Thursday, July 25, 2013

အစိုးရ တပ်ဖွဲ့၏ နယ်မြေ ရှင်းလင်းရေး ပေါ်လစီ နှင့် မွန်ပြည်သစ်ပါတီ

အဲာပိုန်

မွန်ပြည်သစ် ပါတီ (NMSP) ၏ တနင်္သာရီတိုင်း၊ မြိတ်ခရိုင် တပ်ဖွဲ့ကို ၀င်တိုက် ခဲ့သော အစိုးရ၏ အမှတ်(၂၀) စစ်ဆင် ရေး ကွပ်ကဲမှု ဌာနချုပ် လက်အောက်ခံ တပ်များသည် ဇူလိုင် (၁၆) ရက်နေ့တွင် NMSP စခန်းကို တိုက်ခိုက် သိမ်းပိုက်ပြီး (၆) ရက်ကြာ နယ်မြေ ရှင်းလင်း ပြီးနောက် ဇူလိုင် (၂၂) ရက်နေ့ အပြန် ခရီးတွင် သုမင်္ဂလံ ကျေးရွာအား မီးရှို့ ဖျက်ဆီး ခဲ့ကြောင်း NMSP ၏ နယ်မြေခံ တပ်မှူး တမော့ချမ်းက ဆိုပါသည်။

“ ဇူလိုင် (၁၆) ရက်နေ့မှာ သူတို့က စခန်းကို တက်သိမ်းတယ်။ မှားပြီး တိုက်မိတာ ဖြစ်တယ်လို့ ဆိုတယ်။ ကျနော်တို့က အဖြစ်မှန် ဖေါ်ထုတ်ပေးဖို့ သက်ဆိုင်ရာကို အဆင့်ဆင့် တင်ပြတယ်။ ဒါတောင် ဇူလိုင် (၂၂) ရက်နေ့အထိ နေပြီးတော့ ပြန်ခါနီးမှာ သုမင်္ဂလံ ကျေးရွာကို မီးရှို့ပြီးမှ (၂၃) ရက်နေ့ မနက်မှာ ဆုတ်သွား ကြတယ်လေ” ဟု ဆိုပါသည်။

အဆိုပါ တိုက်ခိုက် မှုသည်လည်း မွန်ပြည်သစ် ပါတီမှ ခွဲထွက်သွားသော ဗိုလ်မှူးကြီး ပန်းညွန့် ဦးဆောင်သော တပ်ဖွဲ့အား တိုက်ခိုက်ရန် ကြံရွယ်ထားရာက မှားယွင်း သွားသည်ဟု အကြောင်း ပြထား ပါသည်။ သို့သော် NMSP စခန်းနှင့် ဗိုလ်မှူးကြီး ပန်းညွန့်တို့ စခန်းသည် ကီလိုမီတာ (၄၀)ခန့် ကွာဝေးပါသည်။

ဤစစ်ဆင်ရေးကို အစိုးရ အမှတ် (၂၀) စစ်ဆင်ရေး ကွပ်ကဲမှု စစ်ဌာနချုပ် လက်အောက်ခံ ခမရ (၅၈၁)၊ ခလရ ၂၈၈၊ ခမရ ၂၂၄ နှင့် ခမရ ၅၉၇ တပ်ရင်း များမှ ထုတ်နှုတ် စုဖွဲ့ ထားသည့် အင်အား ၈၀ ခန့်က အင်အား (၄၀) ခန့် ရှိသော NMSP ရှေ့တန်း စခန်းငယ်ကို ၀င်ရောက် တိုက်ခိုက် ခဲ့ခြင်း ဖြစ်ပါသည်။

မီးရှို့ ဖျက်ဆီး ခဲ့သော သုမင်္ဂလံ ကျေးရွာသည် အိမ်ခြေ (၂၀) ခန့် ရှိပြီး၊ ယခု နှစ်ဆန်း ပိုင်းမှ တည်ထားသော ကျေးရွာဖြစ်ပါ သည်။ ဤကိစ္စ ဖြေရှင်း ပေးပါရန် NMSP သည် သမ္မတထံ တင်ပြ တောင်းဆို ခဲ့သည်ဟု ဆိုပါသည်။

မီးရှို့ ဖျက်ဆီး ခံလိုက်ရသော သုမင်္ဂလံ ကျေးရွာသည် ထိုင်း-မြန်မာ နယ်စပ်ဒေသ ထိုင်းတောင်ပိုင်း ပရာဂျွဇ်ခီရီခန်ခရိုင်ရှိ ဗာန်စဖန်နွဲ့နှင့် ဗာန်စဖန်ယိုင်း အကြား၌ တည်ရှိပြီး မြန်မာ နိုင်ငံ တနင်္သာရီတိုင်း မြိတ်ခရိုင် ဘုတ်ပြင်း မြို့နယ် အတွင်းရှိ ပြည်ကြီး မဏ္ဍိုင်၊ လေညာ ကျေးရွာ အထက် နယ်စပ် အနီးတွင် တည်ရှိပါသည်။

အစိုးရသည် အပစ်အခတ် ရပ်စဲထားသော အဖွဲ့များအား အခြေခံ နယ်မြေ သတ်မှတ်ပေးခြင်း မရှိပေ။ ဤသို့သတ်မှတ်မှု မပေးခြင်းသည် ယခုကဲ့သို့ လိုအပ်သလို ဖိအားပေးနိုင်ရန် ကြိုတင် စီစဉ် ထားခြင်းသာ ဖြစ်ကြောင်း၊ ဤကဲ့သို့သော လုပ်ရပ် မျိုးသည်၊ ရှမ်းပြည် ပြန်လည် ထူထောင်ရေး ကောင်စီ (RCSS) နှင့် ရှမ်းပြည် တိုးတက်ရေးပါတီ (SSPP) နယ်မြေများ တွင် အထူးသဖြင့် ကျင့်သုံး ခဲ့သည်ဟု အကဲခတ် များက ဆိုပါသည်။


အစိုးရ၏ နယ်မြေ ရှင်းလင်းရေး စစ်ဆင်မှုနှင့် ပတ်သက်ပြီး မွန်ပြည်သစ် ပါတီသည် ပြီးခဲ့သည့် ဇူလိုင်လ (၁၈) ရက်နေ့တွင် အရှေ့တောင်တိုင်း စစ်ဌာနချုပ်၊ မြန်မာ့ ငြိမ်းချမ်းရေး စင်တာနှင့် သက်ဆိုင်ရာ အားလုံးသို့ တင်ပြပြီး အဖြစ်မှန် ပေါ်ပေါက်ရေးကို ဖြေရှင်း ပေးရန် တောင်းဆိုခဲ့ပါသည်။ ဤကဲ့သို့ အဆင့်ဆင့် တင်ပြပြီး ဖြေရှင်း ပေးရန် တောင်းဆို နေချိန် တွင်ပင် အစိုးရ တပ်ဖွဲ့များသည် သုမင်္ဂလံ ကျေးရွာအား မီးရှို့လိုက်ခြင်း ဖြစ်ပါသည်။

No comments: