Tuesday, June 15, 2010

နိုင်ငံရေးထက် ကမ္ဘာ့ဖလားဘောလုံးပွဲကို ရန်ကုန်လူထု စိတ်ဝင်စား

တက်လူ / ၁၅ ဇွန် ၂၀၁၀

ရန်ကုန်တွင် နိုင်ငံရေးပါတီများ မဲဆွယ်စည်းရုံးနေမှုကို ကမ္ဘာ့ဖလား ဘောလုံးပွဲလောက် အများပြည်သူက စိတ်မ၀င်စားကြကြောင်း မြို့ခံများက ပြောသည်။

ဇွန်လ (၁၁) ရက်မှ စတင်ကာ တောင်အာဖရိကနိုင်ငံတွင် ကမ္ဘာ့ဖလားဘောလုံးပြိုင်ပွဲများ ကျင်းပနေပြီး ဘောလုံးပွဲစဉ်များအား ကြည့်ရှုသူ ရန်ကုန်မြို့လူဦးရေများအနက် အသက် (၁၀) နှစ်ကျော်မှ အသက် (၇၀) ကျော်အရွယ်များအထိ အားပေးကြည့်ရှုနေကြသည်။

“အမှန်ကိုပြောရရင် ဘယ်သူမှ မဲဆွယ်စည်းရုံးတာကို စိတ်မ၀င်စားဘူးဖြစ်နေတယ်။ ဟောပြောစည်းရုံးရတာကလည်း ပြည်သူတွေကိုပဲ အခြေခံတာလေ။ ပြည်သူက ရှင်းရှင်းပြောရရင် စားဝတ်နေရေးကြောင့် အခု ကမ္ဘာ့ဖလားကို လောင်းပြီးတော့ စီးပွားရှာသူရှာ၊ ရှုံးသူတွေကလည်း ရှုံးနေတော့ ပါတီတွေ စည်းရုံးဟောပြောတာကို စိတ်ဝင်စားတဲ့သူမရှိဘူး” ဟု ၀ါရင့် နိုင်ငံရေးသမားဟောင်းတဦးက ပြောသည်။

ပြီးခဲ့သည့် ဇွန် (၁၂) တွင် ၈၈ မျိုးဆက်ကျောင်းသားလူငယ်များ (ပြည်ထောင်စုမြန်မာနိုင်ငံ) ပါတီက ရန်ကုန်မြို့ အင်းစိန်လမ်းမကြီး ဆင်ရေတွင်းမှတ်တိုင်းအနီး ကမာရွတ်မြို့နယ်တွင် ပါတီရုံးခန်းဖွင့်လှစ်ခဲ့ပြီး ပါတီခေါင်းဆောင်တဦးဖြစ်သူ ဦးအေးလွင်က ပြည်သူတို့အား ဟောပြောမှု ပြုလုပ်ခဲ့သည်။

၎င်းတို့က ရန်ကုန်မြို့တွင်း ပါတီအလံများကို ကားပေါ်တွင် စိုက်ထူကာ လှည့်လည်ခဲ့သည့်အတွက် အများပြည်သူတို့က အမျိုးသားဒီမိုကရေစီအဖွဲ့ချုပ်က ဆန္ဒပြနေသည်ဟူသော သတင်းများ ရန်ကုန်မြို့တွင် ထွက်ပေါ်ခဲ့သေးသည်။

“ဒီကောင်တွေက ပုံမှားရိုက်နေတာလေ။ ဒီလိုပဲ သူတို့က ၈၈ မျိုးဆက်ကျောင်းသားတွေပုံမျိုးနှင့် ပြည်သူတွေကို မဲဆွယ်ကြတာ။ လူတွေကတော့ ပါတီတွေကို စိတ်မ၀င်စားပေမယ့် ဘယ်ပါတီက ဘယ်လို လူတွေပဲဆိုတာ သိကြတယ်” ဟု ၀ါရင့် သတင်းစာဆရာတဦးက ပြောသည်။

၈၈ မျိုးဆက်ကျောင်းသားလူငယ်များ (ပြည်ထောင်စုမြန်မာနိုင်ငံ) ပါတီအလံကို အောက်ခံအနီရောင်နှင့် ခွပ်ဒေါင်းပုံကို အသုံးပြုထားသည့်အတွက် ကျောင်းသားသမဂ္ဂအလံကို အတုခိုးသည်ဟု စာပေနယ်မှ ပုဂ္ဂိုလ်များအပါအ၀င် (၇၂) ဦးက ရွေးကောက်ပွဲကော်မရှင်သို့ ကန့်ကွက်ကြသဖြင့် ပြန်လည်ပြင်ဆင်ရန် ရွေးကောက်ပွဲကော်မရှင်က အကြောင်းကြားရာ အရွယ်တူ ကြယ်ဖြူ (၁၄) လုံးကို အပေါ် (၇) လုံး အောက် (၇) လုံးတန်းကာ အလယ်တွင် ခွပ်ဒေါင်းကို ထားရှိပြီး အလံကို ပြောင်းလဲလိုက်ခြင်းဖြစ်သည်။

ကမ္ဘာ့ဖလားဘောလုံးပွဲကြောင့် လူငယ်များလည်း ပါတီကိစ္စထက် ဘောလုံးပွဲလောင်းရေးကို ဦးတည်နေကြကြောင်း အသက် (၂၃) နှစ်အရွယ်ရှိ နည်းပညာတက္ကသိုလ် ကျောင်းသားတဦးက ပြောသည်။

၎င်းက “ဒီအချိန်မှာ ကျနော်တို့လို လူငယ်တွေအတွက် စိတ်ကို ဘောလုံးပွဲမှာပဲ အချိန်ပေးထားတယ်။ ၀ါသနာလည်းပါတယ်လေ။ ဘယ်ပါတီတွေ ဘယ်လိုလုပ်မယ်ဆိုတာကိုလည်း အရင်တခါလည်း အစိုးရက အိမ်တွေမှာ လာပြီးတော့ မဲပေးဖို့ ဆိုပြီးတော့ လူစာရင်းကောက်သွားတာပဲ။ အခုလည်း ဒီလိုနေမှာပေါ့။ ကျနော်တို့က ဘယ်သူနိုင်နိုင် ဘာမှမထူးဘူး” ဟု ပြောသည်။

ဘောလုံးပွဲကို လူငယ်များသာမက နာမည်ကြီး စီးပွားရေးလုပ်ငန်းရှင်များ၊ စာပေနှင့် စာနယ်ဇင်းသမားများ၊ သတင်းထောက်များ၊ ကျောင်းသားများအပါအ၀င် အရွယ်ပေါင်းစုံ အလွှာပေါင်းစုံက ကြည့်ရှုနေကြပြီး လောင်းကစားမှုများကိုပါ ပြုလုပ်နေကြကြောင်း ရန်ကုန် ပုဇွန်တောင်မြို့နယ်မှ လောင်းကစား ဒိုင်ကြီးတဒိုင်က ပြောသည်။ ကမ္ဘာ့ဖလားဘောလုံးပွဲသည် ဇွန်လ (၁၁) ရက်မှ ဇူလိုင်လ (၁၁) ရက်နေ့ထိဖြစ်သည်။

ယခုအခါ ပါတီတည်ထောင်ခွင့်များ လျှောက်ထားသော ပါတီ (၄၂) ပါတီဖြစ်ပြီး နိုင်ငံရေးပါတီ မှတ်ပုံတင်ခွင့် လျှောက်ထားသောပါတီ (၃၃) ပါတီတွင် (၃၂) ပါတီကို မှတ်ပုံတင်ခွင့်ပြုခဲ့ပြီးဖြစ်ကြောင်း ရွေးကောက်ပွဲကော်မရှင် စာရင်းများအရ သိရသည်။

ရန်ကုန်တွင် ပါတီရုံးခန်းများဖွင့်ကာ မဲဆွယ်စည်းရုံးနေကြသော ပါတီများမှာ ၈၈ မျိုးဆက်ကျောင်းသားလူငယ်များ (ပြည်ထောင်စုမြန်မာနိုင်ငံ)၊ မတူကွဲပြားခြင်းနှင့် ငြိမ်းချမ်းရေးပါတီ၊ ပြည်ထောင်စုဒီမိုကရေစီပါတီ၊ ရခိုင်တိုင်းရင်းသားများတိုးတက်ရေးပါတီတို့ ဖြစ်ကြသည်။

No comments: