်တို့ ပြန်ကြည့်တဲ့အခါကျတော့ ဥပမာဆိုပါစို့ တရုတ်၊ ရုရှား၊ ပါကစ္စတန်ရှိမယ်။ နောက်တခုက အခုမြောက်ကိုရီးယား ရှိမယ်။ တရုတ်ကလည်း မြန်မာအစိုးရကို ဒီပညာပေးမှာ မဟုတ်ဘူး။ ရုရှားဆိုတာကလည်း ဟင်းစားတော့ပေးမယ် ပိုက်ချက်တော့ မပြနိုင်ဘူးဆိုတာမျိုးဘဲ ဖြစ်မှာပဲ။ ပါကစ္စတန်ကလည်း အမေရိကန်နဲ့ အဆင်ပြေနေတော့ ပေးမှာမဟုတ်ဘူး။ အဲတော့ နျူကလီးယားလုပ်လို့ရတဲ့ သန့်စင်ပြီးသား ယူရေနီယံကို တိုက်ရိုက်ဝယ်ယူဖို့အတွက် မြောက်ကိုရီးယားကပဲ ရနိုင်မယ်။ အဲဒါကြောင့်မို့ပဲ မြောက်ကိုရီးယားနဲ့ အခြေအနေအဆိုးကြီးကြားကပဲ သံတမန်ပြန်ပြီးတော့ ဆက်သွယ်တာဖြစ်ဖို့များတယ်” ဟု ဒေါက်တာကျော်တင့်က ပြောဆိုခဲ့သည်။

ထို့နောက် ၂၀၀၈ ခု နိုဝင်ဘာလတွင် မြန်မာစစ်ခေါင်းဆောင် (ကြည်း၊ ရေ၊ လေ) ညှိနှိုင်းကွပ်ကဲရေးမှူး ဗိုလ်ချုပ်ကြီး သူရရွှေမန်းနှင့် အဆင့်မြင့် တပ်မတော်ကိုယ်စားလှယ်အဖွဲ့ တရုတ်နိုင်ငံမှတဆင့် မြောက်ကိုးရီးယားသို့ တိတ်တဆိတ် သွားရောက်လည်ပတ်ခဲ့သည်။ အဆိုပါခရီးစဉ်နှင့် ပတ်သက်၍ မကြာသေးမီက မြန်မာအင်တာနက်စာမျက်နှာအချို့တွင် လျှို့ဝှက်အစီရင်ခံစာနှင့် ဓာတ်ပုံအထောက်အထားများ ပေါက်ကြားထွက်ပေါ်လာခဲ့သည်။

ဗိုလ်ချုပ်ကြီးသူရရွှေမန်းနှင့် အဆင့်မြင့် တပ်မတော်ကိုယ်စားလှယ်အဖွဲ့သည် နိုဝင်ဘာလ (၂၂) ရက်မှ (၂၉) ရက်အထိ မြောက်ကိုရီးယား၌ လည်ပတ်စဉ်အတွင်း မြန်မာစစ်တပ်နှင့် မြောက်ကိုရီးယားစစ်တပ်တို့အကြား နားလည်မှုစာချွန်လွှာကို လက်မှတ်ရေးထိုးခဲ့သည်။ မြန်မာအဆင့်မြင့်ကိုယ်စားလှယ်အဖွဲ့အား မြောက်ကိုရီးယား တာဝန်ရှိပုဂ္ဂိုလ်များက ပြုံယမ်းမြို့တော်နှင့် မြိုယမ်းမြို့ရှိ အရေးပါသည့် နေရာများကို လှည့်လည်ပြသခဲ့ပြီး၊ တောင်ကြောများအတွင်းရှိ ဥမင်များတွင် သိမ်းဆည်းထားသည့် ဂျက်တိုက်လေယာဉ်များ၊ ဒုံးပျံများ၊ တင့်ကားများ၊ အဏုမြူနှင့် ဓာတုလက်နက်များကို ပြသခဲ့သည်။ ထို့အပြင် မြေပြင်မှ မြေပြင်ပစ် စကတ်ဒုံးကျည် (SCUD Missile) ထုတ်လုပ်ရေးစက်ရုံသို့ သွားရောက်၍ ဒုံးကျည်ထုတ်လုပ်ပုံ အဆင့်ဆင့်ကို အသေးစိတ်လေ့လာခဲ့သည်ဟုလည်း မြန်မာကိုယ်စားလှယ်အဖွဲ့၏ လျှို့ဝှက်အစီရင်ခံစာတွင် ဖော်ပြခဲ့သည်။

မြောက်ကိုရီးယားသည် မြန်မာပြည်ကို ဒုံးကျည်များ ရောင်းချနေသည်ဟု အမေရိကန်အစိုးရအရာရှိတို့က ၂ဝဝ၄ ခုနှစ်ကပင် ထုတ်ဖော်ပြောကြားခဲ့သည်။ ထိုအချက်ကိုကြည့်ခြင်းအားဖြင့် ဗိုလ်ချုပ်ကြီး သူရရွှေမန်းနှင့်အဖွဲ့၏ ခရီးစဉ်သည် မြန်မာနိုင်ငံ၌ တာတို၊ တာလတ်ပစ် ဒုံးကျည်များ စမ်းသပ်ပစ်လွှတ်ပြီး ဒေသတွင်းနိုင်ငံများအပေါ် စစ်အရေးအရ အပေါ်စီးမှ ခြိမ်းခြောက် အနိုင်ယူလိုသည်အထိ ဆောင်ရွက်နိုင်ရန် ရည်ရွယ်ပြီး သွားရောက်လေ့လာခဲ့ခြင်းဖြစ်မည်ဟု ယူဆရပေသည်။
မြောက်ကိုရီးယားနှင့် နောက်ထပ်ဆက်ဆံမှုတခုမှာ မြန်မာစစ်အစိုးသည် လွန်ခဲ့သည့် (၁၀) နှစ်ကျော်လောက်မှစ၍ မြောက်ကိုရီးယား၏ နည်းပညာအကူအညီဖြင့် နေပြည်တော်၊ မေမြို့နှင့် ရှမ်းပြည်တ၀ိုက်တွင် မြေအောက်ဥမင်လိုဏ်ခေါင်းများ တူးဖော်ဖောက်လုပ်နေခြင်းပင်ဖြစ်သည်။

ပြီးခဲ့သည့် ဇွန်လ (၉) ရက်နေ့က အမေရိကန်ပြည်ထောင်စု၌ ထုတ်ဝေသည့် Yale Global မဂ္ဂဇင်းတွင် မြောက်ကိုရီးယားက မြန်မာစစ်အစိုးရအတွက် မြေအောက်ဥမင်လိုဏ်ခေါင်းများ တူးပေးနေသည်ဆိုသည့် ဆောင်းပါးတပုဒ်ကို ဆောင်းပါးရှင် ဘာတေးလ်လစ်တနာက ဓာတ်ပုံအထောက်အထားများနှင့်တကွ ရေးသားဖော်ပြခဲ့သည်။ ဆောင်းပါးတွင် ၂၀၀၃ ခုနှစ်နှင့် ၂၀၀၆ ခုနှစ်အတွင်း ရိုက်ကူးခဲ့သည့် မြောက်ကိုရီးယားပညာရှင်များ၊ မြေအောက်ဥမင်လိုဏ်ခေါင်းများ၊ နေပြည်တော်တွင် ဆောက်လုပ်နေသည့် ဓာတ်ပုံများအပါအ၀င် မြောက်ကိုရီးယားနှင့် မြန်မာလက်နက်အရောင်းအ၀ယ် ကိစ္စရပ်များကိုပါ အသေးစိတ် စုံးစမ်းတင်ပြထားသည်။

မြန်မာစစ်အစိုးရအနေဖြင့် မည်ကဲ့သို့သော ရည်ရွယ်ချက်နှင့် အဆိုပါ မြေအောက်ဥမင်လိုဏ်ခေါင်းများ တူးဖော်နေသည်လဲ ဟူသည့်အမေးကို ဖြေကြားရာတွင် ဆောင်းပါးရှင် ဘာတေးလ်လစ်တနာက “မြေအောက်လိုဏ်အားလုံးဟာ စစ်အစိုးရဲ့ ဗုံးခိုကျင်းမဟာဗျူဟာချည်းသက်သက် မဟုတ်ပါဘူး။ ဒီလိုဏ်တွေဟာ အစိုးရရုံးအဖွဲ့တချို့ကို မြေအောက်မှာထားဖို့ ရည်ရွယ်တာ တွေ့ရပါတယ်။ မြန်မာစစ်အစိုးရ ရေဒီယို၊ ရုပ်မြင်သံကြားနဲ့ ပြည်တွင်းသုံးအင်ထရာနက်တွေမှာပါ ဒီလိုဏ်တွေရဲ့ နေရာတွေကို မကြာခဏ ဖော်ပြတတ်ပါတယ်။ သူ့အဆက်အသွယ်တွေအရ ဒီလိုဏ်တွေဟာ မြေအောက်အစည်းအဝေး ခန်းမတွေဖြစ်ပြီး ထိပ်တန်းခေါင်းဆောင်တွေကို ပြည်ပလေကြောင်းရန်ကဖြစ်ဖြစ်၊ ပြည်တွင်းမတည်မငြိမ်မှုရန်ကဖြစ်ဖြစ် ကာကွယ်ဖို့ ရည်ရွယ်တယ်လို့ ယူဆကြပါတယ်” ဟု ပြောဆိုခဲ့သည်။

မကြာသေးမီက ထွက်ပေါ်လာသည့် မြန်မာ-မြောက်ကိုရီးယား လျှို့ဝှက်ဆက်ဆံရေး သတင်းများအရလည်း စစ်အုပ်စုသည် လေယာဉ်များနှင့် လက်နက်များကို ဖုံးကွယ်သိမ်းဆည်းရန် မြေအောက်ဥမင်များနှင့် ဂူများကို ဖောက်လုပ်ရုံမျှမက ဗဟိုစစ်ရုံး အမိန့်ပေးနှင့် ထိန်းချုပ်ရေးစနစ်များကို ဖုံးကွယ်ထားရန်အထိပါ ရည်ရွယ်ဖောက်လုပ်နေခြင်းဖြစ်သည်ဟု သိရသည်။ မြန်မာစစ်အစိုးရသည် ယခုအချိန်အထိ မြေအောက်ဥမင်လိုဏ်ခေါင်း တူးဖော်မှုအတွက် စုစုပေါင်း ဒေါ်လာ (၉) ဘီလီယံကျော် အံ့မခန်း သုံးစွဲခဲ့ပြီးဖြစ်ကြောင်း သိရသည်။

မြန်မာစစ်အစိုးရ တူးဖော်ဖောက်လုပ်နေသည့် မြေအောက်ဥမင်လိုဏ်ခေါင်းများနှင့် ပတ်သက်၍ စစ်ထောက်လှမ်းရေး အရာရှိဟောင်း ဗိုလ်မှူးအောင်လင်းထွဋ်က “မြောက်ကိုရီးယားနဲ့ လိုဏ်ဂူတွေ အများကြီးဖောက်နေတယ်။ ကျနော်တို့သိသ လောက် နျူကလီးယားစက်ရုံ (၂) ရုံ မကွေးတိုင်း မြိုင်ဘက်မှာ စက်ရုံတရုံ၊ မေမြို့အလွန် နောင်ချိုကြား ရွှေတောင်ကြော တွေထဲမှာ စက်ရုံတရုံဆောက်ဖို့ ၂၀၀၈ ခုနှစ် ဗိုလ်ချုပ်ကြီး ရွှေမန်း နိုဝင်ဘာခရီးစဉ်မှာ MOU ထိုးခဲ့တဲ့ အနေအထားမျိုးတွေ ရှိပါတယ်” ဟု ပြောဆိုသည်။

