မင်းဟန်
(၁)
၁၉၈၈ ခုနှစ် သြဂုတ်လ ၂၄ ရက်နေ့တွင် သမ္မတဒေါက်တာမောင်မောင်၏ မဆလအုပ်ချုပ်ရေး အဖွဲ့သစ်သည် စစ်အုပ်ချုပ်ရေးဥပဒေ (မာရှယ်လော) အား ရုပ်သိမ်းလိုက်၏။ ပြည်သူ့တရားသူကြီးအဖွဲ့ ဥက္ကဋ္ဌ ဦးတင်အောင်ဟိန်း
ဦးဆောင်သည့် ‘ပြည်သူ့ဆန္ဒလေ့လာရေးကော်မရှင်’ ဖွဲ့စည်းပေးပြီး၊ ‘တပါတီစနစ် (သို့မဟုတ်) ပါတီစုံစနစ်ကျင့်သုံးရေး ပြည်သူ့ဆန္ဒခံယူပွဲများ ပြုလုပ်ပေးမည်ဟု ဆိုလာသည်။
ဤတွင် နိုင်ငံတော်ကောင်စီ ဥက္ကဋ္ဌ ဒေါက်တာမောင်မောင်ထံသို့ ပေးပို့သည့် မျိုးချစ်တပ်မှူးဟောင်းကြီးများ၏ အချက် ၁ဝ ချက်ပါသော တင်ပြချက်တစောင် ထွက်ပေါ်လာခဲ့သည်။ မျိုးချစ်တပ်မှူးကြီးများ၏ တင်ပြချက်သတင်းကို ရန်ကုန်နှင့် မန္တလေးထုတ် လွတ်လပ်သည့် သတင်းစာ၊ ဂျာနယ်များတွင် ဖော်ပြခဲ့ကြ၏။
“မျိုးချစ်တပ်မှူးဟောင်းကြီးများက နိုင်ငံတော်ကောင်စီ ဥက္ကဋ္ဌထံသို့ အချက် ၁ဝ ချက် ပါသော တင်ပြချက်တရပ်အား၊ ၂၃၊ ၈၊ ၈၈ နေ့စွဲဖြင့် ထွက်ပေါ်လာပါသည်။ ထိုအချက် ၁ဝ ချက်တွင် ‘တပါတီလော - ပါတီစုံလော’ ပြည်သူ့ဆန္ဒ ခံယူနေစရာမလိုတော့ကြောင်းနှင့် ကြားဖြတ်အစိုးရ ဖွဲ့စည်းပေး၍ ဒီမိုကရေစီ ရွေးချယ်တင်မြောက်ပွဲများ ပြုလုပ်ပေးရန် အဓိကဖော်ပြထားသည်။ လက်မှတ်ထိုး၍ တောင်းဆိုကြသော တပ်မှူးများမှာ …
(၁) ဗိုလ်မှူးချုပ်ဟောင်း ဦးအောင်ရွှေ
(၂) ဗိုလ်မှူးကြီးဟောင်း ဦးစောမြင့်
(၃) ဗိုလ်မှူးကြီးဟောင်း ဦးလွင်
(၄) ဗိုလ်မှူးကြီးဟောင်း သီဟသူရ ဦးလှမော်
(၅) ဗိုလ်မှူးကြီးဟောင်း ဦးကြည်ဝင်း
(၆) ဗိုလ်မှူးကြီးဟောင်း ဦးရွှေ
(၇) ဗိုလ်မှူးကြီးဟောင်း ဦးတင်ဦး
(၈) ဗိုလ်မှူးကြီးဟောင်း ဦးတင်မောင်
(၉) ဗိုလ်မှူးကြီးဟောင်း ဦးသိန်းတုတ်
(၁ဝ) ဗိုလ်မှူးကြီးဟောင်း ဦးကြည်မောင်
(၁၁) ဗိုလ်မှူးကြီးဟောင်း ဦးချစ်ခိုင်
(၁၂) ဗိုလ်မှူးကြီးဟောင်း ဦးတင်ထွန်း
(၁၃) ဗိုလ်မှူးကြီးဟောင်း ဦးဘအောင်
(၁၄) ဗိုလ်မှူးကြီးဟောင်း ဦးအေးမောင်
(၁၅) ဗိုလ်မှူးကြီးဟောင်း ဦးထွန်းအောင်ကျော်တို့ ဖြစ်ကြပါသည်။”
၁၉၈၈ ခုနှစ် သြဂုတ်လ ၃၁ ရက်နေ့ထုတ် မန္တလေးစာပေနှင့် အနုပပညာရှင်များမှ ထုတ်ဝေသည့် ‘ရှစ်လေးလုံးသတင်းစာ’ အမှတ် ၁၊ တွင်လည်း မျက်နှာဖုံးသတင်းအနေဖြင့် ‘မာန်မကုန်တဲ့ ရန်ကုန်’ ခေါင်းစဉ်နှင့် သတင်းတပုဒ် ဖော်ပြ၏။ သတင်း၌ …
“ရန်ကုန်မြို့တွင် ဌာနပေါင်းစုံ အထွေထွေသပိတ်တိုက်ပွဲကြီး ဆင်နွှဲရန်အတွက် ‘ဒီမိုကရေစီတိုက်ပွဲဝင် ကော်မတီ - ရန်ကုန်’ ကို ယနေ့ ဌာနပေါင်းစုံ သပိတ်ကိုယ်စားလှယ်များဖြင့် ဖွဲ့စည်းလိုက်ပြီဖြစ်သည်။
ယင်းအဖွဲ့၏ သဘောထားမှာ …
(က) လတ်တလော အခြေအနေအရ ပြည်သူများ၏ ဆန္ဒဖော်ထုတ်ပြီးဖြစ်သဖြင့် ဆန္ဒခံယူပွဲပြုလုပ်ရန် မလို၊
(ခ) ပြည်သူ့ဆန္ဒဖော်ထုတ်ပွဲ အရေးပေါ်ပါတီညီလာခံနှင့် အရေးပေါ်လွှတ်တော်တို့ကို သပိတ်မှောက်ရန်
(ဂ) လက်ရှိဖွဲ့စည်းပုံ အခြေခံဥပဒေကို ဖျက်သိမ်းပေးရန်
(ဃ) လွှတ်တော်နှင့်တကွ အာဏာပိုင် အဖွဲ့အစည်းများအားလုံးကို ပြည်သူများက ထုတ်ပယ်ပြီးပြီ ဆိုသည့်အကြောင်း ဒေသ၊ မြို့နယ်၊ ရပ်ကွက်၊ ကျေးရွာဒေသအလိုက် ကြေညာသွားရန်
(င) ကြားဖြတ်အစိုးရ ချက်ချင်း ဖွဲ့စည်းရန်
(စ) ပါတီစုံရွေးကောက်ပွဲ အမြန်ဆုံးကျင်းပရန်တို့ ဖြစ်သည်။”
(၂)
သမ္မတဒေါက်တာမောင်မောင်သည် ၁၉၈၈ ခုနှစ် စက်တင်ဘာလ ၁ ရက်နေ့ ညပိုင်းတွင် မြန်မာ့အသံနှင့် မြန်မာ့ရုပ်မြင်သံကြားတို့မှနေ၍ တိုင်းပြည်သို့ မိန့်ခွန်းစကား ဆို၏။ မဆလသမ္မတ၏ မိန့်ခွန်းက …
“ပါတီစုံစနစ်ကို ပြည်သူတွေလက်ခံကြမယ်ဆိုလျှင်၊ အခြေခံဥပဒေ၏ အဓိကမူပိုင်းဖြစ်သည့် ပုဒ်မ ၁၁ ကို ပြင်ဆင်မည်။”
“၁၉၆၂ ခုနှစ် ဇူလိုင်လ ၇ ရက်နေ့တွင် ဖောက်ခွဲဖျက်ဆီးခဲ့သည့် သမဂ္ဂအဆောက်အဦးအား ပြန်ပြီး ဆောက်ပေးမည်။”
ပြီးလျှင် ဒေါက်တာမောင်မောင်က လူထုကြီးမှ တောင်းဆိုနေသည့် ‘ကြားဖြတ်အစိုးရ ဖွဲ့စည်းပေးရေး’ တောင်းဆိုနေမှုအား မေးခွန်းထုတ်၏။ ဒေါက်တာမောင်မောင်၏ မိန့်ခွန်းနှင့်ပတ်သက်၍ လွတ်လပ်သည့် သတင်းစာ၊ ဂျာနယ်များက တုံ့ပြန်ရေးသားကြသည်။
၁၉၈၈ ခုနှစ် စက်တင်ဘာလ ၄ ရက်နေ့ထုတ် ရှစ်လေးလုံးသတင်းစာအမှတ် ၅ တွင် ဆောင်းပါးရှင် ‘ဝတ်လုံတော်ရ မောင်သောင်းဘေ’ က ‘ဆေးအဟောင်းကို ပုလင်းပြောင်းပေးဖို့ မဟုတ်ပါ’ ခေါင်းစဉ်နှင့် ဆောင်းပါးတပုဒ် ရေး၏။
