ရွှေဘိုခရိုင် ကန့်ဘလူမြို့နယ် ထန်းကုန်းတွင် ဖြစ်ပွားခဲ့သည့် ပဋိပက္ခတွင် သံသယရှိသူ အဖြစ် ဖမ်းဆီးခံထားရသူများထဲမှ ၁ ဦး သေဆုံးခဲ့ရာ မည်သည့်အတွက်ကြောင့် သေဆုံးသည်နှင့် ပတ်သက်၍ ၅ ရက်ကြာသည့်တိုင် ဆေးစစ်ချက် ထွက်မလာ သေးကြောင်း သိရသည်။
သြဂုတ်လ ၂၄ ရက်နေ့က ဖြစ်ပွားခဲ့သည့် ထန်းကုန်း ပဋိပက္ခတွင် သံသယရှိသူ ၁၁ ဦး ဖမ်းဆီးခဲ့ပြီးနောက် သြဂုတ်လ ၂၈ ရက်နေ့ ညနေ ၆ နာရီကျော်တွင် ရွှေဘို ဆေးရုံကြီး၌ ဖမ်းဆီးခံရသူများ ထဲတွင် ပါဝင်သော ဦးဆန်းချို သေဆုံးခဲ့သည်။
အတည်ပြု၍ မရသည့် သတင်းများအရ ဦးဆန်းချိုသည် ကာလ၀မ်းရောဂါကြောင့် သေဆုံးခြင်း ဖြစ်ပြီး သွေးဝမ်းများ သွားခဲ့သည်ဟု ဆိုသည်။
“ဦးဆန်းချို ရွှေဘိုထောင်ထဲမှာ ဗိုက်အောင့်တယ်ဆိုပြီး ရောဂါစဖြစ်တာက မနက် ၄ နာရီမှာ။ အဲဒီကနေ ထောင်ဆေးရုံမှာ တင်ပြီး ကုနေတာ။ နောက်တော့ ရွှေဘိုဆေးရုံကို ရောက်တယ်။ ညနေ ၆ နာရီကျတော့ သူဆုံးတော့တာပဲ။ ဆေးရုံကို ကျနော် မေးကြည့်တော့ ဘာကြောင့်ဆုံးတာလဲ ဆိုတာ သေသေချာချာ မပြောနိုင်ဘူး။ သူ့ကို ဆေးစစ်ထားတဲ့ အဖြေလည်း မရသေးဘူး။ အကြမ်းဖျဉ်းတော့ သွေးဝမ်းသွားလို့ ဆုံးတယ်ဆိုတာပဲ သိရတယ်” ဟု အမျိုးသား လွှတ်တော်ကိုယ်စားလှယ် ဒေါက်တာမြင့်နိုင်က ပြောသည်။
သေဆုံးသွားသူကို ရင်ခွဲရုံပို့ပြီး စစ်ဆေးသည့်အခါတွင် ၀မ်းဗိုက်ကို ခွဲထားရုံတင်မကဘဲ ဦးနှောက်၏ အနောက်ဘက် ကိုလည်း ခွဲစိတ်ထားကြောင်း၊ အလောင်း၏ ပေါင်တွင်လည်း အညိုအမည်း စွဲနေကြောင်း ၎င်းက ဆက်ပြောသည်။
ဦးဆန်းချိုမှာ ပဋိပက္ခ ဖြစ်ပွားနေချိန်တွင် ကျောင်းတက်နေသော ၎င်း၏ သားငယ်ကို သွားရောက် ခေါ်ယူသည့်အချိန်တွင် အဖမ်းခံ ခဲ့ရခြင်း ဖြစ်သည်ဟု ၎င်း၏ ဇနီးက ပြောသည်။
“သူ့ကို ဖမ်းသွားတာလည်း မသိလိုက်ရဘူး။ သူ ဆေးရုံရောက်မှပဲ သိရတာ။ ဆေးရုံရောက်တဲ့ အချိန်ကျတော့ သတိက လစ်နေပြီ။ သူဆေးရုံက အချုပ်ခန်းမှာ ခေါင်းအုံးမပါဘဲ လှဲနေလို့ ခေါင်းအုံးပြေးဝယ်ပြီး ပြန်လာတော့ သူဆုံးသွားတာပါ” ဟု သူက ဆိုသည်။
သက်ဆိုင်ရာမှ တာဝန်ရှိသူများသည် ပဋိပက္ခ ဖြစ်စဉ်အချိန်အတွင်း ည ၁ နာရီခန့်တွင် အုတ်ဖိုရွာရှိလူ ၇ ဦးကို ၀င်ရောက် ဖမ်းဆီးခဲ့ခြင်း ဖြစ်သည်။
