အမည်မသိလူအုပ်၏ရိုက်နှက်ခံရသောသူ၂ဦးသည် မြစ်ကြီးနားမြို့ ၁၀ မိုင်၊ နောင်နန်းကျေးရွာနေ မောင်ဆိုင်းဒူ (၁၉) နှစ်နှင့် ခရစ်ယာန်ဓမ္မအမှုတော်ဆောင် ဆရာ ဟောင်းလွမ်းတို့ဖြစ်ပြီး သြဂုတ်လ ၉ ရက်နေ့က တနေရာစီ ရိုက်နှက်ခံခဲ့ရခြင်းဖြစ်ကြောင်းသိရသည်။
နောင်နန်းကျမ်းစာကျောင်းသားဖြစ်သော အလယ်ကုန်းရပ်ကွက် မလိယန်ကျေးရွာမှ ဆရာ ဟောင်းလွမ်းကို ညအချိန် ကွန်ပျူတာဆိုင်မှဆိုင်ကယ်နှင့်အပြန်လမ်းတွင် ရိုက်နှက်မှုခံခဲ့ရခြင်းဖြစ်ပြီး အတွင်းဒဏ်ရာ ပြင်းထန်မှုကြောင့် သတိလစ်နေဆဲဖြစ်ကြောင်း မိသားစုဝင်တစ်ဦး KNG ကချင်သတင်းဌာန သို့ပြောသည်။
“ည ၉ နာရီခွဲလောက်မှာ ကွန်ပျူတာသွားလုပ်မယ်ဆိုပြီး မြစ်ကြီးနား ဈေး (၁) ဈေး (၂) ကိုဝင်ပြီး အပြန်မှာ ရိုက်ခံရတာပါ။ သူ့ကို ရိုက်နှက်ထားပြီး ဖုန်းနဲ့ ဆိုင်ကယ်တွေကိုတော့ ဒီတိုင်းထားပေးခဲ့တယ်။ ခုထိစကား မပြောနိုင်သေးဘူး။ သူကသွေးတိုးလည်းရှိတော့ အခုက သတိလစ်ပြီး လေဖြတ်သလိုဖြစ်နေတယ်။ အဲဒီ လူတွေက သေနတ်ကိုင်တဲ့သူတွေဟုတ်တယ်။ ၅ ယောက်ဆိုပြီး လက်ထောင်ပြတယ်။ ဆေးရုံကနေ ပြီးခဲ့တဲ့ အပတ်ကဆင်းပြီး အိမ်မှာပဲတိုင်းရင်းဆေးနဲ့ပြန်ကုနေတယ်။ ကျောင်းတောင်မတက်နိုင်တော့ဘူးထင်တယ်။”
ယခုချိန် ဆေးရုံမှအိမ်သို့ ပြန်လည်အနားယူလျက်ရှိသော်လည်း စကားကောင်းမွန်စွာ မပြောနိုင်သေးသောကြောင့် တိုင်းရင်းဆေးဖြင့်သာ ဆက်လက်ကုသနေဆဲဖြစ်ကြောင်းသိရသည်။
နောင်နန်းကျေးရွာမှ မောင် ဆိုင်းဒူသည် ၄င်း၏အိမ်သို့အပြန်လမ်းတွင် အမည်မသိ မြန်မာစကားပြော လူနှစ်ဦးက ဆီးတားကာ အပြစ်မဲ့ရိုက်နှက်ခံခဲ့ရပြီး နဖူးတွင် တလက်မခန့် ဓါးဒဏ်ရာရရှိခဲ့ကြောင်း KNG ကချင်သတင်းဌာသို့ ပြောပြခဲ့သည်။
“အိမ်နဲ့မနီးမဝေးမှာပဲ လူနှစ်ယောက်က အင်္ကျီအနွေးထည်တွေ ၀တ်ထားပြီး ဆကော့စ် ဖိနပ်ရှည်စီးထားတယ်။ ရပ်တော့မလိုလို နေရာမေးမလိုလိုနဲ့ ကျွန်တော့်ကို ဘိန်းစားလားဆိုပြီးမေးတယ်။ ပြီးတာနဲ့ တခါထဲ ဆင်းပြီးရိုက်တယ်။ ၁၀ ကြိမ်ထက်မကဘူး ဘိန်းမစားဘူးလို့ ပြောရင်လည်း စားလား၊ စားလား ဆိုပြီးရိုက်တာ ပြီးတော့ ဥက္ကဌဘယ်သူလဲဆိုပြီးလည်းမေးတယ်။ ကျွန်တော်က အရမ်းကြောက်လို့ဘာမှမပြောရဲတော့ဘူး။ ဓါးအရှည်နဲ့လည်း ကျွန်တော့်လည်ပင်းမှာထောက်တယ်။ အဲဒါကျွန်တော်လှုပ်လိုက်တော့ နဖူးမှာထိသွားတာ။ လမ်းမှာလည်းဘယ်သူမှမရှိဘူး။ ကျွန်တော်အော် လိုက်ရင်လည်း ဓါးနဲ့ထိုးသတ်မှာစိုးလို့ မအော်ရဲဘူး။ ကြောက်လို့ ဒီတိုင်းပဲခံလိုက်တယ်” ဟု မောင်ဆိုင်းဒူကပြောသည်။
မောင်ဆိုးဒူသည် ဒာဏ်ရာပြင်းထန်စွာရရှိခြင်းမရှိသော်လည်း ရိုက်နှက်မှုကြောင့် နာကျင်ကိုက်ခဲမှုဖြစ်ပြီး ဓါးဒဏ်ရာကိုလည်း ဆေးကုသခဲ့ရကြောင်းသိရသည်။
သြဂုတ်လအတွင်း ဒေသခံလူငယ်များ ၄ ဦးထက်မနည်း အပြစ်မဲ့ ရိုက်နှက်ခံခဲ့ရကြောင်း ဒေသခံများ ပြောဆိုသော်လည်း ၄င်းကိစ္စနှင့်ပတ်သက်၍ တရားစွဲဆိုဖမ်းဆီးရန် သက်သေအထောက်ဖြင့် စွပ်စွဲရန်ခက်ခဲသည့်အပြင် အစိုးရလုံခြုံရေးချထားသော အဖွဲ့များအား သင်္ကာမကင်းဖြစ်ကြောင်း ပြောဆိုခဲ့သည်။
ထိုအဖြစ်အပျက်များသည် နိုင်ငံတော်ဒုတိယသမ္မတ ဦးစိုင်းမောက်ခမ်း နှင့်အဖွဲ့ ကချင်ပြည်နယ်သို့ လာရောက်ချိန်လည်းဖြစ်သောကြောင့် အစိုးရတပ်ဖွဲ့ဝင်များဖြစ်သည်ဟု စွပ်စွဲပြောဆိုခြင်းဖြစ်သည်။
သို့သော် အဆိုပါ ကိစ္စနှင့်ပတ်သက်၍ ရပ်ရွာတွင်း သက်ဆိုင်ရာအာဏာပိုင်များကလည်း တစုံတရာ စုံစမ်းစစ်ဆေးရန်မရှိကြောင်းပြောဆိုခဲ့သည်။ ထိုရိုက်နှက်ခံရသည့် အဖြစ်ပျက်များကြောင့် ယခုချိန် လူငယ်များအပြင်သို့သွားလာရန် လုံခြုံရေးအတွက် အစိုးရိမ်ကြောက်လန့် နေကြသည်။
No comments:
Post a Comment