အောင်သက်ဝိုင်း Wednesday, June 02, 2010
လျှပ်စစ်မီး လုံးဝ ပြတ်တောက်ခြင်း မရှိသော စစ်အစိုးရ မြို့တော်သစ် နေပြည်တော်တွင် ယခုအခါ မီး ပြတ်တောက်မှု ကြုံတွေ့နေရပြီ ဖြစ်ကြောင်း နေပြည်တော် ဝန်ထမ်း အသိုင်းအဝန်းမှ သတင်းရရှိသည်။
ဝန်ကြီးဌာနအများစု ရုံးစိုက်ရာ နေပြည်တော်တွင် မေလလယ်ပိုင်းမှ စ၍ လျှပ်စစ် မီးပြတ်တောက်မှုများ ဖြစ်ပေါ်နေပြီး
ရန်ကုန်၊ မန္တလေးနှင့် တခြား မြို့ကြီးများတွင် လျှပ်စစ်မီးရရှိမှု အလွန် ဆိုးရွားလျက်ရှိနေကြောင်း နေပြည်တော် မြန်မာ့ လျှပ်စစ်ဓာတ်အားလုပ်ငန်းမှ အရာရှိတဦးက ပြောဆိုသည်။
“၀န်ကြီးဌာန ရုံးတွေမှာတောင် မီးက ၁၀ မိနစ်လောက် ပြတ်သွားလိုက်၊ ပြန်လာလိုက် ဖြစ်နေ တယ်။ နေပြည်တော် စပြောင်းတဲ့ ၂၀၀၆ ကတည်းက တာဝန်ထမ်းဆောင်လာတာ အခုလို တခါမှ မီးမပျက်ဖူးသေးဘူး” ဟု အဆိုပါအရာရှိက ပြောသည်။
ရန်ကုန်နှင့် မန္တလးတွင်လည်း မီးရရှိမှု အခြေအနေများ ဆိုးရွားလျက်ရှိပြီး ပဲခူး၊ စစ်ကိုင်း၊ မကွေးတိုင်း အပါအ၀င် နယ်ဒေသ ကြီးများတွင် လျှပ်စစ်မီး လုံးဝ မရရှိတော့ကြောင်း ကြားသိရသည်။
အထက်မြန်မာပြည် မန္တလေးမြို့တော်တွင် တနေ့လျှင် ၁ နာရီခန့်သာ မီးရရှိပြီး မန္တလေး ဈေးချိုတွင် မီး လုံးဝ မလာသည်မှာ ၃ ရက်ခန့် ရှိနေပြီဟု မန္တလေးမြို့ခံများကပြောသည်။
“မြို့ထဲမှာကို မီးက လုံးဝမလာဘူး။ လာရင်လည်း တ နာရီတောင်မပြည့်ဘူးဟု” မန္တလေးသား တဦးက ဆိုသည်။
ရန်ကုန်မြို့တွင်လည်း အလားတူ အခြေအနေမျိုးကြုံတွေ့နေရပြီး မီးပွိုင့်၊ အစိုးရဆေးရုံ၊ စာသင်ကျောင်းများ အပါအ၀င် အများပြည်သူအတွက် အရေးကြီးသော နေရာများတွင်ပင် လျှပ်စစ်မီးပြတ်တောက်လျက်ရှိကြောင်း သိရသည်။
“ရပ်ကွက်တခုကို တနာရီလောက်ပဲ အလှည့်ကျ မီးပေးနိုင်ပါတယ်။ ဒါတောင် ရေတင်ဖို့အတွက် အဓိက ပေးတာ” ဟု
ရန်ကုန်မြို့တော် လျှပ်စစ်ဓာတ်အားပေးရေး အဖွဲ့မှ အင်ဂျင်နီယာတဦးက ပြောသည်။
ယခုကဲ့သို့ လျှပ်စစ်မီးများ ပြတ်တောက်ခြင်းသည် သဘာဝ ဓာတ်ငွေ့ပိုက်လိုင်းများ ပေါက်ခြင်းနှင့် တရုတ်နိုင်ငံလုပ်
ရေအားလျှပ်စစ်ထုတ် စက်များ ချွတ်ယွင်းမှုကြောင့်ဖြစ်ကြောင်း အမှတ် ၁ လျှပ်စစ်စွမ်းအား ၀န်ကြီးဌာနမှ တာဝန်ရှိသူတဦးက ပြောသည်။
သဘာဝဓာတ်ငွေ့ ပိုက်လိုင်းချွတ်ယွင်းမှုများမှာ မကြာခဏဆိုသလို ဖြစ်ပွားနေပြီး မေလ ၃၀ ရက်တွင် မွန်ပြည်နယ်၊ မုဒုံမြို့အနီး ဓာတ်ငွေ့ပိုက်လိုင်း ပေါက်ခဲ့ကြောင်း သိရသည်။
“ဓာတ်ငွေ့မရလို့ ဓာတ်ငွေ့သုံး ဓာတ်အားစက်ရုံတွေလည်း မလည်နိုင်ဘူး။ တရုတ်ရေအားလျှပ်စစ်ထုတ် စက်တွေ ချွတ်ယွင်း တာကြောင့်ရော၊ ရေမရှိတာရောကြောင့် စွမ်းအားပြည့် မလည်နိုင်သေးဘူး” ဟု မြန်မာ့လျှစ်စစ်ဓာတ်အားလုပ်ငန်းအရာရှိက
ပြောသည်။
ပဲခူးတိုင်းအတွင်းတွင်လည်း မီးလုံးဝမလာသည်မှာ ရက်ပေါင်းများစွာ ကြာမြင့်နေပြီး ဒေသခံများသည် ရေတင်ရန် ဒီဇယ်သုံး အင်ဂျင်စက်ကြီးများကို ငှားရမ်း အသုံးပြုနေရသည်ဟု သိရသည်။
“ရေတင်ဖို့ ဒီဇယ်သုံးစက်တွေ ငှားပြီးရေတင်တယ်။ မိုးရွာတဲ့အချိန်လည်း ရေခံပြီး သုံးကြတယ်။ မီးက မလာတာ တလ လောက်တောင် ရှိတော့မယ်” ဟု ပဲခူးတိုင်း အုတ်ဖိုဒေသခံ တဦးက ဆိုသည်။
လျှပ်စစ်မီးလာသော နာရီပိုင်း အချိန်တွင်လည်း လူအများ ဝိုင်းဝန်း သုံးစွဲကြသောကြောင့် မီးအားအပြည့် မရကြောင်း
ရန်ကုန်မြို့ခံများက ပြောသည်။
မြန်မာတနိုင်ငံလုံးအတွက် လျှပ်စစ်ဓာတ်အား လိုအပ်ချက်မှာ မဂ္ဂါဝပ် ၁၀၀၀ ကျော်ဖြစ်ပြီး ရန်ကုန်မြို့၏ ဓာတ်အား လိုအပ်ချက် မှာ မဂ္ဂါဝပ် ၆၀၀ ဖြစ်သည်ဟု ရန်ကုန်မြို့တော်လျှပ်စစ်ဓာတ်အားပေးရေးအဖွဲ့ ၀န်ထမ်းတဦး အဆိုအရ သိရသည်။
No comments:
Post a Comment