NEJ / ၁၈ ဇွန် ၂၀၀၉
မန္တလေးမြို့(နန်းမြို့)၊ အမှတ် (၁၈) တပ်မတော် အခြေခံပညာအထက်တန်းကျောင်းတွင် ကျောင်းသားတဦးလျှင် ငွေကျပ် (၅) သိန်း ပေး ရ ကြောင်း မန္တလေးမြို့ခံများက ပြောသည်။
ယင်းကျောင်းတွင် ကျောင်းတက်ရန်မလိုဘဲ စာမေးပွဲဝင်ဖြေနိုင်ပြီး စာမေးပွဲဖြေဆိုသော ကျောင်းသားများအတွက် စာမေးပွဲဖြေဆိုရာတွင် အခက်အခဲမရှိ ဖြေဆိုနိုင်သောကြောင့် ငွေပေးရသော်လည်း ကျောင်းအပ်သူ များကြောင်း ထိုကျောင်းတွင် ကျောင်းအပ်ဖူးသော ကျောင်းသားမိဘတဦးက ပြောသည်။
“(၅) သိန်း ဆိုလည်း ပေးလိုက်တာပဲ။ ဘာလို့လဲဆိုတော့ အဲဒီကျောင်းက စစ်တပ်က ကျောင်းလေ။ ဒီတော့ စာမေးပွဲ စစ်တဲ့အခါ ဆရာမတွေက တင်းကျပ်တဲ့ စည်းကမ်းတွေ မထားတော့ဘူး။ ငွေကြေးတတ်နိုင်တဲ့ ကျောင်းသား
မိဘတွေအနေနဲ့ကတော့ ငွေ (၅) သိန်းကို ပေးတာပေါ့။ ဂုဏ်ထူးတွေပါအောင်ထိ အဲဒီကျောင်းမှာ စာမေးပွဲဖြေရတာ လွတ်လပ်တယ်လေ” ဟု မန္တလေးမြို့ နန်းရှေ့အနီး နေသူတဦးက ပြောသည်။
အဆိုပါကျောင်းတွင် ကျောင်းအပ်ထားသူများသည် မိမိသင်လိုသောနေရာတွင် သွားရောက် သင်ကြားနိုင်ပြီး စာမေးပွဲ ဖြေဆိုရန်အတွက်သာ သီးသန့် ကျောင်းအပ်နှံကြကြောင်း မန္တလေးမြို့ခံများက ပြောသည်။
“ဘယ်လို ကျုရှင်ဝိုင်းမှာပဲဖြစ်ဖြစ်၊ ဘယ်လို ဘော်ဒါဆောင်မှာပဲဖြစ်ဖြစ် သွားတက်နိုင်တယ်။ ဒီကျောင်းမှာ ကျောင်း စာရင်းဝင်ရင် ပြီးရော၊ ဘာလို့ လူတွေက အဲဒီလို လုပ်လာကြလဲဆိုရင် သားသမီးတွေကို ဂုဏ်ထူးတွေ ပါစေချင် တယ်။ ပြီးတော့ တပ်က ဗိုလ်မှူးကြီးတွေ၊ စစ်ဗိုလ်ကြီးတွေရဲ့ သားသမီးတွေပဲ၊ အဲဒီကျောင်းမှာ တက်ကြတာဖြစ်လို့ 
တချို့က အဲဒါကို အခွင့်အရေးယူပြီး ကျောင်းအပ်ထားကြတာဖြစ်တယ်” ဟု မန္တလေးမြို့မှ ၀ါရင့် သတင်းသမား တဦးက ပြောသည်။
ယခင်နှစ်များက ကျောင်းသားတဦးလျှင် ကျောင်းအပ်ခ ကျပ် (၂) သိန်း၊ (၃) သိန်းအသီးသီးရှိခဲ့ပြီး၊ ယခုနှစ်တွင် ကျောင်းအပ်ခနှုန်းထားမှာ (၅) သိန်းထိ တိုးမြင့်လာခဲ့ခြင်းဖြစ်သည်။
မန္တလေးမှ သာမန်တပ်သားတဦးက “ဒီမြို့က ပိုက်ဆံရှိတဲ့ လူကုံထံတွေ တော်တော်များများက ဒီကျောင်းမှာပဲ ကျောင်းလာအပ်ကြတယ်။ ဒီကျောင်းဟာ အမှန်တော့ တပ်မိသားစုရဲ့ သားသမီးတွေအတွက် သီးသန့်ထားတဲ့ ကျောင်းပါ။ စစ်တပ်ဆိုတာမှာ အလွှာက (၂) မျိုးပဲ ရှိတယ်လေ။ အာဏာမြင့်တဲ့ အလွှာနဲ့ တပ်သားအဆင့်တွေရဲ့ အလွှာပေါ့၊ တပ်သားတွေရဲ့ လစာက သားသမီးတွေကို ကျောင်းစရိတ်ထောက်ပံ့ပေးဖို့ဆိုတာ မလွယ်တဲ့ ဘ၀ပါ” ဟု ပြောသည်။
အဆိုပါကျောင်းတွင် ဆရာ၊ ဆရာမပေါင်း (၂၀) ကျော်ခန့်ရှိပြီး ကျောင်းသားကျောင်းသူပေါင်း စာရင်းမှာ သောင်းနှင့် ချီရှိကြောင်း သိရသည်။
No comments:
Post a Comment