အမှောင်ထဲ လမ်းလျှောက်ခဲ့ရတာ ကြာရှည်ပေါ့လား။ ၁၉၈၈ ခုနှစ်မှ ပါတီစုံ ဒီမိုကရေစီ စနစ်တောင်း ဆိုမှုကို မြင်ခဲ့ရသည်။ အရှုးမီးဝိုင်း ခံရတော့ ”စစ်တပ်ဆိုတာ ပစ်ရင်မှန်အောင်ပစ် တယ်ကွ။ သေဖို့သာ မှတ်ပေရော့” အော်ပြီး ဆင်းပြေးသွားတဲ့ စစ်အာဏာရှင်ထိပ်သီး ဗိုလ်နေဝင်းကို ရ-ရက်သားသမီး များဖြစ်တဲ့ မျိုးဆက်သစ်များ မြင်တွေ့လိုက်ကြပေသည်။ ၈ – ၈ – ၁၉၈၈ ကနေစစ်တပ်က အာဏာပြန် သိမ်းတဲ့ ၁၈ -၉-၁၉၈၈ နေ့ထိ ပြည်သူ့ အုပ်ချုပ်ရေး ဖြစ်ခဲ့တဲ့ ကာလကို မမေ့သင့်ပါပေ။ ဘယ်ရုံးမှ ရုံးတက်စရာမလိုခဲ့ ပါ။ သို့သော် ကြားဖြတ်အစိုးရ တရပ် မဖွဲ့စည်းနိုင်ခဲ့ပါ။ ဖွဲ့နိုင်ခဲ့လျှင် ပါတီစုံပွဲက ပွဲပြတ်သည်။ သို့သော် ယနေ့ ထိ ပါတီစုံစနစ်က ပွဲမပြတ်ဖြစ်နေသည် ကို သက်ဆိုင်ရာ ရွေးကောက်ပွဲ အမျိုးမျိုးကသက်သေပြ နေသည်။
ရွေးကောက်ပွဲတိုင်းတွင် ထားရှိသင့်သည့် ပါတီစုံဆိုင်ရာ မူ ၀ါဒ သဘောထားများ ကို နားလည်သင့်ပါသည်။ ငါ့မြင်း ငါစိုင်း စစ်ကိုင်း ရောက် ရောက်၊ ရောက်ချင်ရာရာ မရောက်ကောင်းပါ။ အများသူငါ ပါဝင်နိုင်ရမည့် ပါတီတိုင်း ပါဝင်ခွင့် ရရမည့် သံဃာစုံ ။ရေမီး အစုံ ပါဝင်မှုမျိုး ဖြစ်ရပါမည်။ ရေမှုတ် တဖက် မီးစ တဖက် သဏ်ဏ္ဍာန်ဆောင် ဟန်ပြ ပါတီစုံပုံစံ မော်ဒယ်များကိုကား ကျောက်ခေတ်က သမိုင်း ပြတိုက်ထဲ သွားပြရမလို ခေတ်နောက်မကျကောင်းပါ။ ကမ္ဘာ အနောက်ခြမ်းတွင် အရင်းရှင်စနစ်ထွန်းပေါ်နေချိန် တွင် အရှေ့ခြမ်းက မြန် မာတို့မှာ စိန်ခြူးကြာညောင် လရောင်လင်းပါလို့ မယ်ခုမျှော် တီးလုံးနဲ့ ပဒေသရာဇ်ခေတ်တွင်ပင် သီပေါမင်း ပါတော်မူခဲ့ရသည့် ခေတ် နောက်ကျမှုမျိုး ယနေ့ထိ တည်ရှိနေသည်ကို မျက်ခြေ မပြတ်သင့်ပါပေ။ ရှင်းရှင်းပြောရလျှင် အောက်တန်းကျလျှင် နောက်တန်း ရောက် သွားတတ်ပါသည်။ နောက်တန်းရောက်လေ ကမ္ဘာ့အဆင်းရဲဆုံး နိုင်ငံဘဝက မလွတ်မြောက်လေ ဖြစ်ပါမည်။ ဘယ်သူ့အားကိုးဖြင့် စစ် အုပ်စု စစ်ခေါင်း ဆောင်များ ပြည်တွင်းစစ်ကို ဆက်မီး မွှေးချင်မှန်း မသိ ဆက်တိုက်နေသည်ကို အားလုံးဝိုင်းဝန်း ငြိမ်းသတ်ရန် လိုလာပါ သည်။ စစ် အုပ်စု ကောင်းစားမည့် ခေတ်ထက် ပြည်သူ့ခေတ် ကို ဖန်တီးရပါ မည်။ တိုင်းပြည်သည် စစ်အုပ်စု ခေါင်းဆောင်များအတွက် စားကျက်ကောင်း မဖြစ်သင့်ပါ။ စစ်တပ်သည် တိုင်းပြည်အတွက် ၀န်ထမ်းကောင်း ဖြစ်ရပါမည်။ နိုင်ငံ့ဝန်ထမ်းများသည် ပါတီ နိုင်ငံရေးနှင့် ကင်းရှင်းရမည်။ -ဟု အခိုင်အမာ ဖွဲ့စည်းပုံ အခြေခံမူ ပုဒ်မ-၂၆(က)ကို စစ်အုပ်စုခေါင်းဆောင်များ ဖောက်ဖျက် ကျူးလွန်ထားသည်။ ၂၅ ရာခိုင်နှုန်းက စစ်တပ်။ ကျန် ရ၅ ရာခိုင်နှုန်းတွင် စစ်တပ်ပါတီကြံ့ဖွဲ့က မရမနေ ရာခိုင်နှုန်း အများဆုံး ရနိုင်ရန် ကြိုတင်ပြင်ဆင် ပြဌာန်း ထားသည့် ဥပဒေတွေက ၂၀၀၈ ဖွဲ့စည်းပုံ အခြေခံဥပဒေ အပါအဝင် ရွေးကောက်ပွဲဆိုင်ရာ ဥပဒေ နည်းဥပဒေတွေက အမြောက် အမြား ပင် တွေ့နေရသည်။
၂၀၀၈ ခုနှစ် ဖွဲ့စည်းပုံအခြေခံဥပဒေ အခန်း(၉)။ ပြည်ထောင်စု ရွေးကောက်ပွဲ ကော်မရှင်ဖွဲ့စည်းခြင်း၊ ပုဒ်မ-၃၉၈ (ခ) ပြည်ထောင်စု ရွေး ကောက်ပွဲ ကော်မရှင် ဥက္ကဌ နှင့် အဖွဲ့ဝင်များသည်- (၇) နိုင်ငံရေး ပါတီဝင် မဟုတ်သူ ဖြစ်ရမည်။ (၈) လွှတ်တော် ကိုယ်စားလှယ် မဟုတ် သူ ဖြစ်ရမည်။ ဟု ပြဌာန်းချက်များကို လက်ရှိ ရွေးကောက်ပွဲ ကော်မရှင် တဖွဲ့လုံးက လိုက်နာခြင်း ရှိ မရှိ ဦးစွာ ပထမ စစ်ဆေးရပါမည်။ ဟုတ်ပါ၏လော၊ မှန်ပါ၏လော။ ကော်မရှင်အဖွဲ့ဝင်အားလုံးမှာ ဥက္ကဋ္ဌ ဗိုလ်တင်အေးမှအစ ကြံ့ဖွံ့ပါတီဝင် ဗဟိုကော်မတီ များ ဖြစ်ခဲ့ကြ သည်ကို လုံးဝမမေ့သင့် ပါပေ။ အဖွဲ့ဝင်အားလုံး ဖွဲ့စည်းပုံ အခြေခံဥပဒေကို ချိုးဖောက်၍ ရာထူးရယူထားခြင်း ဖြစ်ကြောင်း နိုင်ငံရေး ပါ တီ အားလုံးတွင် အရေးဆိုပိုင်ခွင့် ရှိပါသည်။
ထို့ပြင် ကော်မရှင်ကို ပုဒ်မ ၃၉၈ (က) အရ ခန့်အပ်တာဝန်ပေးသော နိုင်ငံတော် သမ္မတ ဦးသိန်းစိန်(ဗိုလ်ချုပ်ကြီး သိန်းစိန်) သည်ပင်လျှင် ဖွဲ့စည်းပုံအခြေခံ ဥပဒေ ပုဒ်မ ၆၈ -အရ” နိုင်ငံတော်သမ္မတနှင့် ဒုတိယ သမ္မတများသည် မိမိတို့ဦးစီးသည့် တစ်စီးပွားတည်း ဖြစ်သော မိ သားစုပိုင် မြေ၊ အိမ်၊ အဆောက်အအုံ၊ စီးပွားရေး လုပ်ငန်း၊စုငွေနှင့် အခြားအဖိုးတန် ပစ္စည်းများကို တန်ဖိုးနှင့် တကွ စာရင်းပြုစုပြီး ပြည် ထောင်စု လွှတ်တော် အကြီးအမှုးထံ ပေးပို့ရမည်။” ဟုပါရှိသည်ကို လွှတ်တော်များ အကြိမ်ကြိမ် ကျင်းပလာခဲ့သည်မှာ ကြာပြီဖြစ်သော် လည်း ယနေ့ထိ ဥပဒေကို လိုက်နာပြီး စာရင်းပြုစု အပ်နှံထားခြင်းမရှိသည်ကို ထုတ်ဖော်ကြရန် လိုပါသည်။ အပြော သက်သက် ဖြစ်စေ သတည်း ဆိုလျှင် မ ဆ လ အောင်မြင်ခဲ့တာကြာပြီ။ သို့သော် သမိုင်း အမှိုက်ချင်းတောင်းထဲမှ ပြန်မတက်နိုင်သည်ကို သင်ခန်းစာ ယူ သင့် ပါသည်။ ဆက်မလိမ် သင့်တော့ပါ။ ပွင့်လင်းမြင်သာသည့် လူ့အဖွဲ့အစည်းကို ကိုယ်ကိုယ်တိုင် ဖန်တီးကြရပါ မည်။
အာဏာသိမ်းဗိုလ်ချုပ်နေဝင်း
ခုလတ်တလော လာမည့် ဧပြီလ ၁ -ရက်တွင် ကျင်းပမည့် ကြားဖြတ်ရွေးကောက်ပွဲ နှင့်ပတ်သက်၍ ရန်ကုန်တိုင်း ဒေသကြီး ကော်မရှင် အ ဖွဲ့ခွဲ ဥက္ကဌ ဦးကိုကို တို့၏ ၂၃- ၂ -၂၀၁၂ နေ့က ဖြေကြားချက်တွင် ပါရှိသည့် – ကြိုတင်မဲ ပေးခြင်းနှင့် သက်ဆိုင်သည့် ဖြစ်စဉ်ကို နိုင် ငံရေးပါတီတွေ အနေဖြင့် ကြည့်ရှုစစ်ဆေးခွင့် ဥပဒေတွင်မပါရှိကြောင်း ပြောကြားခဲ့သည်။ဤအချက်နှင့် ပတ်သက်၍ သတင်းထောက် များ၏ မေးမြန်းချက် ဖြစ်သော-” ဒါဆို ဒီကြိုတင်မဲ စာရင်းပြုစုတာ၊ တိုက်ဆိုင် စစ်ဆေးတာ၊ မဲပေးတာ စတဲ့ဖြစ်စဉ်မှာ နိုင်ငံရေးပါတီ တွေ က ကိုယ်စားလှယ်လောင်း တွေက စောင့်ကြည့်နိုင်တဲ့ အနေအထား မပါဘူးပေါ့” ဆိုသည့်မေးမြန်းချက် အပေါ် ဥက္ကဌက ”ဟုတ်ပါတယ်။ မပါပါဘူး။”ဟု ဖြေကြားခဲ့ပါသည်။ ကြိုတင်မဲများမှာ ပြီးခဲ့သည့် ၂၀၁၀ ခုနှစ် ရွေးကောက်ပွဲတုန်းက ဗြောင်တိုမဲများ ဖြစ်ခဲ့ကြသည်ကို သက်ဆိုင်ရာ ကော်မရှင်များကပင် ၀န်ခံထားသည် များကို တွေ့ရပါသည်။
လောလောလတ်လတ် တွေ့နေရပြန်ပြီ။ ”ပုံမှန် မဟုတ်တဲ့ မူမမှန်မှု ဆိုတာက ရွေးကောက်ပွဲ မဲပေးနိုင်သူ စာရင်းတွေမှာ သေဆုံး ထားပြီး တဲ့သူ တွေ စာရင်းတွေ ပါဝင်နေပြီး၊ သူတို့တွေက ဧပြီ ၁-ရက်နေ့ရွေးကောက် ပွဲတွေမှာ မဲပေးရမလို ဖြစ်နေတယ်။” လို့ ဒီမိုကရေစီ ခေါင်း ဆောင် ဒေါ်အောင်ဆန်းစုကြည် ကပြောလာပါ သည်။ သက်ဆိုင်ရာမဲဆန္ဒနယ်များတွင် ထုတ်ပြန်သည့် မဲပေးနိုင်သူ စာရင်းများတွင် သေ ဆုံးသွားသူများ၊ ပြောင်းရွှေ့သွားသူများ ပါဝင်နေခြင်း၊ အသက်ပြည်သူများ၊ သက်ရှိထင်ရှားရှိနေသူများ မပါဝင်ခြင်း၊ အချို့သူများ၏ အ မည်များ အကြိမ်ကြိမ် ထပ်၍ပါဝင်နေခြင်း စသည်တို့ ဖြစ်ပေါ်နေကြောင်း ပြောဆို ဝေဖန်မှုများ ရှိနေကြပါသည်။ အစမရိုးတဲ့ ဘယ် အစိုးရ မျိုး ကိုမဆို ဘယ်ပြည်သူလူတုကမှ ယုံယုံကြည်ကြည် ဆက်ဆံကြမည် မဟုတ်ပါ။
”မြန်မာနိုင်ငံက စစ်အစိုးရအဆက်ဆက်မှာ တရားဥပဒေစိုးမိုးမှု ကင်းမဲ့ပုံတွေ၊ ပြည်သူတွေကို ချုပ်ချယ်ဖို့ ဥပဒေတွေ ပြဌာန်းခဲ့ပုံ ကိစ္စတွေ တင်ပြမယ့် စာသားတွေကို အာဏာပိုင်တွေက ပြောကြားခွင့် မပြုဘူး။”ဟု ဒေါ်အောင်ဆန်းစုကြည်က ပြောပါသည်။ ”ကျမရဲ့ တီဗီက ထုတ်လွင့်မယ့် မဲဆွယ်စည်းရုံးတဲ့ မိန့်ခွန်းကိုလည်း ပြည်ထဲရေး ၀န်ကြီးဌာန စိစစ်ရေးကို တင်ပြထားရတယ်။ကျမ အနေနဲ့ သတင်း လွတ် လပ်ခွင့် မရှိသေးဘူး ဆိုတဲ့ ပြောဆိုချက်အပေါ်မှာ သဘောတူတယ်။”
“ကျမတို့ လုံးဝလွတ်လပ်တဲ့ သတင်းဆက်သွယ်ရေး စနစ်မရှိသေးပါဘူး။ ဒါကိုကျမ သဘောတူတယ်။ဒါကလည်း ကျမတို့ရွေးကောက်ပွဲ ဝင်ဖို့ ဆုံးဖြတ်ခဲ့ စေခဲ့တဲ့ အချက်တချက်ပါပဲ။ ဒီလို လွတ်လပ်ခွင့်တွေ ရဖို့ ကျမတို့ ဆက်ပြီး အလုပ်လုပ်သွားရပါမယ်။” ဟု ဒီမိုကရေစီ ခေါင်းဆောင် ဒေါ်အောင်ဆန်းစုကြည် က အလေးအနက်ထား ပြောကြားသွားပါသည်။
လွတ်လပ်စွာ ဖော်ထုတ်ပြောဆိုခွင့် မှ မရှိလျှင်၊ လွတ်လပ်စွာ အသက်ရှုခွင့်ကော ရှိနိုင်ပါမည်လော ။
ဒီမိုကရေစီ အလင်းရောင် ထွန်းပြောင်နိုင်စေဖို့ မီးဇာမှန်အိမ် မြှင့်လိုက်ကြပါစို့။
No comments:
Post a Comment