ဆော်လမွန် ကြာသပတေးနေ့၊ ဖေဖေါ်ဝါရီလ 19 2009
နယူးဒေလီ (မဇ္ဈိမ)။ ။ ကမ္ဘာ့ကုလသမဂ္ဂ လူ့အခွင့်အရေးဆိုင်ရာ ကျွမ်းကျင်သူ တောမတ် အိုဂျီ ကွင်တားနားသည် ဗုဒ္ဓဟူးနေ့က ထိန်းသိမ်းခံနေရသော နာမည်ကျော် ဟာသသရုပ်ဆောင် ကိုဇာဂနာနှင့် မြစ်ကြီးနား အကျဉ်းထောင်တွင် တွေ့ဆုံခဲ့ကြောင်း ထောင်အာဏာပိုင်များနှင့် မိသားစုဝင်များက မဇ္ဈိမကို ပြောသည်။
မိသားစုဝင် တဦးက ပြောကြားရာတွင် ကွင်တားနားသည် ဗုဒ္ဓဟူးနေ့က မြန်မာနိုင်ငံမြောက်ပိုင်း ကချင်ပြည်နယ်ရှိ မြစ်ကြီးနားထောင်သို့ သွားရောက် လည်ပတ်ခဲ့ပြီး ဇာဂနာနှင့် တွေ့ခဲ့ခြင်း ဖြစ်သည်ဟု ဆိုသည်။
"ဗုဒ္ဓဟူးနေ့ ညနေနှောင်းပိုင်းက တွေ့တာ၊ အသေးစိတ်ကိုတော့ မသိရသေးဘူး" ဟု ကိုဇာဂနာ၏ ဆွေမျိုးတဦးက ပြောသည်။
မြစ်ကြီးနားထောင်မှ အရာထမ်းတဦးက မဇ္ဈိမက ဆက်သွယ် မေးမြန်းရာ ဗုဒ္ဓဟူးနေ့ ညနေပိုင်းတွင် ကွင်တားနား ရောက်လာခဲ့ကြောင်း အတည်ပြု ပြောကြားခဲ့သော်လည်း အသေးစိတ် ပြောရန် ငြင်းဆန်ခဲ့သည်။
ရန်ကုန်အခြေစိုက် ကုလသမဂ္ဂရုံးက ကွင်တားနားသည် ကြာသပတေးနေ့က နေပြည်တော်သို့ အလည်အပတ် ထပ်မံ သွားရောက်ကြောင်း ပြောသည်။
ကုလသံတမန်သည် ဗုဒ္ဓဟူးနေ့က တရားသူကြီးချုပ်၊ ရှေ့နေချုပ်၊ နိုင်ငံခြားရေး ၀န်ကြီးတို့နှင့် နေပြည်တော်တွင် တွေ့ဆုံခဲ့ကြောင်း သိရသည်။ သို့သော် ကြာသပတေးနေ့က နောက်တကြိမ် သွားရောက်ရာတွင် မည်သူနှင့် တွေ့မည်ကို မသိရသေးပေ။
အလည်အပတ် ရောက်ရှိနေသော အာဂျင်တီးနားသား သံတမန်က နေအိမ် အကျယ်ချုပ် ကျခံနေရသော ဒေါ်အောင်ဆန်းစုကြည်နှင့် တွေ့ဆုံခွင့်ပြုရန် စစ်အစိုးရကို ခွင့်ပန်ထားသော်လည်း အကြောင်းပြန်ကြားချက် မရသေးဟု သတင်းရပ်ကွက်များက ပြောသည်။
ကုလသမဂ္ဂရုံး အဆိုအရ ကွင်တားနား၏ ခြောက်ရက်ကြာ ခရီးစဉ်သည် ယနေ့ အဆုံးသတ်မှာဖြစ်ပြီး ညနေတွင် မင်္ဂလာဒုံလေဆိပ်တွင် ပြည်တွင်း၊ ပြည်ပ သတင်းထောက်များကို သတင်းစာ ရှင်းလင်းပွဲ ပြုလုပ်ပြောကြားမှာ ဖြစ်သည်။
No comments:
Post a Comment