သျှမ်းပြည် (မြောက်ပိုင်း) နမ့်ခမ်းမြို့နယ်တွင် ဒေသခံ စစ်တပ် ရဲနှင့် ပြည်သူ့စစ်အဖွဲ့များက ဒေသထွက်ကုန် သယ်ဆောင် သည့် ထော်လာဂျီယာဉ်များထံမှ ငွေတောင်းယူမှုများ ရှိနေကြောင်း ဒေသခံများအဆိုအရ သိရသည်။ထင်း မီးသွေး လက်ဘက်ခြောက် နှင့် ဆန်ကဲ့သို့သော ကုန်များကို ဒေသအတွင်း ထော်လာဂျီယာဉ်ဖြင့် သယ်ဆောင်ရာတွင် လမ်းကြောင်း တစ်လျှောက်ရှိ နအဖလုံခြုံရေးဂိတ်တာဝန်ကျ အဖွဲ့များက ငွေတောင်းခြင်းဖြစ်သည်။
နမ့်ခမ်း - မုံးဝီး လမ်းကြောင်းတစ်လျှောက်တွင် လက်နက်ကိုင်လုံခြုံရေး ဂိတ် ၃ ခုရှိပြီး ငွေတောင်းသည့်အဖွဲ့ ၁၀ ဖွဲ့ခန့်ရှိ ကြောင်း ဒေသခံတစ်ဦးက သျှမ်းသံတော်ဆင့်သို့ ပြောသည်။
နမ့်ခမ်းမြို့နှင့် မုံးဝီးကြားတွင် ကျေးရွာ ၈ ရွာခန့်ရှိပြီး မုံးဝီးမှဆက်ထွက်လျှင် မိုးမိတ်မြို့နယ်သို့ ပေါက်ရောက်ကြောင်း သိရသည်။
နမ့်ခမ်းကနေစထွက်ရင် မုံးဝီးအထိ ရွာ ၈ ရွာလောက်ရှိတယ် ကြားထဲမှ ပန်ဆေးပြည်သူ့စစ် ပလောင်ပြည်သူ့စစ်ရဲ သစ်တော အဲဒီအဖွဲ့တွေထိုင်တဲ့ ဂိတ်က ၃ ဂိတ်ရှိတယ် လမ်းမှာကျတော့ သူတို့ကိုယ်တိုင်မတောင်းဘူး တခြားလူတွေ ကိုတောင်းခိုင်းတယ် မပေးရင် နောက်မှာရဲတွေခေါ်လာတယ် အဲလိုလုပ်တယ်” ဟု သူက ဆိုသည်။
နမ့်ခမ်းမှ မုံးဝီးအထိ ကြားတွင် မန့်အင်၊ နမ့်တီး၊ လွယ်အင်ကန်၊ ဟိုပုံ၊ နမ့်မ ၊ငါးလုံ ၊ကောင်းကတ် နှင့် မန့်ကြတ် ရွာများရှိပြီး မန့်အင် ၊ လွယ်အင်ကန် ၊ ကောင်းကတ်ရွာများတွင် လုံခြုံရေးဂိတ်များရှိကြောင်း သိရသည်။
“ကားကြီးရင်များများကောက်တယ် သေးရင်နည်းနည်းကောက်တယ် ထင်းတင်တဲ့ထော်လာဂျီတစ်စီးဆို ကျပ် ၂၀၀ ကနေ ၅၀၀ အဲလိုကောက်တယ် မီးသွေးတင်ရင် တစ်သောင်းကျော်အထိ ပေးရတယ် ပြောတတ်ရင်နည်းနည်းပေးရတယ် မပြော တတ်ရင် များများပေးရတယ်” ဟု သူကဆိုသည်။
တောင်းသည့်ငွေမပေးပါက ဥပဒေနှင့်ခြိမ်းခြောက်၍ တောင်းယူကြောင်း သူက ဆက်ပြောသည်။ “ မပေးဘူးဆိုရင် ခင်ဗျား တို့မပေးလည်းရတယ် ရဲစခန်းကိုမောင်းသွားလိုက် အမှုစွဲမယ်လို့ ခြိမ်းခြောက်တယ်” ဟု ဆိုသည်။
မြန်မာနိုင်ငံတွင် နအဖစစ်အာဏာပိုင်များသည် စစ်တပ် ရဲ ပြည်သူ့စစ် စသည့်လက်နက်ကိုင်တပ်ဖွဲ့ မျိုးစုံကို တိုးချဲ့ဖွဲ့စည်း နေသော်လည်း အဆိုပါတပ်ဖွဲ့ဝင်များအတွက် ကျပ် ၃၀၀၀၀ ၀န်းကျင်သာ အခြေခံလစာအနေဖြင့် ထောက်ပံ့ပေးလျှက်ရှိရာ နေထိုင်စားသောက်စားရိတ်အတွက် ကိုယ့်နည်းကိုယ့်ဟန်နှင့် ဖြေရှင်းနေရကြောင်း သိရသည်။
No comments:
Post a Comment