- နှောင်းလှိုင်
ထိုင်း-မြန်မာနယ်စပ်ရှိ ကရင်နီဒုက္ခသည် အမှတ် ၂ စခန်းသို့ ထွက်ပြေးရောက်ရှိလာသော အမှတ် ၂ ခရိုင်မှ ရွာပုန်းရွာရှောင်အိုင်ဒီပီ လူသစ်များသည် များသောအားဖြင့် အဆုတ် (ခေါ်) တီဘီရောဂါ အဖြစ်များကြသည်ဟု စခန်းအုပ်ချုပ်ရေးက ပြောသည်။
“ကျနော်တို့ ခရိုင် ၂ မှာ နေရတဲ့ လူထုရဲ့ ရွာရှောင်တွေ တောထဲမှာ ပုန်းနေရတာလေ။ သူတို့ ခမျာ မိုးတွင်းမှာ အအေးဒဏ် ခံနေရတယ်။ အိပ်တော့လည်း မြေပေါ်မှာ။ အဲတော့ အဲဒီ ရာသီဥတုကြောင့် သူတို့ခမျာ အဆုတ်မှာ ပြသာနာ ဖြစ်တယ်။ နောက် တချို့ကလည်း ဒီမော်ချီးဒေသမှာဆို ခဲတွင်းမှာ အလုပ်လုပ်တဲ့ လူတွေ ရှိတယ်။ ခဲတွင်းအလုပ်လုပ်တယ်ဆိုတာ ယမ်းတွေ ဘာတွေ ခွဲရတယ်။ နောက်တခါ မိုးထဲရေထဲ၊ နောက် ဒီခဲတူးတဲ့ ချိန်မှာ လှိုင်ခေါင်းထဲမှာ နေရတယ်။ လေမသန့်ဘူး။ ဒီကျောက်အငွေ့တွေ ရှူရတဲ့ဟာက ကျနော် ထင်တယ်။ ဒီအဆုတ်ကို သွားထိခိုက်တယ်။ အဲဒီ အကြောင်းကြောင့် ကျနော်တို့ဆီမှာ တီဘီရောဂါသည်တွေ များတယ်” ဟု အမှတ် ၂ စခန်း အုပ်ချုပ်ရေးမှ ဥက္ကဌ ဒေါ်နယ်က ရှင်းပြသည်။အမှတ် ၂ စခန်းတွင် တီဘီရောဂါ ဖြစ်ပွားသော လူဦးရေသည် ၂၀၀၇-၀၈ ခုနှစ်အတွင်းတွင် ၈ ဦး ရှိပြီး ၂၀၀၉ ခုနှစ်တွင် ကူးစက်ခံရသူ ၇ ဦးထဲမှ ၆ ဦးမှာ လူသစ်များ ဖြစ်သည်။ အလားတူ ယခုနှစ်အတွင်းတွင် တီဘီရောဂါရှိသူ ၆ ဦးအနက် ၅ ဦးမှာ လူသစ်များ ဖြစ်သည်ဟု ဆေးမှူးတာဝန်ခံတဦးက ပြောသည်။
တလနှစ်လအတွင်းမှာ အခု ၃ ယောက်ရှိ လူသစ် ၃ ယောက်လုံးပဲ။ သူတို့ ရွာကတည်းက ဖြစ်တာ။ ဒီမှာ လာရင်းနဲ့ ဖောက်တာနဲ့ ချက်ချင်းပေါ်တယ်” ဟု အမှတ် ၂ စခန်းမှ ဆေးမှူးတာဝန်ခံ ဆာလယ်ထူးက ပြောသည်။
တီဘီရောဂါ ကူးစက်ခံရသူများသည် ညအိပ်ချိန်တွင် ချွေးထွက်ခြင်း၊ ချောင်းဆိုးခြင်း၊ သလိပ်တွင် သွေးများ ပါဝင်ခြင်းနှင့် ရင်ဘတ် နာကျင်ခြင်း စသည့်တို့ ခံစားရပြီး ဆေးကုသမှု မပြုလုပ်ပါက တပါးလူများကိုပါ ကူးစက်သွားနိုင်သည့်အပြင် အသက်လည်း ဆုံးနိုင်သည်ဟု ဆေးမှူးတာဝန်ခံက ဆက်ပြောသည်။
ထိုလူသစ်များသည် တီဘီရောဂါ ဖြစ်ပွားနေသည့်အပြင် ကင်ဆာရောဂါလည်း အဖြစ်များကြသည်ဟု သိရသည်။ ၂၀၀၈-၀၉ ခုနှစ်တွင် ကင်ဆာရောဂါ လက္ခဏာရှိသူ ၈ ဦးအနက် ၆ ဦးမှာ လူသစ်များ ဖြစ်ပြီး ယခုနှစ်တွင် ၄ ဦးအနက်၂ ဦးမှာ လူသစ်များ ဖြစ်သည်။
ကရင်နီပြည် အမှတ် ၂ ခရိုင်ရှိ ဖာဆောင်းမြို့နယ်မှ ရွာပုန်းရွာရှောင် အိုင်ဒီပီ ၅၀၀ ကျော်သည် ယခုနှစ်အတွင်းတွင် ဒုက္ခသည် အမှတ် ၂ စခန်းသို့ ထွက်ပြေးရောက်ရှိလာခဲ့ကြသည်။
No comments:
Post a Comment