ပြီးခဲ့သည့် ဇွန် (၁၇) ရက်နေ့ကလည်း မြောက်ကိုရီးယား နမ်ပိုဆိပ်ကမ်းမှ ထွက်ခွာခဲ့သည့် ကန်နမ် (၁) သင်္ဘောသည် ဒုံးလက်နက်နှင့် ဆက်စပ်ပစ္စည်းများ တင်ဆောင်ကာ မြန်မာနိုင်ငံဘက်သို့ ဦးတည်ခုတ်မောင်းနေသည်ဟု တောင်ကိုရီးယားထောက်လှမ်းရေး အပါအ၀င် နိုင်ငံတကာ စောင့်ကြည့်လေ့လာသူများက ယူဆသည့်အတွက် အမေရိကန် ရေတပ်ဖျက်သင်္ဘော ယူအက်စ်အက်စ် ဂျွန်အက်စ် မက်ကိန်းက နောက်ယောင်ခံလိုက်ခဲ့သည်။

စစ်အစိုးရက ထိုကန်နမ် (၁) သင်္ဘောနှင့် ပတ်သက်၍ သတင်းတစုံတရာ မရရှိကြောင်း ငြင်းဆိုခဲ့ပြီး ဆန်တန်ချိန် ထောင်ပေါင်းများစွာ သယ်ဆောင်မည့် မြောက်ကိုရီးယား ကုန်တင်သင်္ဘောတစီးသာ ဇွန်လ (၂၇) ရက်နေ့တွင် မြန်မာဆိပ်ကမ်းသို့ ဆိုက်ကပ်မည်ဟု စစ်အစိုးရ သတင်းမီဒီယာများတွင် ဖော်ပြခဲ့သည်။

သို့သော် စစ်လက်နက်ပစ္စည်းများ တင်ဆောင်လာသည်ဟု သံသယရှိသည့် မြောက်ကိုရီးယားသင်္ဘော ကန်နမ် (၁) သည် ဇွန်လကုန်ပိုင်းတွင် မြောက်ကိုရီးယားဘက်သို့ ပြန်လှည့်သွားပုံရကြောင်း အမေရိကန် စစ်ဘက်ဆိုင်ရာ တာဝန်ရှိပုဂ္ဂိုလ်များက ပြောဆိုခဲ့သည်။ ကန်နမ် (၁) သင်္ဘော နောက်ကြောင်းပြန်လှည့်သည် ဆိုသည့်အချက်မှန်ကန်ပါက မြောက်ကိုရီးယားအပေါ် ကုလသမဂ္ဂလုံခြုံရေးကောင်စီ၏ တားမြစ်ချက်များ သက်ရောက်မှုရှိသည်ကို ပြသခြင်းဖြစ်ကြောင်း မြောက်ကိုရီးယားအရေး ကျွမ်းကျင်သူများက ပြောဆိုသည်။

“တကယ်လို့ ဒီသင်္ဘောဟာ သူ့လမ်းအတိုင်း ပြန်လှည့်သွားပြီဆိုရင် ကုလသမဂ္ဂရဲ့ ဆုံးဖြတ်ချက်အမှတ် ၁၈၇၄ က ထိရောက်တယ်လို့ ဆိုရမှာပါ” ဟု ကိုရီးယား ကာကွယ်ရေးဆိုင်ရာလေ့လာရေးအဖွဲ့ ဒု-ဥက္ကဋ္ဌ ကင်တေ၀ူးက ကိုရီးယားသံတော်ဆင့် သတင်းစာသို့ ပြောဆိုသည်။

မြောက်ကိုရီးယားသည် မေလ (၂၅) ရက်နေ့က နျူကလီးယားလက်နက် စမ်းသပ်ခဲ့သည့်အတွက် ကုလသမဂ္ဂ လုံခြုံရေးကောင်စီ က ဆုံးဖြတ်ချက်အမှတ် ၁၈၇၄ ကို ချမှတ်ပြီး အရေးယူခဲ့သည်။ ယင်းဆုံးဖြတ်ချက်ကို မြောက်ကိုရီးယား၏ ရင်းနှီးသော မဟာမိတ်များဖြစ်သည့် ရုရှားနှင့် တရုတ်တို့ကလည်း ထောက်ခံခဲ့ကြသည်။ ဆုံးဖြတ်ချက် ၁၈၇၄ အရ သံသယဖြစ်ဖွယ်ရှိသော မြောက်ကိုရီးယားနိုင်ငံ၏ မည်သည့်သင်္ဘော၊ လေယာဉ်များကိုမဆို ကုလသမဂ္ဂ အဖွဲ့ဝင်နိုင်ငံများ အနေဖြင့် ၀င်ရောက်ရှာဖွေ စစ်ဆေးနိုင်ခွင့်ရှိသည်ဟု ဖော်ပြထားသည်။ လုံခြုံရေးကောင်စီမှ ယင်းသို့ ပြဋ္ဌာန်းချက်အသစ် ချမှတ်လိုက်ပြီးသည့်နောက် ကန်နမ် (၁) မြောက်ကိုရီးယားသင်္ဘောသည် နိုင်ငံတကာ၏ စောင့်ကြည့်စိစစ်ခြင်းခံရသည့် ပထမဆုံးသင်္ဘောဖြစ်သည်။

ထို့အပြင် ဇွန်လ (၃၀) ရက်နေ့ကလည်း တာဝေးပစ် ဒုံးကျည် ဆက်စပ်ပစ္စည်းတမျိုး မြန်မာပြည်သို့ တရားမဝင်တင်ပို့ရန် ကြိုးပမ်းသူဟု ယူဆရသည့် လုပ်ငန်းရှင် (၃) ဦး ကို ဂျပန်ရဲတပ်ဖွဲ့က ဖမ်းဆီးခဲ့ကြောင်း ဂျပန်သတင်းများတွင် ဖော်ပြခဲ့ပြန်သည်။ အဆိုပါပစ္စည်းမှာ တာဝေးပစ်ဒုံးကျည် ပြုလုပ်ရာတွင် အသုံးပြုသည့် သံလိုက်သတ္တိတိုင်းတာသော ကိရိယာတမျိုးဖြစ်ကြောင်း၊ နိုင်ငံခြားငွေကြေးဖလှယ်ရေးနှင့် ကုန်သွယ်မှုဥပဒေကို ချိုးဖောက်သည်ဟု သံသယရှိသဖြင့် ဖမ်းဆီးထိန်းသိမ်းခဲ့ခြင်းဖြစ်သည်ဟု ဂျပန်ရဲတပ်ဖွဲ့က ပြောဆိုသည်။

ဖမ်းဆီးခံရသူများမှာ တိုကျိုအခြေစိုက် လုပ်ငန်းရှင်များဖြစ်ကြသည့် တိုကိုဘိုးကီကုမ္ပဏီ ဥက္ကဋ္ဌ မြောက်ကိုရီးယားနိုင်ငံသား လီကျုံးဟို၊ ကုန်ပစ္စည်းထုတ်လုပ်ရေး ကုမ္ပဏီတခု၏ ဥက္ကဋ္ဌ မီယာကီကက်ဆူကီနှင့် ထုတ်ကုန် အေဂျင်စီတခု၏ ဥက္ကဋ္ဌ ယာဆူဟီကိုမူတို တို့ဖြစ်သည်။ ထိန်းသိမ်းခံထားရသူ (၃) ဦးသည် ယခုနှစ် ဇန်နဝါရီလက ဂျပန်ယန်း (၇) သန်းနီးပါးခန့် တန်သည့် သံလိုက်သတ္တိ တိုင်းတာသည့် ကိရိယာများကို မြန်မာပြည်သို့ တင်ပို့ခဲ့ကြောင်း ရဲက ပြောဆိုသည်။ ထိုသို့တင်ပို့ရာတွင် ဂျပန်နိုင်ငံ စီပွားကုန်သွယ်နှင့် စက်မှုဝန်ကြီးဌာန၏ ခွင့်ပြုချက်ကို ရယူခြင်းမရှိဟု ဆိုသည်။

ဖျက်အားပြင်း လက်နက်ထုတ်လုပ်ရာတွင် အသုံးပြုမည့် ကုန်ပစ္စည်းများ ပြည်ပသို့ တင်ပို့ခြင်းမပြုနိုင်ရန် ဂျပန်နိုင်ငံက ဥပဒေအရ တားမြစ်ထားသည်။ ၂ဝဝ၈ ခုနှစ် စက်တင်ဘာလဝန်းကျင်တွင် ယင်းကုမ္ပဏီက အလားတူပစ္စည်းမျိုးကို မြန်မာနိုင်ငံ အမှတ် (၂) စက်မှု ဝန်ကြီးဌာနသို့ ပေးပို့ရန် ကြိုးပမ်းခဲ့ဖူးသည်ဟု သိရသည်။ နှစ်ကြိမ်စလုံးတွင် ပြည်ပတင်ပို့ခွင့်လျှောက်လွှာ ပါဝင်ခြင်းမရှိ သည်ကို ဂျပန်အာဏာပိုင်တို့က သတိထားမိခဲ့သဖြင့် သင်္ဘောပေါ်သို့ မတင်မီ အစီအစဉ်များ ပျက်ခဲ့ရခြင်းဖြစ်သည်ဟု ဆိုသည်။

ဟောင်ကောင်အခြေစိုက် ကုမ္ပဏီ၏အမည်မှာ New East International Trading Ltd ဖြစ်သည်။ ထိုကုမ္ပဏီကို မြောက်ကိုရီးယားအစိုးရပါတီဖြစ်သော မြောက်ကိုရီးယား အလုပ်သမားပါတီ၊ ဒုတိယ စီးပွားရေးရာကော်မတီက တိုက်ရိုက်ထိန်းချုပ်သည်ဟု ယုံကြည်ရကြောင်း ယိုမီယူရီရှင်ဘွန်း သတင်းတွင် ဖော်ပြခဲ့သည်။ မြောက်ကိုရီးယားစစ်တပ်အတွက် စစ်ဘက်ဆိုင်ရာပစ္စည်းများ ဝယ်ယူရန် ယင်းကော်မတီက တာဝန်ယူထားသည်ဟု ဆိုသည်။

ကန်နမ် (၁) သင်္ဘောထွက်ခွာလာသည့်ကိစ္စနှင့် ဂျပန်၌ လုပ်ငန်းရှင် (၃) ဦး ဖမ်းဆီးခံရသည့်ကိစ္စတို့ကို ဆက်စပ်ကြည့်မည် ဆိုလျှင် ၂၀၀၈ နိုဝင်ဘာလအတွင်း ဗိုလ်ချုပ်ကြီး သူရရွှေမန်းနှင့် အဆင့်မြင့်ကိုယ်စားလှယ်အဖွဲ့ မြောက်ကိုရီးယားသို့ သွားရောက်စဉ်က မှာယူခဲ့သည့် စစ်လက်နက်ပစ္စည်းများကို မြန်မာပြည်သို့ ပို့ဆောင်ရန် ကြိုးစားခြင်း၏ တစိတ်တဒေသ ဖြစ်ပုံရသည်ဟုလည်း ယူဆစရာအကြောင်းရှိပေသည်။

မည်သို့ဆိုစေ အထက်၌တင်ပြခဲ့သည့် ဖြစ်စဉ်များအားလုံးသည် ၂၀၀၇ ဧပြီလတွင် မြန်မာ-မြောက်ကိုရီးယား သံသမန်အဆက် အသွယ် ပြန်လည်ပြုလုပ်ပြီးနောက်ပိုင်း ဆက်တိုက်ဖြစ်ပေါ်ခဲ့သည့် အဖြစ်အပျက်များပင်ဖြစ်သည်။ ဤဖြစ်ရပ်များကို ကြည့်ခြင်းအားဖြင့် နိုင်ငံတကာအသိုင်းအ၀ိုင်း၏ ပစ်ပယ်ထားခြင်းခံနေရသည့် မြန်မာစစ်အုပ်စုသည် ဘ၀တူ မြောက်ကိုရီးယား အစိုးရနှင့် ရင်းနှီးစွာ မဟာမိတ်ဖွဲ့ပြီး အစွမ်းကုန် မိုက်တွင်းနက်ရန် ပြင်ဆင်နေသည်ကို တွေ့ရမည်ဖြစ်ပေသည်။

နအဖစစ်အုပ်စုသည် ကမ်းလွန်ရေနံနှင့် သဘာဝဓာတ်ငွေ့မှ ရရှိသည့် ပြည်သူ့ဘဏ္ဍာငွေများကို သူတို့အာဏာတည်မြဲရေးနှင့် ဒေသတွင်းနိုင်ငံများအား စစ်အရေးအရ ခြိမ်းခြောက်ပြီး အသာစီးယူနိုင်ရေးအတွက် ရည်ရွယ်သည့် နျူကလီးယားလက်နက် ပိုင်ဆိုင်နိုင်ရေး မိုက်တွင်းကြီးတခု တူးဖော်နေသလို ဒုက္ခပင်လယ်ဝေနေသည့် ပြည်သူလူထုအပေါ် ဘယ်သူသေသေ ငတေမာလျှင်ပြီးရောဟူသည့် စိတ်ဓာတ်နှင့် မိုက်မိုက်မဲမဲ လျစ်လျူရှု မျက်ကွယ်ပြုသည့် မိုက်တွင်းကြီးတခုကိုလည်း တပြိုင်နက်တည်း တူးဖော်နေသည်ကို တွေ့ရပေသည်။

ထိုသို့ နအဖစစ်အုပ်စု၏ မိုက်တွင်းများ ဆက်လက်တူးဖော်နေမှုကို ရပ်တန့်နိုင်ရန်အတွက် နိုင်ငံတကာ၏ အရေးယူဆောင်ရွက်မှု များ ထိရောက်မှုရှိရန် အထူးလိုအပ်လှပေသည်။ ထို့အပြင် မြန်မာနိုင်ငံအတွင်း၌ ဒီမိုကရေစီနည်းကျ ရွေးကောက်တင်မြှောက် သည့် ပြည်သူ့အစိုးရတရပ် အမြန်ဆုံးပေါ်ထွန်းလာရေးအတွက် မြန်မာပြည်သူများကိုယ်တိုင် အားထုတ်လုပ်ဆောင်ရမည်ဖြစ် သလို ဒေသတွင်းနိုင်ငံများမှလည်း ၀ိုင်းဝန်းအကူအညီပေးရန် လိုအပ်ပေသည်။ သို့မဟုတ်ပါက စစ်အုပ်စု တူးနေသည့် မိုက်တွင်းများကြောင့် အနာဂတ်ကာလတွင် မြန်မာပြည်သူများအားလုံး မတွေးဝံ့စရာ အခြေအနေ ဆိုးများနှင့် ကြုံတွေ့ကြရမည် ဖြစ်သလို ဒေသတွင်းနိုင်ငံများအနေဖြင့်လည်း မိမိတို့နိုင်ငံ၏ လုံခြုံရေးကို ခြိမ်းခြောက်ထိပါးမည့် အန္တရာယ်ဆိုးနှင့် ရင်ဆိုင်ကြုံတွေ့ကြရနိုင်ကြောင်း သုံးသပ်တင်ပြလိုက်ရပါသည်။