“ထောင်က စိတ်ချရတဲ့ အနေထားမှာ မရှိဘူး။ တကယ်လို့ ဒီတရားခံက ရောဂါရနေတယ် ဆိုရင်တောင် သူတို့မှာ ကုသဖို့အတွက် အချိန် အများကြီး ရှိတယ်။ မနက် ၄ နာရီက စဖြစ်တာ ညနေ ၆ နာရီမှာ သေဆုံးတယ် ဆိုတော့ သူတို့မှာ ကုသဖို့အချိန် ၁၄ နာရီတောင် ရတယ်။ ဒီလို ရောဂါလေး ကိုတောင် ကောင်းကောင်း ကုသမပေးနိုင်ဘူး။ နောက်ပြီး ကာလ ၀မ်းရောဂါ ဆိုရင်လည်း ကျန်တဲ့လူတွေကို ကူးစက်ကုန်ပြီပေါ့။ သူတို့ဘာလို့ အခုအချိန်အထိ ကြိုတင် ကာကွယ်မထားတာလဲ။ ဒီလို သွေးဝမ်း သွားတယ်ဆိုတာနဲ့ သေနိုင်တဲ့အနေထားမျိုး မဟုတ်ပါဘူး” ဟု အမျိုးသား လွှတ်တော် ကိုယ်စားလှယ် ဒေါက်တာမြင့်နိုင်က ပြောသည်။
သေဆုံးသူ ဘက်မှ ဒေသခံများ၏ အဆိုအရ ၎င်းသည် အဖမ်းခံရစဉ် အချိန်က လယ်တောထဲတွင် လယ်လုပ်သူတဦး ဖြစ်ကြောင်း၊ အရက် သောက်တတ်သော်လည်း မူးယစ်ဆေးဝါး မသုံးစွဲတတ်ကြောင်း၊ ထောင်သို့ရောက်မှ ကျန်းမာရေး ချက်ခြင်းမကောင်း ဖြစ်ပြီး သေဆုံးခဲ့ခြင်း ဖြစ်ကြောင်း ပြောဆိုကြသည်။
“သေဆုံးသွားတဲ့သူက ၀မ်းရောဂါ ပိုးတမျိုးကြောင့် သေဆုံးသွားရတဲ့ သဘောမျိုးပါ။ ပြင်ပဒဏ်ရာတော့ မရှိပါဘူး။ ဆေးရုံ ရောက်ကတည်းက သတိလစ်နေတာ။ ကျန်တဲ့ အဖြေတွေကိုတော့ ဆေးစစ်ချက် ထွက်လာမှပဲ သိရမှာပါ” ဟု ရွှေဘို မြို့နယ် ဆေးရုံမှ ဆေးရုံအုပ်ကြီး ဒေါက်တာ ဒေါ်သက်သက်စိန်က ရှင်းပြသည်။
ဆေးစစ်ချက်များ ထွက်ရှိလာပါက သေဆုံးသူ၏ မိသားစုများ၏ ဆန္ဒအတိုင်း လုပ်ဆောင် ပေးသွားမည်ဟု ဒေါက်တာမြင့်နိုင်က ပြောသည်။
“ကျမတို့ကတော့ တောင်သူလယ်သမားတွေ ဖြစ်နေတဲ့အတွက် ဘာမှ မလုပ်တတ်ဘူး။ ဒါပေမယ့် ဒီကိစ္စကတော့ မတရား ခံရတာပါ။ ဆေးစစ်ချက်တွေ ထွက်လာတဲ့ အပေါ် မူတည်ပြီး နားလည်သူတွေနဲ့ တိုင်ပင် လုပ်ဆောင် သွားမှာပါ” ဟု သေဆုံးသွားသူ၏ ဇနီးက ဆိုသည်။
သေဆုံးသည့် ဦးဆန်းချိုကို ၎င်းနေထိုင်သည့် ကျေးရွာတွင် သြဂုတ်လ ၃၀ ရက်နေ့က မြေမြှပ်သင်္ဂြိုဟ်လိုက်ပြီ ဖြစ်သည်။
ဦးဆန်းချို သေဆုံးမှုသည် ပဋိပက္ခကြောင့် ဖမ်းဆီးခံရသူများထဲမှ ဒုတိယ အကြိမ်မြောက် သေဆုံးမှု ဖြစ်သည်။ ရခိုင်ပြည်နယ် ရမ်းဗြဲမြို့ ကျောက်နီမှော် ကျေးရွာမှ မသီတာထွေးကို အဓမ္မပြုကျင့်သည်ဟု ဆိုကာ ဖမ်းဆီးခံခဲ့ရသည့် တရားခံ ၃ ဦးအနက် ၁ ဦးသည် ၂၀၁၂ ဇွန်လအတွင်း ပြစ်ဒဏ်မချခံရမီတွင်ပင် ထောင်တွင်း၌ ကြိုးဆွဲချ သေဆုံးခဲ့သည်ဟု ဆိုသော်လည်း အသေးစိတ်ကို မသိရှိရပေ။
No comments:
Post a Comment