Wednesday, July 3, 2013

ရွှေ သဘာဝ ဓာတ်ငွေ့ပိုက်လိုင်း စိတ်ချရသည့် အနေအထား မဖြစ်သေး

ညိမ်းပြည့်စံ

ရခိုင်ပြည်နယ်မှ တရုတ်နိုင်ငံသို့ ဆက်သွယ်မည့် ရွှေ သဘာဝဓာတ်ငွေ့ ပိုက်လိုင်းစီမံကိန်းကို အကောင်အထည် မဖော်နိုင် ခြင်းမှာ ဓာတ်ငွေ့ပိုက်လိုင်း ဆက်ထားသည့် နေရာများတွင် အပေါက်ငယ်များ ဖြစ်နေသည်ကို အချိန်မီ ပြန်ပြင်ဆင်နိုင်ခြင်းများ မရှိသောကြောင့် ဖြစ်သည်ဟု ရွှေဓာတ်ငွေ့စီမံကိန်းမှ ပြည်တွင်း တာဝန်ခံ ကိုတူးတူးထံမှ သိရသည်။

“ကျနော်တို့ အစကတော့ ဇွန်လထဲမှာ အကောင်အထည် ဖော်ဖို့ လုပ်ထားတာ။ လယ်သမား ပြဿနာတွေရော၊ ပိုက်လိုင်းမှာ အပေါက်တွေ တွေ့တာတွေရောကြောင့် ဇူလိုင်လ ထဲမှာတော့ အပြီးသတ် အကောင်အထည် ဖော်ဖို့ ဖြစ်သွားတယ်။ ဒီလထဲ မှာတော့ အကောင်အထည် ဖော်နိုင်လိမ့်မယ်လို့ ထင်ပါတယ်” ဟု ကိုတူးတူးက ဧရာဝတီသို့ ပြောသည်။

လယ်မြေ ပြဿနာများမှာ မြန်မာ – တရုတ် သဘာဝဓာတ်ငွေ့ ပိုက်လိုင်းစီမံကိန်း ပြုလုပ်မည့် နေရာများတွင် လယ်မြေများကို ၃ နှစ် စာချုပ်ဖြင့် ငှားထားခြင်း ဖြစ်ကာ ယခု ၃ နှစ် ကျော်သွားပြီဖြစ်ကြောင်း၊ ထိုသို့ ၃ နှစ် ကျော်သွားခြင်းကို ငှားရမ်းကြေး၊ လျော်ကြေးများ မပေးသောကြောင့် ကျောက်ဖြူမြို့နှင့် ရှမ်းပြည် မြောက်ဘက်ပိုင်း ဒေသများတွင် လယ်မြေ ပြဿနာများ ဖြစ်ကာ ကြံ့ကြာနေခြင်း ဖြစ်ကြောင်း ကျောက်ဖြူမြို့ လူမှုကွန်ရက်မှ ကိုထွန်းထွန်းနိုင်က ဆိုသည်။

ထို့အပြင် ယမန်နေ့က သတင်းစာများတွင် မြန်မာ – တရုတ် သဘာဝဓာတ်ငွေ့ပိုက်လိုင်း စီမံကိန်းမှ မဒေးကျွန်း ရေနက် ဆိပ်ကမ်းအနီး ပိုက်လိုင်းများတွင် ဓာတ်ငွေ့ ပို့လွှတ်စမ်းသပ်ရာတွင် ဓာတ်ငွေ့ယိုစိမ့်မှုများ ဖြစ်ခဲ့သည်ဟု ဖော်ပြခဲ့ခြင်းမှာ အမှန်မဟုတ်ကြောင်း ပြည်တွင်းတာဝန်ခံ ကိုတူးတူးက ဆိုသည်။

“ကျနော်တို့ အဲဒါကိုတော့ အတည်ပြုလို့ မရသေးဘူး။ တကယ်ဟုတ်၊ မဟုတ်ဆိုတာလည်း အခုအချိန်မှာ မသိသေးဘူး ပေါ့နော်။ တကယ်ဖြစ်တယ် ဆိုရင်တော့ ကျောက်ဖြူဒေသခံတွေ ဆီက ဟုတ်တယ်ဆိုတဲ့ အသံကို ကြားရမှာပေါ့။ အခုထိ ကျောက်ဖြူ ဒေသခံတွေဆီက ဘာမှမကြားဘူးလေ” ဟု ကိုတူးတူးက ဆက်လက်ပြောသည်။

ယမန်နေ့က ဓာတ်ငွေ့စမ်းသပ် ပို့လွှတ်ရာတွင် ယိုစိမ့်မှုများ ဖြစ်သည်မှာ မဟုတ်ကြောင်း၊ ပိုက်လိုင်းတလျှောက် ဓာတ်ငွေ့ ယိုစိမ့်မှုများ ရှိနေခြင်းမှာလည်း မဟုတ်ကြောင်း၊ မိမိတို့ ကုမ္ပဏီအနေဖြင့် ဓာတ်ငွေ့ တင်ပို့လွှတ်ရန် အဆင်သင့် ဖြစ်နေပြီ ဖြစ်ကြောင်း ပိုက်လိုင်းသွယ်တန်းသည့် ကုမ္ပဏီဖြစ်သော SEAPO/ SEAGP ကုမ္ပဏီမှ ပြည်သူ့ဆက်ဆံရေး တာဝန်ရှိသူတဦးက Daily Eleven တွင် ဖြေကြားထားသည်ကို တွေ့ရသည်။

၎င်းနှင့် ပတ်သက်၍ ကျောက်ဖြူဒေသခံများကို မေးကြည့်ရာ ယမန်နေ့က ပိုက်လိုင်းတွင် ဓာတ်ငွေ့ထုတ်လွှတ် စမ်းသပ် သည်မှာ မဟုတ်ကြောင်း၊ ထိုသို့သော သတင်းများသည် ကောလာဟလ များသာ ဖြစ်ကြောင်း၊ အမှန်တကယ် ပိုက်လိုင်း ပေါက်သည်ဆိုပါက မိမိတို့လည်း သိမည်ဖြစ်ကြောင်း ကျောက်ဖြူမြို့ လူမှုကွန်ရက်မှ ကိုထွန်းထွန်းနိုင်က ဆိုသည်။

“တခုရှိတာက ကျောက်ဖြူကို ဓာတ်ငွေ့တာဘိုင် တွေကနေတဆင့် လျှပ်စစ် ဓာတ်အားပေးဖို့ လုပ်ထားတာရှိတယ်။ ၄ လက်မ ပတ်လည် ပိုက်လိုင်းတွေနဲ့ပေါ့။ အဲဒီ ပိုက်လိုင်းတွေကနေ ဓာတ်ငွေ့လွှတ်ဖို့ကို တခါ စမ်းသပ်ဖူးတယ်၊ ရေလွှတ်ပြီးတော့။ အဲဒီတုန်းကတော့ ပိုက်လိုင်း ပေါက်တာ ကြုံရတယ်။ ဒါကလည်း လွန်ခဲ့တဲ့ ၁၀ ရက်လောက်က ကိစ္စပါ” ဟု မဒေးကျွန်းဒေသ ဖွံ့ဖြိုးရေး လူမှုကွန်ရက်မှ ကိုထွန်းကြည်က ဆိုသည်။

မြန်မာ – တရုတ် သဘာဝဓာတ်ငွေ့ ပိုက်လိုင်းအား ဆက်ထားသည့် နေရာများ လေမလုံကြောင်းကို သက်ဆိုင်ရာ အဖွဲ့အစည်း များနှင့် ပိုက်လိုင်း သွယ်တန်းသည့် ကုမ္ပဏီဖြစ်သော SEAPO/ SEAGP ကုမ္ပဏီမှ တာဝန်ရှိသူများက ယခင် ကတည်းက ကြေညာထားခြင်း ဖြစ်သည်ဟု သိရသည်။

ဓာတ်ငွေ့ ပို့လွှတ်ရန် လာမည့် သြဂုတ်လတွင်မှ အကောင်အထည် ဖော်နိုင်မည်ဖြစ်သည်ဟု ခန့်မှန်းမိကြောင်း၊ ဓာတ်ငွေ့ ပိုက်လိုင်းသည် ရခိုင်ပြည်နယ်မှ တဆင့် မကွေးတိုင်း၊ မန္တလေးတိုင်း၊ ရှမ်းပြည်နယ် တို့ကို ဖြတ်သန်း၍ တရုတ်နိုင်ငံ ယူနန် ပြည်နယ်၌ အဆုံးသတ်မည် ဖြစ်ကာ မြန်မာအစိုးရမှ တရုတ်အစိုးရသို့ အနှစ် ၃၀ ဓာတ်ငွေ့ ရောင်းချမှုအတွက် ခန့်မှန်းခြေ အမေရိကန် ဒေါ်လာ ၂၉ ဘီလီယံ ရရှိကြောင်း သိရသည်။

No comments: