ဗန်းမော် အခြေစိုက် အမှတ် (၂၁) စစ်ဆင်ရေး ကွပ်ကဲမှု စစ်ဌာနချုပ် (စကခ) နှင့် ဗန်းမော်မြို့နယ် မယက တို့က ရွှေလုပ်ငန်း ရှင်များ ထံမှ ရန်ပုံငွေ ကောက်ခံကာ ကချင်ပြည်နယ် ဗန်းမော်မြို့ အနီးတွင် ရွှေရှာ ဖွေခွင့်ပြု လိုက်သည်။ဗန်းမော်မြို့အနီးရှိ ဧရာဝတီမြစ်အတွင်း တာပိန်မြစ်နှင့် မုံးလွဲချောင်းစီးဝင်ရာ နေရာတွင် ရွှေရှာဖွေခွင့်ပေးထားသဖြင့် ရွှေဖောင်ဟု ခေါ်သည့် စက်ယန္တရားများ တပ်ဆင်ထားသော စက်လှေအစီး (၂ဝ) ခန့် ယခုအခါ ရွှေရှာဖွေလုပ်ကိုင်နေကြောင်း ရွှေလုပ်ငန်းရှင်များနှင့် နီးစပ်သူ ဗန်းမော်ဒေသခံတဦးက ပြောသည်။
၎င်းက “ဗန်းမော် စကခနဲ့ မြို့နယ် မယကတို့က ရန်ပုံငွေအတွက်ဆိုပြီး ရွှေရှာခွင့် ပေးလိုက်တာ။ လွန်ခဲ့တဲ့ (၅) နှစ် ကျော်ကတည်းက အဲဒီနေရာမှာ လုပ်ခဲ့ဖူးတယ်၊ ရွှေလည်း ရကြတယ်။ အဲဒီနားက ရွာတွေက ဘုန်းကြီးတွေကိုယ်တိုင် အထက်ကို စာတင်တော့ ရပ်ထားခဲ့တာ။ အခု ပြန်လုပ်ခွင့်ပြုနေတယ်။ ရွှေကျင်တဲ့ စက်လှေတစီးက (၁ဝ) သိန်း အလှူငွေ ထည့်ရတယ်။ စစချင်း ပေးရတာ။ ရွှေရရင် သုံးပုံတပုံ ပေးရမယ်။ လုပ်ငန်းသိမ်းချိန်မှာ ထွက်လာတဲ့ရွှေကို အချိုးကျ ထည့်ရမှာပေါ့” ဟု ပြောသည်။
လွန်ခဲ့သည့် (၅) နှစ်က ယခုရွှေရှာနေသည့်နေရာတွင် မှုန်စုပ်စက် (ရေအောက်ကြမ်းပြင်မှ သဲ၊ ခဲများကို စုပ်ယူသည့်စက်) များ အသုံးပြုကာ ရွှေအကြီးအကျယ်ရှာဖွေခဲ့သဖြင့် သဲသောင်များ ထွန်းကာ ရေစီးကြောင်း ပြောင်းလဲပြီး ဧရာဝတီမြစ်လယ် အတွင်းရှိ ကျွန်းရွာများဖြစ်သည့် ကမ်းနီ၊ ကမ်းပါးနီ၊ ကုန်းခါးနှင့် ကျွန်းကြီးရွာတို့တွင် ရေကြီးမှုဖြစ်ပေါ်ခဲ့သည်ဟု အဆိုပါ ဗန်းမော်ဒေသခံက ပြောသည်။
၎င်းက “ကျွန်းကြီးရွာဆိုရင် အိမ်ခြေ (၁ဝဝ) ကျော်ရှိတယ်၊ ကုန်းခါးလည်း (၁ဝဝ) လောက်ရှိမယ်၊ အားလုံး အိမ်ခြေ (၃ဝဝ) ကျော်လောက်ရှိမယ်။ မိုးတွင်းအချိန်ဆို အရင်က အဲဒီရွာတွေက ရေမကြီးဘူး။ ရွှေလုပ်တဲ့ခါကျတော့ ရေကြောင်းက ရွာတွေဘက် ဦးတိုက်လာတယ်၊ ရေကြီးရေလျှံတာတွေ ဖြစ်ခဲ့တယ်။ အဲဒါနဲ့ နားခဲ့တာ။ အခုပြန်လုပ်နေတယ်ဆိုတော့ ရေကြီးမှာကို စိုးရိမ်နေကြတယ်” ဟု ဗန်းမော်ဒေသခံက ပြောသည်။
ကချင်ပြည်နယ်အတွင်း နေရာအနှံ့အပြားတွင် ရွှေတွင်းလုပ်ငန်းများကို အာဏာပိုင်များ၏ ခွင့်ပြုချက်ရယူကာ တရားဝင်နည်းလမ်းဖြင့်လည်းကောင်း၊ တောတောင်များတွင် ခိုးတူးသည့် တရားမဝင် နည်းလမ်းဖြင့်လည်းကောင်း လုပ်ကိုင်နေကြပြီး အဆိုပါ ရွှေတွင်းလုပ်ငန်းများကြောင့် သဘာဝပတ်ဝန်းကျင် ထိခိုက်ပျက်စီးမှုများလည်း ရှိနေသည်။
No comments:
Post a Comment