ABC
မြန်မာနိုင်ငံ ပြန်ကြားရေးဝန်ကြီးဌာနကရေးဆွဲတင်ပြထားတဲ့ ပုံနှိပ်ခြင်းနဲ့ ထုတ်ဝေခြင်းဥပဒေကြမ်းကို ကန့်ကွက်မှုတွေရှိနေတဲ့ကြားကပဲ ပြည်သူ့လွှတ်တော်ကအတည်ပြုလိုက်ပြီဖြစ်ပါတယ်။
မြန်မာနိုင်ငံကစာနယ်ဇင်းအဖွဲ့အစည်းတွေ၊ သတင်းသမားတွေက သတင်းနဲ့စာနယ်ဇင်း လွတ်လပ်ခွင့် ကို ထိန်းချုပ်တဲ့အချက်အလက်တွေ ပါဝင်နေတယ်ဆိုပြီး ဒီဥပဒေကြမ်းကို ကန့်ကွက်ထားကြပေမယ့် ဇူလှိုင်လ ၄ရက်နေ့က နေပြည်တော်မှာကျင်းပတဲ့ ပြည်သူ့လွှတ်တော် အစည်းအဝေးမှာ အတည်ပြု လိုက်တာ ဖြစ်ပါတယ်။ ဒီဥပဒေမူကြမ်းကို ဖေဖော်ဝါရီလ ၂၇ရက်နေ့က အစိုးရသတင်းစာတွေမှာ ဖော်ပြခဲ့ပါတယ်။
သတင်းမီဒီယာသမားတွေအားလုံး ကန့်ကွက်နေတဲ့ကြားက လွှတ်တော်မှာ အတည်ပြုခဲ့တာနဲ့ ပတ်သက်ပြီး ပြည်သူ့လွှတ်တော်ကိုယ်စားလှယ် ဦးဖြိုးမင်းသိမ်းက အခုလို ပြော ပါတယ်။
“ဒီနေ့ကျနော်တို့ စာနယ်ဇင်းထုတ်ဝေမှုနဲ့ ပတ်သက်တဲ့ ဥပဒေတရပ် လွှတ်တော်မှာ အတည်ပြုပါတယ်၊ ဒီကိစ္စနဲ့ ပတ်သက်ပြီး ၀န်ကြီးဌာနနဲ့ အားကစားအနုပညာ ယဉ်ကျေးမှုနဲ့ ပြည်သူလူထုရေးရာ ကိစ္စရပ်တွေနဲ့ ပတ်သက်တဲ့ ရေးရာကော်မတီတွေရဲ့ကြားထဲမှာ ဆွေးနွေးပြီးတော့မှ ဒီဥပဒေကို အတည်ပြုတာပါ။”
အဆိုပါဥပဒေကြမ်းနဲ့ ပတ်သက်ပြီး ၀န်ကြီးဌာနတွေနဲ့ ဥပဒေကြမ်းကော်မတီတို့ ပြင်ဆင်ဖြည့်စွက် ချက်တွေ ပြုလုပ်ပြီးမှ လွတ်တော်မှာအတည်ပြုခဲ့တာလို့ လည်း ဦးဖြိုးမင်းသိမ်းက ဆက်ပြောပါတယ်။
“ဖြည့်စွက်တဲ့အပိုင်းတွေမှာတော့ အဓိကက စာနယ်ဇင်းလွတ်လပ်ခွင့်တွေနဲ့ ပတ်သက်ပြီး ထိန်းချုပ် ထားတဲ့အပိုင်းတွေနဲ့ ပတ်သက်တဲ့ တော်တော်များများကို ၀န်ကြီးဌာနနဲ့ အကြိမ်ကြိမ်ဆွေးနွေးပြီးမှ ဒီဥပဒေကို စိစစ်ကြတာပါ။”
အခုလွှတ်တော်ကအတည်ပြုလိုက်တဲ့ ဥပဒေကြမ်းထဲက ဖွဲ့စည်းပုံဥပဒေအရ ပြဌာန်းထားချက်တွေ ကို ဖောက်ဖျက်ပြီး ရေးသားမှုနဲ့ ပတ်သက်တဲ့ ပြဌာန်းချက်တွေကို ပယ်ဖျက်ခဲ့သလို၊ ထုတ်ဝေ စာနဲ့ပတ်သက်ပြီး ဥပဒေချိုးဖာက်မှုရှိတယ်လို့ယူဆရင် ရပ်ဆိုင်းခွင့်ရှိပြီး ထုတ်ဝေသူဘက်က သက်ဆိုင်ရာပြည်နယ်တိုင်း လွှတ်တော်မှာ တရာရုံးအဆုံးအဖြတ်ပေးဖို့ လျောက်ထား နိုင်တဲ့အကြောင်းနဲ့ တရားစွဲဆိုချင်တိုင်း စွဲဆိုလို့မရနိုင်အောင် စည်းကမ်းချက်တွေ သတ်မှတ်ပြီး ပြည်သူ့လွှတ်တော်က ပြင်ဆင်ပေးခဲ့တယ်လို့ ပြောပါတယ်။
ဥပဒေကြမ်းကို အမျိုးသားလွှတ်တော်မှာ ဆွေးနွေးနိုင်ဖို့ ဆက်လက်ပေးပို့ သွားမှာဖြစ်ပြီးတော့ အဲဒီကနေတဆင့် ပြည်ထောင်စုလွှတ်တော်က အတည်ပြုပြီးနောက် တရားဝင်ဥပဒေဖြစ်ပေါ် လာနိုင်ဖို့ အတွက် နိုင်ငံတော်သမ္မတရဲ့ အတည်ပြုချက် ရယူရမှာဖြစ် တယ်လို့ ဦးဖြိုးမင်းသိမ်းကပြောတဲ့ အကြောင်း ရေဒီယိုသြစတြေးလျသတင်းထောက် မြတ်မိုးက သတင်းပေးပို့ ခဲ့ပါတယ်။
No comments:
Post a Comment