(ထိုင်းနိုင်ငံ မဲဆောက်မြို့ ကမ္ဘာ့ငြိမ်းချမ်းရေးနေ့ (၂၁.၉. ၂၀၀၉)၊ စက်တင်ဘာ ရွှေဝါရောင် ၂ နှစ်မြောက် အထိမ်းအမှတ် ငြိမ်းချမ်းရေး စုပေါင်း လမ်းလျှောက်ပွဲတွင် ဦးဆောင် ပါဝင်ခဲ့သည့် မြန်မာ့ သံဃာတော်များ ဖြစ်သော နို့ဖိုး ဒုက္ခသည် စခန်းမှ အရှင်ကေသရ၊ အရှင် ပညာသာမိ၊ အရှင်ကဝိန္ဒနှင့် အရှင်ကေသရိန္ဒတို့အား သံဃာ့ဇာနည်များ အဖြစ် ဤဆောင်းပါးဖြင့် ဂုဏ်ပြုအပ်ပါသည်။)
စက်တင်ဘာ ရွှေဝါရောင် တော်လှန်ရေး အကြောင်းကို မြန်မာပြည်သူ အများစု သိပြီး ဖြစ်သလို ကမ္ဘာ့ပြည်သူ တွေက လည်း မြန်မာပြည် အကြောင်းကို ပိုမိုသိရှိ လာကြ၊ စိတ်ဝင်စား လာကြတယ်။ ရွှေဝါရောင် တော်လှန်ရေးဟာ လွယ်လွယ်နဲ့ ပေါ်ပေါက် လာတာ မဟုတ်ပါဘူး။ ရဟန်း၊သံဃာတွေ ဦးဆောင်မှုကြောင့် ဖြစ်ပေါ်လာတာပါ။ အတိအကျ ပြောရမယ် ဆိုရင် ရဟန်းသမဂ္ဂ အဖွဲ့အစည်း ၄ ဖွဲ့ကို စုပေါင်း ဖွဲ့စည်းထားတဲ့ မြန်မာနိုင်ငံလုံး ဆိုင်ရာ သံဃာ့တပ် ပေါင်းစု အဖွဲ့ကြီးရဲ့ ဦးဆောင်မှုနဲ့အညီ သံဃာတော်တွေရဲ့ စုလုံးညီညွတ်မှု၊ ရဲရင့် သတ္တိ ရှိမှုတို့ကြောင့် ပေါ်ပေါက် ခဲ့ခြင်းပဲ ဖြစ်ပါတယ်။
ရွှေဝါရောင်ရဲ့ ဝိညာဉ်၊ စက်တင်ဘာရဲ့ မေတ္တာစွမ်းတွေဟာ ရွှေဝါရောင် တော်လှန်ရေးဖြစ်ပြီး၊ ၂ နှစ်ကြာသည့်တိုင် ပျောက်ပျက်မသွားဘဲ၊ ရဟန်းတော်တွေရဲ့ အတွင်းသဏ္ဍာန်မှာ နက်နက် ရှိုင်းရှိုင်း ကိန်းအောင်းနေတုန်းပါပဲ။ ရွှေဝါရောင် ကာလအပြီး နအဖ ရဲ့ သာသနာဖျက် လုပ်ရပ်တွေကြောင့် ပြည်ပကို ရောက်ရှိလာကြတဲ့ သံဃာတော် တွေရဲ့ ဦးဆောင်မှုကြောင့် ၂ နှစ်ပြည့် အထိမ်းအမှတ် ရွှေဝါရောင် ငြိမ်းချမ်းရေး ဆုတောင်း မေတ္တာပို့ လမ်းလျှောက် ပွဲကို ထိုင်းနိုင်ငံ မြောက်ပိုင်း မဲဆောက်မြို့မှာ အရှင်သောပါက ခေါင်းဆောင်ပြီး အောင်မြင်စွာ ပြုလုပ်ခဲ့ပါတယ်။
ငြိမ်းချမ်းရေး လမ်းလျှောက်ပွဲ
ဒီလ ၅ ရက်နေ့ မနက်မှာ ဒီသတင်းကို သယ်ဆောင် လာသူကတော့ အရှင်ကေသရ ဖြစ်ပါတယ်။
နို့ဖိုး ဒုက္ခသည် စခန်းမှာရှိတဲ့ ဗုဒ္ဓဝိဟာရ ကျောင်းထဲကို အထုတ်အပိုးတွေနဲ့ ဝင်လာတဲ့ ကိုယ်တော်တပါးကို သတိထား ကြည့်မိတော့ ကိုယ်တော် ကေသရ။ သူ့ပုံသဏ္ဍာန်က ဝဝဖိုင့်ဖိုင့် ပုပု၊ နှစ်လိုဖွယ်အပြုံးနဲ့ တဖက်သားကို ကူညီတတ် သူပါ။ ကျောင်းမှာရှိတဲ့ ကိုယ်တော်တွေက ချစ်စနိုးနဲ့ သူ့ကို ဦးကေလို့ ခေါ်ကြပါတယ်။ ဦးကေ ပြန်လာပြီဆို လက်ဆောင် ပစ္စည်းတွေ ပါပါလာတတ်လို့ သူပြန်လာရင် အားလုံး ပျော်ရွှင်ကြပါတယ်။ ဒီတခါ သူယူလာတာကတော့ ငြိမ်းချမ်းရေး သတင်းစကားပါ။ ကမ္ဘာ့ငြိမ်းချမ်းရေးနေ့ အထိမ်းအမှတ်၊ ရွှေဝါရောင် ၂ နှစ်ပြည့် အထိမ်းအမှတ်ပွဲ ဖြစ်မြောက်ရေး အတွက် လျှို့ဝှက်တာဝန်ကို ယူဆောင် လာပါတယ်။ ဦးကေသရဟာ ၂၀၀၇ ခုနှစ် ရွှေဝါရောင် တော်လှန်ရေး ကာလတုန်းက ဦးဂမ္ဘီရနှင့် လက်တွဲ လုပ်ခဲ့ကြတဲ့၊ သံဃာ့ တပ်ပေါင်းစုက ဖြစ်ပြီး စက်တင်ဘာ အဖမ်းအဆီး တွေကြောင့် ထိုင်းနိုင်ငံထဲကို တိမ်းရှောင်ရင်း နို့ဖိုး ဒုက္ခသည် စခန်းမှာ သီတင်းသုံး နေထိုင်ပါတယ်။
အရှင်ပညာသာမိ ဆိုလည်း နို့ဖိုး ဒုက္ခသည် စခန်းမှာ သာသနာရောင် ထွန်းပြောင်ဖို့အတွက် ပရိပတ္တိလုပ်ငန်းတွေနဲ့ ဗုဒ္ဓရဲ့ တရားတော်တွေကို သာမန် လူတွေလည်း နားလည်နိုင်အောင် ဟောနိုင်ပြောနိုင်တဲ့ ဓမ္မစရိယ ဆရာတော် တပါးပါ။ သက်တော်အားဖြင့် ၂၅ နှစ်ရှိပြီး၊ ဝါတော် ၅ ဝါ ရှိပြီဖြစ်တဲ့၊ ငယ်ဖြူ ရဟန်းတော် ဖြစ်ပါတယ်။ တရားဟော ကောင်းခြင်းကြောင့် ဒကာ၊ ဒယိကာမတွေ ကြည်ညို ကိုးကွယ်မှုကို ခံရတဲ့ ရွှေဝါရောင် ကိုယ်တော်တပါး ဖြစ်ပါတယ်။ လူမျိုး၊ ဘာသာ၊ သာသနာအတွက် စွန့်လွှတ် အနစ်နာခံဖို့ အသင့်ရှိနေတဲ့ အရှင်ပညာသာမိဟာ၊ ဦးကေသရရဲ့ ညီအရင်း ဖြစ်ပြီး ရွှေဝါရောင်တုန်းက ဦးဂမ္ဘီရနဲ့ အတူ ရန်ကုန်၊ မန္တလေး စာသင်တိုက်တွေမှာ စုရုံးရေး တာဝန်ကို ကျေပွန်စွာ ထမ်းဆောင် ခဲ့ပါတယ်။ ပြည်တွင်းမှာ နအဖ ရန်ကြောင့် တောတောင်တွေထဲ ပုန်းအောင်းရင်း လွတ်မြောက် နယ်မြေကို ရောက်လာ ခဲ့တာပါ။
တတိယမြောက် ကိုယ်တော်ကတော့ အရှင်ကေသရိန္ဒ ဖြစ်ပြီး၊ ပြည်ပရောက် မျိုးချစ် ကျောင်းသားများအဖွဲ့ - ONSOB မှ ကိုကျော်ကျော် ဖြစ်ပါ တယ်။ ၂၀၀၇ စက်တင်ဘာ တော်လှန်ရေးမှာ ပြည်တွင်းကို ပြန်ဝင်ခဲ့ပြီး ပြည်ပ မီဒီယာတွေနဲ့ ဆက်သွယ်မှုကြောင့် စစ်အစိုးရရဲ့ ဖမ်းဝရမ်း ထုတ်ခံရလို့ ထိုင်းနိုင်ငံဆီ ပြန်တိမ်းရှောင်လာတဲ့ ၉၆ ကျောင်းသား တဦး ပါ။ အခုတော့ သာသနာတော် အတွင်း ဝင်ရောက်ပြီး သာသနာ့ ဝန်ထမ်း ရှင်ရဟန်းအဖြစ်နဲ့ နို့ဖိုး ဒုက္ခသည် စခန်းထဲက ဗုဒ္ဓဝိဟာရ ကျောင်းတော်မှာ သီတင်းသုံး နေထိုင်တော်မူပါတယ်။
နို့ဖိုး ဒုက္ခသည် စခန်းမှာရှိတဲ့ ဒုက္ခသည်တွေဟာ စခန်းအုပ်ချုပ်သူ ပလပ်ရဲ့အောက်မှာ နေထိုင်ကြ ရပါတယ်။ ငြိ်မ်းချမ်းရေး လမ်းလျှောက်မယ့် သတင်းနဲ့ အစီအစဉ်ကို သယ်လာတဲ့ ဦးကေသရဟာ စခန်းကို ရောက်တယ်ဆိုရင်ပဲ သူယူလာတဲ့ သတင်းကို လျှို့ဝှက်စွာ သံဃာတော်တွေနဲ့ တိုင်ပင်ညှိနှိုင်း၊ စခန်းအုပ်ချုပ်သူ ပလပ် မသိအောင် စီစဉ် ပါတော့တယ်။ ဆက်လက် လုပ်ဆောင်ဖို့ ကိစ္စတွေကို ဦးကေသရိန္ဒနဲ့ လွှဲအပ်ပြီး မဲဆောက်မြို့ဆီ ပြန်လည် ကြွရောက် သွားခဲ့ပါတယ်။ တကယ်လို့ နို့ဖိုး စခန်းမှာရှိတဲ့ သံဃာတော်တွေ လမ်းလျှောက်ပွဲမှာ မေတ္တာပို့ လမ်းလျှောက်ဖို့ လာရင် နေရေးထိုင်ရေး အဆင်ပြေအောင် စီစဉ်ဖို့အတွက် မဲဆောက်ကို ပြန်ကြွ သွားခဲ့ပါတယ်။ ဦးကေသရ ပြန်ကြွသွားပြီး နောက် ဦးပညာသာမိနဲ့ ဦးကေသရိန္ဒတို့ဟာ ကျောင်းတိုက် အသီးသီးမှာရှိတဲ့ သံဃာ ခေါင်းဆောင်တွေကို မဲဆောက် မှာရှိတဲ့ ဦးဆောင် သံဃာအရှင် သောပါကနဲ့ အချိတ်အဆက် မိအောင် ဆက်သွယ် ဆောင်ရွက် ပေးပါတယ်။
အရှင်သောပါကရဲ့ နို့ဖိုး မှာရှိတဲ့ သံဃာတော်တွေကို လျှောက်ထားချက်က စက်တင်ဘာ ရွှေဝါရောင် တော်လှန်ရေး ၂ နှစ်ပြည့် အထိမ်းအမှတ် အဖြစ် မဲဆောက်မြို့မှာ ငြိမ်းချမ်းရေး လမ်းလျှောက်ပွဲ လုပ်မယ့်အကြောင်း ရွှေဝါရောင် စိတ်ဓာတ်တွေ ဆက်လက် ရှင်သန်စေဖို့နဲ့ မငြိ်မ်းချမ်း သေးတဲ့ မြန်မာပြည်မှာ သာယာမှုတွေရအောင် ပြည်သူလူထုကို နှိပ်စက်နေတဲ့ နအဖ စစ်ကျွန်အောက်က လွတ်မြောက်စေဖို့အတွက် သံဃာတော်တွေရဲ့ မေတ္တာ ဖြန့်ဝေချင်ပါတယ်။ အရှင်ဘုရားတို့အနေနဲ့ လာရောက် ပါဝင်ကြမယ်ဆိုရင် တပည့်တော်တို့အနေနဲ့ တတ်စွမ်းသမျှ ကူညီပါမယ်လို့ လျှောက်ထား ပါတယ်။ သံဃာတော်တွေရဲ့ လုံခြုံရေးကိုတော့ သူ့အနေနဲ့ မယူပေးနိုင်ကြောင်းနဲ့ ပြောသင့်ပြောထိုက်တဲ့ ပုဂ္ဂိုလ်တွေကိုတော့ ပြောထားဆိုထားတဲ့ အကြောင်း ထပ်မံ လျှောက်ထား သွားပါတယ်။
ဒုက္ခသည် စခန်းအတွင်း နေထိုင်ကြတဲ့ လူ၊ ရဟန်းတို့ ဆိုတာ စခန်းအုပ်ချုပ်သူ ပလပ်ရဲ့အောက်မှာ နေရတာပါ။ ဆန္ဒပြ တာ မပြောပါနဲ့၊ စခန်းအတွင်းမှာ ရှုပ်ရှုပ် ယှက်ယှက်တောင် လက်မခံပါဘူး။ မဲဆောက်အထိ သွားဖို့ထက် စခန်းအပြင် ဝန်းနံရံ ဘေးကပ်ပြီး အညောင်းပြေ အညာပြေ လမ်းလျှောက်ရင်တောင် ဖမ်းပါတယ်။ ကိစ္စကြီးငယ်ရှိလို့ မဲဆောက်ကို သွားမယ်ဆိုရင် ပလပ်မှာ ခရီးသွားလာခွင့် လက်မှတ် ကြိုတင် တင်ရပါတယ်။ သူတို့ ခွင့်ပြုရင်တော့ သွားခွင့်ရပြီး (၇) ရက် ပြင်ပမှာ နေထိုင်ခွင့် ရပါတယ်။ ကိုယ်တော်တွေ မဲဆောက်သွားပြီး ဆန္ဒပြဖို့ ဆိုတာ မလွယ်တဲ့ ကိစ္စပါ။ ဝါတွင်းကြီး ဖြစ်နေတော့ ခွင့်ပြုချက် ယူဖို့ ဆိုတာကလည်း မဖြစ်နိုင်ပါဘူး။ ဆန္ဒပြဖို့ သွားတယ်ဆိုတာ သိရင် စခန်းက နှင်ထုတ်ပြီး မြန်မာပြည်ဘက် ပြန်ပို့ ခံရဖွယ် ရှိပါတယ်။
ဒုက္ခသည် စခန်းမှာ နေကြတယ် ဆိုပေမယ့် ယာယီ ဒုက္ခသည် အဆင့်မှာသာ ရှိကြပြီး ဒုက္ခသည် အစစ် မဖြစ်သေးတာ ကြောင့် တခုခုဖြစ်လို့ မြန်မာပြည် ပြန်ပို့မယ်ဆိုရင် ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး UNHCR ကလည်း လာရောက် ကူညီနိုင်မှာ မဟုတ်ပါဘူး။ မဲဆောက်အထိ အသွားလမ်းခရီးမှာ စစ်ဆေးရေးဂိတ် ၇ ခုတောင် ရှိနေတာကြောင့် ကိုယ်တော်တွေအနေနဲ့ မဲဆောက်အထိ ရောက်ဖို့ ခရီးဟာ မဟာ စွန့်စားခန်းကြီး ဖြစ်ပါတယ်။ အဲဒီတော့ မဲဆောက်ကို ဖုန်းတွေဆက်ရင်း ကိုယ်တော်တွေ အလုပ်ရှုပ် နေကြပါတယ်။ ဦးသောပါကရဲ့ အကျိုးတော် ဆောင် ဒကာ ဦးလင်းကလည်း ရယ်ကာမောကာနဲ့ ဖုန်းထဲမှာ အားပေးရှာပါတယ်။ လမ်းလျှောက်ပွဲ အောင်မြင်ရင် သံဃာတော် တွေရဲ့ မေတ္တာကို မြန်မာပြည်နဲ့ အနီးကပ်ဆုံး ပြည်ထောင်စု တံတားကနေပြီး ပြည်သူလူထု အတွက် ပို့သနိုင် မှာပါတဲ့။ မအောင်မြင်ရင်တော့ အဖမ်းခံ ရနိုင်ဖွယ် ရှိတယ်ဆိုတဲ့ အကြောင်း၊ အခန့်မသင့်ရင် မြန်မာပြည် ပြန်ပို့ ခံရနိုင်တဲ့ အကြောင်း၊ ထောင်ကျမယ် ဆိုရင်လည်း ဘယ်ထောင်မှန်း မသိရဘဲ ရောက်သွားနိုင်တယ် ဆိုတဲ့ အကြောင်း၊ အဲဒါတွေက တဆင့် လွတ်ပြီး နို့ဖိုးစခန်း ပြန်ရောက်ရင်လည်း ဓာတ်ပုံတွေ၊ မီဒီယာတွေ၊ သတင်းတွေမှာ ပါသွားမှာ ဖြစ်တဲ့အတွက် စခန်းက နှင်ထုတ်ခံရဖွယ် ရှိကြောင်း၊ တတိယနိုင်ငံ သွားရောက်ဖို့ ကိစ္စလည်း ထိခိုက်သွား နိုင်ကြောင်း သတိပေး စကား ပြောပါတယ်။
ဘယ်လောက်ပဲ ခက်ပါစေ၊ ဘဝတွေရင်းပြီး ပေးဆပ်ရပါစေ၊ ဒကာ ဒါယိကာမတွေ ကျွေးတဲ့ ထမင်းစားပြီး မြန်မာပြည် ကြီး မငြိမ်းချမ်းတာကို ငြိမ်းချမ်းစေဖို့ အတွက် လူအချင်းချင်း နှိပ်စက်ခြင်း ကင်းဝေးကြစေဖို့ အတွက် မေတ္တာတွေ ပို့လွတ်ဖို့ သံဃာ့ဇာနည် ၃ ပါး နို့ဖိုးစခန်း ကနေပြီး ငြိမ်းချမ်းရေး ခရီးစဉ်ကို စတင်လိုက် ကြပါတယ်။ ကမ္ဘာမြေကြီး ငြိမ်းချမ်းဖို့၊ မြန်မာပြည်ကြီး ငြိမ်းချမ်းဖို့ အတွက် ဆုတောင်းမဲ့ သူတို့ရဲ့ မေတ္တာ စွမ်းအင်တွေက ဘယ်လို အတားအဆီး မျိုး၊ အန္တရာယ်မျိုးကိုမှ ဂရုမစိုက် ကြတော့ပါဘူး။ ဖြစ်ချင်ရာ ဖြစ်စမ်း။ အမျိုး၊ ဘာသာ၊ သာသနာ အတွက် ငါတို့ လုပ်နိုင်တာ ဒါပဲရှိတယ်။ တို့မေတ္တာစွမ်း ကမ္ဘာလွှမ်းပြီး ငြိမ်းချမ်းဖို့ အတွက် ငါတို့ လမ်းလျှောက်မယ်လို့ ယတိပြတ် ဆုံးဖြတ်ကြရင်း မဲဆောက်ခရီးကို တောလမ်းကနေ လမ်းလျှောက် ချီတက် သွားကြ ပါတော့တယ်။
ဦးပညာသာမိ၊ ဦးကေသရိန္ဒနဲ့ နောက်ဆုံး ပါဝင် ပူးပေါင်းခဲ့တဲ့ ဦးကဝိန္ဒတို့ဟာ တပါး၊ တလမ်းစီ သွားခဲ့ကြရင်း မဲဆောက်မြို့မှာ အသင့် စောင့်ကြို နေကြတဲ့ ကမ္ဘာ့ငြိမ်းချမ်းရေးနေ့နဲ့ စက်တင်ဘာ ၂ နှစ်ပြည့် လမ်းလျှောက်ပွဲကို အောင်မြင်စွာ ဦးဆောင်မယ့် အရှင်သောပါကနဲ့ နို့ဖိုး စခန်းက ဦးကေသရတို့ ပေါင်းစည်းနိုင် လိုက်ကြပြီး၊ စက်တင်ဘာ ၂၁ ရက် လမ်းလျှောက်ပွဲကို မြန်မာ သံဃာတော်တွေ ဦးဆောင် ပါဝင်ခဲ့ပါတယ်။
သံဃာတော် အရှင်မြတ် ၁၂ ပါးနဲ့ နိုင်ငံရေး အဖွဲ့အစည်း အသီးသီးက ပုဂ္ဂိုလ်တွေ၊ မြန်မာ့ နိုင်ငံရေး စိတ်ဝင်စားသူ နိုင်ငံခြားသားတွေ၊ ထိုင်းလူမျိုး ကျောင်းသား/သူတွေရဲ့ လမ်းလျှောက်ရင်း ပို့သခဲ့ကြတဲ့ “လူအချင်းချင်း နှိပ်စက်ခြင်း ကင်းရှင်းကြပါစေ …. ဒို့မေတ္တာစွမ်း၊ ကမ္ဘာလွှမ်း ငြိမ်းချမ်းကြပါစေ“ ဆိုတဲ့ မေတ္တာတွေနဲ့၊ မေတ္တာသုတ် တရားတော် တွေရဲ့ အစွမ်း တန်ခိုးတော်တွေက ကမ္ဘာကြီးနဲ့တကွ မြန်မာ ပြည်သူတွေ စစ်ကျွန်စနစ်နဲ့ အာဏာရှင် အောက်ကနေ လွတ်မြောက် နိုင်ပါစေလို့ .. သူတို့နဲ့အတူ ကျနော်လည်း ဆန္ဒပြုရင်း ထိုင်းနိုင်ငံ နို့ဖိုး စခန်းအတွင်းမှာ နေထိုင်ကြတဲ့ အရှင် ၄ ပါးရဲ့ မေတ္တာစွမ်းအားဟာ လမင်းကြီး ၄ စင်းပမာ မြန်မာပြည်သူတွေနဲ့ ကမ္ဘာကိုပါ မေတ္တာ အလင်းဓာတ်တွေ ဖြန့်ဝေ ပေးနိုင်ခဲ့ပါပြီ။
အရှင်မြတ်တို့ဟာ ပူပြင်းလှတဲ့ နေရောင်အောက်မှာ ၆ နာရီကြာ မေတ္တာပို့ လမ်းလျှောက်ခဲ့တဲ့ မြင်ကွင်းဟာ တပည့် တော်တို့ ရင်ထဲ၊ နှလုံးသားထဲမှာ သံဃာ့ဇာနည်တွေ အဖြစ် ကဗ္ဗည်းကျောက်စာ ရေးထိုးရင်း၊ ဒီ ချိုးဖြူသံလွင် ခရီးနှင် ဆောင်းပါးနဲ့ သဒ္ဒါရိုကျိုး လက်စုံမိုးပြီး ရှစ်ခိုးဦးခိုက် လိုက်ပါတော့တယ်။
No comments:
Post a Comment