“ဒေါက်တာမောင်မောင်က ‘ပါတီစုံစနစ်ကို ပြည်သူတွေက လက်ခံကြမယ်ဆိုရင် အခြေခံဥပဒေရဲ့ အဓိကမူပိုင်းဖြစ်တဲ့ ပုဒ်မ ၁၁ ကို ပြင်ဆင်ရမယ်’ လို့ပြောပါတယ်။ ဖွဲ့စည်းပုံ အခြေခံဥပဒေ ပုဒ်မ ၁၁ မှာ နိုင်ငံတော်သည် တခုတည်းသော ပါတီစနစ်ကိုသာ ကျင့်သုံးရမည်လို့ ဖော်ပြထားပါတယ်။
လူထုက ပါတီစုံစနစ်ကိုကြိုက်လို့ နိုင်ငံတော် ပါတီစုံစနစ် ကျင့်သုံးပြီး ရွေးကောက်ပွဲနဲ့ တက်လာမယ့် အစိုးရဟာ ဒီဖွဲ့စည်းပုံ အခြေခံဥပဒေအတိုင်း ကောင်စီအဆင့်ဆင့်ထား၊ ပြည်သူ့တရားသူကြီးဆိုတဲ့ အာဏာရပါတီဝင်တွေနဲ့ တရားစီရင်၊ အုပ်ချုပ်ရေးဘက်က တရားစီရင်ရေးကို ဝင်ရောက်စွက်ဖက် စတဲ့ လုပ်ရပ်တွေကို ဆက်ပြီး ကျူးလွန်ရမလို ဖြစ်နေတယ်။
လူထုက ပါတီစုံစနစ်ကို တောင်းဆိုတာက တပါတီ၊ နှစ်ပါတီ၊ သုံးပါတီ ဖြစ်လာရုံ ဖွဲ့စည်းပုံ အခြေခံဥပဒေကို ပုဒ်မတခုလောက် ပြင်ခိုင်းတာ မဟုတ်ဘူး။ တပါတီစနစ်အောက်မှာရှိတဲ့ ဥပဒေပြုရေး၊ အုပ်ချုပ်ရေး၊ တရားစီရင်ရေး အားလုံးကို ပြောင်းပစ်ဖို့ တောင်းဆိုနေတာပါ။ လက်ရှိအုပ်ချုပ်ရေး စနစ်တခုလုံး ဖျက်သိမ်းဖို့ တောင်းဆိုနေတာပါ။
ဒါကြောင့် လက်ရှိအခြေခံဥပဒကေို ဖျက်သိမ်းပြီး ဖွဲ့စည်းပုံ အခြေခံဥပဒေအသစ် ပြဋ္ဌာန်းရပါမယ်။ ကျနော်တို့က ဆေးအဟောင်းကို ပုလင်းပြောင်းထည့်ပေးဖို့ တောင်းနေတာ မဟုတ်ဘူး။ ဘေးဖြစ်နေတဲ့ ဒီဆေးကို ပုလင်းပြောင်းပေးဖို့ မဟုတ်ဘဲ ဘေးမဖြစ်တဲ့ ဆေးအသစ်ကို လိုချင်နေတာပါ။”
(၃)
၁၉၈၈ ခုနှစ် စက်တင်ဘာလ ၁၃ ရက်နေ့တွင် ပြည်သူ့လွှတ်တော် ခေါ်ယူကျင်းပနိုင်ရေးအတွက် ဒေါက်တာမောင်မောင် အုပ်ချုပ်ရေးအဖွဲ့သည် အစွမ်းကုန် စိုင်းပြင်းနေသည်။ ပြည်သူ့လွှတ်တော် ကိုယ်စားလှယ်အချို့က ပြည်သူ့လွှတ်တော် ကိုယ်စားလှယ်အဖြစ်မှ နုတ်ထွက်ကြောင်း လွှတ်တော်သဘာပတိထံသို့ စာပို့ကြ၏။ မီးရထားသပိတ်၊ ပြည်တွင်းလေကြောင်းသပိတ်တို့ကြောင့် လွှတ်တော်ကိုယ်စားလှယ်များ၏ သွားရေး၊ လာရေးက ခက်ခဲနေသည်။ တပ်မတော် ရဟတ်ယာဉ်များနှင့် သယ်ယူပို့ဆောင်ရေး စီစဉ်နေကြ၏။
မဆလတို့ အပူတပြင်း ပြုလုပ်လိုနေသည့် ပြည်သူ့လွှတ်တော် အစည်းအဝေးက ‘ပြည်သူ့ဆန္ဒခံယူပွဲ’ များ ပြုလုပ်၍ တပါတီစနစ်နှင့် ပါတီစုံစနစ် ဆန္ဒခံယူမည့် အစီအစဉ်အား ဖျက်သိမ်းပြီး ပြည်သူ့လွှတ်တော်မှ ပါတီစုံစနစ်အား ကျင့်သုံးမည်ဟူ၍ ဆုံးဖြတ်ရန် ဖြစ်သည်။ ပြီးလျှင်၊ မဆလ၏ လက်အတွင်းမှပင် ပါတီစုံ အထွေထွေရွေးကောက်ပွဲများ ကျင်းပ၍ ပါတီစုံစနစ်သို့ လျှောက်လှမ်းရန် ဖြစ်၏။
ထိုအခြေအနေများနှင့်ပတ်သက်၍ ၁၉၈၈ ခုနှစ် စက်တင်ဘာလ ၁ဝ ရက်နေ့ထုတ် ရှစ်လေးလုံး သတင်းစာ၏ အယ်ဒီတာ့အာဘော်တွင် ‘အလဟဿ ဖြုန်းတီးခြင်း’ ခေါင်းစဉ်နှင့် သတိပေးထား၏။
“ပြည်သူ့လွှတ်တော်ကို စက်တင်ဘာလ ၁၃ ရက်နေ့မှာ မဖြစ်မနေ လုပ်ဆောင်နိုင်ဖို့ မဆလ အစိုးရက မီးကုန်ယမ်းကုန် ကြိုးစားနေတာ တွေ့ရတယ်။ အမတ်တွေက တက်ဖို့ ဆုတ်ဆိုင်းနေတဲ့အခါ စစ်တပ်က အမတ်တွေကို လိုက်ဆွဲတယ်။ ရန်ကုန်သွားစရာ မီးရထားတွေ၊ လေယာဉ်ပျံတွေ သပိတ်မှောက်တဲ့အခါ လေတပ်က လေယာဉ်တွေနဲ့ သယ်ယူပေးနေတယ်။
ဘယ်လိုလုပ်ပြီး လွှတ်တော်ကို မဖြစ်မနေ ကျင်းပလို့၊ လွှတ်တော်က ဘာတွေ အဆုံးအဖြတ်ပေးတယ်ပဲပြောပြော ပြည်သူလူထုက လုံးဝ အယုံအကြည်မရှိမှာ၊ လက်မခံမှာက သေချာလှပါတယ်။ ပြည်သူတွေမှာ လွှတ်တော်ဆိုတဲ့ ကြက်ပေါင်တံဆိပ်ကြီးနဲ့ အလိမ်ခံခဲ့ရတာက များလွန်းလို့ ထုံလို့တောင် နေပါပြီ။ လိမ်နေမှန်းသိရဲ့သားနဲ့ မပြောဝံ့တုန်းကမို့ မပြောဘဲ နေခဲ့ကြရတာပါ။
အခုတော့ အောင့်ထားခဲ့ရသမျှ တနိုင်ငံလုံး ပေါက်ကွဲပြီမို့ ပြည်သူ့လွှတ်တော်ဆိုတာကြီး တခုလုံးဟာ အာဏာရှင်တယောက်ရဲ့ အလိုဆန္ဒကို တရားဝင်လေဟန် လုပ်ပေးရတဲ့ ကြက်ပေါင်တံဆိပ်တုံးကြီးရယ်လို့ ပြည်သူက သတ်မှတ်ပြီးကြပြီး ဖြစ်ပါတယ်။
ဒါကြောင့် အချိန်တွေကုန်၊ လူတွေပန်းပြီး၊ ငွေတွေ သောက်သောက်လဲ ကုန်ဦးမယ့် လွှတ်တော်ဆိုတာကြီးကနေပြီး ဘာတွေဆုံးဖြတ်လို့၊ ဘာတွေပြောပြော ပြည်သူတွေကတော့ ယုံကြတော့မှာလည်း မဟုတ်။ လက်ခံတော့မှာလည်း မဟုတ်လို့ အလဟဿ ဖြန်းတီးခြင်းတရပ် ဖြစ်မှာပဲလို့သာ ဆိုလိုက်ရပါတယ်”
No comments:
Post a Comment