နန်းမြင့်
အသက်မပြည့်သေးသည့် ကလေးတစ်ဦးကို ရဲတပ်ဖွဲ့သို့ အသက်လိမ်ပြီးသွင်းခဲ့သည်ဟု အဆိုပါကလေး၏ မိခင်က စက်တင်ဘာ ၂ ရက်တွင် မဇ္ဈိမကိုပြောသည်။
အဆိုပါကလေးမှာ အသက် ၁၆ နှစ်အရွယ်ဖြစ်ပြီး ဧရာဝတီတိုင်းဒေသကြီးမှဖြစ်ကာ ကျောက်တံတားရဲစခန်းမှ အသက်လိမ်ပြီး ရဲတပ်ဖွဲ့အတွင်းသွင်းခဲ့သည်ဟု လက်ရှိရဲတပ်ဖွဲ့တွင် တာဝန်ထမ်းဆောင်နေသည့်
မောင်ကျော်ခိုင်လင်း၏ မိခင်ကမဇ္ဈမကိုပြောသည်။
၎င်းသည် ယခုနှစ်ဇန်န၀ါရီလအတွင်းက မိခင်ဖြစ်သူနှင့်စိတ်ဆိုးပြီး အိမ်မှထွက်သွားကာ လက်ရှိအချိန်တွင် မင်္ဂလာဒုံ မြို့နယ်၊ ပျဉ်းမပင်ရဲတပ်ရင်း အမှတ် (၈) တွင် တာဝန်ထမ်းဆောင်နေသည်ဟု မိခင်ဖြစ်သူက ဆိုခြင်းဖြစ်သည်။
မိခင်ဒေါ်အေးအေးခိုင်က “ကလေးက အသက် ၁၆ နှစ်ပဲရှိသေးတယ်။ ကလေးက ကျွန်မကိုစိတ်ကောက်ပြီး အိမ်ကနေထွက်သွားတာ။ ရန်ကုန်ရောက်ပြီး သွားစရာ၊ နေစရာမရှိတော့ ဒေါ်လာရောင်းတဲ့သူက ရဲထဲ ၀င်မလားလို့မေးပြီး ရဲထဲသွင်းလိုက်တာ။ ကျောက်တံတားရဲစခန်းက ပညာရေးနဲ့အသက်လိမ်ပြီး ရဲထဲသွင်း လိုက်တာ” ဟု ပြောသည်။
မောင်ကျော်ခိုင်လင်းသည် ယခုနှစ်ဇန်န၀ါရီလက အိမ်ပေါ်မှဆင်းသွားပြီး ရဲတပ်ဖွဲ့တွင် တာဝန်ထမ်းဆောင်နေ သည်ဟု မေလကအကြောင်းကြားခဲ့ကြောင်း မိခင်ကပြောသည်။ ယင်းကိစ္စနှင့်ပတ်သက်၍ မိခင်က နိုင်ငံတကာ အလုပ်သမားအဖွဲ့အစည်း (ILO)၊ ပညာရေးဝန်ကြီးဌာန၊ သမ္မတရုံးနှင့် ရဲစခန်းတို့တွင် တိုင်ကြားထားပြီးဖြစ်သည်။
ယင်းကိစ္စနှင့်ပတ်သက်၍ ရန်ကုန်မြို့ လသာရဲစခန်းက မိခင်ဖြစ်သူကို ခေါ်တွေ့ခဲ့ပြီး ဒေါ်အေးအေးခိုင်က “ဒီနေ့ (စက်တင်ဘာ ၂ ရက်) လသာရဲစခန်းကို လာတာက ကျွန်မတိုင်စာတင်လိုက်တဲ့အတွက် လသာရဲစခန်းကခေါ်တွေ့တာ။ စစ်ချက်ယူပြီး အထက်ကို ပြန်တင်ပေးမယ်။ သူတို့ကခေါ်မေးလို့ လာပြောပြပြီး ကလေးကိုပြန်ထုတ်မယ်။ အသက်မမီတဲ့ ကလေးကို ရဲထဲသွင်းတယ်ဆိုတာ ခွင့်ပြုချက်လည်းမရှိဘူး” ဟု ပြောသည်။
အသက်လိမ်ပြီး ရဲတပ်ဖွဲ့သို့ သွင်းသည်ဟု စွပ်စွဲခံရသော ကျောက်တံတားမြို့နယ် ရဲစခန်းသို့ မဇ္ဈိမက ဆက်သွယ်မေးမြန်းခဲ့ရာ ကလေး၏ဆန္ဒအရ ၀င်ခြင်းဖြစ်ပြီး ကလေးကအသက် ၁၈ နှစ်ပြည့်ပြီဆိုသောကြောင့် ရဲတပ်ဖွဲ့သို့ သွင်းခဲ့ခြင်းဖြစ်ကြောင်းပြောသည်။ အဆိုပါဖြစ်ရပ်ကြောင့် ရဲတပ်ဖွဲ့သို့သွင်းခဲ့သူ နယ်ထိန်းနှင့် ရဲနှစ်ဦးကို အသက်မပြည့်ဘဲ ရဲတပ်ဖွဲ့သို့သွင်းသောကြောင့် အရေးယူဆောင်ရွက်မှုများပြုလုပ် မည်ဟုလည်း ဆိုသည်။
ကျောက်တံတားရဲစခန်းမှ တာဝန်ရှိတစ်ဦးက “သူ့ဆန္ဒအရ၀င်လာလို့ ကျွန်တော်တို့က သတ်မှတ်ချက်နဲ့ ကိုက်ညီလို့ ထည့်ပေးလိုက်တယ်။ ကောင်လေးက ဗန္ဓုလပန်းခြံနားမှာ ယောင်လည်လည် ဖြစ်နေတော့ နယ်ထိန်းကတွေ့ပြီး မင်းရဲထဲဝင်မလားပြောမှာပေါ့။ သူ့အမေကလည်း ဆက်သွယ်မှုမရှိဘူးလေ။ သူ့ကို လည်း အိမ်ပြေးမှန်း မသိဘူး” ပြောသည်။
မောင်ကျော်ခိုင်လင်းသည် ဧရာဝတီတိုင်းဒေသကြီး၊ ဘိုကလေးမြို့ အ.ထ.က (၁) တွင် ဒသမတန်း တက်ရောက်နေသော ကျောင်းသားဖြစ်သည်။ ၎င်းပျောက်ဆုံးနေသည့် ကာလတွင် လူပျောက်အမှုဖွင့် ထားခဲ့သည်။
ကလေးမိခင်ကို ခေါ်ယူမေးမြန်းခဲ့သည့် လသာရဲစခန်းမှ ရဲအုပ်ဦးထိန်ဝင်းက “ အမေခေါ်ပြီး မေးကြည့်တာပါ။ ကျွန်တော်တို့က ဘာမှလုပ်ပေးလို့ မရပါဘူး” ဟုပြောသည်။
မောင်ကျော်ခိုင်လင်းသည် ဧရာဝတီ တိုင်းဒေသကြီး၊ ဘိုကလေးမြို့နယ်၊ ခြောက် ရပ်ကွက်၊ မြလေးလမ်း၊ အမှတ် ၈၃ တွင် မိဘများနှင့်အတူ နေထိုင်သူဖြစ်သည်။
No comments:
Post a Comment