Thursday, July 25, 2013

တပြည်လုံး အတိုင်းအတာ ဆောင်သော တိုင်းရင်းညီလာခံ ဖြစ်မြောက်ရေး UNFC ပြင်ဆင်

ဖြူဖြူကို

တပြည်လုံး အတိုင်းအတာ ဆောင်သော တိုင်းရင်း ညီလာခံ တရပ်ကို ဇူလိုင် ၂၈ မှ ၃၁ ရက်နေ့အထိ ထိုင်းနိုင်ငံ တနေရာတွင် ရည်ရွယ်ချက် (၄) ချက်ဖြင့် ကျင်းပရန် ရှိကြောင်း ပြောရေး ဆိုခွင့် ရှိသူ UNFC တွဲဖက် အတွင်းရေးမှူး (၁) ပဒို မန်းမန်းက ဆိုပါသည်။

“ ပြည်တွင်းကရော နယ်စပ်ဒေသမှာ ရှိတဲ့ တိုင်းရင်းသား ပါတီတွေကိုရော ဖိတ်ခေါ်ထားပါတယ်။ တန်ိုင်ငံလုံး အတိုင်းအတာ အထိ အားလုံး ပါဝင် လာနိုင်အောင်တော့ ကြိုးစား လုပ်ဆောင် နေပါတယ်။ ကိုယ်စားလှယ်ပေါင်း (၁၅၀) လောက် ဖိတ်ခေါ်ထား ပါတယ်။ ကျင်းပတဲ့ နေရာ ကတော့ ဆွေးနွေးချိန် နီးလာမှ သတ်မှတ်မှာပါ။ CBO တွေလည်း ဖိတ်ထားတယ် အချိုးကျပေါ့” ဟု ဆိုပါသည်။

ထို့အပြင် နိုင်ငံရေး ပါတီ မဟုတ်သည့် တခြား တိုင်းရင်းသား အဖွဲ့များနှင့် ဒီမိုကရေစီ အင်အားစု များကိုပါ ဖိတ်ကြား ထားပါသည်။ အရေးကြီးသည့် ပြည်တွင်းရှိ ညီနောင် တိုင်းရင်းသား ပါတီများ ဖက်ဒရေးရှင်း (NBF) ၊တိုင်းရင်းသား လူမျိုးများ မဟာမိတ် အဖွဲ့နှင့် နိုင်ငံခြားရောက် တိုင်းရင်းသား တသီး ပုဂ္ဂလ ပညာရှင် များကိုပါ ဖိတ်ကြား ခဲ့ပါသည်။

တိုင်းရင်းသား ညီလာခံကို အခြေခံ အချက် (၄) ချက်ဖြင့် ကျင်းပမည် ဖြစ်ပါသည်။

(၁) တိုင်းရင်းသား စည်းလုံး ညီညွတ်ရေး ပိုမ်ို အားကောင်း လာစေရန်။


(၂) ငြိမ်းချမ်းရေးနှင့် နိုင်ငံရေး ဆိုင်ရာ ဘုံသဘော တူညီချက် ရရှိစေရန်။

(၃) တိုင်းရင်းသား တော်လှန်ရေး အင်အားစုများ၊ လူထု အခြေပြု အဖွဲ့အစည်းများနှင့် နိုင်ငံရေး ပါတီ အင်အားစုများ ဆက်စပ် ပူးပေါင်း ဆောင်ရွက်မှု အားကောင်း လာစေရန်။

(၄) ဖက်ဒရယ် ပြည်ထောင်စု တည်ဆောက်ခြင်း ဖြစ်စဉ်နှင့် လုပ်ငန်း စဉ်များကို ချမှတ် နိုင်စေရန် အတွက် ရည်ရွယ် ထားပါသည်။

UNFC သည် အစိုးရ နည်းပညာ အထောက်အကူပြု အဖွဲ့ (Technical Team) ကိုယ်စားလှယ်များ တင်ပြခဲ့သော တပြည်လုံး အပစ်အခတ် ရပ်စဲရေး လက်မှတ်ထိုးပွဲနှင့် ပါတ်သက်သည့် သဘောထား အတွက် ဘုံသဘော တူညီချက် တရပ်ကိုလည်း ယင်းညီလာခံ၌ ရယူ သွားရန် ရည်ရွယ် ထားပါသည်။

ညီလာခံသည် အနာဂတ် ဖက်ဒရယ်ဖွဲ့စည်းပုံကို ရေးဆွဲရာတွင် လိုအပ်သည့် အခြေခံ ရမည့် မူကိုလည်း ဘုံသဘော တူညီချက် ရရှိစေရေးကိုလည်း ဆွေးနွေး သွားမည်ဖြစ်သည်။

ဤကဲ့သို့ အရေးကြီးသော အခြေအနေ ဖြစ်ခြင်းကြောင့် UNFC သည် လာမည့် ညီလာခံတွင်၊ ပြည်တွင်း ပြည်ပမှ တိုင်းရင်းသား နိုင်ငံရေး အဖွဲ့အစည်းများ၊ CBO များ၊ လူငယ်၊ အမျိုးသမီး အဖွဲ့များ၊ တိုင်းရင်းသား လက်နက်ကိုင် အဖွဲ့များနှင့် နိုင်ငံရေး ပါတီ မဟုတ်သော တိုင်းရင်းသား အဖွဲ့အစည်းများကို ဖိတ်ကြား ခဲ့ရခြင်း ဖြစ်သည်ဟု ပဒို မန်းမန်းက ဆိုပါသည်။

ညီလာခံသည် ဇူလိုင် ၂၈ ရက်နေ့မှ (၃၁) ရက်နေ့ အတွင်း ကျင်းပ သွားမည် ဖြစ်သည်။ ညီလာခံ ပြီးဆုံးသော အခါ သြဂုတ်လ (၁) ရက်နေ့တွင် အခြား ဒီမိုကရေစီ အင်အားစု များနှင့် ထပ်မံ ဆွေးနွေးရန် ရှိကြောင်း ဆိုပါသည်။ ဤတွေ့ဆုံမှုသည် ညီလာခံမှ ရရှိ ထားသော ဘုံသဘော တူညီချက် များကို ထပ်မံဆွေးနွေးပြီး သဘောထား ရယူရန် ဖြစ်ပါသည်။


ထိုအထဲတွင် အမျိုးသား ဒီမိုကရေစီ အဖွဲ့ချုပ် (NLD -LA) ၈၈ မျိုးဆက်သစ်များ၊ လူ့ဘောင်သစ် ဒီမိုကရက်တစ် ပါတီ၊ ဒီမို ကရေစီ အင်အားစုများ ပါသော နိုင်ငံရေး ပါတီများ သာမက ဒီမိုကရေးစီ အရ စုဖွဲ့ပြီး လှုပ်ရှားသည့် အဖွဲ့အစည်း အားလုံးနှင့် လူမှု အဖွဲ့အစည်းဖြင့် စုဖွဲ့ ထားသည် အဖွဲ့အစည်း အားလုံးနှင့် တွေ့ဆုံဆွေးနွေး ကြမည် ဖြစ်ပါသည်။

No comments: